मात्ति 7
7
याॽमिचि आप्दिक ङ्ङेन्दानुम्चिम्निन
(लुका ६:३७-३८,४१-४२)
1येसुङा हाकुचा लुसाङ् ख्या, “न्निङ्दा याॽमिचि आप्दिक ङ्ङेन्दानुम्चिम्निन, न्हाङ् निङ्वाफुमाङा चा न्निङ्दा आप्दिक ङ्ङेन्दिॽवागान्हा॥ 2इजाङ्बाङ्निङ् हेकोहा याॽमिचि आप्दिक एन्द्वाम्चिम्घा लोॽवा निङ्वाफुमाङा चा न्निङ्दा आप्दिक एन्दिॽवाघा॥ न्निङ्दा हेॽना नापङा याॽमिचि पिवाम्चिम्गा, न्ना नापङामाङ् निङ्वाफुमाङा चा न्निङ्दा पिइवाघा॥#मार्कुस ४:२४
3 “इजाङ् न्नुन्छागा उमिकपेॽना मिना सिन्का निस्वागा, ङ्खाॽनिङ्गो ङ्गा म्मिकपेॽना मुढा च्हेन न्निस्वागान्ना? 4ङ्गा मिकपेॽना मुढा मेनिखुबाङा, ‘आनुन्छा सोङ्सोङ्, का म्मिकपेॽना सिन्का लोन्नाहाङ्बिमेॽनेन्ना’ भोङ् इमिन लुॽमा यास्वागाना? 5ओ किहि काप्खुबा! ओन्दाङ् म्मिकपेॽना मुढा लोन्धाक्सु, न्हाङा से न्नुन्छागा उमिकपेॽना सिन्का उचुन निस्वागाहोङ् लोन्नाहाङ्मा यास्वागाना॥
6 “पाबित्तारा थोक कुचुमाचि म्बियानुम्चिम्निन, पिम्चिम्गाभोङ् ङ्खाचि न्निङ्दा पोटि ङ्हिङ्होङ् हाइबिइगा॥ न्निङ्गा वालोक्लुङ् फाकचिगा ओन्दाङ् न्लेप्ताबियानुम्चिम्निन, लेप्तुबिम्चिम्गाभोङ् ङ्खाचिङा म्बाताहाक्स्वाहा॥
नाक्तानुम, योगानुम न्हाङ् ढ्वाक्ढ्वाक चोगानुम
(लुका ११:९-१३)
7 “नाक्तानुम न्हाङ् तोक्त्वाम्गा, योगानुम न्हाङ् तुप्स्वाम्गा, ढ्वाक्ढ्वाक चोगानुम न्हाङ् न्निङ्गा लागि वालाम्बुङ् होमेॽना॥ 8इजाङ्बाङ्निङ् इसाङा नाक्त्वा न्नाङा तोक्त्वा, इसाङा योग्वा न्नाङा तुप्स्वा न्हाङ् इसाङा वालाम्बुङ् ढ्वाक्ढ्वाक चोग्वा न्नागा लागि वालाम्बुङ् होमेॽना॥ 9न्निङ्दा माध्येबे इसाङा न्निङ्च्याचिङा चालेप्पा न्नाक्त्वानिङ् लुङ्खाक पिवाम्चिम्घा? 10न्हाङ् नासा न्नाक्त्वानिङ् पुछाक पिवाम्चिम्घा? 11खाॽला न्निङ्दा पापि याॽमिसिगानहोङ्चा न्निङ् च्याचि उचुन्हा थोक पिॽमा निस्वाम्चिम्घाभोङ्, वालोकपे वाखुबा न्निङ्पा गो झान उङ्नुङ् नाक्खुबाचि ङ्खा हाक्निङ्चा उचुन्हा थोक पिॽमा जेप्पा त्यारिना॥
छुछुॽना वालाम्बुङ्
(लुका ६:३१; १३:२४)
12 “याॽमिचिङा न्निङ्दा इमिन चोक्नि मितिॽवागा, न्निङ्दा चा उङ्चि ङ्खाॽलामाङ् चोगानुम्चिम॥ इजाङ्बाङ्निङ् ब्यावास्था नुङ् निङ्वाफुमाभाङ् चेक्खुबाचिङा न्जिन्दुचिहा मुख्या चेॽया खामाङ् ओम॥ #
लुका ६:३१
13 “छुछुॽना वालाम्बुङ्भाङ् उयानि, इजाङ्बाङ्निङ् नासपे तामेखुबा वालाम्बुङ् माडा नुङ् लाम्मा साजिलोना, न्हाङा न्ना लाम्बु प्याक याॽमि न्लाम्मेहा॥ 14ङ्खाॽनिङ्गो हिङ्लुङ्बे तामेखुबा वालाम्बुङ् छुछुॽना॥ न्ना लाम्बु लाम्मा चा छाक्हा, न्हाङ् न्ना लाम्बु मिॽयाङ्से याॽमि न्लाम्मेहा॥
सिङ् नुङ् न्नागा उसा
(लुका ६:४३-४६; १३:२५-२७)
