युहन्ना 11
11
लाजरस सिबॽआ
1लाजरस लुमे इक्को याॽमि टुक्पॽआ ले़टा। खो मरियमनुङ मारथा निप्पाङ नानाजिनुङ बेथानियाबेॽ पेने। 2याक्लो इक्खेॽ येसुमि सराङ्बेॽ नाम्जानुये केवा सिॽनुङ खोमि टाङ्डे़ॽ टुःक्पेॽखुबा मरियम इगोनोॽ ले़टे़, मोमिन्नोॽ निसा लाजरस टुगे़। 3खोमि नानाजिडे़ॽ इडोॽ लुनुङ येसुबेॽ लम्बवाँ पाक्सुजि “परभु, हे़ने़ॽ नम्नम ले़ःॽपॽआ याॽमि लाजरस टुॽइये।”
4तर इगो लम्बवाँ खेम्नुङ येसुडे़ॽ लुसु, “इगो टुक्मवाडे़ॽ याॽमि सेॽनेसुनि, तर इगोबाङ निवाहाङ्मि महिमा लिरो लुनुङ लिटे़, इगोबाङ निवाहाङ्मि पसामि महिमा लिरो।” 5येसुडे़ॽ मारथा, मरियमनुङ खोजिमि निसा लाजरस बेॽलो नम्नम ले़टुजे। 6तरसो येसुडे़ॽ लाजरस टुॽइये लुमे खा खेम्नुङ्सो फेरि नियाक मोबेॽनोॽ पेना। 7मोबा ए़क्साङ येसुडे़ॽ खोमि चोङ्साजि लुसुजि, “लो, हागो कानिङ फेरि यहुदिया ठाउँबेॽनोॽ टेघडि।”
8खोमि चोङ्साजिडे़ॽ लुसुजि, “गुरु, आसेङ्नोॽ मोबेॽहा यहुदिजिडे़ॽ हे़न रुङ्गोॽवाडे़ॽ फे़ङ्नेमा योॽइटामे। फेरि हे़न मोबेॽनोॽ खे़ॽमा योॽइये ?”
9येसुडे़ॽ माहाजि लुसुजि, “इमा लेन्डा बारो घन्टा टुहा ने़ॽने ? लेन्डा राम्घुबामि सराङ रुङ्गोॽवाबेॽ ठोःक्निबा, इन्ढोङ्होङ खोजिडे़ॽ इगो मक्खाम्डेममि जोति चुप्मिटुजे। 10तर सेन्डा राम्घुबामि चाहिँ सराङ ठोःइन्डुए, इन्ढोङ्होङ मो याॽमिनुङ उज्यालो माॽआये।”
11मोबा ए़क्साङ येसुडे़ॽ लुसु, “कानिङ्मि लङ्गाम लाजरस इम्डिघे़टे़, हागो खो इम्माबाङ हुम्बोक्सिॽ मोबेॽ खे़ॽए़ङे।”
12चोङ्साजिडे़ॽ लुसुजि, “परभु, खो इम्डिघे़ॽपॽआहोङ गो नुबोक्इये।”
13येसुडे़ॽ चाहिँ लाजरस सिघे़टे़ लुबॽआ ले़टे़, तर चोङ्साजिडे़ॽ चाहिँ चइबानोॽ खो इम्माबेॽनोॽ टुये मिॽटुजि। 14मोडोगे़ॽ येसुडे़ॽ माहाजि छे़ङ्गै लुसुजि, “लाजरस सिघे़ॽपेटे़। 15हे़निङ्मि बिस्वास बेॽलो लिरो लुनुङ्नोॽ का मोबेॽ चान्डो मे़ङ्खे़ॽपॽआ। मोडोगे़ॽ का साप्थाङ्इङे, हागो कानिङ खो टुढामबेॽ खडि।”
16मोबा दिदुमस निङ्मा याॽमि थोमाडे़ॽ खोमि लङ्गामजि लुसुजि, “लो कानिङ्सो गुरुनुङ सोरि खे़ॽमा, सिमा सिॽहोङ्सो खोनुङ्नोॽ सिमा।”
येसुडे़ॽ सिमवा हेजाबॽआ
