Wəza net Maslənɗe 9

Əkkpaŋ na Sawlu

(22:6-16; 26:12-18)

1Ya Sawlu tay əzban əzəmgit sahã gəm əbey gewleɗ na Daya, yaŋ ambat aza daya net məsdəlveŋge. 2Assoh ɗerewelɗe nawtoŋ addivit gəlaɗe nakkal net mə Yudeɗ an na Damas. Vi an arahək zel awaniɓa gil naka tive na Daya na, kawkiyit məɓrukit a Yerusalem.

3Aka adaddan, agap go'o də Damas, əkeɗeɗe adek sə disiŋ ləŋ əwiɗ kiyən tərwəslə. 4Azbərək afuŋ, aprəmək əpel dawnah sən na: Sawlu, Sawlu, vimi kədawsər maw di? 5Yaŋ amna: Nawa kənan di Daya? Ya nan amna: Naw intə Yesu məs nok kədawsər mani. 6Ya asili, atoŋ a walaŋgəla-metiŋ. Kawnah suk an kədaɗɗa. 7Ɗiy en dədaɗɗaŋ malaka dəndən aziweŋke assoŋguk ɓata'ə, tay əprəmaŋ əpele, awlaŋ ɗəf ɓa. 8Sawlu asilik sə fuŋgu, akoluk harani, ya awɓap ula təki ɓa. Ndəni kan armanən van atoŋgunən a Damas. 9Asanək əvoŋ hoku məza ula ɓa, məza əzəm ɓa, məza əsa ɓa.

10Məzutaf tay a Damas vani, iya nan na Ananiyas. Yaŋ Daya aya addəv ula, Ananiyas, nan azlan na: In yakəŋkə Daya. 11Daya aɓsən na: Asili, dok dəka tive adawyaŋ na Sarara, akayan ɗəf adawyaŋ na Sawlu na Tarsis eŋgil ana Yudas da, yas tay əkkama. 12Awələk ɗəf məs adawyaŋ na Ananiyas dawtoŋ azan addəv ula nani, aɗiyək van akani, vi dəmsakgən ula əmpa. 13Ananiyas azlanəka: Daya, nəprəmək əpel diyɗa səmet ɗiy aka wən na ɗəfəska, mbərayən agəɗ sit ɗiy salala nok gbaŋ a Yerusalem əŋka. 14Ya aŋ van kpak arahək tive səvet deyeɗe net məsdəlveŋge vi kaɓruk məzuyanən iya nok pakə.

15Daya aɓsən na: Doko, vi zəga an nəwel dərbangən iya naw azet ɗiy-ɗarə, azet milyeŋge gəm azet mə Israyelɗe yi. 16Vi naw wanərbet sin zəgeɗ məs adawzəm sahã aket vi iya naw pakə.

17Yaŋ Ananiyas ambatə, atoŋguk eŋgil naka, aɗiyək van akani. Amna: Sawlu məlmuwa, Daya dəslənwa, Yesu məs dərban zən azok aka tive dazzoko, ka kəmsakgən ula, kəssokgən məknahuk də Zeŋgile Salala. 18Yas zəga agil səra Sawlu ləŋ va kosloproko na kilfi, haran akolko. Asilke, arahək baptem. 19Səza azəm waya, amsakək ərəh gbogboŋgo.

Sawlu tay ərba wən na Maŋgəlva a Damas

Sawlu asanək əvoŋ siɗikke dit ɗiy na Maŋgəlva a Damas. 20Ndən ləŋ mbat addəvit gəlaɗe nakkal net Yudeɗi, ətəlma na: Yesu əŋka Wətən Maŋgəlva yi.

21Ɗiy məs dəprəmən pak aggətaŋgək akani, aɓɗaŋ na: Ɗəfəŋki məs dədawzet ɗiy məzuyanən iyaŋ a Yerusalem nak ɓa sa? Ade aŋ na vi karmeti, kawket məɓrukit sit deyeɗe net məsdəlveŋge yi ɓa sa?

