Va'Atəŋ 42
42
Yakob tay əslin kirtin a Eziptə
1Yakob, awla na əzəm tay a Eziptə, yaŋ anah sit kirtin na: «Vimi kədawlaŋ aza zukum di?» 2#WNM 7:12Amna: «Nəprəmək na Zoŋgoro tay a Eziptə. Məddoŋ məlbah səm əzəm sədaka, vi mərmagən zil mayəm mədamta ɓa.» 3Milmiŋgiɗin Yosef kəlaw apərkoŋguk a Eziptə kalbəh zoŋgoro. 4Ya, Yakob dəslən Benyamin, məlmən Yosef dənɗaŋ ɓa, vi anahək a makran na: «Mandara adawrəhən.» 5Kirtin Israyel azzoŋguk a Eziptə va net ɗiy meɓɓet kalbəh zoŋgoro vi may tay aka dələv na Kana'an.
Yosef dəwəl sahã aket milmiŋgiɗin ɓa
6Yosef iyi daya aka dələv vani, ndəni məzuvəl zoŋgoro sit ɗiy nadak pakə. Milmiŋgiɗ Yosef azzoŋko, appu'oŋ aban mirbizit afuŋ nisi. 7Yosef awlek milmiŋgiɗni, nan asinke, dərban zən azet ɓa, yaŋ apel sit də gəgay, aɓsit na: «Səŋga kəzzoŋ di?» Aɓɗaŋ na: «Səka dələv na Kana'an kalbəh zəga nawzəma.»
8Yosef asinik milmiŋgiɗin, net dəsənən ɓa. 9#VAA 37:5-10Yaŋ Yosef aɗɗumon wissine assin dənɗaŋ naka, aɓsit na: «Məkkeseŋ mamba təki kənanaŋgə, vi kawla əddak nammba dələv kəzzoŋgu.» 10Aɓsənən na: «Vaski ɓa daya nawa, belemɗe nok azzoŋ na, kalbəh zəga nawzəmi. 11Dəwən nam pak kirtin ɗəf taka mənani, matakataka tay azam ɓa, belemɗe nok məkkeseŋ mamba təkiyəŋ ɓa.» 12Aɓsit na: «Tay ta'sa ɓa; əddak na dələv kəzzoŋ ula.» 13Azlanən na: «Mənam belemɗe nok, kəlaw kiyəm sula, məlma zəm mənan kirtin ɗəf taka aka dələv na Kana'an. Dəpaŋ na tabuwa nam tay də afəmə, an taka, nan tay ɓa.» 14Yosef aɓsit na: «Nənah sukum kpak na, məkkeseŋ mammba təki kənanaŋgə. 15Wəsla nokum yaŋ an nədawslukum: Suway va Farawən asan madarani, kəgilyoŋ na saŋ an tabuwa nokuməŋ dəde aŋɓa ɓa. 16Məslən taka sərokum, dəl əgəm məlmukuməŋka. Nokum məssoŋ məfərsəneɗi, kawsla əpel nokum təstəsi sa? An vaski ɓa na, suway va Farawən asan madarani, məkkeseŋ mammba təki kənanaŋ kpakə!»
17Yaŋ atoŋgit a fərsəna əvoŋ hoku. 18Aka pay mahoko'ən, Yosef aɓsit na: «An kədaɗɗaŋ kəssoŋgən madarokum yaŋka. Naw Maŋgəlva nədawgeslne səni. 19An təstəs kənanən na, məlmukum taka dəsan a fərsəna məmpokuməŋka. Mənokum moɓɓokum məka zoŋgoro nawzəm sən gəla nokum naddəv mayəŋka. 20Kəki suwəngən tabuwa nokumə. Vasna wanəsən əpel nokum, kəmtaŋ na ɓa.» Vas aɗɗaŋgə. 21Apeleŋ sənən ziti: «Aw! Məraygənək aka wən na məlməm pay mula əzəmsahã nani. Məprəm man pay akkamam mulagən sasãhən ɓa. Vini tatwãhəŋ ade səmə.» 22#VAA 37:21,22Ruben azlan sit də wənah na: «Nənah sukum na: “Kəɗɗaŋ sənən mbərayən sən wiynəŋ ɓa ɓa sa!” Kəprəmən maw ɓa. Mbel nanəŋgə dəkkpaŋgaŋ akam kakaŋ kana.» 23Net dəsənnən na, Yosef tay əprəmni ɓa, vi məzuman ma tay ta' aka waleŋti. 24Yosef zar səzet, tek ədawhəma, ndən buryok azet apel siti.
Kirtin Yakob tay əmndoŋ a Kana'an
Arma Simeyon səreti, agul a fərsəna dereti. 25Yaŋ Yosef aɗi wən nani, aknəh sitinik haykəmari addəvit gabalɗe neti, kamndagan sit koɓeɗ neti, naway di pak a gabal nani. Dəpsitingən zəga nawzəm aka tive. Vaski agəɗ siti. 26Aslanənək zoŋgoro net aket korɗe neti, ndəɗaŋ mbataŋ ɓa' sədaka.
27A təki navoŋ aka tive na, taka səmmbet akol ma gabal nan kapsən əzəm sən koro nani, yaŋ awla koɓeɗ nani! Məɗiyit ama mazlambay nani! 28Anah sit milmiŋgiɗin na: «Məmndeget suwi koɓeɗ nawa, yeŋ ama mazlambay nawa!» Mekret azlahka, akkereŋke, adawnahaŋ sən zit na: «Miyaŋ Maŋgəlva agəɗ səməŋ di!»
29Agapaŋgək aza Yakob afit aka dələv na Kana'an, aboton sənənək zəga an dirih pakə, Aɓɗaŋ na: 30Afən dələv nadak apel səmək na gagay. Aɗiymək ka məkkeseŋ mammba dəlva. 31Məzlan sənək na: «nam ɗiy təstəs mənan ɓa na məkkeseŋ mammba dələv mənan ɓa. 32Mənam kirtin əbba tat na məlma na zəm kəlaw kiyəm sula; taka nam tay ɓa, sawa nam tay dəpaŋ də afəm aka dələv na Kana'an.» 33Daya na dələv van anah səm na: «Ka nəsəngən təstəs nokum na, məpəl məlmukum taka azawa. Vi may naddəv gəla nokumu, məgəm an dəslə, məddoŋgu. 34Məki su tabuwa nokum, asna wanəsən na məkkeseŋ mammba dələv kənanaŋ ɓa, təstəs kənanaŋgə. Wanəpsukum məlmukumu, wakəbbalanən dəlva.»
35Attukunək hay səddivit gabalɗe neti; naway pak arəhək pertete net koɓet nan addəv gabal nani. Adan awlenin perteteɗe net dit koɓeɗ tahəŋgə, ndəɗaŋ də afit ageslne'eŋke. 36Yakob, afit aɓsit na: «Naw kəzet suwinik kirni! Yosef tay ɓa, Simeyon tay ɓa, Benyamin əmpa na, kawgəm suwa! As pak akaw adakkala.» 37Ruben aɓsən afən də wənah na: «Kəbeygin kirtu suleŋ an nəməgən suk ɓa, apsu avawa naw wanəmndagan suko.» 38Amna: «Wətu aprikna də mənokum ɓa. Yaŋ məlmən amtəka, mbəgən takərgəni. An zəga arəhək aka tive kədaddoŋgu, də magalagala babar nawəŋ na, wakətoŋguwən a vov net mimtit də tatwahã.»
Currently Selected:
Va'Atəŋ 42: GB
Highlight
Share
Copy
Want to have your highlights saved across all your devices? Sign up or sign in
All right reserved
