मात्ति 8
8
कोरङा याक्सुना याॽमि नुयाना
(मार्कुस १:४०-४५; लुका ५:१२-१६)
1येसु कोङ्गुभाङ् मो उक्साहोङ् प्याक याॽमिचि उका हेक्साङ् लान्जोगा॥ 2ङ्खिङ्बेला एको कोरङा याक्सुना याॽमि तायाहोङ् येसुगा ओन्दाङ् लाङ्छुकपे युङाहोङ् खाॽला लु, “चिन्खुबा, न्दा मितागाभोङ् का नुमेॽमा यामेङ्गाना॥”#८:२ याहुदिगा चालानबे कोरङा याक्सुना याॽमि आसुद्दा साया, न्हाङ् ङ्खाचिङा हेकोहा याॽमिचिगा उयुम्बे खेॽमा न्दोक्तुनिन॥
3येसुङा उमुक सोसुहोङ् न्ना याॽमि तोक्ति, न्हाङ् खाॽला लु, “का मिमेङ्, न्दा नुयाब्या॥” ङ्खिङ्बेलामाङ् न्ना कोरङा याक्सुना याॽमि नुयाब्या॥ 4न्हाङा येसुङा न्ना याॽमि लु, “सो, खा चेॽया इसा चा ङ्योक्मेतुन्चिन॥ ङ्खाॽनिङ्गो ख्याघोङ् हाङ्खुबा जाच चोक्मेतु न्हाङा मोसाङा पिइघा नियामबे छेप्ताहा लोॽवा भेटि तिसु॥ खाॽला घाक याॽमिचिङा न्दा नुयागाना न्निगानि॥”#लेबि १४:१-३२
रोमि केप्टेनगा नोकोर नुयाना
(लुका ७:१-१०)
5येसु काफार्नाहुम साहारबे उयानिङ् एको रोमि केप्टेन उङ् वायानाबे तायाहोङ् उमुक फाक्साङ् खाॽला लु, 6“ओ हाङ्बा, आका नोकोर उलाङ्-उमुक मेन्दाखुबा लेक्सामाहोङ् तुक्नुङ् तुखि आङ्मासिमेॽना॥ खिङ्बेला उङ् पाङ्बे इप्सानेसाना॥”
7येसुङा केप्टेन लु, “का खेमेङ्होङ् नुमेत्वाङ्ना॥”
8ङ्खाॽनिङ्गो केप्टेनङा लु, “हाङ्बा, का लोॽवाना माङ्चुमाङ्ना याॽमिङा, न्दा आपाङ्बे स्वागात चोक्मा न्थेन्सिमेॽङान्ना॥ न्दा नाभाङ् ‘नुनि’ से लुताब्याङ् न्हाङ् आका नोकोर नुमेॽना॥#८:८ याहुदिचि हेकोहा जातिचिगा पाङ्बे ङ्ङुमेनिन्हा बाङ्ना चेॽया केप्टेनङा था वाया॥ 9इजाङ्बाङ्निङ् का चा का हाक्निङ् माम्माहा याॽमिचिगा तायेनबे वेॽङा, न्हाङा आका तायेनबे चा काङ्बाचि ङ्वान्ने॥ का एको ‘ख्या’ ल्वाङ्, न्ना खेमे, हेकोना ‘आबा’ ल्वाङ् न्ना आम्मे, न्हाङ् आका नोकोर ‘खाॽला चोगु’ ल्वाङ्, न्हाङा न्नाङा चोग्वा॥”
10खा चेॽया खेप्सुहोङ् येसु आच्चाम्मा एता, न्हाङा उङ्नुङ् न्लाम्मास्याहा याॽमिचि लुचि, “जेप्पा का न्निङ्दा लुमेॽनेनिन, खाॽलाना बिस्वास नुङ्ना याॽमि गो का इजिरेलिचिगा उलुम्बे चा न्दुप्सुक्सुङान्ना॥ 11जेप्पा का लुमेॽनेनिन, नाम्लोन नुङ् नाम्युङ्भाङ् प्याक याॽमिचि वालोक्का राज्याबे न्दामे, न्हाङ् ङ्खाचि आब्राहाम, इसाहाक, याकुबनुङ् सोरि होक्ता चासे ङ्युङ्मेहा॥