मात्ति 21
21
यारुसालेमबे येसु स्वागात न्जोगुना
(मार्कुस ११:१-११; लुका १९:२८-४०; युहान्ना १२:१२-१९)
1येसु नुङ् उका चेलाचि यारुसालेमगा उयुम्बेॽना जाइतुन कोङ्गुगा बेथ्फागे बाङ्ना ठोङ्बे न्दायाब्या, न्हाङ् येसुङा हिप्पाङ् उका चेलाचि खाॽला लुचिहोङ् पाक्सुचि, 2“न्जिङ्दा युयुन्ना तेनबे ख्याचि॥ न्नाबे तामेचुगाहोङ् सोलोक न्जिङ्दा एको गाधागा उच्या उमा नुङ् छुयाना तुम्मेचुगा, ङ्खाचि न्जिङ्दा फुक्साप्ताचुचि॥ 3ङ्खिङ्बेला याॽमिचिङा छिम्दिॽयाचिगा भोङ्, ‘हाङ्बागा लागि चाहाचोगामाना’ लुयाचुचि न्हाङ् उङ्चिङा सोलोक खेॽमा पिमेचिघा॥”
4खाॽला निङ्वाफुमाभाङ् चेक्खुबाङा चेक्तुक्साहा लोॽवा निङ्वाफुमागा चेॽया पुरा लेक्सा॥ निङ्वाफुमाभाङ् चेक्खुबाङा खाॽला कायामासा–
5“सियोनबे वाखुबा याॽमिचि लुयानुम्चिम,
‘सोयानुम, न्निङ्गा हाङ् न्निङ्दाबे तायेॽना!
उङ् मा मेलेङ्सिले गाधा छोङ्बे थाङ्दारायेॽना,
उङ् गो गाधागा उच्या छोङ्बे थाङ्दारायेॽना॥’”#जाकारिया ९:९
6ङ्खा हिप्पाङ् चेलाचि ख्याचिहोङ् येसुङा लुचिहा लोॽवा चोगाचु॥ 7ङ्खाचिङा गाधागा उमा-उच्या तायाचुचिहोङ् ङ्खाचिगा मिसिङ् छोङ्बे उङ्चि फोॽमा थिक्साचुचि न्हाङ् येसु न्ना गाधागा उच्या छोङ्बे थाङा॥ 8प्याक याॽमिचिङा उङ्चि फोॽमाचि लाम्बुबे न्थिक्सुबि, न्हाङ् इखिङ्ङा च्हेन सेउला न्देक्सुराहोङ् लाम्बुबे न्थिक्सुबि॥ 9येसुगा ओन्दाङ् नुङ् हेक्साङ् लाम्खुबाचि खाॽला कासाङ् ङ्ङोक्ता, “दाउदका उच्यागा जायजायकार लेङ्नि! हाङ्बा निङ्वाफुमागा उनिङ्बे ताखुबा इखिङ् प्याक आसिक तोक्खुबा ओम! घाक हाक्निङ् तो वालोकपे वाखुबा निङ्वाफुमागा जायजायकार लेङ्नि!”#छेम ११८:२५-२६; १४८:१
10येसु यारुसालेमबे उयानिङ् साहारभोरि खाइलाबाइला लेक्सा न्हाङ् याॽमिचिङा न्छिम्दुचि, “ना इसा ओम्लाए?” 11न्नाबे न्छुप्साहा याॽमिचिङा खाॽलाना पोलोवा म्बिचि, “उङ् गो गालिलगा नासारात पाहाङ् तायाना निङ्वाफुमाभाङ् चेक्खुबा येसु ओम॥”
येसु निङ्वाफुमापाङ्बे ख्याना
(मार्कुस ११:१५-१९; लुका १९:४५-४८; युहान्ना २:१३-२२)
12न्हाङा येसु निङ्वाफुमापाङ्बे ख्या॥ न्हाङ् निङ्वाफुमापाङ्गा चारामबे इन्खुबा इन्चाखुबाचि घाक न्नाभाङ् इक्ताहाक्सुचि॥ उङा याङ् लेन्खुबाचिगा टेबोल नुङ् पारेवा इन्चाखुबाचिगा युङ्माहा ठोङ् लेक्साहाक्तुबिचि॥ 13न्हाङा येसुङा ङ्खाचि लुचि, “धार्मासाप्लाबे खाॽला छेप्तामा– ‘आका पाङ् पार्थाना चोक्माना पाङ् लुमेॽना’#यासाइया ५६:७; यार्मिया ७:११ ङ्खाॽनिङ्गो न्निङ्दा ना खुसुबाङ्चि चुम्दिॽमाना लुङ्ढाङ् चोगुक्सुम्गा!”
