मरकुस 5
5
मङे़ॽमा चाबे़ॽ राःप्पॽआ याॽमि
(मत्ति ८:२८-३४; लुका ८:२६-३९)
1येसु खोमि चोङ्साजिनुङ गालिल टोम्लिॽवामि मेए़रेङ गेरासेनस ठाउँबेॽ लेस्सा। 2येसु नाउबाङ ओरला लिमासोरोॽ मङे़ॽमा चाबे़ॽ राःप्पॽआ इक्को याॽमि येःॽमाखाबाङ खो चुप्सिॽ लेस्सा। 3मो याॽमि येःॽमाखाबेॽ पेने़। खो चे़क्चिमि कोङ्डे़ॽ हिःक्नुङ मे़युङ्हेबॽआ ले़टे़। 4बेॽलोखेॽ खो चे़क्चिमि कोङ्डे़ॽ हिःगुजि, तर खोसे़ॽ माहा टेॽनुङ चिःॽखाडे़। असे़ॽसो खो मे़से़क्युङ्हेसुजे। 5खो लेन्डा सेन्डा टाङ्बामि हिङाबेॽ रुङ्गोॽवाडे़ॽ खोःक्नुङ हुवा टोङ्मानुङ येःॽमाघाराजिनुङ टोक्टोक्माराजि वोसाङ राम्डुसे़।
6खोसे़ॽ ओःबाङ्नोॽ येसु खाङ्डोक्मासोरोॽ पिन्साङ आप्नुङ येसुमि पोम्बेॽ उःक्युनुङ, 7वोसाङ लुसु, “हे येसु, निवाहाङ्मि पसा, हे़ने़ॽ का इमा ले़ःॽमा योॽइटिङे ? निवाहाङ्मि निङ्बेॽ के़ॽ बिन्ति ले़न्ने़, का दुःख ए़ॽपिमा।” 8इन्ढोङ्होङ येसुडे़ॽ मो मङे़ॽमा चाप याॽमिबाङ खे़प्पेसे लुबॽआ ले़टे़। 9मोबा येसुडे़ॽ सिप्सु, “हे़ने़ए़ निङ इमाङ्डे ?” मोसे़ॽ लुसु, “के़ए़ निङ फौज, इन्ढोङ्होङ कानिङ बेॽलो टुन्डिङ्मे।” 10मोबा मो मङे़ॽमा चापडे़ॽ येसुनुङ बिन्ति ले़टु, “कानिङ इगो ठाउँबाङ ए़यिक्मायो।”
11मो टोक्टोक्मामि एम्ले़ङ्बेॽ आक्मामि बगालजि चरबा लिमे़ॽनिङ्सिडामे। 12मोबा माहा मङे़ॽमा चापजिडे़ॽ इडोक्मा बिन्ति ले़टुजि, “कानिङ अक्खा आक्माजि होङ्सिॽयु पे़खे़ॽमेॽमा।”
13येसुडे़ॽ माहा मङे़ॽमा चापजि खे़प्पेसानिङे लुसुजि, मोबा पे़आप्नुङ आक्माजिहोङ्बेॽ पे़ए़नामि। मोबा माहा नि हजार आक्माजि ङाङ्मानुङ याक्फुबाङ मिॽमु हेॽनुङ टोम्लिॽवाबेॽ हुम्सिघडामि।
14इगो खा खाङ्नुङ आक्मा गोठ्लाजि चिखे़ॽनुङ मोबेॽ लिबॽआ खा खिम्डेमनुङ सहरबेॽहा याॽमिजि लुबेॽटुजि। मोबा बेॽलो याॽमिजि खाङ्सिॽ येसु टुढामबेॽ लेस्सामि। 15माहा लेङ्खुबा याॽमिजिडे़ॽ मो मङे़ॽमा चापडे़ॽ नाङ्डुखुबा याॽमि नुबोक्नुङ येसुमि के़क्पेॽ पेम्बॽआ खाङ्डोक्टुजि। मोबा खोजि बेॽलो खरि मिन्नुङ किस्सिडामि। 16इगो खा खाङ्खुबाजिडे़ॽ मो याॽमिनुङ आक्माजिमि टुम्बेॽ लिबॽआ खा हाइखा याॽमिजिसो इःबेॽटुजि। 17इडोक्मा खा खेम्नुङ मोबेॽहा याॽमिजिडे़ॽ येसु हे़न कानिङ्मि ठाउँबाङ खे़ॽप्पेसे लुनुङ बिन्ति ले़टुजि।
