मात्ति 20
20
खेतालाचिगा ताप्चेॽया
1 “वालोक्का राज्या सिम्लेॽमाङ्हाम्गा ह्वाङ्बा लोॽवाना ओम॥ उङ् भेनिक कुचिक्कुचिक्पे सिम्लेॽमाङ्हाम्बे काम चोक्मेमागा खेतालाचि योक्से ख्या॥ 2न्हाङा उङा याॽमिचि ‘ए लेनगा एको युप्पा याङ् पिमेॽनेनिन्हा’ लुचिहोङ् उका सिम्लेॽमाङ्हाम्बे काम चोक्से पाक्सुचि॥
3 “भेनिक्का पा मोक्तुनिङ् लोप्पि उङ् फेरि बाजारबे ख्या॥ उङा बाजारबे एकोहिप्पाङ् याॽमिचि इहाचा काम न्दोक्तुनिन्होङ् खाॽला ङ्येबामासाहा निसुचि॥ 4उङा ङ्खाचि लुचि, ‘न्निङ्दा चा आका सिम्लेॽमाङ्हाम्बे काम चोक्से ख्यानि, का न्निङ्दा तोक्माहा ओमेन पिमेॽनेनिन्हा॥’ 5न्हाङ् ङ्खाचि काम चोक्से ङ्ख्या॥ न्हाङा एहिच नुङ् सुम मोक्तुनिङ् लोप्पि उङ् फेरि ख्याहोङ् ङ्खाॽलामाङ् हेकोहा याॽमिचि चा कामबे एन्दुचि॥
6 “फा मोक्तुनिङ् लोप्पि उङ् फेरि लोन्दाख्यानिङ् हेकोहा याॽमिचि चा काम मेॽनिङ् खाॽला बाजारबे ङ्येबामासाहा निसुचि, न्हाङ् ङ्खाचि लुचि, ‘न्निङ्दा इजाङ् नाबे लेॽनाम्चुक काम मेॽनिङ् येबिनेसिॽवाघा?’ 7ङ्खाचिङा पोलोवा म्बि, ‘इ चोक्माहा, कानिङ् इसाङा चा कामबे ङ्गेक्सान॥’ न्हाङा उङा लुचि, ‘ङ्खाॽलाभोङ् न्निङ्दा चा आका सिम्लेॽमाङ्हाम्बे काम चोक्से ख्यानि॥’
8 “नाम आयाहोङ् न्ना सिम्लेॽमाङ्हाम्गा ह्वाङ्बाङा खेतालाचि केङ्खुबा मुख्या च्हेन काहोङ् खाॽला लु, ‘खेतालाचि काचिघोङ् उङ्चिगा कामगा ओमेन पिचि॥ पिचिगानिङ् हेक्साङ् ताखुबाचिभाङ् पिॽमा तारोक्तुचिघोङ् ओन्दाङ् ताखुबा सोम्मा पिचि॥’ #
लेबि १९:१३; ब्यावास्था २४:१५ 9न्हाङा फा मोक्तुनिङ् कामबे लाचोक्खुबा खेतालाचि न्दाया, ङ्खाचि घाकङा लेॽनाम्चुक्का जेला एको-एको युप्पा याङ् न्दोक्तुचि॥ 10ङ्खिङ्बेला ओन्दाङ् कामबे लाचोक्खुबा खेतालाचिङा ‘कानिङ् गो ङ्खाचि हाक्निङ् प्याक तोक्त्वाम्ङाहा लोप्पि’ म्मितामासा, ङ्खाॽनिङ्गो ङ्खाचि घाकङा चा ए लेनगा जेला से न्दोक्तु॥ 11ङ्खाचिङा कामगा ओमेन न्दोक्तुहोङ् लाम्धाङ्गा ह्वाङ्बागाबे ङ्ख्याहोङ् गान्गान चोक्मा न्दारोक्तु॥ 12ङ्खाचिङा न्लु, ‘सो, खा हेक्साङ् ताखुबाचिङा ए घान्टा से काम न्जोगुक्सु, कानिङ् गो नामबे लेॽनाम्चुक काम चोगिङ्, ङ्खाॽनिङ्गो ङ्खाचि चा न्दा कानिङ् हिङ् ओमेन पिचिगा!’
