मात्ति 19
19
हिङ्खुमा नान्सिॽमा न्लेङ्मेन्ना
(मार्कुस १०:१-१२)
1खा चेॽया लुइचिहोङ् येसु गालिलभाङ् यार्दान होङ्मागा योप्पारिक्ना याहुदिया लिङ्खाम पोटि ख्या॥ 2प्याक याॽमिचि उका हेक्साङ् लान्जोगा, न्हाङ् उङा ङ्खाचि नुमेतुचि॥
3एकोहिप्पाङ् फारिसिचि येसु वायानाबे न्दायाहोङ् उङ् चेॽयाबे आन्सिमेॽमागा न्छिम्दु, “एको मिना काम खोक्सिभोङ् हिङ्खुमा नान्सिॽमा लेङ्मेॽनायेम न्लेङ्मेन्नायेम?”
4ङ्खाॽनिङ्गो उङा लुचि, “इना न्निङ्दा धार्मासाप्ला पोढा न्जोगुक्सुम्गान्ना? उथुक्राङ्बाङा ओन्दाङ् याॽमि चोगुचिनिङ् माङ् बाबु नुङ् मामु चोगुचि,#उथुक १:२७; ५:२ 5न्हाङा निङ्वाफुमाङा काया, ‘ङ्खोङ्माङ् बाबु याॽमिङा उमा-उप्पा नाॽवाचिहोङ् उहिङ्खुमानुङ् तोङ्नुङ्मेचि, न्हाङ् ङ्खा हिप्पाङ् एको सालुङ् लोॽवा लेङ्मेचि॥’#उथुक २:२४ 6न्हाङामाङ् ङ्खाचि हिप्पाङ् मेन्ना, ङ्खाॽनिङ्गो एको सालुङ् ओम्चि॥ ङ्खोङ्माङ् निङ्वाफुमाङा एको चोगुचिहा इसाङा चा फोङ्मा न्लेङ्मेनिन्हा॥”
7फारिसिचिङा येसु न्छिम्दु, “ङ्खाॽलाभोङ् मोसाङा इजाङ् उहिङ्खुमा नान्सिखुबाङा फोङ्साप्ला छेप्तुबिहोङ् नासिनि कायाना?”#ब्यावास्था २४:१-४; मात्ति ५:३१
8येसुङा पोलोवा पिचि, “न्निङ्गा आङ्धिङ्ना निङ्वा निसुहोङ्माङ् मोसाङा हिङ्खुमा नान्सिॽमा न्लेङ्मेहा लुइघा ओम॥ ङ्खाॽनिङ्गो ओन्दाङ् गो खाॽलाहा म्मेतासान॥ 9का न्निङ्दा लुमेॽनेनिन, इसाङा ब्याभिचारगा कारान मेॽनिङ् उहिङ्खुमा नासिॽवाहोङ् हेकोना थाङ् छेङ्वा, न्ना ब्याभिचार चोगाना लेङ्मेॽना॥”#मात्ति ५:३२; मार्कुस १०:११-१२; १ कोरिन्थि ७:१०-११
10उका चेलाचिङा येसु न्लु, “हिङ्खुबा-हिङ्खुमाबे खाॽला लेङ्मेहाभोङ् गो थाङ् मेन्छेङ्मामाङ् उचुन्बा॥”
11येसुङा लुचि, “घाक याॽमिङा खा चेॽया सुइकार चोक्मा ङ्यास्वानिन्हा, ङ्खाॽनिङ्गो निङ्वाफुमाङा पिचिहाङा से ङ्यास्वाहा॥ 12थाङ् मेन्छेङ्माहा कारानचि प्याक ङ्वामे, इजाङ्बाङ्निङ् इखिङ् च्हेन ङ्वामेॽनिङ् माङ् नापुङ्साक न्सामे, इखिङ् च्हेन याॽमिङा नापुङ्साक न्जोग्वाचि न्हाङा इखिङ् च्हेन निङ्वाफुमागा राज्यागा लागि थाङ् मेन्छेङ्खुबा चा न्सामे॥ हाकु इसाङा सुइकार चोक्मा यास्वा न्नाङा चोगुनि॥”
येसुङा पिछाचि आसिक पिचिहा
(मार्कुस १०:१३-१६; लुका १८:१५-१७)
13ङ्खिङ्बेला उमुक युक्सुहोङ् आसिक पिचिनि न्हाङ् पार्थाना चोक्तुबिचिनिभोङ् याॽमिचिङा उङ्चि पिछाचि येसु वायानाबे न्दाचि॥ ङ्खाॽनिङ्गो चेलाचिङा ङ्खा याॽमिचि न्थिन्दुचि॥ 14येसुङा लुचि, “पिछानाछाचि काबे तामा पियानुम्चिम, ङ्खाचि ङ्ङोन्दानुम्चिम्निन इजाङ्बाङ्निङ् निङ्वाफुमागा राज्या खाॽलाहाचिगा माङ् ओम॥”
15न्हाङा उङा ङ्खा पिछाचि छोङ्बे उमुक युङ्साङ् आसिक पिचिहोङ् न्नाभाङ् ख्या॥
थुङ्दुना याॽमिगा ताप्चेॽया
(मार्कुस १०:१७-३१; लुका १८:१८-३०)
16इमा एको वेन्चा याॽमि येसु वायानाबे तायाहोङ् खाॽला लु, “ओ चिन्खुबा हेॽनिङ्चा मेन्सिमाना हिङ्लुङ् तोक्मागा का हेॽना च्हेन नुना काम चोक्माङान?”