18येसु नाउबेॽ साङ्सिॽपोरोक्माबेॽ मो मङे़ॽमा चाबे़ॽ लेॽनुङ नुबोक्पॽआ याॽमिडे़ॽ “कासो हे़न्नुङ सोरि चिक्खे़ॽमाना” लुनुङ बिन्ति ले़टु। 19तर येसुडे़ॽ मो याॽमि ए़आप्ने लुसाङ इडोॽ लुसु, “हे़न आम्मि खिमबेॽ खे़ॽनुङ हे़ने़हा लङ्गामजि लुसाजे परभुडे़ॽ हे़ने़ए़ हिङ्मवाबेॽ ले़ःॽपॽआ योम्बोकनुङ खोमि नम्नावामि खा चोप लुबेॽटाजे।” 20मोबा मो याॽमि खिम खे़ॽनुङ खोमि हिङ्मवाबेॽ लिबॽआ बेॽए योम्बोकमि टुम्बेॽ डेकापोलिस लुमे ठाउँबेॽहा याॽमिजि खेम्मेॽसाङ राम्डुसा।
याइरसमि सम्समा पसानुङ इक्को टुक्खुबा मेॽनामिॽ
(मत्ति ९:१८-२६; लुका ८:४०-५६)
21येसु फेरि माहोङ्मामि के़ए़रेङ टेआबा। मोबेॽनोॽ बेॽलो याॽमिजि खोमि किॽयु मिॽयु सुप्सामि। येसु चाहिँ टोम्लिॽवामि के़क्पेॽनोॽ टुसे़। 22यहुदिजि सुम्ढाम खिमबेॽहाजिबाङ्ए इक्को सासक याइरस निङ ले़ःॽखुबा याॽमि लेन्नुङ येसुमि पोम्बेॽ उःक्युसा। 23मोबा खोसे़ॽ येसु इडोॽ लुसाङ बिन्ति ले़टु, “के़ए़ ए़डे़म्मा सम्समा पसा टुक्मे़ॽ सिसिॽपोरोइटे़। खोसोक्पेॽ हे़ने़ए़ हुक युङ्नुङ नुबोक्पेॽमाना।”
24मोबा येसु मो याॽमिनुङ सोरि खडा। बेॽलो याॽमिजि येसुमि किॽयु मिॽयु सोक्सि-सोक्सि टुसामि। 25मोबेॽ हरि खे़ॽमे टुक्मवाडे़ॽ राःप्पॽआ इक्को मेॽनामिॽसो टुसे़। खो मो टुक्मवाडे़ॽ राःप्पॽआ बारा निङ लिघे़ॽपॽआ ले़टे़। 26खोसे़ॽ बेॽलोखेॽ सिडा ले़ःॽखुबाजिनुङ खे़ॽनुङ सिडा ले़ःॽमाबेॽ खोनुङ टुहा चोप याङ रुक्पेसु। तर खो मे़नुबुगा छना मेॽयोङ लिसा। 27खोसे़ॽ हाइखा याॽमिजिबाङ येसुमि टुम्बेॽ खेम्बॽआ ले़टे़। मोडोगे़ॽ खोसो बेॽलो याॽमिजि सुम्बॽआ बेलाबेॽनोॽ खे़ॽनुङ येसुमि ए़ङ्गुवालामबाङ खोमि चेॽ के़गु। 28इन्ढोङ्होङ “येसुमि चेॽरेॽ के़गुङ्होङ्सो का नुघे़ङे” लुनुङ खोसे़ॽ बिस्वास ले़टुए। 29चइबानोॽ खोसे़ॽ येसुमि चेॽ के़क्मासोरोॽ खोमि हरि खे़ॽमे नुबुगा।
30मोडोक्पेॽनोॽ येसुडे़ॽ खोमि हिङाबाङ सक्ति खे़ॽपॽआ लेडोक्टु, मोबा ए़ङ्गुवालाम हिङ्घे़ॽनुङ याॽमिजि सिप्सुजि, “असे़ॽटे के़ए़ चेॽ के़गुए ?”
