मात्ति 14
14
बाप्तिस्मा पिखुबा युहान्ना स्याना
(मार्कुस ६:१४-२९; लुका ९:७-९)
1ङ्खिङ्बेला गालिल लिङ्खामबे राज्या चोक्खुबा हेरोदङा येसुगा उतुम्बे खेप्सु॥ 2न्हाङ् उङा उका काम चोक्खुबाचि लुचि, “ना गो सिसुम्ना बाप्तिस्मा पिखुबा युहान्नामाङ् ओम, उङ् स्यानाभाङ् हिङ्गिलिक लेक्सामाना! ङ्खोङ्माङ् उङ्भाङ् खिङ् साक्तिसालि काम लेङ्मासिम्मेहा॥”
3हेरोदङा खाॽला इजाङ् मितानाबाङ्निङ्, ओन्दाङ् उका उहिङ्खुमा हेरोदियासका उनिङ्वा तामेॽमागा उङा युहान्ना लाप्मेतुचिहोङ् छेक्पाङ्बे छेक्मेतुक्साचि#मात्ति ४:१२; लुका ३:१९-२० (हेरोदियास च्हेन हेरोदका उनुन्छा फिलिपका उहिङ्खुमा साया)॥ 4युहान्नाङा हेरोद दाफे-दाफे खाॽला लुनेसुक्सा, “खाॽला नुन्छा ताङ्मेक हिङ्खुमा चोक्माहोङ् युङ्मा ब्यावास्थाङा म्बिमेन्हा॥”#लेबि १८:१६; २०:२१ 5न्हाङामाङ् हेरोदङा उङ् सिमागा चोगुक्सा, ङ्खाॽनिङ्गो उङ् याॽमिचिनुङ् किसिता, इजाङ्बाङ्निङ् ङ्खाचिङा युहान्ना निङ्वाफुमाभाङ् चेक्खुबा म्मितुक्सा॥
6ङ्खाॽनिङ्गो जोबो हेरोदका वाम लेन ताया, न्ना लेन हेरोदियासका उच्या मामुङा घाक्का उयुम्बे उचुन लाक्ताहोङ् हेरोद इब्बे-इब्बे चोन्सिॽमेतु॥ 7न्हाङा हेरोदङा कासाम चासाङ् न्ना मामु लु, “न्दा इहा नाक्त्वागा, का ङ्खा पिमेॽनेन्हा॥”
8उका उमाङा चिन्दुना लोॽवा न्ना मामुङा खाॽला लु, “बाप्तिस्मा पिखुबा युहान्नागा उटुखुरुक खोक्तुघोङ् का थालबे पियाङ्॥” 9खा खेप्सुहोङ् हाङ् हेरोदका उनिङ्वा तुगाहोङ् चा ङ्खिङाहा खोलोङ्बाचिगा ओन्दाङ् कासाम चायाब्यामासानाङा न्ना मामुङा कायाना लोॽवा चोक्माना आग्गे पिचि॥ 10उङा छेक्पाङ्बेॽमाङ् युहान्नागा उटुखुरुक खोक्मेतुचि॥ 11न्हाङ् न्ना खोक्खुबाङा युहान्नागा उटुखुरुक थालबे ताहोङ् न्ना मामु पि, न्हाङा न्ना मामुङा उमा खुतु॥ 12न्हाङा युहान्नागा चेलाचि न्दायाहोङ् न्ना लास ङ्खेतुहोङ् ङ्हुम्दु॥ न्हाङ् ङ्ख्याहोङ् खा चेॽया येसु ङ्खेम्मेतु॥
येसुङा फा माहोम्बोक याॽमिचि चामेतुचिहा
(मार्कुस ६:३०-४४; लुका ९:१०-१७; युहान्ना ६:१-१४)
13खा चेॽया खेप्सुहोङ् येसु डुङ्गाबे थाङा, न्हाङ् स्वाक इसा चा मेॽनिङ्ना ठोङ्बे ख्या॥ ङ्खाॽनिङ्गो याॽमिचिङा येसु खेक्साना था न्दोक्तुहोङ् तेन-तेनभाङ् लाम्साङ् ओहेक्साङ्-ओहेक्साङ् लान्जोगा॥ 14येसु डुङ्गाभाङ् लोन्दानिङ् प्याक याॽमिङा उङ् ङ्गुसुक्साना निसुचिहोङ् उलुङ्मा तुक्तुचि, न्हाङा ङ्खाचिगा तुखाबाङ्चि नुमेतुबिचि॥
15नाम आयाहोङ् उका चेलाचि न्दायाहोङ् येसु न्लु, “हाकु नाम आया, नाबेको इहाचा मान खा याॽमिचि ‘ख्यानि’ लुचि, न्हाङा ङ्खाचि तेन-तेनबे ङ्खेॽहोङ् उङ्चिगा लागि आफाइ चाम्योङ्बा ङ्ङिनुनि॥”
16ङ्खाॽनिङ्गो येसुङा लुचि, “ङ्खाचि खेॽमा आवास्याक मान्ना, न्निङ्दामाङ् ङ्खाचि चाम्योङ्बा पियानुम्चिम॥”
17चेलाचिङा न्लु, “कानिङ्नुङ् गो फा ओटा चालेप्पा नुङ् हिच्चि नासाचि से ङ्वान्नेहा॥”