17येसु बेथानियाबेॽ लेम्माबेॽ लाजरस येःॽमाबेॽ युङ्बॽआ रियाक याक्खे़ॽपॽआ खा लेडोक्टु। 18यरुसलेमबाङ बेथानिया सुम्जि किलोमिटर ओः सिॽटे़। 19यहुदिया ठाउँबाङ बेॽलो याॽमिजि मारथानुङ मरियममि निसा लाजरस सिबॽआसे़ॽ पेम्माराप्सिॽ लेम्बॽआ ले़टामे। 20येसु आप्मे़ॽनिङ्सिये लुमे खा खेम्नुङ मारथा राम्बेॽनोॽ चुप्सिॽ खडा, तर मरियम चाहिँ खिमबेॽनोॽ पेना। 21मोबा मारथाडे़ॽ येसु चुप्नुङ लुसु, “परभु, हे़न इगोबेॽनोॽ टुसाहोङ्गो काङ्मि निसा लाजरस मे़सिसा होला। 22तर हागोसो के़ॽ लेनुङे़, हे़ने़ॽ निवाहाङ्नुङ इमाङ ङागुहोङ्सो, मो निवाहाङ्डे़ॽ हे़न पिये।”
23येसुडे़ॽ मारथा लुसु, “हे़ने़ए़ निसा लाजरस फेरिसो हिङ्बोॽइये।”
24मारथाडे़ॽ लुसु, “के़ॽ लेनुङे़, ए़क्साङ्ए याकपेॽ चोपनोॽ सिबॽआबाङ हिङ्बोक्इम्मे मोडोक्पेॽ के़ए़ निसासो हिङ्बोॽइये।”
25येसुडे़ॽ खो लुसु, “सिघे़ॽपॽआजि हिङ्बोक्खुबानुङ ए़ॽसिमे हिङ्मवा पिघुबा कानोॽ ले़ङे। काबेॽ बिस्वास ले़ःॽखुबा सिघे़ॽहोङ्सो मो हिङ्बोॽइये। 26मोबा काबेॽ बिस्वास ले़ःॽनुङ हिङ्बोक्खुबाजि इन्डोक्पेॽसो सिमिने। इमा हे़ने़ॽ इगो खाबेॽ बिस्वास ले़न्डुए ?”
27मारथाडे़ॽ येसु लुसु, “इँहिॽ परभु, हे़न मक्खाम्डेमबेॽ लेङ्घुबा निवाहाङ्मि पसा मुक्ति पिघुबा खिरिस्ट ले़ये लुनुङ के़ॽ बिस्वास ले़नुङे।”
28मोबा मारथा खे़ॽनुङ खोम निसा मरियम खुस्रिङ्मु लुसु, “गुरु लेम्बेटा, हे़न के़ःॽमे़ॽनिङ्सिये।” 29इगो खा खेम्मासोरोॽ मरियम येःपोक्नुङ येसुबेॽ खे़ॽपेसा। 30मोडोक्रो येसु खिम्डेमबेॽ रुक्पॽआ मे़ले़टा। खोगो मारथाडे़ॽ चुप्पॽआ ठाउँबेॽनोॽ टुसिडा। 31मरियम सुवाक्टोॽ येःपोक्नुङ चान्डो चान्डो पाखे़ॽयु खे़ॽपॽआ खाङ्नुङ, मोबेॽ पेम्माराप्सिॽ लेम्बॽआ यहुदिजिडे़ॽ इगो मरियम खोम निसामि येःॽमाबेॽ हाःप्सिॽ खे़ॽए़टे़ मिॽनुङ खोमि ए़ङ्गुवा ए़ङ्गुवा खडामि।
32मोबा मरियम येसु टुढामबेॽ रुक्नुङ येसुमि सराङ्बेॽ ओप्युनुङ इडोॽ लुसु, “हे परभु, हे़न इगोबेॽनोॽ टुसाहोङ्गो के़ए़ निसा लाजरस मे़न्सिसा होला।” 33मरियम मोबा खोनुङ लेङ्घुबा यहुदिजिसो हाःप्पॽआ खाङ्नुङ, येसुमि निवासो सारोनोॽ टुगा मोबा खो दुःखि लिसा। 34येसुडे़ॽ माहाजि सिप्सुजि, “हे़निङे़ॽ लाजरस हाम्बेॽ युङ्इटानुमे ?”
