Wəza net Maslənɗe 8

1Sawlu tay zən nek də əbay na Etiyen.

Sawlu tay əsər met kretiyenɗe

Dəpas na əzəmsahã metiŋgin adek aket məzutafaŋ na Yerusalem. Ɗiy pak atrayaŋgək aka kivadələv temtem na Yude də na Samari, maslənɗe dəppaŋ kaka'ə. 2Ɗiy məzugeslne'eŋ sənən Maŋgəlva andəkənək Etiyen, ahəmaŋgək a gəlabayən diyɗa sawɓa.

3 # WNM 22:4,5; 26:9-11 Ya Sawlu aŋroɓik məzutafaŋgə. Ambatək aza memeŋle pakə ərme zel dit gil əket a fərsəna.

Əpel na alabara nenek a Yuda gəm a Samari

(8:4—12:25)

Filip tay ərban alabara nenek a Samari

4En dətrayaŋ neki, addoŋko, arbanənək əpel na alabara neneke. 5Ndəni kan Filip ambat a walaŋgəla-metiŋ na Samari, arban sit Kristu. 6Ɗiy tahəŋ sləɓək, azgaŋgək sləma aket zəgeɗ məs Filip apel aka adaprəməni gəm adawlenin sekeneɗ məs adaɗɗa. 7Əmpəsɗe diyɗa mbəreyit agilyoŋguk də əŋzla vaŋvəl dayadaya səket ɗiy mətemti, ɗiy zə məmtən gəm vədalɗe diyɗa ambəlaŋka. 8Ənnek metiŋgini addəv walaŋgəla-metiŋ vanəska.

9Ɗəf tay adak lahəŋ a walaŋgəla-metiŋ vani, iya nan na Simoŋ. Məgəɗ tetele yi, tay əggərəŋget ɗiy na Samari. Tay ənah na, ɗəf metiŋgini. 10Ɗiy pak tay əzbanəni, təŋ səka muzliya hã gap ɗəf metiŋgini, ənahaŋ na: Ɗəfəŋka Əɓap na Maŋgəlva yi, məs adawyaŋ na Metiŋgini. 11Tay əzbanəni, vi far adawgəgrəŋget dit teteleɗi. 12Adan atafən Filip dədawpel alabara nenek aka wən na məlĩ na Maŋgəlva gəm aka iya na Yesu Kristu, məɗɗa siti baptem sit zel dit gili. 13Simoŋ sən kiyən pak atafka, ataf baptem, tay ɗayɗay də Filip, adan awla sekeneɗ gəm wəzeɗe gagdak diyɗa məs dədaɗɗaŋgə, aggətka.

14Adan maslənɗe na Yerusalem aprəmən na, ɗiy na Samari atafənək əpel na Maŋgəlva, aslənninik mãy Piyer də Yohanna azeti. 15Adan agapaŋ adaka, akkamaŋgək viyiti, vi dərahaŋgən Zeŋgile Salala. 16Vi Zeŋgile Salala dəprik aka ɗəf taka səmmbet tagay ɓa, baptem də iya na Daya Yesu arəhaŋ kaka'ə. 17Mãy Piyer də Yohanna aɗiyən vet aketi, yaŋ arəhaŋ Zeŋgile Salala.

18Adan Simoŋ awla na ɗiy arahaŋgək Əmpəs səza maslənɗe aɗiyən vet aketi, yaŋ aki deleɗ sit mãy Piyer də Yohanna, 19amna: Məvay su gagdak vanəs tam ka ɗəf an nədawɗi vaw akan pak dərahgən Zeŋgile Salala. 20Yaŋ Piyer anah sən na: Dala nok dəzə də zək noko, vi kəɗɗum əlbah əvəl na Maŋgəlva də arya. 21Haran nok tay ɓa, tay an dəwəl suk addəv əpeliŋ ɓa, vi mokrok tay sarara aba Maŋgəlva ɓa. 22Aɗi marava kan aka əɗɗa zəga ɗar nokəska, akkaman Daya, kuzuŋ əɗɗum daryaw na mokrok wavvuy soko. 23Nulaka, mokrok tərahi, addəv helege na mambray kənani. 24Yaŋ Simoŋ azlani, amna: məkkaman Daya viwa, vi məs kənahaŋ adaɗɗa azaw vas ɓa.

25Adan kan apeleŋ aka wən nani, arbanənək əpel na Daya, amilyoŋguk a Yerusalem. Apelinik alabara nenek addivit walaŋgəleɗe na Samari diyɗa.

Filip də məgəɗ wəza mə Etiyopiya

26Maslay na Daya apel sənək Filip dawnəh na: Asili, dok dəka tive dəprik sə Yerusalem a Gaza. Kapta-muyã iyi. 27Ndən le' mbatə, arəhək mə Etiyopiya mətawkoyom, məgəɗ wəza gagdak nat Kandakes məlyaŋgək net mə Etiyopiɗe, ndəni aka ərəh nat baymani, ade əkkama a Yerusalem, 28yas kan adamndan, ɗewwe addəv mawta net pilseŋge nan əŋɗan ɗerewel na məskəleŋ Isaya. 29Yaŋ Əmpəs anah sən Filip na: Dok aruf mawta net pilseŋge ndaka. 30Yaŋ Filip anzani, aprəmək tay əŋɗan ɗerewel na məskəleŋ Isaya, yaŋ assohõni: Kəsənək an kədaŋɗa sa? 31Ɗəf nak aɓsən na: Mbarmbar nədawɓapən an ɗəf tay narban su ɓa di? Ayak Filip dəpeŋgən dəsangən dəndəni. 32#ISA 53:7,8Təki an adaŋɗa addəv ɗerewel van ndən yaŋka:

Tay va time məs adawkaŋ kawtaw wəlani,

va təmaŋgək tədawsat ɓatɓat

aba mətaw zeŋze nata.

Vaski, dəkol man ɓa.

33Addəv əɓe'gən ki zəni,

məkə nan tay ɓa.

Səmmbet ɗiy na sayit ɗiy nan na, naway nawpel akan di?

Vi məgəmni zeŋgilen səka dəlva.

34Mətawkoyom nak azlan sənək Filip amna: Nəssohõk ɗa, aka naway məskəleŋ adawpel wənəŋ di? Aka zək nan sa, awaniɓa aka ɗəf maɓɓani? 35Filip akoluk mani, atəŋgək əpel sən də an Məverin vanəska, arban sənək alabara nenek na Yesu. 36Adan adaddoŋ aka tive dəndən, agapaŋgək a təki net iŋkile, mətawkoyom nak amna: Iŋkile yeŋki, mi dədawtaku darəh baptem di? [ 37Filip aɓsən na: Wagəɗə, an kətafək də mokrok taka. Azlanəka: Nətafək na Yesu Kristu Wətən Maŋgəlva yi.] 38Yaŋ aɗi wən nan nawziwgən mawta net pilseŋge naka. Aprikeŋgik sulegit aret iŋkile Filip də mətawkoyom vani, agəɗ sənək baptem. 39Adan agilyoŋ səret iŋkile, Əmpəs na Daya agəmək Filip. Mətawkoyom nak dula əmpa ɓa. Agəmək tive nan də ənneken zəni. 40Filip arəh na tay a Azotos. Abbalək a walaŋgəleɗe gugriɗ pakə, tay ərban alabara nenek hã gap a Kaysariya.

Currently Selected:

Wəza net Maslənɗe 8: GB

Highlight

Copy