मात्ति 13
13
याङ्लि ह्वेखुबागा ताप्चेॽया
(मार्कुस ४:१-१२,२५; लुका ८:४-१०; १०:२३-२४)
1न्ना लेन येसु न्ना पाङ्भाङ् लोन्दाहोङ् गालिल तालगा उलाप्पे युङा॥ 2न्नाबे इब्बे-इब्बे प्याक याॽमिचि न्छुप्सा, न्हाङामाङ् उङ् एको डुङ्गाबे थाङाहोङ् युङा॥ ङ्खा प्याक याॽमिचि च्हेन तालगा उलाप्पेॽमाङ् ङ्ङेबामासा॥#लुका ५:१-३ 3येसुङा ङ्खा याॽमिचि ताप्चेॽयाभाङ् प्याक चेॽया लुचि॥ उङा लुचि, “याङ्लि ह्वेखुबा एको याॽमि याङ्लि ह्वेसे लाम्धाङ्बे ख्या॥
4 “याङ्लि ह्वेतुनिङ् इखिङ् याङ्लि लाम्बुबे आया, ङ्खा न्वाकुच्याकचि न्दायाहोङ् ङ्गोबुचोइ॥ 5इखिङ् याङ्लि च्हेन लुङ्खाकसेॽना खामबे आया॥ न्नाबे मिमिक्से खाम वायाहोङ् याङ्लि पोक्मा गो सोलोक पोगा, 6ङ्खाॽनिङ्गो ङ्खा याङ्लिगा उसाम घाइरो एन्मा न्दोक्तुक्सान्होङ् नाम फेनानिङ् ङ्खा याङ्लि नामङा फोसि॥ 7इखिङ् याङ्लि च्हेन तिङ्गिभाक्हाम्बे आया, ङ्खा चा पोक्मा गो पोगा ङ्खाॽनिङ्गो तिङ्गिभाक पुसाक्याहोङ् ङ्खा याङ्लि मोम्दिसि॥ 8ङ्खाॽनिङ्गो इखिङ् याङ्लि च्हेन मोलिलोना खामबे आया, न्हाङ् होम्बोक गुना, याखेङ् गुना नुङ् सुम्खेङ् गुना उसा केक्सु॥ 9इसागा खेम्माहा उनाभाक ङ्वान्ने, न्नाङा खेप्सुनि!”
10न्हाङ् चेलाचि न्दायाहोङ् येसु न्छिम्दु, “न्दा ङ्खाचि चिन्द्वाचिगानिङ् इजाङ् ताप्चेॽयाभाङ् चिन्द्वाचिघा?”
11येसुङा ङ्खाचि लुचि, “सोयानुम, न्निङ्दा गो वालोक राज्यागा होङ्चेॽया आमाना ग्यान तोक्तुक्सुम्गा, ङ्खाॽनिङ्गो उङ्चि च्हेन म्बियामानिन्हा॥ 12इजाङ्बाङ्निङ् इसानुङ् आमाहा ग्यान वान्ने, न्ना हाकुचा पिमेहोङ् न्नानुङ् प्याक लेङ्मे, ङ्खाॽनिङ्गो इसानुङ् मान, न्नानुङ् वेॽहा चा नाप्निमेहा॥#मात्ति २५:२९; मार्कुस ४:२५; लुका ८:१८; १९:२६ 13न्हाङ्माङ् ङ्खाचिनुङ् का ताप्चेॽयाभाङ् चेङ्मेङ्ना॥ इजाङ्बाङ्निङ् ङ्खाचिङा न्स्वाहोङ्चा न्निस्वानिन, न्हाङा ङ्खेप्स्वाहोङ्चा ङ्ङास्वानिन॥ 14प्याक ओन्दाङ् निङ्वाफुमाभाङ् चेक्खुबा यासाइयाङा चेक्तुक्साहा खा चेॽया ङ्खाचिनुङ् ठ्याक्काइ तोङ्मेहा–
