लुका 8
8
येसु सहायोग ले़ःॽखुबा मेॽनामिॽचि
1इक्याक नियाक ए़क्साङ येसु निवाहाङ्मि राज्यमि सुसमाचार खेम्मेॽसाङ सहर सहरनुङ खिम्डेमराजि खडा। खोनुङ खोमि बारो जना चोङ्साजिसो खोनुङ सोरि खडामि। 2चाबे़ॽ सुजाबॽआनुङ टुक्मवाबाङ नुबोक्पॽआ हाइखा मेॽनामिॽचिसो खोनुङ राम्बुगामि। माहाजिबेॽ एच्चि गोटा मङे़ॽमा चाप चुप्नुङ नुबोक्पॽआ मरियम मग्दलिनिसो टुसे़। 3हेरोद हाङ्बामि भन्डारे खुजासमि बनिमा योअन्ना, सुसन्नानुङ हाइखाजिसो बेॽलो मेॽनामिॽचि टुसामे, माहाजिडे़ॽ येसुनुङ खोमि चोङ्साजि याङ्सरावा पिनुङ सहायता ले़टुजे।
सोङ्रादाङ्बाडे़ॽ चरि टुप्पॽआ खानवा
(मत्ति १३:१-९; मरकुस ४:१-९)
4सहर सहरबाङ, बेॽलो याॽमिजि येसुबेॽ लेम्मे़ॽनिङ्सिडामि, इडोॽ मोबेॽ सुम्बॽआ याॽमिजि खोसे़ॽ इक्को खानवा, पारलेनडोॽ इःबेॽटुजि, 5“इक्को याॽमि खे़ॽनुङ सोङ्राबेॽ चरि टुबु। माहा चरि टुॽमाबेॽ कोहि चरि रामबेॽ सिॽटा मोबा याॽमिजिडे़ॽ सिगुजि, सोङाजिडे़ॽ कुःप्चोबेसुजि। 6कोहि चरि चाहिँ रुङ्गोॽवाघाबेॽ सिॽटा। मोबेॽ रिङ्गो कडा तर योङा, आक्खामा मे़न्चुप्पॽआसे़ॽ हेघे़ॽपेसा। 7कोहि चरि चाहिँ चिजिङ्घाबेॽ सिॽटा, मोबा चिजिङ नाःपोक्नुङ माहा के़ॽपॽआ रिङ टोप्सिघडा। 8तर कोहि चरि चाहिँ मोलिलो आक्खामाबेॽ सिॽपॽआसे़ॽ काम्नुमानुङ वाबोगा मोबा मो चरिबाङ मुरिमुरि चा किक्सा।” इडोॽ खानवा इःसे़ॽनुङ येसुडे़ॽ लुसु, “ने़ए़क काप्खुबाजिडे़ॽ, के़हा खा निवा टिनुङ खेप्सानुमे!”
खानवाडे़ॽ लुमायोक्पॽआ खा
(मत्ति १३:१०-२३; मरकुस ४:१०-२०)
9खोमि चोङ्साजिडे़ॽ येसु इगो खानवाडे़ॽ लुमायोक्पॽआ खा इमाङ्डे लुनुङ सिप्सुजि। 10येसुडे़ॽ माहाजि लुसुजि, “हे़निङ चाहिँ निवाहाङ्मि राज्यहोङ्सिॽयुहा खा लेहेमे निवा पिबॽआ ले़ये। तर हाइखाजि चाहिँ खानवाबाङ लुमा खे़म्मे। मोडोगे़ॽ माहाजिडे़ॽ खाङ्मागो खाङ्इन्डुजे तर खाङ्डोक्टुजिने, खेम्मागो खेम्इन्डुजे तर लेहेसुजिने#यसैया ६:९ ।