13 “ङ्खाॽनिङ्गो उङा ङ्खाचि माध्येबे एको पोलोवा पिसाङ् खाॽला लु, ‘ओ काम्निभाक, का न्दा आन्याया न्जोङ्नुङ्नेन्ना॥ इना न्दा ए लेनगा जेला एको युप्पा याङ्बे लेॽनाम्चुक काम चोक्मा काक्सामासागाना मेन्नायि? 14ङ्गा तोक्माहा याङ् खेतुघोङ् म्बाङ्बे ख्या॥ खा हेक्साङ् ताखुबाचि चा न्दा पिॽनेन्हा हिङ् का पिॽमा मितुङ्चिङ्॥ 15इना आका याङ् का इचोक्मा मितुङ् ङ्खाॽला चोक्मा न्दोक्त्वाङान्हायि? का आनिङ्वा माडा चोग्वाङ्निङ् ङ्गा इजाङ् म्मिक हान्द्वाचिहा?’
16 “खाॽलामाङ् लोप हेक्साङ् आखुबाचि ङ्खिङ्बेला ओन्दाङ् ङ्ङामे, न्हाङ् लोप ओन्दाङ् आखुबाचि ङ्खिङ्बेला हेक्साङ् ङ्ङामेहा॥” #
मात्ति १९:३०; मार्कुस १०:३१; लुका १३:३०
येसुङा सुम्ना खेप उङ् सिमाना चेॽयागा उतुम्बे लुचिहा
(मार्कुस १०:३२-३४; लुका १८:३१-३४)
17यारुसालेम पोटि ङ्खेॽमास्यानिङ् येसुङा उका एहिच चेलाचि योरोक काहेतुचिहोङ् खाॽला लुचि, 18“सोयानुम, कानिङ् यारुसालेम खेॽमासिइवा॥ हाकु याॽमिगा उच्या खाङ्खाङ् हाङ्खुबाचि नुङ् धार्मासाप्ला चिन्खुबाचिगा मुकपे जिम्मा म्बिवा॥ ङ्खाचिङा उङ् सिमाना दान्डा म्बिवा॥ 19न्हाङा उङ् खिजे चाॽमागा, कोर्रा एम्मागा न्हाङ् कुरुसपे छुन्सिॽमागा ङ्खाचिङा हेकोहा जातिचिगा मुकपे म्बिवा, ङ्खाॽनिङ्गो सुम्ना लेन उङ् हिङ्गिलिक लेङ्मेहोङ् पोङ्मेॽना॥”
येसुङा सेवा चोक्माहा चेॽयागा उतुम्बे चिन्दुचिहा
(मार्कुस १०:३५-४५)
20न्हाङा जाब्दियागा उहिङ्खुमाङा उका हिप्पाङ् उच्याचि याकुब नुङ् युहान्ना उङ्नुङ् ताचिहोङ् येसु वायानाबे ताया॥ न्हाङ् येसुगा उयुम्बे लाङ्छुकपे युङाहोङ् उमुक फाक्तुचि॥ 21येसुङा न्ना छिम्दु, “ङ्गा लागि का इ चोङ्बिॽनेन?”
न्नाङा पोलोवा पि, “का आमुक फाक्त्वाङ्चिङ्, न्दा हाङ् लेङ्मेकानिङ् आका खा हिप्पाङ् आच्या बाबुचिबे एको ङ्गा छुप्ताङ् पोटि नुङ् हेकोना फेक्साङ्पोटि युङ्मा तोक्चुनि॥”
22ङ्खाॽनिङ्गो येसुङा खाॽला लुचि, “न्निङ्दा इहा नाक्मा सिइवागा, ङ्खा न्निङ्दा था मान्ना॥ इना का उङ्माना तुखिगा खोरेकपाहाङ् न्जिङ्दा उङ्मा यामेचुघा?”