14न्हाङा येसु निङ्वाफुमापाङ्बे वायानिङ् मिक्सुरुम्बा, लाङ्सुरुम्बा याॽमिचि उङ् वायानाबे न्दाया, न्हाङ् उङा ङ्खाचि नुमेतुचि॥ 15ङ्खाॽनिङ्गो जोबो खाङ्खाङ् हाङ्खुबाचि नुङ् धार्मासाप्ला चिन्खुबाचिङा उङा चोगुहा आच्चाम्माहा काम न्निसु, न्हाङा ङ्खा पिछानाछाचिङा “दाउदका उच्यागा जायजायकार लेङ्नि!” कासाङ् निङ्वाफुमापाङ्बे ङ्ओक्ताहा ङ्खेप्सुचिहोङ् इब्बे-इब्बे उङ्चि लोक खोता॥ 16न्हाङ् ङ्खाचिङा येसु न्लु, “खा पिछानाछाचिङा इ ङ्गामासिमेहा, खेम्मासिमेकाना?”
येसुङा लुचि, “खेम्मासिमेङ्ना, ङ्खाॽनिङ्गो ‘ओ हाङ्बा, न्दा पिछानाछाचि नुङ् नु उङ्खुबा मिमिॽहा पिछाचि चा ङ्गा पार्साम्सा चोक्मा चिन्दुक्सुचिगा’#छेम ८:२ भोङ् छेप्ताहा खा चेॽया न्निङ्दा पोढा न्जोगुक्सुम्गानाहा?” 17न्हाङ् ङ्खाचि नाओचिहोङ् येसु साहारभाङ् लोन्दा न्हाङ् बेथानिया तेनबे ख्याहोङ् बास यागा॥
उसा मेॽनिङ्ना वेक्पुगा उथाप
(मार्कुस ११:१२-१४,२०-२४)
18हेक्साङ्ना लेन भेनिक उङ्चि यारुसालेम साहारबे न्लासानिङ् येसु साक्ङास्या॥ 19ङ्खिङ्बेला उङा लाम्बुगा उलाप्पे वेक्पुगा उथाप निसु न्हाङ् उसा केक्सुक्सुहायेम्भोङ् न्ना उथापका उयुम्बे ख्या, ङ्खाॽनिङ्गो न्नाबे उलाभाक से निसु॥ न्हाङा उङा वेक्पुगा उथाप लु, “हाकु नाहाङ्तो न्दाबे हेॽनिङ्चा फुङ्सा ङ्गेङ्निन्नि॥” न्ना वेक्पुगा उथाप ङ्खिङ्बेलामाङ् हेराब्या॥
20खा न्निसुहोङ् चेलाचिङा आच्चाम्मा एसाङ् येसु न्छिम्दु, “खिङ्छिटो ना सिङ् इमिन हेराब्याना?”
21येसुङा पोलोवा पिचि, “जेप्पा का न्निङ्दा लुमेॽनेनिन, न्निङ्दा साङ्का मेन्जोक्ले बिस्वास चोगुम्गाभोङ्, का वेक्पुगा उथाप चोगुङ्ना लोॽवा से मेन्ना, ङ्खाॽनिङ्गो ना चोम्कोङ् ‘एनाख्याघोङ् सामुन्दाराबे आयाख्या’ लुम्गाभोङ् ङ्खाॽला लेङ्मेहा॥#मात्ति १७:२०; १ कोरिन्थि १३:२ 22बिस्वास चोगुम्गाहोङ् पार्थानाबे इहा नाक्त्वाम्गा, ङ्खा न्निङ्दा तोक्त्वाम्घा॥”
येसुगा चोक्तोक्का उतुम्बे छिम्योक
(मार्कुस ११:२७-३३; लुका २०:१-८)
23येसु निङ्वाफुमापाङ्बे उयाहोङ् चिन्मास्यानिङ् खाङ्खाङ् हाङ्खुबाचि नुङ् याहुदि हाङ्गुम्बाचि न्दायाहोङ् येसु न्छिम्दु, “न्दा हेॽनाहाङ् चोक्तोक तोक्तुघोङ् खा काम चोक्मा सिम्मेकाना? ना चोक्तोक न्दा इसाङा पियागाना?”