11 “इगो खानवाडे़ॽ लुमायोक्पॽआ खा चाहिँ इडोॽ ले़ये, चरि लुबॽआ निवाहाङ्मि बचन ले़ये। 12रामबेॽ सिॽपॽआ चरि लुबॽआ चाहिँ माहाजिडे़ॽ निवाहाङ्मि बचन खेम्इन्डुजे तर निवाबेॽ युङ्हेसुजिने, इन्ढोङ्होङ माहाजिडे़ॽ बिस्वास मे़ले़टुजिरोनुङ मे़हिङ्मिरो लुनुङ सैतानडे़ॽ खोजिमि निवाबाङ निवाहाङ्मि बचन लाघे़न्डुए। 13रुङ्गोॽवाबेॽ सिप्पॽआ चरि लुबॽआ चाहिँ निवाहाङ्मि बचन खेम्नुङ साप्थाङ्मानुङ इॽछोॽको बिस्वास ले़न्डुजे, तर माहाजिडे़ॽ चइबानोॽ बिस्वास मे़ले़ःॽपॽआसे़ॽ सारो गारो सिॽमासोरोॽ बिस्वास ले़ःॽमा लेप्पेन्डुजे। 14चिजिङ्घाबेॽ सिॽपॽआ चरि लुबॽआ चाहिँ माहाजिडे़ॽ निवाहाङ्मि बचनगो खेम्इन्डुजे, इगो मक्खाम्डेमबेॽहा चामा उङ्मामि सुरताडे़ॽ, याङ्सरावामि खाडे़ॽ, सुख बिलासमि खाडे़ॽ माहाजिमि बिस्वास वाबोक्निहानुङ चासो किङ्निहा। 15मोलिलो आक्खामाबेॽ सिॽपॽआ चरि लुबॽआ चाहिँ, माहा याॽमिजिडे़ॽ निवाहाङ्मि बचन खेम्इन्डुजे मोबा निवाबेॽ नुरोॽ युङ्नुङ दुःखाबेॽ सुखाबेॽ चोप निवे़ॽ बिस्वास ले़न्डुजे, मोबा खोजिबाङ बेॽलो याॽमिजिडे़ॽ आसिस चुप्मिन्डुजे।
कुप्पिमि उज्यालो
(मरकुस ४:२१-२५)
16 “आसे़ॽसो कुप्पि उःप्नुङ पाथिडे़ॽ टे़गुजिनेनुङ रुङ्घाकहोङ्बेॽ चुप्सुजिनि। बरु खिमहोङ्सिॽयु आप्खुबाजि उज्यालो लिरो लुनुङ मो कुप्पि अग्लोमा ठाउँबेॽ युङ्इन्डुजे। 17इडोॽ चुम्नुङ युङ्बॽआ चोप खा खाङ्मुहानुङ लेडोक्मा छॽइहा खा इमाङ टुहा, माहा चोप खा चोबे़ॽ ने़ःक्चा लेडोक्हेहा। 18मोडोगे़ॽ हे़निङे़ॽ खेम्बॽआ खाबेॽ नुरोॽ निवा टिसानुमे इन्ढोङ्होङ असानुङ टुहा, खोबेॽ फेरिसो येॽयुहा, तर असानुङ माॽआहा, मोनुङ टुहासो नाप्खे़हा।”
येसुमि मामानुङ निसाजि
(मत्ति १२:४६-५०; मरकुस ३:३१-३५)
19इक्याक येसुमि मामानुङ निसाजि खो चुप्सिॽ लेस्सामि। तर हाइखा बेॽलो याॽमिजि सुम्बॽआसे़ॽ माहाजिडे़ॽ येसु मे़न्चुॽहेसुजि। 20इक्कोसे़ॽ येसु लुसु, “हे़ने़हा मामानुङ निसाजि हे़न चुप्सिॽ पाखे़ॽयु हुङ्मे़ॽनिङ्सिम्मे।” 21तर येसुडे़ॽ माहाजि लुसुजि, “निवाहाङ्मि खा खेम्खुबाजिनुङ खसिघुबाजिनोॽ के़हा मामानुङ निसाजि ले़म्मे!”
