मरकुस 13
13
ए़क्साङ्हा याकमि चिङ्गा
(मत्ति २४:१-२४; लुका २१:५-१९)
1येसु मन्दिरबाङ आप्मे़ॽनिङ्सिमाबेॽ खोमि इक्को चोङ्साडे़ॽ लुसु, “खाक्से गुरु, इन्डोक बेॽहा बेॽहा रुङ्गोॽवा! इमा नुबा नुबा खिम!” 2मोबा येसुडे़ॽ मो चोङ्सा लुसु, “खाक्से, इघा नुबा नुबा खिम इक्याक इक्को रुङ्गोॽवासोक्पेॽ हाइको रुङ्गोॽवासो मे़युङ्रेॽ चोप योबेहा।”
3मोबा येसु मन्दिरमि मे़ॽए़रे़ङ्लाम जैतुन टोक्टोक्माबेॽ पेम्मे़ॽनिङ्सिडे़ मोडोक्पेॽ पत्रुस, याकुब, युहन्नानुङ अन्दरियास लेन्नुङ खुस्रिङ येसु सिप्सुजि, 4“कानिङ लुमाना, इघा चोप खा इन्डोक्पेॽ लिहा ? मोबा इघा हे़ने़ॽ लुबॽआ खा पुरा लिसिॽ पोरोइटा लुनुङ इन्डोक्टे लेमे, मोमि चिङ्गा चाहिँ इन्डोॽ खाङ्मुहा ?” 5येसुडे़ॽ माहाजि लुसुजि, “होसियार ले़टानिङे, हे़निङ असे़ॽसो मे़रेम्जामिरो! 6बेॽलो जना के़ए़ निङ्बेॽ ‘मुक्ति पिघुबा कानोॽ ले़ङे’ कासाङ लेन्नुङ याॽमिजि रेम्जोन्डुजे। 7हे़निङे़ॽ ङेः लिमे़ॽनिङ्सिबॽआ हल्ला खेम्इन्डानुमे मोडोक्पेॽ किस्सिडानिङे। माहा चोपगो लिमानोॽ खे़हा, तर मोडोॽ लिमाबेॽनोॽ मक्खाम्डेम नासि लिघे़ॽनिबा। 8जाति जातिजिमि रुम्बेॽ खिमवा पुःॽइहा, इक्को देसमि बिरोधबेॽ हाइको देस पुॽइये, ठाउँ ठाउँबेॽ रुॽमि लेङ्इहा। सकआङ्सा लेङ्इहा तर इघा खागो ओङे़क टोक्मा याक्लो बेथा साबुक्पॽआडोक्नोॽ दुःखमि याक तरिक्पॽआरेॽनोॽ मिडानुमे।
9 “हे़निङ टाङ्बा चाहिँ होसियार ले़टानिङे, इन्ढोङ्होङ याॽमिजिडे़ॽ हे़निङ न्याय ले़ःॽठामबेॽ राःप्खे़म्मे। मोबा यहुदिजि सुम्ढाम खिमराजि लाघे़ॽनुङ कोरराडे़ॽ मोइम्मे। हाङ्बाजिनुङ सासकजिमि पोम्बेॽ येःप्नुङ के़ए़ टुम्बेॽ हे़निङे़ॽ साक्छि पिमा खे़ये।
10 “तर मक्खाम्डेम नासि लिमा याक्लो चोप याॽमिजि सुसमाचार खेम्मेॽमानोॽ खे़ये। 11याॽमिजिडे़ॽ हे़निङ राःप्खे़ॽमाबेॽ हे़निङे़ॽ इमाङ लुमे मिॽनुङ निवाबेॽ सुरता ए़ले़टानुमे। खोजिमि पोम्बेॽ येःप्माबेॽ हे़निङ्मि निवाबेॽ इमाङ लेङ्इये मोनोॽ लुसानुमे। इन्ढोङ्होङ मोडोक्पेॽ यामुघुबा हे़निङ ने़ॽनि तर पबित्रा होङ्निवा यामुये।
12 “मोडोक्पेॽ याॽमिजिडे़ॽ टाङ्बामि वावानिसाजिनोॽ सेॽनेमामि लागि पिबेन्डुजे। पाबाडे़ॽ पसाजि, पसाजिडे़ॽ पाबा मामामि टेडिघरिक लिम्मे। 13मोबा का बिस्वास ले़ःॽपॽआसे़ॽ हे़निङ चोबे़ॽ हेला ले़म्मे। तर ए़क्साङ्ठोक बिस्वासबेॽ असा बोलियो लिये मो हिङ्इये।”
किस्सिमारोमा खेःमि याक
(मत्ति २४:१५-२८; लुका २१:२०-२४)
14 “मोबा पेम्मा मे़म्फे़ने़ ठाउँबेॽ हे़निङे़ॽ चिक्चिमिॽमारो थोकनुङ नास ले़ःॽखुबा पेम्बॽआ खाङ्इन्डानुमे नेॽखुबाजिडे़ॽ इगो खाडे़ॽ लुमायोक्पॽआ खा लेसुमिरो। मोडोक्पेॽ यहुदिया ठाउँबेॽ टुखुबा याॽमिजि सुम्लाखालाम चिःॽखे़ॽमिरो। 15खिममि कौसिबेॽ टुखुबा याॽमिजि इमाङ थोक लासिॽहोङ्सो खिमहोङ्बेॽ मे़उङ्मिरो। 16रोपा, सोङ्राबेॽ टुघुबा याॽमिजि ओप्ताङ्नुङ चेॽ लासिॽ खिमबेॽ मे़ङ्खे़ॽमिरो। 17मोडोक्पेॽ उक्खाइसुम्माजि, पस्ताङ्माजि छना बेॽलो खेःबेॽ सिॽइम्मे। 18इडोक्हा याक हिउदोबेॽ मे़सिॽलो लुनुङ निवाहाङ्नुङ पारथना ले़टानुमे। 19मोडोक्हा किस्सिमारोमा खेःमि याकको निवाहाङ्डे़ॽ सिरिस्टि ले़ःॽपॽआ याकबाङ आयुरो मे़लिडिॽ, फेरि ए़क्साङ्सो लिनिबा। 20निवाहाङ्डे़ॽ माहा खेःमि याक चुक्लो मे़ले़ःॽपॽआहोङ्गो असासो मे़हिक्सामे, तर खोसे़ॽ से़म्बॽआ याॽमिजिमि लागि माहा याक चुक्लो टोङ्बेटे़।