ङ्खाचिङा लुयाचु, “यामेङ्चुङ्हा॥”
23येसुङा ङ्खाचि लुचि, “न्जिङ्दा जेप्पामाङ् का उङ्माना खोरेकपाहाङ् उङ्मेचुगा, ङ्खाॽनिङ्गो आका छुप्ताङ् नुङ् फेक्साङ्पोटि युङ्मा पिॽमाना चोक्तोक कानुङ् मान्ना॥ खा ठोङ्चि गो आप्पाङा इसागा लागि त्यार चोगुक्सुचि, ङ्खाचिमाङ् पिवाचिहा॥”
24खा चेॽया ङ्खेप्सुहोङ् हेकोहा एखेङ् जाना चेलाचि ङ्खा हिप्पाङ्नुङ् उङ्चि लोक खोता॥ 25ङ्खाॽनिङ्गो येसुङा ङ्खाचि काचिहोङ् खाॽला लुचि, “न्निङ्दा था वान्नेॽमाङ्, हेकोहा जातिचिगा हाङ्चिङा गो उङ्चि याॽमिचि इमिन चोक्मा म्मितुचि ङ्खाॽला न्जोग्वाचि, न्हाङा माम्माहा याॽमिचिङा उङ्चि हाक्निङ् मिमिॽहाचि छोङ्बे चोक्तोक न्जोग्वा॥#लुका २२:२५-२६ 26ङ्खाॽनिङ्गो न्निङ्दा च्हेन ङ्खाॽला लेङ्मा न्लेङ्मेन्हा, न्निङ्दाबे मा लेङ्मा योक्खुबाङा न्निङ्दा घाक्का सेवा चोगुनि॥ 27न्हाङा घाक हाक्निङ् ओन्दाङ् लेङ्मा मिखुबा, न्निङ्गा नोकोर लेङ्नि॥#मात्ति २३:११; लुका २२:२६ 28ङ्खाॽलामाङ् याॽमिगा उच्या चा सेवा तोक्मागा मेन्ना, ङ्खाॽनिङ्गो सेवा चोक्से नुङ् प्याक याॽमिचि पाप पाहाङ् फोङ्मागा उका हिङ्लुङ् पिसे तायाना ओम॥”
येसुङा हिप्पाङ् मिक्सुरुम्बाचि नुमेतुचिहा
(मार्कुस १०:४६-५२; लुका १८:३५-४३)
29येसु नुङ् उका चेलाचि यारिहो साहारभाङ् ङ्खेॽमास्यानिङ्, प्याक याॽमिचि उका हेक्साङ् लान्जोगा॥ 30लाम्बुगा उलाप्पे हिप्पाङ् मिक्सुरुम्बाचि युङामासाचि॥ ङ्खाचिङा येसु न्ना लाम्बु लेङ्साङ् खेॽमासिमेॽना बाङ्ना था तोक्ताचुहोङ् खाॽला कासाङ् ओक्ताचि, “ओ हाङ्बा, दाउदका उच्या, कान्चिङ् दाया चोगा!” 31याॽमिचिङा ङ्खाचि “स्वाक वायाचि” लुसाङ् न्थिन्दुचि, ङ्खाॽनिङ्गो ङ्खाचि खाॽला कासाङ् झान तुक्नुङ् ओक्ताचि, “ओ हाङ्बा, दाउदका उच्या, कान्चिङ् दाया चोगा!”
32येसुङा ङ्खाचिगा सेम्ला खेप्सुहोङ् लाम्मास्यानुङ् येबा, न्हाङा ङ्खाचि काचिहोङ् लुचि, “का न्जिङ्गा लागि इ चोङ्बिॽनेन्चिन बाङ्ना मिम्मेचिघा?”
33ङ्खाचिङा लुयाचु, “हाङ्बा, कान्चिङ् निमायाचुङ्नि!” 34येसुङा ङ्खाचि उलुङ्मा तुक्तुचिहोङ् उङ्चि मिक तोक्तितुबिचि, न्हाङा ङ्खिङ्बेलामाङ् ङ्खाचि निमा याखुबा लेक्साचिहोङ् येसुगा हेक्साङ् लाचोगाचि॥
Currently Selected:
मात्ति 20: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
