सेगुम्पाक 11
11
पात्तुरुसङा यारुसालेमबेॽना छुम्वाङ्बे पार्चार चोगुहा
1याहुदियाबे ङ्वायाहा सेगुम्पाकचि नुङ् बिस्वासि फुनुन्छाचिङा हेकोहा जातिगा याॽमिचिङा चा निङ्वाफुमागा चेॽयाबे बिस्वास न्जोगुहा भोङ् ङ्खेप्सु॥ 2न्हाङ् पात्तुरुस यारुसालेमबे तायाब्या, ङ्खिङ्बेला याहुदि बिस्वासिचिङा उङ् खाॽला लुसाङ् आप्दिक ङ्ङेन्दु, 3“न्दा खाताना मेन्जोक्लेहा याॽमिचिगाबे ख्याघोङ् उङ्चिनुङ् युङाघोङ् इजाङ् चोघा?”
4न्हाङा पात्तुरुसङा ङ्खा घाक चेॽया योक्मेॽमा तारोक्तुचि, 5“का योप्पा साहारबे वायाङ्निङ् पार्थाना चोक्मास्याङ्, ङ्खिङ्बेला का एको खाॽलाना सेन्चि निसुङ्, वालोकपाहाङ् माडा फोॽमा लोॽवाना ना उलाप्पे थुन्दाना आका आयुम्बे आयुक्सा॥ 6न्नाबे का उचुन सोङ्निङ् न्नाबे ताम्दाङ्फुमाबेॽहा घाक खाले जिवातचि, पुङ्दा पोसुचि, फोक सोसाङ् खामबे लाम्खुबा जिवातचि न्हाङ् ताङ्खेङ्बे पेखुबा न्वाकुच्याकचि ङ्वाया॥ 7न्हाङा का एको खाॽलाना सेम्ला खेप्सुङ्, ‘ओ पात्तुरुस, पोगाघोङ् खाचि सिसुचोचि॥’
8“ङ्खाॽनिङ्गो का पोलोवा पिङ्, ‘मेन्ना हाङ्बा खाॽलाहा का इमिन चामा यास्वाङ्हा! खाॽलाहा चामा मेलेङ्माहा चाम्योङ्बा गो खिङ् सोम्मा का हेॽनिङ्चा न्जाक्सुङान्हा॥’
9“वालोकपाहाङ् फेरि खाॽलाना सेम्ला खेप्सुङ्, ‘निङ्वाफुमाङा सुद्दा चोगुहा चेॽया न्दा आसुद्दाहा भोङ् ङ्गायान॥’ 10सुम्मा खाॽलामाङ् लेक्सा, न्हाङ् ङ्खा घाक ताङ्खेङ्पोटि न्लासाख्या॥ 11ङ्खिङ्बेलामाङ् काइसारियाभाङ् का लाल्लासे म्बाक्सुचिहा सुम्भाङ् याॽमिचि का वायाङ्ना पाङ्बे न्दायाब्या॥ 12पाबित्तारा आत्माङा का लुयाङ्, ‘हेकोहा जातिगा याॽमिचिहोङ्चा ङ्खाचिनुङ् साङ्का मेन्जोक्ले ख्या॥’ न्नाबे या जाना बिस्वासिचि चा कानुङ् न्लोक्सा, न्हाङा कानिङ् घाक कार्नेलियासका उपाङ्बे खेइङ्॥ 13कार्नेलियासङा उपाङ्बे एको वालोक्दुत ओताना चेॽया कानिङ् लुया॥ न्ना वालोक्दुतङा उङ् खाॽला लुक्सा, ‘योप्पा साहारबे वेॽना सिमोन पात्तुरुस लाल्लासे एकोहिप्पाङ् याॽमिचि पाक्सुचि॥ 14उङा न्दा नुसाला खेम्मेमेका, न्हाङा न्दा नुङ् ङ्गा पाङ्बेॽहाचि घाकङा मुक्ति तोक्त्वाम्गाना!’
15“का न्नाबे ख्याङ्होङ् चेक्मा तारोक्तुङ्, ङ्खिङ्बेला पाबित्तारा आत्मा ओन्दाङ् कानिङ्बे उक्साना लोॽवा उङ्चिबे चा उक्सा॥ 16ङ्खिङ्बेला का हाङ्बाङा लुयाङ्हा खा चेॽया मितुरोक्तुङ्, ‘बाप्तिस्मा पिखुबा युहान्नाङा गो माङ्च्वाङा बाप्तिस्मा पिचि, ङ्खाॽनिङ्गो न्निङ्दा च्हेन पाबित्तारा आत्माङा बाप्तिस्मा लेक्सिॽवाघा॥’#सेगुम्पाक १:५ 17कानिङ् एङ्गा हाङ्बा खिरिस्ट येसुबे बिस्वास चोगुम्होङ् निङ्वाफुमाभाङ् पाबित्तारा आत्मा तोक्तुम्ना लोॽवामाङ् ङ्खा हेकोहा जातिगा याॽमिचिङा चा उङ्बे बिस्वास न्जोगुहोङ् पाबित्तारा आत्मा न्दोक्तुक्सु॥ निङ्वाफुमाङा चोगुहा काम ओम्मा याखुबा का इसाङान?”
