मरकुस 4
4
चरि टुप्खुबामि खानवा
(मत्ति १३:१-२३; लुका ८:४-१५)
1येसुडे़ॽ फेरिसो गालिल टोम्लिॽवा के़क्पेॽ सिक्छे पिबोगुजि। येसुमि किॽयु मिॽयु बेॽलो याॽमि सुम्बॽआसे़ॽ खो इक्को नाउबेॽ साङ्नुङ ए़डे़ॽ मेॽयोङ पेना। माहा सुम्बॽआ याॽमिजि चाहिँ वाबोक्क्लामि के़क्पेॽनोॽ पेनामि। 2मोबा येसुडे़ॽ याॽमिजि बेॽलो खा खानवाबाङ इःडुजि। येसुडे़ॽ इडोॽ लुसुजि, 3“खेप्सानुमे, इक्को याॽमि चरि टुप्सिॽ खडा। 4मोबा चरि टुप्माबेॽ कोहि चरि रामबेॽ सिॽटा, इच्छोॽपेॽनोॽ सोङाजिडे़ॽ कुःप्चोबेसुजि। 5कोहि चरि रुङ्गोॽवाघाबेॽ सिॽटा। मोबेॽ आक्खामा माॽआडे़से़ॽ, चरिमि रिङ के़ॽमागो चान्डोनोॽ कडा, 6तर माहा रिङ्मि सामडे़ॽ आक्खामा मे़न्चुप्पॽआसे़ॽ नम राङ्मासोरोॽ वाराम्घडा। 7मोबा कोहि चरि चाहिँ चिजिङ्घाबेॽ सिॽटा, इक्याक नियाक ए़क्साङ चिजिङ नाःपोक्नुङ माहा के़ॽपॽआ डाङ टोप्सिघडा, मोबा चानोॽ मे़ङ्किक्सा। 8तर कोहि चरि चाहिँ मोलनुङ्मा गहिरो आक्खामाबेॽ सिॽनुङ नुरोॽ कडा, वाबोगा। मो डाङ्बेॽ तिस गुना, साठिनुङ सय गुना चा किक्सा।” 9मोबा येसुडे़ॽ लुसु, “असा असामि खेम्मे ने़ए़क टुहा, माहाजिडे़ॽ खेप्सुजिरो।”
10येसु खोमदाङ्बा लिमाबेॽ खोमि चोङ्साजिनुङ खोजिमि किॽयु मिॽयु टुघुबाजिडे़ॽ येसु सिप्सुजि। हे़ने़ॽ लुबॽआ खानवाडे़ॽ लुमायोक्पॽआ खा चाहिँ इमाङ्डे। 11येसुडे़ॽ माहाजि लुसुजि, “हे़निङ चाहिँ निवाहाङ्मि राज्यमि टुम्बेॽहा खा लेहेमे निवा पिटानिङे। तर हाइखा याॽमिजि चाहिँ चोप खा खानवाबाङ लुमा खे़म्मे।
12 “इन्ढोङ्होङ माहाजिडे़ॽ खाङ्मागो खाङ्इन्डुजे तर खाङ्डोक्टुजिने, खेम्मागो खेम्खाङ्इन्डुजे, तर लेडोक्टुजिने। ने़ॽनिहोङ्गो माहाजिडे़ॽ टाङ्बामि पापि योम्बोक लेॽनुङ निवाहाङ्बेॽ लेस्सामि होला, मोबा निवाहाङ्डे़ॽ खोजिमि पाप आम्लाङ ले़ःॽपेॽटुजि होला।”
13मोबा येसुडे़ॽ चोङ्साजि सिप्सुजि, “इमा हे़निङे़ॽ इगो खानवाडे़ॽ लुमायोक्पॽआ खा मे़लेसानुमे ? मोडोक्होङ्गो हाइखा खानवाडे़ॽ लुमायोक्पॽआ खा इन्डोक्टे लेन्डानुमे ? 14चरि टुप्खुबा चाहिँ निवाहाङ्मि बचन परचार ले़ःॽखुबा। 