Luka 15

Wənməkkpaŋga na time məzan yaŋ məmnda mərəhni

(MAT 18:12-14)

1 # LUK 5:29,30 Məkkalaŋ nzalaka dit məɗɗaŋ mambray pak azaraŋgək aza Yesu kaprəm əpel nani. 2Farisaɗe dit mərbaŋ-mahenziŋ aɗɗaŋgək wərwər, aɓɗaŋ na: Ɗəfəŋka tay ətef məɗɗaŋ mambraya, tay əzəm dənɗaŋ. 3Yaŋ anah sit wənməkkpaŋgaŋ dawnəh na: 4Naway səmmbokum an tay dit timiŋgiɗ səkatə, taka mbo' na, appet na en kaklaw vaytak kiyit vaytak a kapta-muyã, vi kada əkayan an məzan hã ndən gas ərəhən ɓa di? 5An arəhəka waslan a mawəlan də zən neki, 6an adek eŋgili, waye bayneŋgiɗin dit meggeŋgiɗni, wanah sit na: Mənnek də iyna, vi nərahək time naw məs dəzə naka. 7In tat ənah sukum, vaski ənnek adawsan a disiŋ vi məs mambray təttaka dəɗi marava dayki an viyit en təstəs kaklaw vaytak kiyit vaytak məs tahəŋ də wəray nawɗi marava ɓa.

Suley na təbəz məzan yaŋ məmnda mərəhni

8Awaniɓa an guluk tat dit suleyɗe na təbəz babar kəlaw, taka mbo' na, təsɗa na lalam kawfaɗ gədəv gəla kawkayan də maɗɗula hã ndət gas ərəhən ɓa sa? 9An tərahək na, atiye bayneŋgiɗit dit meggeŋgiɗta watənah sit na: Mənnek də iyna, vi nərəhək suley naw məs dəzə naka. 10In tat ənah sukum, vaski ənnek adawsan azet maslayɗe na Maŋgəlva vi məs mambray təttaka dəɗi marava.

Wiyən məzan yaŋ məmnda ərəhni

11Yaŋ anah əmpa na: Ɗəf maɓɓan tay dit kirtin sula. 12An sawã aɓsən afən na: Əbba avay hara arya nawa. Yaŋ awɗakan sitik arya nani: 13Dərɓagan əvoŋ siɗikke, sawã nak akkalanək arya nan pakə, ndən mbat aka dələv faraɗa. Azanək arya nan aka polkoyo ɗarə. 14Səza azan pakə, yaŋ mãy na ngaryã agəɗ aka dələv vani, atəŋgək əzəm sahã. 15Ndən mbat kulo' aza ɗəf naka dələv nadak vani, yaŋ a gulyeŋge nan əteɗ vedemɗe. 16Aŋgələk kawba də heleŋ məs vedemɗe adawzəmaŋ, ya ɗəf tay dədapsən ɓa. 17Yaŋ atəŋ əɗɗum aka əssa nani, amna: Məɗɗaŋ wəza na əbba mbarwaŋ də zəga nawzəm ndoɗoɗ-ndoɗoɗ di, yaŋ naw in əmta aŋ sən mãya. 18Wanəsili, wanəmndaw aza əbba, wanənah sən na: Əbba nəgəɗək mbərayən aza Maŋgəlva gəm azoko, 19nəslə nawsaw ka wətuk əmpa ɓa. Aɗiyu va ɗəf nammbet məɗɗaŋ wəza noko. 20Ndən le' mbat ana afən da.

Aka asan faraɗa ləŋ afən awlaka, awələk sahã akani. Anzanka, azlah a mawəlani, afyokoni. 21Wiyən aɓsən na: Əbba, nəgəɗək mbərayən aza Maŋgəlva gəm azoko, nəslə nawsaw ka wətuk əmpa ɓa. 22Yaŋ afən aɓsit belemɗe nan na: Go' məki lukut an moggoni, məgul səni, məgul sən ndama aka vani, məkkpa sən henseki. 23Məki wət wasli məkərən, mətaw wəlani, məzəmsəmə məzlərsəmə, 24vi wətuwəŋ amtəka naka ya ambəlka, azəka naka məmndaki ərəhni. Atəŋgaŋgək əɗɗa wəzləra.

25Pay nani wətən an daya tay awra. Ya aka adazzani, azar go'o də gəla, aprəmək wəsmaya gəm wəskəla. 26Ayək ɗəf taka səmmbet məɗɗaŋ wəza, assohõn an dəgəɗə. 27Yaŋ ɗəf nak aɓsən na: Məlmuk dəmili, afuk aslba sənək wət wasli məkərən, vi amil sənək petpeti. 28Yaŋ wətən an daya nak adə gədəva, aɓoŋ dawtoŋ eŋgili. Afən vit əkkamani. 29Yaŋ azlani, aɓsən afən na: Awla əzva diyɗa nədawgəɗ suk wəza. Nətoŋ ɗah kiy wən məs kəɗi abaw ɓa, ya naw na kəvay ɗah porsokuk vi nənnekengən zu dit bayneŋgiɗu ɓa. 30Ya adan wətuk məs dəzəm arya nok dit məpolkoyeɗ ade, is wət wasli məkərən pam əslba sən dərəŋgə. 31Afən aɓsən na: Wəyin nawa, is tat də in pay pakə, zəga naw pak noki. 32Aslək məzlərgəni, mənnekgəni, vi məlmukuŋka, amtəka naka ya ambəlka, azəka naka məmndaki ərəhni.

Currently Selected:

Luka 15: GB

Highlight

Copy