‘न्निङ्दा खेम्मा गो खेप्स्वाम्गा, ङ्खाॽनिङ्गो हेॽनिङ्चा ङ्ङास्वाम्गान,
सोॽमा गो स्वाम्गा, ङ्खाॽनिङ्गो हेॽनिङ्चा न्निस्वाम्गान॥
15 इजाङ्बाङ्निङ् ङ्खा याॽमिचिगा निङ्वा बोधो न्लेक्सामा॥
न्हाङ् ङ्खाचिगा उङ्चि नाभाकचि ङ्हुतिक्सुचि,
उङ्चि मिक न्सिप्सिक्सुचि॥
मानुङ्गो ङ्खाचिगा मिकङा न्निसुबि,
नाभाकङा ङ्खेप्सुबि,
उङ्चि निङ्वाङा ङ्ङासुबि॥
न्हाङा ङ्खाचिगा उङ्चि निङ्वा का पोटि ङ्हिक्सुचिबि,
न्हाङ् का ङ्खाचि नुमेतुङ्चिङ्बि॥’ #
यासाइया ६:९-१०
16 “ङ्खाॽनिङ्गो न्निङ्दा च्हेन इखिङ् प्याक आसिक तोक्खुबासिगान, इजाङ्बाङ्निङ् न्निङ्गा मिकङा निस्वा न्हाङ् नाभाकङा खेप्स्वा॥ #
लुका १०:२३-२४
17जेप्पा का न्निङ्दा लुमेॽनेनिन, न्निङ्दा खेप्सुम्घा नुङ् निसुम्घा खा चेॽया निङ्वाफुमाभाङ् चेक्खुबाचि नुङ् धार्मोति याॽमिचिङा इब्बे-इब्बे खेम्मा, निमा म्मितुक्सा॥ ङ्खाॽनिङ्गो ङ्खाचिङा निमा चा न्दोक्तुनिन न्हाङ् खेम्मा चा न्दोक्तुनिन॥
ह्वेताहा याङ्लिगा ताप्चेॽयागा तुम्बिला
(मार्कुस ४:१३-२०; लुका ८:११-१५)
18 “हाकु याङ्लि ह्वेताहा ताप्चेॽयागा तुम्बिला खेप्सानुम॥ 19लाम्बुबे आयाहा याङ्लि च्हेन खाॽलाहा याॽमि ओम्चि, ङ्खाचिङा निङ्वाफुमागा राज्यागा उतुम्बे खेम्मा गो ङ्खेप्स्वा, ङ्खाॽनिङ्गो ङ्ङास्वानिन न्हाङ् साइतान तामेहोङ् उङ्चिगा निङ्वाबेॽहा निङ्वाफुमागा चेॽया कोभेतिॽवा॥ 20लुङ्खाकसेॽना खामबे आयाहा याङ्लि च्हेन ङ्खा याॽमि ओम्चि, ङ्खाचिङा निङ्वाफुमागा चेॽया ङ्खेप्स्वाहोङ् सोलोक चोन्सिसाङ् निङ्वाबे ङ्युक्स्वा॥ 21ङ्खाॽनिङ्गो ङ्खा चेॽयाङा उङ्चि निङ्वाबे घाइरो उसाम ङ्ङेन्दुनेस्वान्होङ् एहिलेन से वामे॥ न्हाङा निङ्वाफुमागा चेॽयाबे बिस्वास न्जोगुहाङा तुखि नुङ् जाच आन्दारामेॽनिङ् ङ्खाचिङा सोलोक बिस्वास न्लेप्तिॽवा॥ 22तिङ्गिभाक्हाम्बे आयाहा याङ्लि च्हेन ङ्खा याॽमि ओम्चि॥ ङ्खाचिङा निङ्वाफुमागा चेॽया ङ्खेप्स्वा, ङ्खाॽनिङ्गो ना कायुङ्लेनगा चिन्ताङा, याङ्सा लुङ्मा किप्माना निङ्वाङा निङ्वाफुमागा चेॽया हेच्वा न्हाङ् इहाचा उसा ङ्गेक्स्वान॥ 23ङ्खाॽनिङ्गो इखिङ् याॽमिचिङा च्हेन निङ्वाफुमागा चेॽया ङ्खेप्स्वाहोङ् ङ्ङास्वा न्हाङ् होम्बोक गुना, याखेङ् गुना नुङ् सुम्खेङ् गुना उसा ङ्गेङ्मेत्वा, खा च्हेन मोलिलोना खामबे आयाहा याङ्लि लोॽवा ओम॥”