15कोहि याॽमिजि राम के़क्पेॽ सिॽपॽआ चरिडोक्नोॽ ले़म्मे। मो बचन खोजिडे़ॽ खेम्मासोरोॽ सैतानडे़ॽ खोजिमि निवाबाङ कुःप्पेन्डुए। 16मोबा इन्डोक जनामि निवाबेॽ इगो बचन रुङ्गोॽवाघाबेॽ सिॽपॽआ चरिडोॽ लिये। माहाजिडे़ॽ निवाहाङ्मि बचन खेम्मासोरोॽ साप्थाङ्मानुङ बिस्वास ले़न्डुजे। 17तर माहाजिडे़ॽ मो बचन निवाहोङ्बेॽ मे़युङ्बॽआसे़ॽ माहाजिडे़ॽ बिस्वासगो ले़न्डुजे तर आदरे़ॽवा दुःखनुङ खेः आङ्मा सिॽयेम्बाङ निवाहाङ्बेॽ बिस्वास ले़ःॽमा लेॽपेन्डुजे।
18 “इन्डोक जना याॽमिजिमि निवाबेॽ इगो बचन चिजिङ्घाबेॽ सिॽपॽआ चरिडोॽ लिये। 19मोबा माहाजिडे़ॽ निवाहाङ्मि सिक्छे खेम्गो खेम्इन्डुजे तर इगो मक्खाम्डेमबेॽहा सुरता, याङ्सरावामि नम्नमडे़ॽ मो बचन मिन्डेन्डुजे मोबा इक्कोसो चा किङ्निबा। 20इन्डोक याॽमिजिमि निवाबेॽ इगो बचन मलिलोमा आक्खामाबेॽ सिॽपॽआ चरिडोॽ लिये। माहाजिडे़ॽ निवाहाङ्मि बचन खेम्नुङ पालना ले़न्डुजे, मोबा माहाजि तिस गुना, साठि गुनानुङ सय गुना चुरोक चा किङ्इये डाङडोॽ लिम्मे।”
कुप्पिमि खानवा
(लुका ८:१६-१८)
21येसुडे़ॽ लुघे़ॽटु, “कुप्पि उःप्नुङ असे़ॽटे पाथिडे़ॽ ओप्मिन्डुए अथबा खाटहोङ्बेॽमु युङ्इन्डुए ? आक्टोॽ ले़टुजिने, बोरु कुप्पि उःप्नुङ्गो अग्लोमा ठाउँबेॽ युङ्इन्डुजे। 22चुम्नुङ युङ्बॽआ चोप थोक खाङ्मुहा, लेहेनिहा चोप खा लेहेये। 23खेम्ढाम ने़ए़क काप्खुबा चोबे़ॽ खेप्सुजिरो!”
24मोबा येसुडे़ॽ माहाजि इडोॽ लुसुजि, “हे़निङे़ॽ इमा खेम्इटानुमे मो खाबेॽ नुरोॽ निवा टिसानुमे! हे़निङे़ॽ इन्डोक्मा सिःक्चिराडे़ॽ सिःक्नुङ हाइखाजि पिन्डानुमे, मोडोक्माडे़ॽनोॽ सिःक्नुङ हे़निङ्सो पिम्मे। आक्टोक्रेॽ ने़ॽनि मोबाङ्सो चुरोक पिम्मे। 25इन्ढोङ्होङ असानुङ टुहा, मो छना बेॽलो पिये, तर असानुङ माॽआहा, मोनुङ टुहासो नप्खे़हा।”
चरिमि खा
26येसुडे़ॽ फेरि लुसु, “निवाहाङ्मि राज्य लुबॽआ इक्को याॽमिडे़ॽ सोङ्राबेॽ चरि टुप्पॽआडोक्नोॽ ले़ये।
27 “मो याॽमि इम्होङ्सो, मे़इम्होङ्सो सोङ्राबेॽ टुप्पॽआ चरि सेन्डा लेन्डा के़ॽए़येनुङ वाबोक्इये। तर मो इन्डोक्टे लिसे़ लुनुङ खोसे़ॽ लेसुने।
