युहन्ना 12
12
मरियमनुङ येसु
(मत्ति २६:६-१३; मरकुस १४:३-९)
1यहुदि छुट्कारा चाडमि चुक्चि याक याक्लो येसु बेथानिया खिम्डेमबेॽ लेस्सा, मोबेॽनोॽ याक्लो येसुडे़ॽ सिबॽआबाङ हिङ्बोक्पॽआ लाजरस पेने़। 2येसु लेम्बॽआसे़ॽ साप्थाङ्मानुङ खोजिडे़ॽ युडामि चामा उङ्मा ङिसुजि। मारथाडे़ॽ चाबाङ्जि चामा पिमे़ॽनिङ्सिडुजे, लाजरस चाहिँ येसुनुङ हाइखा चाबाङ्जिनुङ चामा चासिॽ पेम्बॽआ ले़टे़। 3मोबा मरियमडे़ॽ बेॽलो याङ सिॽइये जटामसिमि नाम्जानुबा केवा याङ्आप्नुङ येसुमि सराङ्बेॽ सिटिसु मोबा खोमि टाङ्डे़ॽ टुःक्पेॽटु। मो केवा मो खिम इॽठुप नप्सा।
4तर येसु धोका पिमामि पोरोक्खुबा चोङ्सा यहुदा इस्करियोतडे़ॽ लुसु, 5“इगो नाम्जानुये केवा सुम्जि सये सिसे़ङ्बेॽ#१२:५ सुम्जि सये सिसे़ङ्बेॽइडोॽ याङ चाहिँ इकनिङ ले़ःॽपॽआ योम्बोकमि निम्याडोक ले़टा इन्जानुङ इमाङ मे़ॽनिङ्हा याॽमिजि हाबेॽमा मे़म्फे़ने़ ?” 6तर मोसे़ॽ इमाङ मे़ॽनिङ्हाजि नम्नम मिॽनुङ हाबेॽमामि लुबॽआ ने़ॽनि। खो खुसुबाङ ले़टे़ इन्ढोङ्होङ याङ्मि याङ्सुप खोसे़ॽनोॽ खिसुए मोबा खोसे़ॽ मो याङ्सुपबाङ सानिङ याङ खुसुहा।
7येसुडे़ॽ लुसु, “खो योङ्मेॽटानुमे, खो इमाङ्सो ए़ॽलुसानुमे, इगोसे़ॽ इघा केवा सिॽनुङ का येःॽमाबेॽ हुम्मामि पोरोक्इटे़। 8इन्ढोङ्होङ इमाङ मे़ॽनिङ्हाजिगो सानिङ्नोॽ हे़निङ्नुङ पेङ्इम्मे, तर कागो हे़निङ्नुङ सानिङ पेङ्ङानि।”
9येसु बेथानियाबेॽ टुये खा लेडोक्नुङ बेॽलो यहुदिजि मोबेॽ लेस्सामि। माहाजि येसु खाङ्सिॽरेॽ ने़ॽनि, तर सिघे़ॽपॽआबाङ हिङ्बोक्पॽआ लाजरस खाङ्सिॽसो माहाजि लेम्बॽआ ले़टामे। 10मोडोगे़ॽ एप्पा याडाङ्बाजिडे़ॽ लाजरससो सेॽनेमे मोत्ता इःसुजि। 11इन्ढोङ्होङ लाजरस सिघे़ॽपॽआबाङ हिङ्बोक्पॽआसे़ॽ बेॽलो यहुदिजिडे़ॽ खोजिबाङ फाक्खे़ॽनुङ येसुबेॽ बिस्वास ले़ःॽपॽआ ले़टे़।