24येसुङा ङ्खाचि पोलोवा पिचि, “का चा न्निङ्दा एको चेॽया छिम्मेॽनेनिन्हा॥ का न्नागा पोलोवा पियागाभोङ्, का हेॽनाहाङ् चोक्तोक तोक्तुङ्होङ् खा काम चोक्मासिम्मेङ्ना, न्निङ्दा लुमेॽनेनिन्हा॥ 25लु कायानि, युहान्नाङा बाप्तिस्मा पिॽमाना चोक्तोक हेॽनाहाङ् तोक्तुना? निङ्वाफुमाभाङ् येम याॽमिचिभाङ् येम?” खा चेॽया ङ्खेप्सुहोङ् ङ्खाचि उङ्चि-उङ्चि खाॽला कामा न्दारोक्तु, “हाकु कानिङ् इ लुम? ‘निङ्वाफुमाभाङ्’ लुम्बाङ्निङ् ‘न्निङ्दा इजाङ् युहान्ना बिस्वास न्जोगुम्गान्ना?’ लुमेहोङ् छिप्निमे॥ 26ङ्खाॽनिङ्गो ‘याॽमिभाङ्’ लुम्बाङ्निङ्, याॽमिचिनुङ् किसिॽमाहा, इजाङ्बाङ्निङ् घाकङा युहान्ना निङ्वाफुमाभाङ् चेक्खुबाभोङ् न्ल्वा॥”
27न्हाङा ङ्खाचिङा येसु पोलोवा म्बि, “इस्साङ् कानिङ् था मान्ना॥”
न्हाङ् येसुङा ङ्खाचि लुचि, “ङ्खाॽलाभोङ् का चा हेॽनाहाङ् चोक्तोक तोक्तुङ्होङ् खा काम चोक्मासिम्मेङ्ना, न्निङ्दा न्लुमेॽनेनिन्हा॥”
हिप्पाङ् च्याचिगा ताप्चेॽया
28 “का न्निङ्दा एको ताप्चेॽया लुमेॽनेनिन, इमिन एतिॽवाघा कायानि॥ एको याॽमिगा हिप्पाङ् उच्या बाबुचि ङ्वाया॥ न्ना तुम्ना उच्यागाबे ख्याहोङ् उप्पाङा लु, ‘आच्या, हेन सिम्लेॽमाङ्हाम्बे ख्याघोङ् आका काम चोक्ताब्याङ्॥’ 29उच्याङा लु, ‘का ङ्खेमेङान्ना॥’ ङ्खाॽनिङ्गो हेक्साङ् उनिङ्वा ङ्गाक्सान्होङ् काम चोक्से ख्या॥ 30न्हाङा पाक्ना उच्यागाबे ख्याहोङ् पाक्ना उच्या चा ङ्खाॽलामाङ् लु॥ न्ना उच्याङा लु, ‘लेङ्मेॽना, आप्पा!’ ङ्खाॽनिङ्गो न्ना काम चोक्से ङ्ख्यान॥ 31हाकु कायानि, ङ्खा हिप्पाङ् उच्याचिबे हेॽना च्हेन उच्याङा उप्पागा चेॽया येनुहा?”
ङ्खाचिङा पोलोवा म्बि, “तुम्नाङा!” न्हाङ् येसुङा ङ्खाचि लुचि, “जेप्पा का न्निङ्दा लुमेॽनेनिन, तिरो पोक्खुबाचि नुङ् बेस्याचि न्निङ्दा हाक्निङ् ओन्दाङ् निङ्वाफुमागा राज्याबे ङ्ङुमेहा॥ 32इजाङ्बाङ्निङ् युहान्ना धार्मिक्तागा लाम्बु सोॽमेसे न्निङ्दाबे ताया, ङ्खाॽनिङ्गो न्निङ्दा बिस्वास न्जोगुम्गान॥ बुरु तिरो पोक्खुबाचि नुङ् बेस्याचिङा च्हेन बिस्वास न्जोगु॥ खा चेॽया निसुम्गाहोङ्चा न्निङ्दा पाप चोक्मा न्लेप्तिम्गान, न्हाङा उङ् बिस्वास न्जोगुम्गान॥”#लुका ३:१२; ७:२९-३०
सिम्लेॽमाङ्हाम आध्या चोक्खुबाचिगा ताप्चेॽया
(मार्कुस १२:१-१२; लुका २०:९-१९)
33 “हेकोना एको ताप्चेॽया खेप्सानुम॥ इमा एको लाम्धाङ्गा एको ह्वाङ्बा वाया॥ उङा उका लाम्धाङ्बे सिम्लेॽमाङ् एन्दुहोङ् इघुरुम फाङु॥ उङा सिम्लेॽमाङ् फिॽमाना एको कोल नुङ् याक्सा चा चोगुचि न्हाङा न्ना लाम्धाङ् आध्या चोक्खुबाचि जिम्मा पिचिहोङ् उङ् च्हेन हेकोना खाम्युकपे ख्या॥ #