31येसुमि चोङ्साजिडे़ॽ खो लुसुजि, “इढे़ॽलो याॽमिजि हे़ने़ए़ खिरिरि टुम्मे, मोबा हे़न चाहिँ का असे़ॽ के़गिङे काये ?”
32तर असे़ॽ का के़गिङे लुनुङ येसुडे़ॽ किॽयु मिॽयु वाःप्पोगु। 33मोबा मो मेॽनामिॽडे़ॽ खोमि हिङाबेॽ लिबॽआ खा मिॽनुङ खो किस्सिसाङ येसुमि पोम्बेॽ टुम्रुक ठोःक्नुङ चोप खा लुसु। 34मोबा येसुडे़ॽ मो मेॽनामिॽ लुसु, “नानि, हे़ने़ए़ बिस्वासडे़ॽ हे़न नुबोक्इटे़। हागो ढुक्का लिनुङ खडे।”
35येसुडे़ॽ इडोॽ लुमे़ॽनिङ्सिमाबेॽ याइरसमि खिमबाङ कोहि याॽमिजि लेन्नुङ लुसु, “मायोङ्बा, हे़ने़ए़ सम्समा पसागो सिघडा। हागो गुरु इन्ढोङ दुःख पिन्डुए ?” 36तर माहाजिडे़ॽ लुबॽआ खामि येसुडे़ॽ ले़ख्खो मे़ले़ःॽलेॽ याइरस लुसु, “हे़न ए़क्किसिने, बिस्वासरेॽ ले़टे।”
37मोबा येसुडे़ॽ पत्रुस, याकुबनुङ याकुबमि निसा युहन्नारेॽ खोनुङ सोरि चिक्खे़ॽटुजि। 38खोजि याइरसमि खिम रुक्माबेॽको याॽमिजि हाःप्मे़ॽनिङ्सिबॽआ खाङ्डोक्टुजि। 39मोबा येसु खिमहोङ्सिॽयु पे़एन्नुङ माहाजि लुसुजि, “हे़निङ इन्ढोङ इडोॽ खायोक मायोक ले़ःॽसाङ हाःप्मिन्डानिङे ? इगो पिच्छा मे़न्सिघे़ॽटिॽ।”
40इगो खा खे़म्नुङ माहाजिडे़ॽ येसु यिटे़गुजि। तर येसुडे़ॽ चोप याॽमिजि पाखे़ॽयु पाक्सुजि। मोबा मो पिच्छामि पाबानुङ मामा, येसुनुङ सोरि खे़ॽखुबा सुम्बाङ चोङ्साजि चिक्मानुङ पिच्छा टुढाम कोठा होङ्सिॽयु खडामि। 41येसुडे़ॽ मो पिच्छामि हुक राःप्साङ लुसु, “तालिता कुमि” इगो लुबॽआ “होउ नानि, पुकाडे!” 42मोबा मो सम्समा पिच्छा सुवाक्टोॽ पुके़ॽनुङ किॽयु मिॽयु राम्बुगा। इडोक्मा खा खाङ्नुङ माहाजि खरि मिनामि। [मो पिच्छा बारो निङ्मा ले़टे़] 43तर येसुडे़ॽ इगो खा असासो ए़ॽलुमे लुनुङ आग्या पिसुजि। मोबा मो पिच्छा इमाङ इमाङ चामा पिसानुमे लुसुजि।
Currently Selected:
मरकुस 5: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
