सेगुम्पाक 12
12
हाङ् हेरोदङा छुम्वाङ्बे तुखि पिचिहा
1ङ्खा लेनचिबे हाङ् हेरोद आगिरिपासङा#१२:१ हेरोद आगिरिपास हेरोद एन्टिपासका ओयेछा न्हाङ् हेरोद माहानगा उयाङ्मेन साया॥ छुम्वाङ्बेॽहा एकोहिप्पाङ् याॽमिचि लाबुचिहोङ् तुखि पिॽमा तारोक्तुचि॥ 2उङा युहान्नागा उफु याकुब चा साम्बेकङा चेन्सिमेतुचि॥ 3खा कामङा याहुदि याॽमिचि न्जोन्दास्याहा निसुचिहोङ् पात्तुरुस चा लाप्माना तार्तुम्बि तोङ्मा तारोक्तु॥ खा चेॽया खामिर मेएन्लेहा चालेप्पा चामाना होक्नामगा बेलाबे लेक्सामासा॥ 4हेरोदङा पात्तुरुस लाप्मेतुचिहोङ् छेक्पाङ्बे छेक्मेतुचि न्हाङा उङा ना ओटा काङ्बाचिगा छुम चोगुचिहोङ् लेॽनिसेॽनि कुमेतुचि॥#पारास्थान १२:१-२७ एको छुमबे ना जाना काङ्बा ङ्वाया, इजाङ्बाङ्निङ् उङा फोङ्होक्नाम मेम्मेहोङ् से पात्तुरुस याहुदिचिगा ओन्दाङ् खेॽमा मितुक्सा॥
5ङ्खाॽनिङ्गो पात्तुरुस ङ्खाॽला छेक्पाङ्बे आयामासानिङ् छुम्वाङ्बेॽहा बिस्वासिचि एको निङ्वागा न्लेक्साहोङ् इब्बे-इब्बे निङ्वाफुमाबे उका लागि पार्थाना न्जोक्मास्या॥
पात्तुरुस छेक्पाङ्भाङ् लोन्दाना
6हेरोदङा पात्तुरुस याहुदि याॽमिचिगा ओन्दाङ् ताॽमा हाक्निङ् ओन्दाङ्ना सेॽनि पात्तुरुस हिप्पाङ् काङ्बाचिगा उलुम्बे इप्सामासा॥ उङ् हिच्चि चेक्चिगा साङ्लिङा न्थुन्दुक्सा न्हाङ् वालाम्बुङ्बे काङ्बाचिङा ङ्गुसुक्सा॥ 7ङ्खिङ्बेला थाप्थुम्बे हाङ्बागा एको वालोक्दुत ओता, न्हाङ् छेक्पाङ्गा कोठा ओम लेक्सा॥ न्हाङा वालोक्दुतङा पात्तुरुस उफाक्ताङ्बे खोॽलिक खोसाङ्, “हानि पोगा” लुसाङ् पोगु॥ ङ्खिङ्बेला पात्तुरुसका उमुकपे न्थुन्दाहा साङ्लिचि म्फुक्साख्या॥
8न्हाङा वालोक्दुतङा लु, “फोखिमा मेतुघोङ् लाङ्खोप वाचि!” पात्तुरुस ङ्खाॽलामाङ् चोगा॥ न्हाङ् वालोक्दुतङा लु, “फोॽमा हाप्सुघोङ् आहेक्साङ्-आहेक्साङ् आबा!” 9न्हाङा पात्तुरुस चा छेक्पाङ्भाङ् लोन्दाहोङ् वालोक्दुतका हेक्साङ्-हेक्साङ् लाचोगा॥ ङ्खाॽनिङ्गो वालोक्दुतङा चोगुहा खा चेॽया जेप्पागा ओमभोङ् था न्दोक्तुक्सान॥ उङा गो सेन्चिले निमासिम्मेङ्ना मितामासा॥ 10उङ्चिङा छेक्पाङ्बे कुखुबा काङ्बाचिगा इम्ना नुङ् हिम्ना छुम चा काक्ताप्ताचुचिहोङ् साहारगा चेक्चिगा गेट्पे तायाब्याचि॥ ङ्खिङ्बेला न्ना वालाम्बुङ् आफाइ होसा, न्हाङ् उङ्चि पाखा लोन्दाचिहोङ् एको मिना लाम्बुभाङ् खेॽमास्याचिनिङ् वालोक्दुतङा पात्तुरुस नाओहोङ् ख्या॥
11ङ्खिङ्बेलासेॽले पात्तुरुसङा खा जेप्पा लेक्साहा ओमभोङ् था तोक्तु, न्हाङ् खाॽला काया, “हाकु का जेप्पा था तोक्तुङ्, हाङ्बाङा उका वालोक्दुत पाक्सुहोङ् हेरोदका उमुकपाहाङ् नुङ् याहुदि याॽमिचिङा का इचोक्मा म्मितामासा ङ्खा घाकपाहाङ् फोक्सामाङ्ना॥”
12पात्तुरुसङा खा चेॽया था तोक्तुहोङ् युहान्नागा उमा मारियामगाबे ख्या॥ युहान्नागा हेकोना उनिङ् मार्कुस चा साया॥ ङ्खिङ्बेला न्नाबे प्याक याॽमिचि न्छुप्साहोङ् पार्थाना न्जोक्मास्या॥ 13पात्तुरुसङा वालाम्बुङ् ढोक्ढोक चोगुनिङ् रोदा बाङ्ना एको नोकोरनि वालाम्बुङ् होसे आबा॥ 14न्नाङा पात्तुरुसका ओसेम्ला चिनातोक्तुहोङ् चोन्सिॽमाङा वालाम्बुङ् चा मेहोले लुक्ताख्याहोङ् खाॽला लुचि, “पात्तुरुस वालाम्बुङ्बे येबानेसाना॥”
15ङ्खाचिङा न्लु, “न्दा गो बाउला चोङ्मेकानालेम्बा?”