माहाजिडे़ॽ खो लुसुजि, “परभु, आप्नुङ खाक्से।”
35मोबा येसु हाबा।
36मो खाङ्नुङ माहा यहुदिजि खोजिदाङ्बा कासामि, “खाक्सानुमे, येसुडे़ॽ लाजरस इन्डोक बेॽलो नम्नम ले़न्डुए ले़ः।”
37तर आढाजिडे़ॽ लुसुजि, “इमा मिक मे़ए़ॽखुबामि मिक नुबोक्खुबा इगोनोॽ ने़ॽने ? इगोसे़ॽ इन्ढोङ लाजरस हिङ्रिक मे़युङ्हेसुए ?”
38मोबा येसु बेॽलो दुःखि लिनुङ लाजरसमि येःॽमाबेॽ खडा। इगो येःॽमा इक्को रुम्मुकपेॽ टुसे, मो होङ्सिॽयु खे़ॽठामबेॽ इक्को बेॽए रुङ्गोॽवाडे़ॽ टे़क्पॽआ ले़टा। 39येसुडे़ॽ लुसुजि, “इगो रुङ्गोॽवा सेनानुमे।”
मोडोक्पेॽ लाजरसमि नाना मारथाडे़ॽ येसु लुसु, “परभु, आयुरोगो इगो किम्घे़ॽनुङ्सो नाम्बोॽइटा होला, इन्ढोङ्होङ खो युबॽआगो आयु रियाक याक्खे़टे़।”
40येसुडे़ॽ मारथा लुसु, “इमा के़ॽ हे़न लुबॽआ ने़ॽने, ‘हे़ने़ॽ बिस्वास ले़टुहोङ निवाहाङ्मि महिमा खाङ्डोॽइन्डुए।’”
41मोडोगे़ॽ माहाजिडे़ॽ मो रुङ्गोॽवा सेम्बेसुजि, मोबा येसुडे़ॽ थाङ्सिरिॽटु खाङ्साङ लुसु, “हे पाबा, के़ॽ हे़न ओहाक पिन्ने़, इन्ढोङ्होङ हे़ने़ॽ काङ्मि बिन्ति खेम्इटुए। 42के़ॽ लेनुङे़, हे़ने़ॽ काङ्मि बिन्ति सानिङ खेम्इन्डुए। हे़ने़ॽनोॽ का पाङ्बॽआ लुनुङ इगोबेॽ टुघुबा चोबे़ॽ बिस्वास ले़टुजिरो लुनुङ इगो खा लुनुङे।” 43इडोॽ लुसेॽनुङ येसु इडोॽ कासाङ बेॽए सेम्लाबेॽ वोसा, “लाजरस, पाखे़ॽयु आबे!” 44मो सिघे़ॽपॽआ लाजरस हुक सराङ हिःक्पॽआ, नजिक चेॽडे़ॽ यिप्पॽआनुङ्नोॽ पाखे़ॽयु आबा। येसुडे़ॽ माहाजि लुसुजि, “आक्कोमि सिचेॽ हेम्बेबेॽनुङ खो खे़ॽमेॽटानुमे।”
बिस्वासनुङ बिरोध
(मत्ति २६:१-५; मरकुस १४:१,२; लुका २२:१,२)
45मरियम चुप्सिॽ लेङ्घुबा बेॽलो याॽमिजिडे़ॽ येसुडे़ॽ ले़ःॽपॽआ माहा योम्बोक खाङ्नुङ खोबेॽ बिस्वास ले़टुजि। 46तर माहाजिबेॽ इन्डोक जनाडे़ॽ चाहिँ फरिसिजिबेॽ खे़ॽनुङ, येसुडे़ॽ ले़ःॽपॽआ योम्बोकमि टुम्बेॽ इःबेॽटुजि। 