Wəza net Maslənɗe 1

Əzaɓan an nawpele

(1:1-26)

An Yesu aɗi wən nani gəm man an aynə dərɓe faɗə

(1:1-14)

1 # LUK 1:1-4 Baynaw Teyofil, addəv ɗerewel naw maddaabəŋ na, nəverik an Yesu atəŋ əɗɗa gəm an arban baymani 2hã gap pay an ateŋ a disiŋ dərɓaga asəɓ sit maslənɗe en məs awel də gbogboŋ na Zeŋgile Salala. 3Azeti'e arban zən madaran də tive temtem diyɗa dərɓaga əzəm sahã nani, agəɗək əvoŋ kaklaw poɗo aka ərban zən azet də əpel sit wən na məlĩ na Maŋgəlva. 4#LUK 24:49Aka assan dənɗaŋ, anah sitik na adawzaraŋ sə Yerusalem ɓa, dəganən an məs Afən aynan napsiti, an anah na: «Məs kəprəmaŋ sə mawa. 5#MAT 3:11; MAR 1:8; LUK 3:16; YOH 1:33Yohanna dit iŋkile aɗɗa baptem, ya nokum əvoŋ siɗikke abe aŋ na akərəhaŋ baptem də Zeŋgile Salala.»

Yesu tay əteŋ a disiŋ

6En məs dəkkalaŋ də Yesu attokonənək na: Daya kakaŋki kədawzaɓan məlĩ na Israyel sa? 7Yas azlan sit na, wən nokum tay aza əsən əvoŋ nan də pay nan məs Afən aɗi də gagdak nan ɓa. 8#MAT 28:19; MAR 16:15; LUK 24:47,48Ya wakərəhaŋ gagdaka, an Zeŋgile Salala adek akokum, wakəssoŋ məpeleŋ wən naw a Yerusalem gəm a Yude baymani, a Samari gəm hã aket meŋge na dəlva. 9#MAR 16:19; LUK 24:50,51Adan anah sit vaska, apeŋgik a disiŋ, aka adawlanəni, yas slaybuwən azan sə ma hereti.

10Aka adawlaŋ a disiŋ pay adawpeŋge, ɗiy yeŋ sula ziwziw dit lukutɗe babarɗe a maŋgeveti. 11Aɓsitin na: Mə Galileɗi, vimi kəssoŋ ziwziw aŋ ula a disiŋ di? Yesu məs dəteŋ a disiŋ sə zokumuŋka, vaski adawmilyeni, məstaka va kulanən əddan a disiŋ.

Ɗəf məs dəgəm gəla Yuda

12Yaŋ maslənɗe amilyoŋ a Yerusalem səka mossorgo an adawyaŋ na mossorgo net heremeɗi go'oy də Yerusalem, ɓaɓa' nan gba ədaw na pay naffete#1:12 Pay naffet na, ɗəf addan təki gap kilometər taka ɓa.. 13#MAT 10:2-4; MAR 3:16-19; LUK 6:14-16Adan amilyoŋgu, ateŋgeŋgək addəv giziŋ an na disiŋ a təki adakkalaŋ ɗayɗayə. Ndəɗaŋgə mãy Piyer, Yohanna, Yakob, Andre, Filip, Tomas, Bartelemi gəm Matiye də Yakob wətən Alfe, gəm Simoŋ məs dəŋglu dələv nani, gəm Yuda wətən Yakob. 14Ndəɗaŋ pak tahəŋ məslerit addəv əkkam pay pakə, dit gil meɓɓeti gəm Miryam ma Yesu dit milmiŋgiɗni.

Ɗəf an nawgəm gəla Yudas

(1:15-26)

15Pay dəpaska Piyer le aweleŋgit milmiŋgiɗin, ɗiy waɗɗaŋ gap səkat də kaklaw sula adaka yas amna: 16Milmiŋgiɗwa, adahək an Zeŋgile Salala anah də ma Davit addəv Ɗerewel aka wən na Yudas məs dəkkpaŋ mədaw abet ɗiy dərmanən Yesu dəknahgəni. 17Vi məŋɗani aramə, ya arahək haran nan səddəv wəza namə.

18 # MAT 27:3-8 Yudas vanəs albahək guli dit deleɗ en arah də wəza mambray nani, askotuk də ma gədəvən, aɓahə, herɗen afuŋ zoɗoɗu. 19Ɗiy na Yerusalem pak aprəmənək wən nani, ndəni ayanən guli van də ma net na: Hakeldama va ənəh na: Guli net mbeli. 20#GLƊ 69:26 GLƊ 109:8Vi məverni addəv ɗerewel na Gəlya na:

Gəla nan dəsan kiməskiya,

ɗəf adawsan də gəla adak ɓa.

Ya gəla wəza nan na,

ɗəf mbərən dəgəma.

21 # MAT 3:16; MAR 1:9; LUK 3:21 MAR 16:19; LUK 24:51 Adahək məwelgən ɗəf taka səret ɗiy en dəssoŋ də mənam aka pay Daya Yesu adawzləwəran dələv də mənamə. 22Təŋ səza bapteme na Yohanna hã gap pay an məgəmən sə walaŋgəm, vi dəkkpaŋgən miziwe sap də mənam aka əsilye nan səka əmta. 23Yaŋ aziyaŋ ɗiy sula: Yosef məs adawyaŋ na Barsabas məlvan na Yustus, gəm Matiyas. 24Yaŋ akkamaŋ anahaŋ na: Daya istə kəsən mekret ɗiy pakə, arban an kəwel taka səret ɗiy suleŋki. 25Vi dəgəmgən gəla wəzaŋ gəm əslən məs Yudas apəl kaddan a təki an nanəŋka. 26Yaŋ aɗɗaŋ vẽpəlwa aketi, yas vẽpəlwa abət aka Matiyas, yaŋ məŋɗan aret maslənɗe kəlaw kiyit taka neki.

Currently Selected:

Wəza net Maslənɗe 1: GB

Highlight

Copy