येसुडे़ॽ वाडुम योप्पॽआ
(मत्ति ८:२३-२७; मरकुस ४:३५-४१)
22इक्याक येसु चोङ्साजिनुङ नाउबेॽ साङ्नुङ लुसुजि, “कानिङ इगो टोम्लिॽवामि मेॽए़रेङ खे़ॽमा” मोबा खोजि खडामि। 23इडोॽ खे़ॽमे़ॽनिङ्सिमाबेॽ येसु नाउबेॽ इम्डिखडा। मोडोक्पेॽनोॽ मो टोम्लिॽवाबेॽ बेॽए वाडुम लेम्बुगा, नाउ योङेॽ टिप्खे़ॽसिॽ पोरोक्पॽआसे़ॽ माहाजि किस्सिबोगामि। 24मोडोगे़ॽ खोम चोङ्साजिडे़ॽ येसु हुम्बोक्साङ लुसुजि, “हे गुरुज्यु, कानिङ्गो सिसिॽपोरोगिङ्मा।” इगो खेम्नुङ येसु पुके़ॽनुङ मो वाडुम योबु। मोडोक्पेॽनोॽ मो वाडुम एॽयुसा। 25येसुडे़ॽ चोङ्साजि लुसुजि, “खोइ, हे़निङ्मि बिस्वास ?” माहाजि खरि मिनामि, येसुमि सक्ति खाङ्नुङ चोङ्साजि खोजिदाङ्बा काबोगामि, “इगो असाडे ? खोसे़ॽ योप्माबेॽको फे़ङ्ले़ॽवानुङ वाडुमसो खसिम्मे ले़ए़।”
मङे़ॽमा चाबेॽ राःप्पॽआ याॽमि नुबोक्पॽआ
(मत्ति ८:२८-३४; मरकुस ५:१-२०)
26येसुनुङ खोमि चोङ्साजि गालिल टोम्लिॽवामि मेॽए़रेङ गेरासेनसमि मुलुकपेॽ रुक्टुजि। 27नाउबाङ ओरला लिमाबेॽ मो सहरबाङ मङे़ॽमा चापटे़ॽ राःप्पॽआ याॽमि येसुबेॽ लेस्सा। मो याॽमिडे़ॽ बेॽलो याक्लोएबाङ चेॽ मे़न्चाक्सुए मोबा खिमबेॽसो मे़म्पेन्लेॽ येःॽमाखाराजि पेने़। 28येसु खाङ्डोक्नुङ खो बेॽए सेम्ले़ॽ वोसाङ येसुमि पोम्बेॽ पोप्युनुङ लुसु, “हे येसु, चोप्पा बेॽए निवाहाङ्मि पसा, हे़ने़ॽ का इमाङ ले़ःॽमा योॽइटे़ ? बिन्ति ले़न्ने़, का दुःख ए़ॽपिमायो।” 29येसुडे़ॽ मङे़ॽमा चाप याॽमिबाङ चान्डो खे़ॽपेसे लुबॽआसे़ॽ मो याॽमिडे़ॽ मोडोॽ लुबॽआ ले़टे़। मो याॽमि मङे़ॽमा चाबे़ॽ बेॽलोखेॽ राःप्पॽआ ले़टे़। चे़क्चिमि कोङ्डे़ॽ हुक सराङ्बेॽ हिःक्नुङ युङ्माबेॽसो मो चापमि बोलडे़ॽ चे़क्चिमि कोङ्सो टेप्पेनुङ रे़क्रे़क्मा ठाउँराजि चिॽखे़टुए।
30येसुडे़ॽ खो सिप्सु, “हे़ने़ए़ निङ इमाङ्डे ?” मोसे़ॽ लुसु, “फौज!” इन्ढोङ्होङ खोबेॽ बेॽलो मङे़ॽमा चापजि टुसामे। 31मङे़हा चापजिडे़ॽ येसुनुङ बिन्ति ले़टुजि, “कानिङ चापजि से़क्ठाम ठाउँबेॽ ए़पाङ्मायो।” 32मो टोक्टोक्मामि एम्लेङ्बेॽ बेॽलो आक्माजि चरबा लिमे़ॽनिङ्सिडामे। माहा मङे़ॽमा चापजिडे़ॽ माहा आक्माजिबेॽ पे़खे़ॽमेॽमा लुनुङ येसुनुङ बिन्ति ले़टुजि। येसुडे़ॽ माहाजि लुसुजि, “खडानिङे”। 33मोबा माहा चापजि मो याॽमिबाङ पे़आप्नुङ आक्माजिबेॽ पे़ए़नामि। मोबा ए़क्साङ आक्मामि बगाल याक्फुबाङ हेॽनुङ मिम्मु टोम्लिॽवाबेॽ हुम्सिघडामि।