वाघायागा ताप्चेॽया
24येसुङा फेरि एको ताप्चेॽया लुचि, “सोयानुम, निङ्वाफुमागा राज्या एको उलाम्धाङ्बे उचुन्हा याङ्लि ह्वेखुबा एको याॽमि लोॽवाना ओम॥ 25ङ्खाॽनिङ्गो पाङ्बेॽहा घाक याॽमिचि ङ्ङिप्साख्याना बेला उका सात्तुर ताया, न्हाङ् गाउगा उलुम-उलुम्बे वाघाया ह्वेतोओ॥ 26हेक्साङ् गाउ पुसाहोङ् केङ्मा तारोक्तुनिङ् वाघाया चा ओता॥
27 “न्हाङा लाम्धाङ्गा उह्वाङ्बागा नोकोरचि न्दायाहोङ् उह्वाङ्बा न्लु, ‘हाङ्बा, न्दा लाम्धाङ्बे उचुन्हा याङ्लि ह्वेतुघा मेन्नायि? सोसोॽलो खा वाघाया हेॽनाहाङ् तायाहा?’ 28उङा लुचि, ‘एङ्गा सात्तुरङा खाॽला चोगुहा ओम॥’ नोकोरचिङा न्छिम्दु, ‘ङ्खाॽलाभोङ् कानिङ् खेइङ्होङ् ङ्खा वाघाया एनाहाक्सुम्ङा?’
29 “ङ्खाॽनिङ्गो लाम्धाङ्गा उह्वाङ्बाङा लुचि, ‘मेन्ना लोप वानि, इजाङ्बाङ्निङ् न्निङ्दा वाघाया एन्वाम्गानिङ् आन्जानबे गाउ चा एनाहाक्स्वाम्घा॥ 30हाकु चाचिॽया खोम्माना बेला मेलेङ्ले सोम्मा सोरि पुमा पियानुम॥ चाचिॽया खोम्माना बेलाबे का आका नोकोरचि, ओन्दाङ् वाघाया छुप्सानुम्घोङ् मिबे हुन्हाङ्मागा बिटा थुन्दानुम, ङ्खाॽनिङ्गो गाउ च्हेन छुप्सुम्घोङ् चाचिॽयादाङ्बे युक्सानुम ल्वाङ्चिङ्हा॥’”
यारोगा दाना नुङ् खामिरगा ताप्चेॽया
(मार्कुस ४:३०-३४; लुका १३:१८-२१)
31येसुङा ङ्खाचि हेकोना ताप्चेॽया लुचि, “निङ्वाफुमागा राज्या यारोगा दाना लोॽवाना ओम॥ न्ना याङ्लि एको याॽमिङा खेतुहोङ् उलाम्धाङ्बे ह्वेतु॥ 32न्ना याङ्लिचिबे घाक हाक्निङ् मिना सामे, ङ्खोङ्चा पुमेहोङ् घाक खिउनेत्नुगा उथाप हाक्निङ् माडा एको सिङ्गा उथाप लोॽवा लेङ्मे॥ न्हाङ् न्वाकुच्याकचि न्दामेहोङ् न्नागा ह्वाकचिबे ओहोप ङ्गावाचि॥”
33येसुङा हेकोना ताप्चेॽया चा लुचि, “निङ्वाफुमागा राज्या चालेप्पा होम्मेखुबा खामिर लोॽवाना ओम॥ एको मामुङा सुम पाथि खोॽमुङ्बे मिॽयाङ् खामिर फास्वा न्हाङ् घाक खोॽमुङ् होम्दुगेत्वा॥”