#लुका १३:२९ 12ङ्खाॽनिङ्गो निङ्वाफुमागा राज्याबे वामागा न्सेगाहा इजिरेलिचि च्हेन न्नाभाङ् पाखा कुइम्नाबे न्लेम्नाहाङ्मे, न्हाङा न्नाबे ङ्खाचि उङ्चि केङ् छिम्साङ् ङ्हाम्नुङ्मेहा॥”#मात्ति २२:१३; २५:३०; लुका १३:२८-२९
13न्हाङा येसुङा न्ना केप्टेन खाॽला लु, “ख्या, न्दा बिस्वास चोगुघा लोॽवा लेङ्नि॥” ङ्खिङ्बेलामाङ् केप्टेनगा नोकोर नुयाब्या॥
प्याक याॽमिचि न्नुयाहा
(मार्कुस १:२९-३४; लुका ४:३८-४१)
14न्हाङा येसु पात्तुरुसका उपाङ्बे ताया॥ ङ्खिङ्बेला येसुङा पात्तुरुसका उनाम्मा जोरो तायाहोङ् इप्सामासाना निसु॥ 15येसुङा पात्तुरुसका उनाम्मा उमुकपे तोक्ति, तोक्तिहोङ् सोलोक जोरोङा नाओ॥ न्हाङा उङ् पोगाहोङ् येसुगा सेवा चोक्मा तारोक्तु॥
16नाम आयाहोङ् याॽमिचिङा इसिॽहा मुइङा याक्सुचिहा प्याक तुखाबाङ्चि येसु वायानाबे न्दाचि॥ येसुङा आग्गे पिचिहोङ् ङ्खा इसिॽहा मुइ लोन्धाक्सुचि, न्हाङ् घाक तुखाबाङ्चि नुमेतुचि॥ 17खाॽला निङ्वाफुमाभाङ् चेक्खुबा यासाइयाङा चेक्तुहा खा चेॽया पुरा लेक्साहा–
“उङामाङ् एङ्गा सालुङ्बेॽहा तुखिभाङ् फोक्सा,
न्हाङ् एङ्गा तुक्मा-छाक्मा पोघेतुहा॥”#यासाइया ५३:४
येसुगा चेला लेङ्मा छाक्हा
(लुका ९:५७-६२)
18येसुङा उका ओरिपोरि प्याक याॽमिचि न्छुप्साहा निसुचिहोङ् उका चेलाचि लुचि, “कानिङ् तालगा योप्पारिक खेइ॥” 19ङ्खिङ्बेला धार्मासाप्ला चिन्खुबा एको याॽमि तायाहोङ् येसु लु, “चिन्खुबा, न्दा हेॽने खेक्काहोङ्चा का न्दानुङ् खेमेङ्ना॥”
20येसुङा न्ना पोलोवा पि, “स्यालचिगा चुम्दिॽमाहा ओहोङ् ङ्वान्ने, न्वाकुच्याकचिगा ओहोप ङ्वान्ने, ङ्खाॽनिङ्गो याॽमिगा उच्यागा गो टुखुरुक युङ्माना ठोङ् चा मान्ना॥”
21न्हाङा उका चेलाचिबे एकोङा येसु खाॽला लु, “हाङ्बा, का ओन्दाङ् आप्पागा लास हुम्मा पियाङ्॥”
22ङ्खाॽनिङ्गो येसुङा न्ना लु, “न्स्याहाचि न्स्याहाचिङा माङ् ङ्हुम्दुचिनि, न्दा च्हेन आहेक्साङ् लाचोगा॥”
येसुङा कुहिक लामेतुना
(मार्कुस ४:३५-४१; लुका ८:२२-२५)