यरुसलेमबेॽ येसु आदरनुङ स्वागत ले़ःॽपॽआ
(मत्ति २१:१-११; मरकुस ११:१-११; लुका १९:२८-४०)
12वागियाराम छुट्कारामि चाडबेॽ लेङ्घुबा बेॽलो याॽमिजिडे़ॽ येसु यरुसलेम लेम्मे़ॽनिङ्सिये लुमे खा खेप्सुजि। 13मोबा माहा याॽमिजि खजुरमि हक्काम्बा याङ्मानुङ इडोॽ कासाङ येसुमि स्वागत ले़ःॽसिॽ लेस्सामि, “ओहाङ! ओहाङ#१२:१३ ओहाङ! ओहाङ गिरिक खाप्लाबेॽ होसन्ना! होसन्ना लुन्डुजे, इगो लुबॽआ चाहिँ कानिङ हिङ्मेॽमा! परमपरभुमि निङ्बेॽ लेङ्घुबा इस्राएलमि हाङ्बा आसिसनुङ्मा ले़ये!#भजनसङ्ग्रह ११८:२५-२६; सपन्याह ३:१५ ”
14मोबा येसु इक्को गधामि पसा सोक्पेॽ साङ्नुङ लेस्सा, इगोमि टुम्बेॽ धारमिक नेॽचिराबेॽ इडोॽ साप्पॽआ ले़ये-
15“हौउ यरुसलेमबेॽहा याॽमिजि, ए़क्किसिडानिङे! खाक्सानुमे, हे़निङ्मि हाङ्बा गधामि पसासोक्पेॽ साङ्नुङ आप्मे़ॽनिङ्सिये।”#१२:१५ “हौउ यरुसलेमबेॽहा याॽमिजि, ए़क्किसिडानिङे! खाक्सानुमे, हे़निङ्मि हाङ्बा गधा पसासोक्पेॽ साङ्नुङ आप्मे़ॽनिङ्सिये।”#जकरिया ९:९
16इघा खाडे़ॽ लुमायोक्पॽआ खा येसुमि चोङ्साजिडे़ॽ मे़लेसुजि। तर येसु खोमि महिमा लिनुङ ए़क्साङ इघा खा खोमि टुम्बेॽ साप्पॽआ ले़टा, मोबा इघा योम्बोक खोमि लागि माहाजिडे़ॽ ले़ःॽपॽआ लुनुङ चोङ्साजिडे़ॽ मिॽटुजि।
17येसुडे़ॽ येःॽमाबेॽ युङ्बॽआ लाजरस के़ःॽनुङ सिघे़ॽपॽआबाङ हिङ्बोक्पॽआ खाङ्घुबा याॽमिजिडे़ॽ मो खरिमा खा चइबानोॽ लिबॽआ लुमा मे़लेडुजि। 18मोडोक्मा खरिमा योम्बोक ले़ःॽपॽआ खा खेम्नुङ, बेॽलोनोॽ याॽमिजि येसु चुप्सिॽ लेम्बॽआ ले़टामि। 19मोबा फरिसिजि खोजिदाङ्बा काबोगामि, “खोइ कानिङे़ॽ इमाङ्सो मे़ले़ःॽहेसुङ्मा। खाक्सानुमे, चोप याॽमिजि खोमि लिघे़टामि!”