34येसुङा खा घाक चेॽया ताप्चेॽयाभाङ् याॽमिचि लुचि॥ ताप्चेॽया मेलुॽले उङा इहाचा न्जिन्दुन्चिन॥ 35निङ्वाफुमाभाङ् चेक्खुबाचिङा न्जेक्तुक्साहा खा चेॽया खाॽला पुरा लेक्साहा–
“का ङ्खाचिनुङ् ताप्चेॽयाभाङ् चेङ्मेङ्,
कायुङ्लेनगा उथुक नाहाङ्तो चुमानेसाहा चेॽया का ल्वाङ्चिङ्हा॥”#छेम ७८:२
वाघायागा ताप्चेॽयागा तुम्बिला
36न्हाङा येसु याॽमिचि नाओचिहोङ् पाहोङ्बे उया, न्हाङ् उका चेलाचि न्दायाहोङ् खाॽला न्लु, “कानिङ् लाम्धाङ्बेॽहा वाघायागा ताप्चेॽयागा तुम्बिला योक्मेता॥”
37येसुङा लुचि, “उचुन्हा याङ्लि ह्वेखुबा च्हेन याॽमिगा उच्या ओम॥ 38लाम्धाङ् च्हेन ना कायुङ्लेन ओम॥ उचुन्हा याङ्लि निङ्वाफुमागा राज्यागा सान्तान ओम्चि न्हाङ् वाघाया च्हेन दुस्टागा सान्तान ओम्चि॥ 39वाघायागा याङ्लि ह्वेखुबा सात्तुर च्हेन दियाबालास ओम॥ चाचिॽया खोम्माना बेला च्हेन कायुङ्लेनगा आखेरि लेन ओम॥ चाचिॽया खोम्खुबाचि च्हेन वालोक्दुत ओम्चि॥ 40इमिन वाघाया मिबे हुन्हाङ्मागा लागि छुम्मे, कायुङ्लेन नास लेङ्माना बेला चा ङ्खाॽलामाङ् लेङ्मेहा॥ 41न्ना लेन याॽमिगा उच्याङा उका वालोक्दुतचि पाक्स्वाचि न्हाङ् ङ्खाचिङा उका राज्याभाङ् पाप चोक्खुबाचि नुङ् पाप चोक्मेखुबाचि घाक ङ्खोप्स्वाचिहोङ् 42मिगा भाट्टिबे लेप्तेन्द्वाचि, न्नाबे ङ्खाचि केङ् छिम्साङ् इब्बे-इब्बे ङ्हाम्मे॥ 43न्हाङा धार्मोतिचि च्हेन निङ्वाफुमा पागा राज्याबे नाम लोॽवा चाम्काचोक्साङ् ङ्वामेहा॥ इसागा खेम्माहा उनाभाक ङ्वान्ने, न्नाङा खेप्सुनि!
हुम्दाहा याङ्सा नुङ् वालोक्लुङ्गा ताप्चेॽया
44 “निङ्वाफुमागा राज्या च्हेन एको रोपाबे हुम्दाहा याङ्सा लोॽवाना ओम॥ ङ्खा एको याॽमिङा तुप्स्वाहोङ् चुमोॽवा, न्हाङ् चोन्सिसाङ् खेमेहोङ् उङ्नुङ् वेॽहा घाक थोक इनुच्वाहोङ् न्ना रोपा इन्वा॥
45 “फेरि निङ्वाफुमागा राज्या उचुन्ना वालोक्लुङ् योक्खुबा एको बेपारि लोॽवाना ओम॥ 46न्नाङा एको प्याक ओमेन आखुबा वालोक्लुङ् तुप्स्वा, न्हाङ् खेमेहोङ् उङ्नुङ् वायाहा घाक थोक इनुच्वाहोङ् न्ना वालोक्लुङ् इन्वा!