23येसु डुङ्गाबे थाङा, न्हाङ् उका चेलाचि चा उङ्नुङ् ङ्ख्या॥ 24ङ्खेॽमास्यानिङ् थाप्थुम्बे तालबे किॽमालुलुना कुहिक फेम्मा तारोक्तु, न्हाङ् माङ्च्वागा छालङा डुङ्गा लुप्सेतेहेक्सुसा॥ ङ्खाॽनिङ्गो ङ्खिङ्बेला येसु च्हेन इप्साख्यामासा॥ 25न्हाङा चेलाचि येसुगा उयुम्बे ङ्ख्याहोङ् खाॽला लुसाङ् उङ् म्बोगु, “हाङ्बा, कानिङ् हिङ्मेता, कानिङ् लुप्सिखेइहेक्सिङाहा॥”
26येसुङा ङ्खाचि लुचि, “इजाङ् किसितिॽवाघा? हेॽनाइ न्निङ्गा बिस्वास?” खिङ् लुचिहोङ् येसु पोगा न्हाङ् कुहिक नुङ् छाल थिन्दुचि॥ थिन्दुचिहोङ् सोलोक कुहिक लासाख्या न्हाङ् छाल चा पोक्मा लेप्ति॥
27खाॽला लेक्साहा न्निसुहोङ् घाक आच्चाम्मा ङ्ङेता, न्हाङ् उङ्चि-उङ्चि खाॽला लुखुसा न्जाया, “ना गो इमिन्ना याॽमि लेबा? छाल नुङ् कुहिकङा चा उका चेॽया ङ्येन्वाहा!”
इसिॽहा मुइङा याक्सुचिहा याॽमिचि
(मार्कुस ५:१-२०; लुका ८:२६-३९)
28येसु तालगा योप्पारिक गादारिनि बाङ्ना लिङ्खामबे तासुनिङ्, सियापाङ्भाङ् आप्मास्याचिहा हिप्पाङ् इसिॽहा मुइङा याक्सुचिहा याॽमिचिङा तुप्साचु॥ ङ्खाचि खिङ् किॽमालुलु सायाचि, किसिॽमाङा न्ना लाम्बु इसा चा लाम्मा ङ्यासामासानिन॥ 29ङ्खाचि खाॽला कासाङ् ओक्ताचि, “ओ निङ्वाफुमागा उच्या, कान्चिङ् इ चोघेक्साघा? निरिक चोक्माना लेनमाङ् मेन्दाले कान्चिङ् आङ्मा मेयामाहा तुखि पिसे तायागानायि?”
30न्नागा मियोरोक फाकचिगा एको बागाल चारान्जोक्मास्या॥ 31ङ्खा इसिॽहा मुइचिङा उङ्चि मुक फाक्साङ् न्लु, “कानिङ् लोन्नाहाङ्मेकाहा भोङ् ङ्खा फाकचिबे उमा पिया॥”
32येसुङा ङ्खाचि लुचि, “ख्यानि!” ङ्खिङ्बेलामाङ् इसिॽहा मुइचि ङ्खा याॽमिचिभाङ् न्लोन्दाख्याहोङ् फाकचिबे ङ्ङुया॥ न्हाङ् ङ्खा फाकचिगा बागाल घाक भिरिकपाहाङ् मो उइमालाङ्-उइमालाङ् लुक्साङ् ङ्ख्याहोङ् तालगा माङ्च्वाबे न्लुप्सास्या॥
33न्हाङा ङ्खा फाक कोप्खुबाचि साहारपोटि न्लुक्ताख्या॥ साहारबे न्दासुहोङ् न्नाबे लेक्साहा घाक चेॽया नुङ् इसिॽहा मुइङा याक्सुचिहा हिप्पाङ् याॽमि इमिन नुयाचिहा, ङ्खा चेॽया चा ङ्खेम्मेतुचि॥ 34खा चेॽया ङ्खेप्सुहोङ् साहारबेॽहा प्याक याॽमिचि येसु वायानाबे न्दाया, न्हाङा उङ्चिङा येसु न्निसुहोङ् “आनिङ्गा ठोङ् नाओघोङ् खेब्या!” लुसाङ् उङ्चि मुक म्फाक्तुचि॥
Currently Selected:
मात्ति 8: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