17येसुङा पोलोवा पि, “नुना कामगा उतुम्बे का इजाङ् छिम्मेङ्गाना? नुना गो निङ्वाफुमा सेॽना॥ न्दा हेॽनिङ्चा मेन्सिमाना हिङ्लुङ् तोक्मा मितुक्सुगानाभोङ् निङ्वाफुमागा आग्गे येनु॥”
18न्नाङा छिम्दु, “हेखा च्हेन आग्गे?”#पारास्थान २०:१३-१६; ब्यावास्था ५:१७-२०
येसुङा लु, “याॽमि मेन्सिमाचि, ब्याभिचार मेन्जोक्मा, मेङ्खुमा, मेनाहा चेॽयागा गाबाहि मेम्बिॽमाचि, 19पा-माचि आदार चोक्माचि, न्हाङ् पाङ्निवाकचि आफाइ लोॽवा लुङ्मा तुक्माहाचि॥”#पारास्थान २०:१२; ब्यावास्था ५:१६; लेबि १९:१८
20न्ना वेन्चा याॽमिङा लु, “खा घाक आग्गे गो का येनुक्तुक्सुङ्हा॥ हेकोहा इहा चोक्माङान?”
21येसुङा न्ना लु, “न्दा नुना याॽमि लेङ्मा मिमेकानाभोङ् ख्याघोङ् न्दानुङ् वेॽयाहा घाक थोक इनुचोघोङ् तुखिसुम्बाचि याङ् पिचि न्हाङ् न्दा वालोकपे याङ्सा तोक्त्वाघा॥ न्हाङ् न्दा आबाघोङ् आहेक्साङ् लाचोगा॥”
22खाॽलाहा चेॽया खेप्सुहोङ् न्ना वेन्चाबाङ् उनाचिक कुइम चोगुहोङ् लामाख्या, इजाङ्बाङ्निङ् न्नागा प्याक याङ्सा वाया॥
23न्हाङा येसुङा उका चेलाचि लुचि, “जेप्पा का न्निङ्दा लुमेॽनेनिन, थुङ्दुना याॽमि वालोक्का राज्याबे उमा तुक्नुङ् छाक्हा॥ 24फेरि का न्निङ्दा लुमेॽनेनिन, थुङ्दुना याॽमि निङ्वाफुमागा राज्याबे उमा हाक्निङ्गो ओओक लुॽमेगा#१९:२४ उट् लुॽमेगा ओछोमबेॽना होङ्बे॥ ओहोङ्बे उमा साजिलो लेङ्मेॽना॥”
25खा चेॽया ङ्खेप्सुहोङ् चेलाचिङा आच्चाम्मा एसाङ् न्लु, “ङ्खाॽलाभोङ् इसाङा मुक्ति तोक्त्वाहोङ् वालोक खेॽमा यामेॽना?”
26येसुङा ङ्खाचि सोसाङ् लुचि, “खा याॽमिभाङ् लेङ्मा मेयामाहा चेॽया ओम, ङ्खाॽनिङ्गो निङ्वाफुमाभाङ् घाक चेॽया लेङ्मायामेहा॥”
27न्हाङा पात्तुरुसङा लु, “सो, कानिङ् गो घाक थोक नाओम्ङाहोङ् ङ्गा हेक्साङ् लामिमिङ्, कानिङ् च्हेन इहा तोक्त्वाम्ङाहा?”
28येसुङा ङ्खाचि लुचि, “जेप्पा का न्निङ्दा लुमेॽनेनिन, ना कायुङ्लेन ओछोङा लेङ्मेहोङ् याॽमिगा उच्या उका माहिमागा हाङ्युक्थामबे युङ्मे, ङ्खिङ्बेला आका हेक्साङ् लाचोक्खुबाचि न्निङ्दा चा एहिच हाङ्युक्थामबे युङिॽवागाहोङ् इजिरेलगा एहिच छोङ्गा निरिक चोग्वाम्घा॥#मात्ति २५:३१; लुका २२:३० 29न्हाङा आका लागि इसाङा उपाङ्, उफु-उनुन्छाचि, उना-उनुन्छाचि, उप्पा-उमा, उच्याचि, रोपा लाम्धाङ् नाओक्सो न्नाङा होम्बोक गुना प्याक तोक्त्वाहा, न्हाङ् हेॽनिङ्चा मेन्सिमाना हिङ्लुङ् चा तोक्त्वाना॥ 30ङ्खाॽनिङ्गो लोप ओन्दाङ् आखुबा प्याक याॽमिचि ङ्खिङ्बेला हेक्साङ् ङ्ङामे, न्हाङ् लोप हेक्साङ् आखुबाचि ङ्खिङ्बेला ओन्दाङ् ङ्ङामेहा॥”#मात्ति २०:१६; लुका १३:३०
Currently Selected:
मात्ति 19: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