18येसुङा लुचि, “सोङ् ङ्खा चालेप्पा नुङ् नासाचि नाबे आप्तानुम्चिम॥”
19येसुङा ङ्खा याॽमिचि चाउरबे युङ्मेतुचि, न्हाङ् फा ओटा चालेप्पा नुङ् हिच्चि नासाचि उमुकपे याङुचिहोङ् वालोकपोटि सोसाङ् निङ्वाफुमा नुनिङ्वा पि॥ न्हाङा उङा चालेप्पा एगुचिहोङ् चेलाचि पिचि, न्हाङ् चेलाचिङा याॽमिचि ङ्हाप्सुबिचि॥ 20घाकङा खानुङ् न्जो, न्हाङ् ङोन्दाहा टुक्रा चेलाचिङा ङ्खोप्सुनिङ् एहिच डालो लेक्सा॥ 21न्नाबे चाखुबाचि मामुचि नुङ् पिछानाछाचि मेॽनिङ् बाबु याॽमिचि से फा माहोम्बोक हिङ् ङ्वाया॥
येसु माङ्च्वा छोङ्बे लामाना
(मार्कुस ६:४५-५६; युहान्ना ६:१५-२१)
22न्हाङ् येसुङा याॽमिचि पाङ्मास्यानिङ् उका चेलाचि खाॽला लुचि, “डुङ्गाबे थाङिघोङ् ओन्दाङ् योप्पारिक ख्यानि॥” न्हाङ् उङ् च्हेन याॽमिचि बिदा मेम्बिॽले सोम्मा न्नाबे वाया॥ 23ङ्खाचि बिदा पिइचिहोङ् उङ् ओतोखुमाक पार्थाना चोक्से कोङ्गुबे थाङा॥ नाम आयानिङ् येसु से ओतोखुमाक वाया॥ 24ङ्खिङ्बेला डुङ्गा च्हेन तालबे माङ्फा योरोक तासिक्सा॥ न्हाङा माडा हिॽवा फेनानाङा डुङ्गा छालगा चापेटाबे आयाहोङ् चेलाचि ओन्दाङ् खेॽमा ङ्यासामासानिन॥ 25भेनिक्का सुम मोक्तुनिङ् लोप्पि येसु माङ्च्वा छोङ्बे लाम्साङ् चेलाचि ङ्वायानाबे ताया॥ 26चेलाचिङा येसु माङ्च्वा छोङ्बे लामाना न्निसुहोङ् किसिॽमाङा खाॽला कासाङ् ओक्मा न्दारोक्तु, “हाओ, ना गो छेम्चाखुबा ओम!”
27ङ्खाॽनिङ्गो सोलोक येसुङा लुचि, “ङ्गिसितानिन, का ओम्ङान, साहास चोगानि॥”
28खा खेप्सुहोङ् पात्तुरुसङा लु, “हाङ्बा न्दामाङ् ओम्गानभोङ्, का चा माङ्च्वा छोङ्बे लाम्साङ् न्दा वेकानाबे आप्माना आग्गे पियाङ्॥”
29येसुङा लु, “आबा!” न्हाङा पात्तुरुस येसु वायानाबे खेॽमागा डुङ्गाभाङ् लोन्दाहोङ् माङ्च्वा छोङ्बे लाम्मा तारोक्तु॥ 30ङ्खाॽनिङ्गो माडा हिॽवा फेनाना निसुहोङ् उङ् किसिता, न्हाङ् जोबो उङ् माङ्च्वाबे लुप्साखेक्सासा ङ्खिङ्बेला खाॽला कासाङ् ओक्ता, “ओ हाङ्बा! का हिङ्मेताङ्॥”
31न्हाङ् ङ्खिङ्बेलामाङ् येसुङा च्याप्पाइ लाबुहोङ् लु, “हेॽनाइ ङ्गा बिस्वास, न्दा इजाङ् साङ्का चोगाङ्गाना?” 32न्हाङ् उङ्चि डुङ्गाबे थाङाचि, उङ्चि थाङाचिहोङ् सोलोक हिॽवा चा फेम्मा लेप्ति॥ 33न्हाङा डुङ्गाबे ङ्वायाहा चेलाचिङा फोप सेमेसाङ् न्लु, “जेप्पा न्दा गो निङ्वाफुमागा उच्यागान!”
34येसु चेलाचिनुङ् तालगा योप्पारिक गानेसारेत बाङ्ना ठोङ्बे तासुहोङ् डुङ्गाभाङ् लोन्दा॥ 35न्नाबेॽहा याॽमिचिङा उङ् येसुमाङ् ओमभोङ् चिनान्जोगुहोङ् योरोक-खेरेक्हा तेनचिबे खा सालेन ङ्हाक्सु, न्हाङा याॽमिचिङा तुखाबाङ्चि येसु वायानाबे ङ्खुराचि॥ 36न्हाङ् खाॽला लुसाङ् मुक म्फाक्तुचि, “खा तुखाबाङ्चि ङ्गा तेक्का उलाप से होङ्चा तोक्निमा पिचि॥” न्हाङा उका ओतेक तोक्निखुबा घाक न्नुया॥
Currently Selected:
मात्ति 14: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