येसुडे़ॽ टाङ्बा सिमे टुम्बेॽ इःबॽआ
20मो छुट्कारामि चाडबेॽ ओहाङ ले़ःॽसिॽ लेङ्घुबाजिबेॽ गिरिक जातिहा आढा याॽमिजिसो यरुसलेमबेॽ लेम्बॽआ ले़टामे। 21खोजि गालिलमि बेथसेदाबाङ लेम्बॽआ फिलिपबेॽ लेन्नुङ लुसुजि, “हजुर, कानिङे़ॽ येसु चुप्मा मिॽइन्डुङ्मे़।” 22मोबा फिलिपडे़ॽ अन्दरियास लुनुङ मोजि निप्पाङ खे़ॽनुङ येसु लुसाजु। 23येसुडे़ॽ माहाजि लुसुजि, “याॽमिमि पसामि महिमा लिमे बेला लेम्बेटे़। 24चइबानोॽ, के़ॽ हे़निङ लुनिम्ने, सिचाम आक्खामाबेॽ सिॽनुङ मे़सिघे़ॽहोङ मो इक्कोरेॽ लिये। तर खो सिघे़ॽहोङ चाहिँ खोबाङ बेॽलो चा किङ्इहा। 25मोडोक्नोॽ टाङ्बामि हिङ्मवा बेॽलो नम्नम ले़ःॽखुबे़ॽ मो हिङ्मवा मे़चोबेन्डुए। तर टाङ्बामि हिङ्मवा इगो मक्खाम्डेमबेॽ इमाङ्सो ने़ॽनि मिॽखुबे़ॽ चाहिँ ए़ॽसिमे हिङ्मवा चुप्मिन्डुए। 26काङ्मि योम्बोक ले़ःॽमा मिॽखुबा कानुङ राम्मा खे़ये। का हाम्बेॽ हाम्बेॽ खे़ॽए़ङे, काङ्मि योम्बोक ले़ःॽमा मिॽखुबासो मोबेॽनोॽ खे़ॽमा खे़ये। काङ्मि पाबाडे़ॽ खो खाङ्इन्डुए।”
27 “हागो के़ए़ सोःक्मा सारोनोॽ खेःबेॽ सिॽइटे़, के़ॽ इमाङ लुमे ? ‘हे पाबा, का इगो खेःबाङ जोगबा ले़ःॽमा ?’ तर ने़ॽनि, कागो इगोमि लागिनोॽ लेङ्इटिङे। 28हे पाबा, हे़ने़ए़ निङ्मि महिमा ले़टे।”
मोबा थाङ्सिरिबाङ इडोक्मा सेम्ला कासा, “के़ॽ महिमा लाटुङेनुङ, फेरिसो लानुङे।”
29मोबेॽ सुम्बॽआ बेॽलो याॽमिजिडे़ॽ मोडोॽ काबॽआ सेम्ला खेम्नुङ लुसुजि, “इगो नान्द्रुङ्मा कासा!” आढाजिडे़ॽ लुसुजि, “थाङ्सिरिदुत खोनुङ यामुबॽआ!”
30तर येसुडे़ॽ माहाजि लुसुजि, “इगो सेम्ला के़ए़ लागि ने़ॽनि, हे़निङ्मि लागि ले़ये। 31हागो मक्खाम्डेममि न्याय लिमे याक लेम्बेटे़। हागो मक्खाम्डेमबेॽए दुस्टामि हाङ्बा पाखे़ॽयु राप्खे़ये। 32मोबा का माहाजिडे़ॽ मक्खाम्डेमबाङ ठेॽपोॽइम्मे, के़ॽ चोप याॽमिजि काबेॽ से़ॽए़नुङ्हाजि।” 33खो इन्डोॽ सिमा खे़ये, मो खामि टुम्बेॽ लुसु।
34माहा बेॽलो याॽमिजिडे़ॽ खो सिप्सुजि, “कानिङ्मि निवाहाङ्डे़ॽ पिबॽआ धारमिक नियमबेॽको खिरिस्टगो सानिङ हिङ्इये लुये। तर हे़ने़ॽ चाहिँ इन्डोक्टे लुहेन्डुए याॽमिमि पसा ठेॽपोक्मानोॽ खे़ये ? इगो याॽमिमि पसा चाहिँ असाडे ?”
35येसुडे़ॽ माहाजि लुसुजि, “हागो इॽछोॽ हे़निङ्नुङ जोति टुये, इगो जोति हे़निङ्नुङ टुरो राम्डुसानिङे। इन्ढोङ्होङ सेन्जुगुपडे़ॽ हे़निङ मे़न्टे़गुरो, सेन्जुगुपपेॽ राम्डुहोङ खो हाम्बेॽ खे़ॽमे़ॽनिङ्सिये लुनुङ लेसुनि। 36इन्डोक्लो जोति हे़निङ्नुङ टुये, मो जोतिबेॽ बिस्वास ले़टानुमे मोबा हे़निङ जोतिमि पसाजि ले़न्डानिङे।” इघा खा इःसेॽनुङ येसु मोबाङ खडा मोबा माहाजिबाङ कुम्नुङ पेना।
यहुदिजिमि अबिस्वास
37येसुडे़ॽ माहाजिमि पोम्बेॽ मोढे़ॽलो खरिहा योम्बोक ले़टु, तरसो माहाजिडे़ॽ खोबेॽ बिस्वास मे़ले़टुजि। 38यसैया अगमबक्ताडे़ॽ इडोॽ लुबॽआ बचन पुरा लिमा खडे़
“हे परमपरभु, कानिङ्मि खाबेॽ असे़ॽ बिस्वास ले़टुजे ?