यासाइया ५:१-२
34सिम्लेॽमाङ् सेम्माना बेला लेक्साहोङ् उङा उका नोकोरचि उका भाक लाल्लासे आध्या चोक्खुबाचिगाबे पाक्सुचि॥ 35ङ्खाॽनिङ्गो ङ्खा आध्या चोक्खुबाचिङा नोकोरचि न्लाबुचिहोङ् एको म्मोक्तु, हेकोना न्सिसु न्हाङ् हेकोना च्हेन लुङ्खाकङा न्लेप्तु॥ 36फेरि लाम्धाङ्गा उह्वाङ्बाङा ओन्दाङ्हा हाक्निङ् प्याक उका नोकोरचि पाक्सुचि॥ ङ्खाॽनिङ्गो आध्या चोक्खुबाचिङा ङ्खाचि चा ङ्खाॽलामाङ् न्जोगुचि॥
37 “हेक्साङ् लाम्धाङ्गा उह्वाङ्बाङा ‘आच्या गो ङ्खाचिङा उचुन न्जोग्वाना लोप्पि’ मिताहोङ् उच्या आध्या चोक्खुबाचिगाबे पाक्सु॥ 38ङ्खाॽनिङ्गो ङ्खा आध्या चोक्खुबाचिङा उच्या न्निसुना सोलोक उङ्चि-उङ्चि खाॽला ङ्गाया, ‘हाओ, न्ना गो लाम्धाङ्गा उह्वाङ्बागा उच्या ओम॥ आबानि, न्ना सिसुम न्हाङ् न्नागा घाक याङ्सा एङ्गा मुकपे चोगुम॥’ 39न्हाङ् ङ्खाचिङा न्ना सिम्लेॽमाङ्हामभाङ् पाखा न्लाभेतुहोङ् न्सिसु॥”
40येसुङा ङ्खाचि छिम्दुचि “लु कायानि, हाकु लाम्धाङ्गा उह्वाङ्बा तामेहोङ् ङ्खा आध्या चोक्खुबा याॽमिचि इ चोग्वाचिहा लोप्पि?”
41ङ्खाचिङा न्लु, “उङ् तामेहोङ् ङ्खा आध्या चोक्खुबा इसिॽहा याॽमिचि तुक्नुङ् तुखि पिसाङ् सिस्वाचि न्हाङ् उङा तोक्माहा उका भाक उचुन पिखुबाचि न्ना लाम्धाङ् पिओवाचिहा॥”
42न्हाङा येसुङा ङ्खाचि छिम्दुचि, “इना न्निङ्दा धार्मासाप्लाबे छेप्ताहा खा चेॽया पोढा न्जोगुक्सुम्गान्हा?
‘हेॽना लुङ्खाक लुङ्छेङ्बाचिङा काम लान्जोङ्मेन्ना ङ्गायाहोङ् न्लेप्ताहाक्सु,
न्ना लुङ्खाकमाङ् सुरगा मुक्खे लुङ्खाक लेक्सा॥
खा गो हाङ्बा निङ्वाफुमाभाङ् लेक्साहा ओम,
न्हाङ् एङ्गा सोयायिबे खा इखिङ् आच्चाम्माहा॥’ #
छेम ११८:२२-२३
43 “न्हाङामाङ् का न्निङ्दा लुमेॽनेनिन, निङ्वाफुमागा राज्या हाकु न्निङ्दाभाङ् निङ्वाफुमाङा नाप्तिॽवागा, न्हाङ् उका उनिङ्वा लोॽवा चोक्खुबा हेकोना जाति पिवाचिहा॥ 44न्ना लुङ्खाक छोङ्बे आॽनुङ्खुबा घाक टुक्रा-टुक्रा न्लेङ्मे, न्हाङ् न्ना लुङ्खाक इसा छोङ्बे आॽनुङ्मे, ङ्खाचि पिच्चिक-वाच्चिक न्लेङ्मेहा॥”
45येसुङा लुचिहा खा ताप्चेॽया खाङ्खाङ् हाङ्खुबाचि नुङ् फारिसिचिङा ङ्खेप्सुहोङ्, खा चेॽया कानिङ्माङ् लुयाहा ओमभोङ् था न्दोक्तु॥ 46न्हाङामाङ् उङ्चिङा येसु लाप्मागा न्जोगु, ङ्खाॽनिङ्गो याॽमिचिनुङ् ङ्गिसिता इजाङ्बाङ्निङ् याॽमिचिङा उङ् निङ्वाफुमाभाङ् चेक्खुबा म्मितुक्सा॥
Currently Selected:
मात्ति 21: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