34इडोक्मा खा खाङ्नुङ आक्मा कुघुबाजि किस्सिमे़ॽ मोबा चिःॽखे़नुङ माहा चोप खा खिम्डेमनुङ सहरराजि खेम्मेॽटुजि। 35बेॽलो याॽमिजि इमा पिक्खाडे़ लुनुङ खाङ्सिॽ येसुबेॽ लेस्सामि। मङे़ॽमा चाबे़ॽ चुङ्जाबॽआ मो याॽमि नुबोक्नुङ्सो चेॽ चाङ्नुङ येसुमि के़क्पेॽ पेम्मे़ॽनिङ्सिबॽआ खाङ्डोक्टुजि। इघा खा खाङ्नुङ माहाजि चोप खरि मिनामि। 36मो याॽमि नुबोक्पॽआ खाङ्घुबाजिडे़ॽ हाइखाजि खेम्मेॽटुजि। 37मोबा ए़क्साङ गेरासेन ठाउँबेॽहा चोप याॽमिजिडे़ॽ येसु “इगो ठाउँबाङ चान्डो खे़ॽपेसे” लुनुङ बिन्ति ले़टुजि। इन्ढोङ्होङ माहाजि बेॽलो किस्सिडामि, मोडोगे़ॽ येसु टेघे़ॽमामि नाउबेॽ सक्सा। 38मोडोक्पेॽ मो नुबोक्पॽआ याॽमिडे़ॽ बिन्ति ले़ःॽसाङ लुसु, “कासो हे़न्नुङ्नोॽ चिॽखे़ॽमाना।” तर येसुडे़ॽ मो याॽमि लुसु, 39“हे़न आम्मि खिमबेॽ खे़ॽनुङ निवाहाङ्डे़ॽ हे़ने़ए़ हिङ्मवाबेॽ ले़ःॽपॽआ, खरिमा योम्बोक हाइखा याॽमिजि खेम्मेॽटाजे।” चइबानोॽ येसुडे़ॽ खोमि हिङ्मवाबेॽ ले़ःॽपॽआ खरिमा योम्बोकमि टुम्बेॽ मो याॽमिडे़ॽ सहरराजि खेम्मेॽसाङ राम्डुसा।
याइरसमि सम्समा पसानुङ इक्को टुक्खुबा मेॽनामिॽ
(मत्ति ९:१८-२६; मरकुस ५:२१-४३)
40येसु टोम्लिॽवामि के़ए़रेङ्लाम लेम्माबेॽ बेॽलो याॽमिजि खोमि राम हुङ्मे़ॽनिङ्सिडामि। माहाजिडे़ॽ खो स्वागत ले़टुजि। 41इॽछोॽ ए़क्साङ यहुदिजि सुम्ढाम खिमबेॽए याइरस निङ ले़ःॽखुबा इक्को एप्पा याॽमि लेन्नुङ येसु सेवा मुसाङ “के़ए़ खिमबेॽ आप्पिॽमाना” लुनुङ बिन्ति ले़टु। 42इन्ढोङ्होङ खोमि बारो निङ याक्पॽआ सम्समा पसा सिघे़ॽसिॽ पोरोक्पॽआ ले़टे़। मोमि बिन्ति खेम्नुङ येसु मोनुङ खे़ॽपुगा। येसु खे़ॽमे़ॽनिङ्सिमाबेॽ खोमि खिरिरि बेॽलो याॽमिजि सुम्बॽआसे़ॽ चोक्खुसे़ॽचुसामि। 43माहा सुम्बॽआ बेॽलो याॽमिजिबेॽ इक्को बारो निङ्बाङ हरि खे़ॽमे टुक्मवा काप्खुबा मेॽनामिॽसो टुसे़। खो आसे़ॽसो मे़नुबोक्हेबॽआ ले़टे़#८:४३ स्रोत कोहि कोहि बाइबलबेॽ इडोक्सो साप्पॽआ ले़हा मो मेॽनामिॽमि चोप याङ्सरावाडे़ॽ सिडा ले़ःॽमाबेॽसो मे़नुबुक्पॽआ ले़टे़। 