47मोबा एप्पा याडाङ्बाजिनुङ फरिसिजिडे़ॽ यहुदिजिमि बेॽए सभाबेॽहा याॽमिजि के़ःॽनुङ लुसुजि, “हागो कानिङे़ॽ इमाङ ले़ःॽमे ? इन्ढोङ्होङ इगो याॽमिडे़ॽको बेॽलो खरिहा योम्बोक ले़ःॽमे़ॽनिङ्सिन्डु। 48इगो याॽमि इडोक्नोॽ योङ्मेॽमाहोङ्गो चोप याॽमिजिडे़ॽ खोबेॽ बिस्वास ले़न्डुजे। मोबा रोमि तिरिङ्गाजि लेन्नुङ कानिङ्मि मन्दिर योबेबेम्मेनुङ कानिङ्मि जातिजिसो नासि ले़न्डुजे।”
49तर माहाजिबेॽ कैयाफा निङ ले़ःॽखुबा इक्को याॽमि टुसे़। मो निङ खो चोप्पाङ एप्पा याडाङ्बा ले़टे़, मोसे़ॽ माहाजि लुसुजि, “हे़निङे़ॽ इमाङ्सो लेसानुम्ने! 50चोप यहुदि जातिनोॽ नासि लिमाबाङ नुबागो इक्को याॽमि सिमानोॽ चुये लुमे खा हे़निङे़ॽ लेसानुम्ने।”
51खोसे़ॽ इगो खा खोमटाङ्बे़ॽ लुबॽआ ने़ॽनि, तर मो निङ खो चोप्पाङ एप्पा याडाङ्बा ले़टेन्से़ॽ मो देसबेॽहा जनतामि लागि येसु सिमा खे़ये लुमे अगमबानि इःबॽआ ले़टे़। 52मो देसबेॽहा याॽमिजिमि लागिरेॽ ने़ॽनि, तर हाम्बेॽको हाम्बेॽ टुप्खे़ॽपॽआ निवाहाङ्मि याॽमिजि इक्को ठाउँबेॽ सुम्मामि लागि इडोॽ लुबॽआ ले़टा। 53मोबा मो याकबाङ माहाजिडे़ॽ येसु सेॽमामि दाउ योक्पोगुजि।
54मोडोगे़ॽ येसु मो याकबाङ हाम्बेॽको हाम्बेॽ मे़ङ्खडा। मोबा रे़क्रे़क्मा ठाउँमि के़क्पेॽ सिॽइये एफ्राइम लुमे सहरबेॽ खे़ॽनुङ खोमि चोङ्साजिनुङ मोबेॽनो पेना।
55यहुदिजिमि छुट्कारामि चाड लेङ्सिॽपोरोक्पॽआ ले़टेन्से़ॽ, चोप खिम्डेमराजिबाङ बेॽलो याॽमिजि टाङ्बा चोखो लिमामि मो चाडमि याक तरिक्मा याक्लोनोॽ यरुसलेमबेॽ लेस्सामि। 56माहाजिडे़ॽ मोबेॽ येसु लेन्डेन्डे लुनुङ योगुजि, मन्दिरबेॽ सुम्माबेॽ खोजिदाङ्बा कासामि, “हे़निङे़ॽ इन्डोॽ मिॽइन्डानुमे, इमा येसु इगो चाडबेॽ लेङ्इये ?” 57एप्पा याडाङ्बानुङ फरिसिजिडे़ॽ चाहिँ येसु राःप्मामि “खो हाम्बेॽ टुये लेडोक्नुङ कानिङ लम्बवाँ पिमा” लुनुङ लुबॽआ ले़टामे।
Currently Selected:
युहन्ना 11: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