28 “आक्खामाडे़ॽनोॽ चरिमि रिङ के़ॽमेन्डुए, मो ताम वाबोक्इये, मोबा ए़क्साङ खाॽवा के़ॽए़ये, मोबा चा किङ्इये। 29अन्न टुम्नुङ ए़क्साङ मो सोङ्रादाङ्बे़ॽ खोॽइडे़ॽ हे़ॽइन्डुए। इन्ढोङ्होङ माहा अन्न हे़क्मा बेला युघे़ॽपॽआ लिये।”
पारसाइमि चरि
(मत्ति १३:३१-३२,३४; लुका १३:१८-१९)
30फेरि येसुडे़ॽ लुसु, “निवाहाङ्मि राज्य हाइखा इमाङ्डोॽ ले़ये लुनुङ लुमे ? अथबा हाम्बे खानवाबाङ इगोमि टुम्बेॽ लुमे़ ? 31इगो इडोॽ ले़ये। पारसाइमि चरि मक्खाम्डेमबेॽ चोप्पाङ ए़डेॽमा चरि ले़ये। इक्को याॽमिडे़ॽ मो चरि सोङ्राबेॽ टुप्इन्डुए। 32मो वाबोक्नुङ बेॽए आॽवानुङ्मा डाङ लिये। इगोमि बेॽहा बेॽहा हक्काम्बा लिहा मोबेॽ सोङाडे़ॽ हाप टिनुङ पेङ्इम्मे।” 33याॽमिजिडे़ॽ निवाहाङ्मि सिक्छे लेसुजिरो लुनुङ इडोक्हा बेॽलो खानवा लुबेॽटुजि। 34याॽमिजि सिक्छे पिमाबेॽ खानवाबाङ्नोॽ इःडुजि। तर खोमि चोङ्साजिरेॽ टुमाबेॽ चाहिँ खानवाडे़ॽ लुमायोक्पॽआ खा इःबेॽटुजि।
येसुडे़ॽ वाडुम योङ उक्मेॽपॽआ
(मत्ति ८:२३-२७; लुका ८:२२-२५)
35मो युडा येसुडे़ॽ खोम चोङ्साजि लुसुजि, “लो आबानिङे, हागो कानिङ टोम्लिॽवामि मेॽए़रेङ खडि।” 36चोङ्साजि मोबेॽ सुम्बॽआ बेॽलो याॽमिजि याःॽयानुङ येसु साङ्बॽआ नाउबेॽ साक्सामि। मोबा येसु चिक्मानुङ मेॽए़रेङ खे़ॽमामि पोरोगामि। माहाजिनुङ हाइखासो नाउ टुसाहा। 37मोडोक्पेॽनोॽ मो टोम्लिॽवाबेॽ हाजोक्टोॽ बेॽए फुइक्सुमा यिक्पोगा, मोबा फे़ङ्ले़ॽवा राप्पोक्नुङ योङा नाउ इॽठुप लिसिॽपोरोगा। 38येसु चाहिँ नाउमि ए़ङ्गुवाराम खे़ॽनुङ टे़ॽकोङ कोङ्मानुङ इम्मे़ॽनिङ्सिडे़। मोबा चोङ्साजिडे़ॽ खो हुम्बोक्साङ लुसुजि, “गुरु, कानिङ्गो हुम्घे़ॽसिॽ पोरोगिङ्मा, हे़ने़ॽ ले़ख्खो ले़ःॽनिबा ?”
येसुडे़ॽ वाडुमनुङ फे़ङ्ले़ॽवा वोप्पॽआ
39येसुडे़ॽ वाडुमनुङ फे़ङ्ले़ॽवा वोःप्साङ लुसु, “योङ उगे!” मोडोक्पेॽनोॽ वाडुम एॽयुसा, मोबा योङ उगा। 40येसुडे़ॽ चोङ्साजि लुसुजि, “हे़निङ इन्ढोङ्डे किस्सिन्डानिङे ? खोइडे हे़निङ्मि बिस्वास ?” 41मोबा माहाजि खरि मिन्नुङ किस्सिसाङ कासामि, “इगो असाडे ? खोसे़ॽ लुमाबेॽको वाडुमनुङ फे़ङ्ले़ॽवाडे़ॽसो खेम्इन्डु!”
Currently Selected:
मरकुस 4: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