नासा लाप्माना जालगा ताप्चेॽया
47 “निङ्वाफुमागा राज्या सामुन्दाराबे लेप्ताना एको जाल लोॽवाना चा ओम॥ न्नाबे घाक खाले नासाचि ङ्ङामे॥ 48नासाचिङा जाल इप्तिॽवाहोङ् नासा लाप्खुबाचिङा न्ना जाल उलाप्पे न्लोन्द्वा, न्हाङ् नासाचि न्सेग्वाचि॥ उचुन्हा-उचुन्हाचि उङ्चि उयाङ्धाङ्बे ङ्ङेन्द्वाचि न्हाङ् इसिसिॽहाचि च्हेन पाखा न्लेप्ताहाक्स्वाचि॥ 49ना कायुङ्लेनगा आखेरि लेनबे चा ङ्खाॽलामाङ् लेङ्मेहा॥ वालोक्दुतचि न्दामेहोङ् इसिॽहा काम चोक्खुबाचि धार्मोतिचिभाङ् म्फोक्स्वाचि, 50न्हाङ् मिगा भाट्टिबे न्लेप्तेन्द्वाचि॥ न्नाबे उङ्चि केङ् छिम्साङ् इब्बे-इब्बे ङ्हाम्नुङ्मेहा॥”
51येसुङा उका चेलाचि छिम्दुचि, “इना न्निङ्दा खा घाक चेॽया आसुम्घा?”
उङ्चिङा न्लु, “आसुम्ङाहा हाङ्बा॥”
52न्हाङ् येसुङा ङ्खाचि लुचि, “न्हाङामाङ् निङ्वाफुमागा राज्यागा उतुम्बे घाक चेॽया था तोक्खुबा धार्मासाप्ला चिन्खुबाचि च्हेन पाङ्गा एको उह्वाङ्बा लोॽवाहा ओम्चि॥ पाङ्गा उह्वाङ्बाङा उका भान्डारभाङ् ओछोङा, उलिप्पा, प्याक ओमेन आखुबा इमिन्हा सामान चा लोन्मा यास्वाहा॥”
नासारात साहारबे येसु इन्कार न्जोगुना
(मार्कुस ६:१-६; लुका ४:१६-३०)
53खा ताप्चेॽया लुइचिहोङ् येसु न्नाभाङ् ख्या॥ 54न्हाङ् उङ् पुसाना ठोङ्बे तायाहोङ् उङा ङ्खाचिगा छुम्पाङ्बे चिन्मा तारोक्तुचि॥ उङा चिन्दुचिहा खेम्खुबाचि आच्चाम्मा एसाङ् ङ्गाया, “नाङा खाॽलाहा बुद्दि नुङ् आच्चाम्मा-आच्चाम्माहा काम चोक्माहा साक्ति हेॽनाहाङ् तोक्तुहा? 55मेन्ना ना गो न्ना सिङ् कार्मिगा उच्या मेन्नायि? नागा उमा चा न्ना मारियाम मेन्नायि? याकुब, योसेफ, सिमोन नुङ् याहुदा नागा उनुन्छाचि मेन्हाचि? 56नागा उनुन्छा मामुचि चा नाबे कानिङ्नुङ् मानिन्हायि? ङ्खाॽलाभोङ् नाङा खा घाक चेॽया हेॽनाहाङ् तोक्तुहा?” 57खाॽला कासाङ् ङ्खाचिङा उङ् पात्ते न्जोगुनिन॥#युहान्ना ४:४४ ङ्खाॽनिङ्गो येसुङा ङ्खाचि लुचि, “निङ्वाफुमाभाङ् चेक्खुबागा घाक ठोङ्बे आदार लेङ्मे, ङ्खाॽनिङ्गो उका तेन्कुबेॽनुङ् उका याॽमिचिङा च्हेन आदार न्जोग्वानिन्ना॥” 58ङ्खा याॽमिचिबे बिस्वास म्मायान्होङ् येसुङा न्ना ठोङ्बे प्याक आच्चाम्माहा काम न्जोगुन॥
Currently Selected:
मात्ति 13: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