21 “खाक्सानुमे, मोडोक्पेॽ असा याॽमिजिडे़ॽसो हे़निङ खिरिस्ट इगोबेॽ टुये, खो मोबेॽ टुये लुमिहोङ माहाजिमि खाबेॽ बिस्वास ए़ले़टानुमे। 22इन्ढोङ्होङ रेम्सिङ खिरिस्टजिनुङ रेम्सिङ अगमबक्ताजि लेङ्इम्मे। माहाजिडे़ॽ बेॽहा बेॽहा चिङ्गानुङ खरिहा योम्बोक ले़ःॽनुङ निवाहाङ्डे़ॽ से़म्बॽआ याॽमिजिसो रेम्इन्डुजे। 23मोडोगे़ॽ हे़निङ होसियार ले़टानिङे, इघा खा लिमा याक्लोनोॽ के़ॽ हे़निङ लुबेनिम्ने़।”
येसु फेरिसो लेङ्इये
(मत्ति २३:२९-३१; लुका २१:२५-२८)
24 “माहा खेःमि याक रुक्खे़ॽयेबाङ नामनुङ लाडे़ॽ उज्यालो पिनिबा। 25साङ्गेजि नान्द्रुङ्माबाङ हेओक्इम्मे, मोबा नान्द्रुङ्माबेॽहा चोप सक्तिजि सोङ्इम्मे। 26मोबा ए़क्साङ याॽमिमि पसा सक्तिनुङ महिमानुङ खिम्मिॽवाबेॽ उङ्मे़ॽसिबॽआ याॽमिजिडे़ॽ खाङ्डोइन्डुजे। 27मोबा खोसे़ॽ थाङ्सिरिदुतजि पाङ्इन्डुजेनुङ निवाहाङ्डे़ॽ से़म्बॽआ याॽमिजि खोसे़ॽ नान्द्रुङ्मानुङ मक्खाम्डेममि चोपराजिबाङ सुम्इन्डुजे।
वेॽलाभुमि डाङ्बाङ सिक्छे
(मत्ति २४:३२-३५; लुका २१:२९-३३)
28 “मोबा येसुडे़ॽ लुसु, वेॽलाभुमि डाङ्बाङ खा चिनानुमे। इगोमि हक्काम्बाबेॽ चोङ ङोःॽवा के़ॽपोक्माबेॽ बरखयाम लेम्बॽआ लुनुङ लेडोक्इये। 29मोडोक्नोॽ के़ॽ हे़निङ लुडिङ्बॽआ खा लिबोकयेम्बाङ खो लेङ्सिॽपोरोइटे़ लुनुङ लेसानुमे। 30चइबानोॽ हे़निङ लुनिम्ने़ इडोक्हा चोप खा पुरा मे़लिरो इगो पुस्ताबेॽहा याॽमिजि सिघे़ॽमिने। 31नान्द्रुङ्मानुङ मक्खाम्डेम नासि लिघे़ये, तर के़ॽ लुबॽआ इघा खा इन्डोक्पेॽसो नासि लिनिहा।
चङ्खो लिमे टुम्बेॽ सिक्छे
(मत्ति २४:३६-४४; लुका १२:३८,४०)
32 “तर मो याक इन्डोक्पेॽ लेङ्इये लुमे खा निवाहाङ पाबाबाङ हाइखा असे़ॽसो लेसुनिबा। पसानुङ थाङ्सिरि दुतजिडे़ॽसो लेसुजिनि। 33मोडोगे़ॽ होसियार ले़टानिङे, चङ्खो पेन्नुङ पारथना ले़टानिङे। इन्ढोङ्होङ मो याक इन्डोक्पेॽ लेङ्इये हे़निङे़ॽ लेसानुम्नि।
34 “इगो खागो खिमदाङ्बे़ॽ खोमि सेउतेजि खिममि योम्बोक नुरोॽ ले़टिक्सानुमे लुनुङ, खिम हुङ्खुबा नुरोॽ खिम हुङ्मे लुआनुङ खो चाहिँ हाइको देस खे़ॽपॽआडोक्नोॽ ले़ये। 35मोडोगे़ॽ हे़निङ्सो चङ्खो लिनुङ पेनानिङे, इन्ढोङ्होङ खिमदाङ्बागो युडा, सेन्डा, वापा ओःक्मा याक्लो अथबा माक्मि इन्डोक्पेॽसो टेजाये। 36खो हाक्चोक्टोॽ लेम्माबेॽ हे़निङ इम्डिघे़ॽपॽआ चुप्होङ, 37आयु के़ॽ हे़निङ लुबॽआडोक्नोॽ चोप याॽमिजि लुटुङ्हाजि, होसियार ले़ःॽनुङ पेनानिङे।”
Currently Selected:
मरकुस 13: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