15 “निङ्वाफुमाभाङ् चेक्खुबासिङान कासाङ् लेम्चाखुबाचिभाङ् थाङ्थाङ् वायानि॥ ङ्खाचि सामुङ्चि लोॽवा न्लेङ्दारामे, ङ्खाॽनिङ्गो उङ्चि निङ्वाबे च्हेन किॽमालुलुहा ब्वासो लोॽवाहा न्सामेहा॥ 16ङ्खाचि न्निङ्दा उङ्चिगा कामभाङ् चिनाचोग्वाम्चिम्घा॥ इना तिङ्गिभाक्का उथाप्पे सिम्लेॽमाङ् केक्स्वाहायि? न्हाङ् बिजुगा उथाप्पे वेक्पु केक्स्वाहायि? 17ङ्खाॽलामाङ् साप्रा चोगाना सिङ्गा उथापङा उचुन्हा उसा केक्स्वा, ङ्खाॽनिङ्गो साप्रा न्जोगान्ना उथापङा इसिसिॽहा उसा केक्स्वाहा॥ 18साप्रा चोगाना उचुन्ना सिङ्गा उथापङा हेॽनिङ्चा इसिसिॽहा उसा ङ्गेक्स्वान्हा, न्हाङ् साप्रा न्जोगान्ना सिङ्गा उथापङा चा उचुन्हा उसा ङ्गेक्स्वान्हा॥ 19न्हाङामाङ् उचुन उसा मेङ्गेङ्खुबा घाक सिङ्गा उथाप इम्मेहोङ् मिबे लेम्नाहाङ्मेहा॥#मात्ति ३:१०; लुका ३:९ 20खाॽला न्निङ्दा ङ्खा ‘निङ्वाफुमाभाङ् चेक्खुबासिङान’ कासाङ् लेम्चाखुबाचि उङ्चिङा न्जोगुहा कामभाङ् चिनाचोग्वाम्चिम्घा॥#मात्ति १२:३३
21 “का ‘हाङ्बा, हाङ्बा’ लुखुबा घाकङा वालोक्का राज्याबे उमा न्दोक्त्वानिन्ना॥ ङ्खाॽनिङ्गो वालोकपे वाखुबा आप्पागा उनिङ्वा लोॽवा चोक्खुबाचिङा से उमा न्दोक्त्वाना॥ 22न्ना लेन प्याकङा का खाॽला लुमे, ‘हाङ्बा, हाङ्बा, कानिङ् ङ्गा न्निङ्बे आगाम्बानि न्जोगुम्ङान्हायि? ङ्गा न्निङ्बे कानिङ् इसिॽहा मुइचि न्लोन्धाक्सुम्चिम्ङान्हायि? न्हाङा ङ्गा न्निङ्बे आच्चाम्मा-आच्चाम्माहा काम न्जोगुम्ङान्हायि?’ 23ङ्खिङ्बेला का ङ्खाचि उचुन ल्वाङ्चिङ्, ‘ओ इसिॽहा काम चोक्खुबाचि, का न्निङ्दा चिनान्दोङ्मेॽनेनिन्हा, आयुम्भाङ् माङ्दु खेब्यानि!’#छेम ६:८
हिच्चि पाङ्गा ताप्चेॽया
(लुका ६:४७-४९)
24 “न्हाङामाङ् आका खा चेॽया खेप्स्वाहोङ् ङ्खाॽला चोक्खुबा च्हेन, लुङ्खाक छोङ्बे चात्तुनुङ् पाङ् चोक्खुबा एको बुद्दिमानि याॽमि लोॽवाना ओम॥ 25उङा पाङ् चोगिहोङ् कुहिक, वासिक, भोलङा न्ना पाङ् लुक्तु, ङ्खाॽनिङ्गो न्ना पाङ् ङ्होराख्यान॥ इजाङ्बाङ्निङ् न्ना लुङ्खाक छोङ्बे चात्तुनुङ् चोगामासा॥ 26ङ्खाॽनिङ्गो आका चेॽया खेप्स्वाहोङ्चा ङ्खाॽला मेन्जोक्खुबा च्हेन बालुवा छोङ्बे पाङ् चोक्खुबा मुर्खा याॽमि लोॽवाना ओम॥ 27उङा पाङ् चोगिहोङ् कुहिक, वासिक, भोलङा न्ना पाङ् लुक्तुनिङ् होराख्याहोङ् न्ना पाङ् घाक नास लेक्सा॥”
28येसुङा उका चेलाचि खा घाक चिन्दिचिहोङ्, खा चेॽया खेम्खुबा न्नाबेॽहा प्याक याॽमिचि आच्चाम्मा ङ्ङेता॥#मार्कुस १:२२; लुका ४:३२ 29इजाङ्बाङ्निङ् उङा याहुदि धार्मासाप्ला चिन्खुबाचिङा लोॽवा मेन्ना, ङ्खाॽनिङ्गो माडा चोक्तोकनुङ् चिन्दुचि॥
Currently Selected:
मात्ति 7: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