44मोसे़ॽ याॽमिमि घुँइचोबेॽ येसुमि ए़ङ्गुवालामबाङ आप्नुङ चेॽमि इक्के़ङ के़गु। येसुडे़ॽ चाङ्बॽआ चेॽमि इक्के़ङ के़क्मासोरोॽ खोमि हरि खे़ॽमे टुक्मवा नुघडा। 45येसुडे़ॽ सिप्सुजि, “का असे़ॽटे के़गिङे ?” तर चोबे़ॽ लुसुजि के़ॽको मे़ङ्के़क्टिॽ। मोबा पत्रुसडे़ॽ लुसु, “गुरुज्यु, हे़न गो याॽमिमि घुँइचोडे़ॽ इगिॽयु मिॽयुबाङ चोक्मे़ॽनिङ्सिम्मे।” 46तर येसुडे़ॽ लुसु, “का असे़ॽना असे़ॽको के़ॽइटिङे, इन्ढोङ्होङ काबाङ नुबुक्मे सक्ति खे़ॽपॽआ के़ॽ लेडोक्टुङ।” 47हागो का कुम्हेङानि ले़ए़ मिॽनुङ मो मेॽनामिॽ किस्सिमे़ॽ योङ्साङ येसुमि सराङ्बेॽ पोप्युसा। मोसे़ॽनोॽ येसु के़क्पॽआनुङ के़क्मासोरोॽ नुबोक्पॽआ खा चोप याॽमिजिमि पोम्बेॽ इःसु। 48येसुडे़ॽ मो मेॽनामिॽ लुसु, “होउ पसा, हे़ने़ए़ बिस्वासडे़ॽ हे़न नुबोइटे़, हागो नुरोॽ खडे।”
49येसुडे़ॽ इडोॽ लुमे़ॽनिङ्सिमाबेॽ याइरसमि खिमबाङ इक्को याॽमि लेन्नुङ याइरस लुसु, “हे़ने़ए़ सम्समा पसा सिघे़ॽपेटे़, हागो गुरु दुःख ए़ॽपिसे।” 50तर येसुडे़ॽ इगो खा खेम्नुङ याइरस लुसु, “ए़क्किसिने, बिस्वासरेॽनोॽ ले़टे! हे़ने़ए़ पसा हिङ्इये।” 51याइरसमि खिम रुक्नुङ येसुडे़ॽ पत्रुस, याकुब, युहन्नानुङ मो पिच्छामि पाबा मामाबाङ हाइखाजि असासो खिमहोङ्सिॽयु मे़आप्मेॽटुजि। 52मोबेॽ सुम्बॽआ चोबे़ॽ मो सम्समा पिच्छा सिघे़टे़ लुनुङ हाःप्साङ बिलौना इःमे़ॽनिङ्सिडामि। येसुडे़ॽ माहाजि लुसुजि, “ए़ॽहाबानिङे खोगो इम्डिघे़ए़टे़रेॽनोॽ, मे़सिघे़ॽटिॽ।” 53इगो खा खेम्नुङ माहा याॽमिजिडे़ॽ येसु यिटे़गुजि इन्ढोङ्होङ माहाजिडे़ॽ मो सम्समा पिच्छा चइबानोॽ सिघे़ॽपॽआ लुनुङ लेबेबॽआ ले़टे़। 54तर येसुडे़ॽ मो पिच्छामि हुकपेॽ राःप्नुङ लुसु, “होउ नानि, पुकाडे!” 55सम्समा पिच्छामि सोःक्मा टेजामासोरोॽ मो पुकडा। मोबाङ येसुडे़ॽ लुसु, “इगो पिच्छा चामा उङ्मा पिसानुमे”। 56मो पिच्छामि पाबा मामा खरि मिनाजि। तर येसुडे़ॽ मोजि “इगो खा हाइखाजि असासो ए़ॽलुमे!” लुओसुजि।
Currently Selected:
लुका 8: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