22Ya Sawlu asokuk zən əmbat abe abe, agəɗ sitik gərəŋ sit mə Yudeɗ məs dəssoŋ də gəla a Damas də ərban sit na, Yesu ndəni Kristu.

23 # 2KO 11:32,33 Əvoŋ diyɗa dərɓagani, mə Yudeɗ aslerinik met vi kawzani. 24Ya Sawlu asənək wən mətuvuro neti, tay əgenin memeŋgleɗe na walaŋgəla-metiŋ dəfəɗ də kapay pak vi kawzani. 25Yaŋ gewleɗ nan aslanən də dəfɗa, aktuknən addəv keŋkele, aprikginin dəka zlava.

Sawlu a Yerusalem

26Səza agap a Yerusalem, akayək tive nasap dit məzəzbaŋgə. Ya pakgit ageslne'eŋ sənənka, dətafən na akkpaŋgək məzəzba ɓa. 27Yaŋ Barnabas agəma, aka azet maslənɗe aboton sit va awla Daya aka tive gəm va apel səni gəm va Sawlu apel a Damas də iya na Yesu məza geslne ɓa. 28Yaŋ asan dənɗaŋ əbbal a Yerusalem, tay əpel də iya na Daya məza geslne ɓa. 29Tay əpele gəm əbay ma dit mə Yudeɗ məpeleŋ ma Gərek, ya net akayaŋgək tive nawzani. 30Adan məzutafaŋ asənən wən nani, aprikgənən Sawlu a Kaysariya, aslənən a Tarsis.

31Ndəni kan məzutafaŋ naka dələv na Yude na Galile dit na Samari pak assoŋ addəv zazaya. Asɓanən ziti, adawdawaŋ addəv geslne na Daya, adawanən zit də əbbah na Zeŋgile Salala.

Əmbla na Ayne'as

32Piyer tay əbbal aka dələv awandi pakə, pay maɓɓani ambatək tam anet ɗiy na Maŋgəlva na Lidda da. 33Yaŋ arəh ɗəf adaka, iya nan na Ayne'as, zən məmtəni, tay ɗuffo aka ɓərzləma nan zəga na əzva dodopoɗo. 34Yaŋ Piyer aɓsən na: Ayne'as, Yesu Kristu tay əmbəlguko. Asili, aktəm zəga nawvoŋ noko. Yaŋ asil ləŋgə. 35Ɗiy na Lidda də Saron pak awlanənka, yas akkpaŋgaŋ aza Daya.

Məmbəlgəti Tabita

36A Yoppe, məzutafək tatə, iya nat na Tabita, va ənəh na, Mune; tat əɗɗa wəzeɗe mogget diyɗa gəm məwəl sahã tə. 37Təzgək gbəgba' aka əvoŋ nani, ndət zamə, adan aslaytəni, ndəɗaŋ ɗufgutən addəv gəla an na disiŋ. 38Adan Lidda go'oy də Yoppe, məzutafaŋ aprəmənək na Piyer tay adaka, aslənaŋ zel sula əkkaman na: Agəm zuko, ade anamda ɗa. 39Piyer hõs ləŋ pay dənɗaŋgə, adan agapə, akanənək addəv gəla an na disiŋ naka. Gil net gəbayɗe pak aziweŋgik a maŋgavani, tay əhəmaŋgə gəm tay ərbetin lukutɗe gəm zəgeɗ nawgul məs Dorkas təgəɗ aka təsat dənɗaŋ. 40Piyer agilgitik ɗiy pak appaka, akdukuk afuŋ, akkamka. Yaŋ akkpaŋ aza gəbay nata, amna: Tabita asili. Yaŋ təkol harata, tulak Piyer, ndən ɗewi. 41Piyer armak vata, asilgətəka. Yaŋ aye ɗiy na Maŋgəlva gəm gil net gəbayɗe neki, arbatəka, madarattə. 42Alabara nan atrayək a Yoppe pakə, ɗiy diyɗa atafənək Daya. 43Piyer avoŋguk diyɗa a Yoppe a na Simoŋ milmis gəba da.

Currently Selected:

Wəza net Maslənɗe 9: GB

Highlight

Copy