18खा चेॽया ङ्खेप्सुहोङ् याहुदि बिस्वासिचिङा उङ् आप्दिक एम्मा न्लेप्ति, न्हाङ् खाॽला कासाङ् निङ्वाफुमागा माहिमा चोक्मा न्दारोक्तु, “हाकु गो निङ्वाफुमाङा पास्चाताप चोक्माहोङ् हिङ्लुङ् तोक्माना उचुन्ना माउका हेकोहा जातिगा याॽमिचि चा पिक्सुचिहा॥”
एन्टिओखियाबेॽना छुम्वाङ्
19स्तिफानास न्सिसुहोङ् येसुबे बिस्वास चोक्खुबाचि तुक्नुङ् तुखि म्बिचिहाङा उङ्चि घाकपोटि ङ्हिसाख्या॥ इखिङ् फोनिके लिङ्खामबे न्दासु, इखिङ् साइपारास न्हाङ् इखिङ् च्हेन एन्टिओखिया साहारबे चा न्दासु॥#सेगुम्पाक ८:१-४ उङ्चिङा न्नाबेॽहा याहुदिचि से नुसाला ङ्खेम्मेतुचि॥ 20ङ्खाॽनिङ्गो मिहेक्साङ् साइपारास नुङ् कुरेनिभाङ् न्दायाहा एकोहिप्पाङ् चेलाचिङा एन्टिओखियाबे ङ्ख्याहोङ् हेकोहा जातिगा याॽमिचि चा हाङ्बा येसुगा उतुम्बे नुसाला ङ्खेम्मेतुचि॥ 21हाङ्बागा साक्ति उङ्चिनुङ् वाया, न्हाङा प्याक याॽमिचिङा बिस्वास न्जोगुहोङ् हाङ्बागा चेला न्लेक्सा॥
22खा सालेन यारुसालेमबेॽना छुम्वाङ्बे चा तासु, न्हाङ् उङ्चिङा बार्नाबास एन्टिओखियाबे म्बाक्सु॥ 23उङ् न्नाबे तासुहोङ् न्नाबेॽहा याॽमिचिबे निङ्वाफुमागा आनुगाराहा निसुहोङ् इब्बे-इब्बे चोन्दास्या, न्हाङा “घाक निङ्वा निङ्वाफुमा पिम्घोङ् बिस्वासि लेक्सामासानि” भोङ् उत्साहा पिचि॥ 24इजाङ्बाङ्निङ् उङ् पाबित्तारा आत्माङा इप्तुना नुङ् बिस्वासपे चात्तुना, नुराङ्बा याॽमि साया॥ न्हाङा उङा प्याक याॽमिचि बिस्वासपे ताचि॥
25न्हाङा साउल योक्से बार्नाबास टार्सास साहारपोटि ख्या॥ 26उङा न्नाबे साउल तुप्सुहोङ् एन्टिओखियाबे ता॥ न्हाङ् ए फिम्बिलिङ् सोम्मा न्नाबेॽना छुम्वाङ्बेॽहा याॽमिचिनुङ् साङ्गाति चोक्साङ् प्याक याॽमिचि चिन्दाचुचि॥ (न्नाबेॽमाङ् घाक हाक्निङ् ओन्दाङ् चेलाचि “खिरिस्टियान” भोङ् न्लुयाहा ओम)॥
27ङ्खिङ्बेला निङ्वाफुमाभाङ् चेक्खुबा एकोहिप्पाङ् याॽमिचि यारुसालेमभाङ् एन्टिओखियाबे न्दाया॥ 28ङ्खाचिबे एको आगाबास बाङ्ना याॽमि वाया॥ उङ् पाबित्तारा आत्माङा ताम्दाङ्फुमाभोरि माडा आनिकाल पोक्त्वाना भोङ् योक्मेतुक्सा॥ उङा खा चेॽया छुम्वाङ्बे येबाहोङ् योक्मेतुचि॥ खा च्हेन क्लाउडियास हाङ्ङा राज्या चोगुना बेलाबे लेक्सा॥#सेगुम्पाक २१:१० 29एन्टिओखियाबेॽहा चेलाचिङा आगाबासङा चेक्तुहा चेॽया ङ्खेप्सुहोङ् “याहुदिया लिङ्खामबेॽहा घाक फुनुन्छा नानुन्छाचि यासुम्चिम्नुङ् फातुम्चिम” भोङ् चेॽया ङ्हुप्तु॥ 30न्हाङा ङ्खाचिङा मिमिक याङ् म्बोगुहोङ् बार्नाबास नुङ् साउलगा मुकपाहाङ् यारुसालेमबेॽना छुम्वाङ्बेॽहा एल्डारचि ङ्हाक्तुचि॥
Currently Selected:
सेगुम्पाक 11: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