मोबा परमपरभुमि सक्तिसालि योम्बोक असाबेॽ खाङ्मुसे़ ?”
39फेरि माहाजिडे़ॽ बिस्वास मे़ले़ःॽपॽआ खामि टुम्बेॽ यसैयाडे़ॽ इडोॽ लुटुए-
40“निवाहाङ्डे़ॽ माहाजिमि मिक टेक्चुम्बेटुजे
माहाजिमि निवा निस्ठुरि टोङ्बेबेॽटुजे।
मोडोगे़ॽ इघाजिडे़ॽ खाङ्डोक्टुजिने, निवे़ॽ लेसुजिने,
ने़ॽनिहोङ खोजि टेम्मे, मोबा के़ॽ नुबोक्मा खे़म्मे।#यसैया ६:१०”
41यसैयाडे़ॽ येसुमि महिमा याक्लोनोॽ खाङ्डोक्नुङ्नोॽ खोमि टुम्बेॽ लुटुए।
42बेॽलो यहुदि अगुवाजिडे़ॽ बिस्वासगो ले़टुजि, तर फरिसिजिमि किस्सिमाडे़ॽनुङ यहुदिजि सुम्ढाम खिमबाङ यिॽइम्मे लुनुङ किस्सिमावे़ॽ बिस्वास मे़ले़टुजि। 43इन्ढोङ्होङ माहाजिडे़ॽ निवाहाङ्डे़ॽ ले़ःॽमे ओहाङ्बाङ याॽमिजिबाङ चुप्मिये ओहाङ बेॽलो नेन्जोसुजे।
बिस्वास मे़ले़ःॽखुबा आप्टिकनुङ्मा लिये
44येसुडे़ॽ बेॽए सेम्लाडे़ॽ लुसु, “का बिस्वास ले़ःॽखुबे़ॽ कारेॽ ने़ॽनि, तर का पाङ्घुबासो बिस्वास ले़न्डुए। 45असे़ॽ का खाङ्डोक्इये, मोसे़ॽ का पाङ्घुबासो खाङ्डोक्इन्डुए। 46का मक्खाम्डेमबेॽए जोति ले़ङे। काबेॽ बिस्वास ले़ःॽखुबाजि सेन्जुगुपपेॽ मे़सिॽरो लुनुङ का लेङ्इटिङे। 47काङ्मि बचन खेम्नुङ पालना मे़ले़ःॽखुबाजि न्याय ले़ःॽसिॽ का लेम्बॽआ ने़ॽनि। तर मक्खाम्डेमबेॽहा याॽमिजि हिङ्मेॽसिॽ लेङ्इटिङे। 48का बिस्वास मे़ले़ःॽखुबानुङ काङ्मि खा मे़खेम्खुबामि न्याय ले़ःॽखु इक्को टुये। के़ॽ लुबॽआ बचनडे़ॽनोॽ ए़क्साङ्ए यिडे़ॽ मो न्याय ले़न्डुए। 49इन्ढोङ्होङ इघा के़ॽ लुबॽआ खा काङ्मि निवाबाङ लुबॽआ ने़ॽनि। तर का पाङ्घुबा पाबाडे़ॽनोॽ के़ॽ इमा लुमेनुङ यामुमा खे़ये लुनुङ का आग्या पिहाङ्इटिङे। 50के़ॽ लेनुङे़, पाबामि आग्याडे़ॽ ए़ॽसिमे हिङ्मवा पिये। मोडोगे़ॽ के़ॽ लुमाबेॽ पाबाडे़ॽ लुमेॽपॽआ खानोॽ इःनुङे।”
Currently Selected:
युहन्ना 12: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