ङ्खाॽनिङ्गो न्ना मामुङा, “उङ्माङ् ओम्यि, जेप्पा पात्तुरुसमाङ् ओम” भोङ् लुचिहा-लुचिहा चोगुचि॥
न्हाङ् ङ्खाचिङा न्लु, “ङ्खाॽलाभोङ् न्ना गो पात्तुरुस तिक्खुबा सोखुबा वालोक्दुत लोप्पि॥”
16ङ्खाॽनिङ्गो पात्तुरुसङा च्हेन वालाम्बुङ् ढोक्ढोक चोगुक्सा॥ न्हाङा ङ्खाचि ङ्ख्याहोङ् वालाम्बुङ् ङ्होसुनिङ् उङ् जेप्पा न्निसुहोङ् उङ्चि आच्चाम्मा ङ्ङेता॥ 17पात्तुरुसङा ङ्खाचि उमुक्का चालङा स्वाक वायानिभोङ् लुचि, न्हाङ् निङ्वाफुमाङा उङ् इमिन छेक्पाङ्भाङ् पाखा लोन्दुना ङ्खा चेॽया खेम्मेतुचि॥ न्हाङा “खा चेॽया याकुब नुङ् छुम्वाङ्बेॽहा बिस्वासि फुनुन्छाचि चा खेम्मेतानुम्चिम्यो” लुचिहोङ् उङ् न्नाभाङ् हेकोना ठोङ्बे ख्या॥
18न्हाङा वान्दिभेनिक ओम लेक्साहोङ् “पात्तुरुस इङा हाना, हेॽने ख्याना” भोङ् छेक्पाङ् कुखुबा काङ्बाचिबे माडा हाल्लाखाल्ला लेक्सा॥ 19खा चेॽया था तोक्तुहोङ् हेरोदङा पात्तुरुस योक्से पाक्सुचि, ङ्खाॽनिङ्गो ङ्खाचिङा उङ् हेॽने चा न्दुप्सुनिन॥ न्हाङा छेक्पाङ् कुखुबा काङ्बाचि घाक खा चेॽया इमिन लेक्साहाभोङ् छिम्दुचि, ङ्खाॽनिङ्गो ङ्खाचिङा इहाचा पोलोवा म्बिनिन्नाङा ङ्खाचि सिमेतुचि॥ न्हाङ् हेरोद एहिलेनगा लागि याहुदियाभाङ् काइसारिया साहारबे वासे ख्या॥
हाङ् हेरोद स्याना
20टुरोस नुङ् सिदोन साहारबेॽहा याॽमिचिनुङ् हाङ् हेरोदका तुक्नुङ् ओलोक खोतामासा॥ हाकु ङ्खा साहारबेॽहा खाङ्खाङ्बाचि हाङ् हेरोदनुङ् तोङ्मा म्मिता, न्हाङा हेरोदका उनिङ्वाङा चोना याॽमि बालास्तास नुङ् उङ्चि न्दोङाहोङ् हाङ्नुङ् तुप्मा तोक्तुम्ङानिभोङ् मुक म्फाक्तुचि॥ इजाङ्बाङ्निङ् उङ्चि घाकङा चाम्योङ्बा हाङ् हेरोदका खाम्युकभाङ् खेॽमाहा साया॥
21न्हाङ् न्ना तुप्माना लेनबे हेरोदङा हाङ्ङा वाॽमाहा तेक वाहोङ् हाङ्युक्थामबे युङा, न्हाङ् ङ्खा खाङ्खाङ्बाचिगा ओन्दाङ् चेक्ता॥ 22ङ्खिङ्बेला याॽमिचि खाॽला कासाङ् ङ्ङोक्ता, “ना सेम्ला गो याॽमिगा मेन्ना, निङ्वाफुमागा ओम!”
23खाॽला हेरोदङा निङ्वाफुमा माहिमा म्बिन्नाङा ङ्खिङ्बेलाक्माङ् हाङ्बागा एको वालोक्दुतङा हेरोद दान्डा पि, न्हाङ् उङ् फिबाकङा न्लेप्तुहोङ् स्या॥
24ङ्खाॽनिङ्गो निङ्वाफुमागा चेॽया पुसाङ् नुङ् हिसाङ् ख्या॥
25बार्नाबास नुङ् साउलङा चा उङ्चि काम याइयाचुहोङ् यारुसालेमभाङ् एन्टिओखियाबे लासारायाचि॥ ङ्खिङ्बेला उङ्चिनुङ् युहान्ना चा तायाचु, न्नागा हेकोना उनिङ् मार्कुस साया॥
Currently Selected:
सेगुम्पाक 12: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
