Lʉ́ka Mʉlongooryo
Mʉlongooryo
Kɨtáabu ɨkɨ chaandɨkwa nɨ Lʉ́ka. Ʉhʉ Lʉ́ka ˆvyeene vyoónekanaa, nɨ Mugiríki ajáa. Kei, nɨ dakitáari ajáa (Vakolosáai 4:14) na nɨ mʉʉntʉ ˆajáa na ʉmanyi wo kaasakanʉla masáare ya kalɨ (1:1-4). Lʉ́ka aandɨka kɨtáabu ɨkɨ na kɨtáabu cha Mɨrɨmo ya Vatumwi. Vitáabu ivi vivɨrɨ, Lʉ́ka ajáa amwaandɨkɨra kɨjeengi chaachwe ˆaséwaa Toofíili. Lʉ́ka atʉmamáa mʉrɨmo wo variyʉla Masáare Maaja hamwɨ na Paúli (2 Timotéeo 4:11; Filemóoni 24).
ˆVyeene vyoónekanaa, Lʉ́ka aandɨka kɨtáabu ɨkɨ kati ya myaaka ya 57-64 keende Kirisitʉ ˆavyaalwa. ˆCheene chabweeyya aandɨke kɨtáabu ɨkɨ, nɨ kʉvoonekya vaantʉ kɨkomi cha Masáare Maaja ya Yéesu kwa vaantʉ voosi, noo kʉsea, kwa Vayahúudi na kwa vaantʉ sɨ ˆvarɨ Vayahúudi (1:4; 4:24-26; 17:11-19). Ɨkɨ noo ˆchooreka aandɨka ufumo wa lʉkolo lwa Yéesu fʉʉrʉ kwa Adáamu (3:23-38). Kei, oonekya ˆvyeene Yéesu ajáa heehi na vaantʉ ˆvachwɨ́ɨwaa matɨ, baa ja Vasamaría (10:23-37) na vasaankanʼyi kóodi (5:27-32). Avanyemyáa vakɨva, na alumiriryáa vasúngaati vandoovaambirirya vakɨva (12:33; 14:13; 18:22; 19:8).
Lʉ́ka aandɨka masáare ˆyarɨ foo ˆmeene yoonekya Masáare Maaja ya Yéesu Kirisitʉ, nɨ sa vaantʉ voosi. Na ivi vyoónekanaa sa ˆvyeene aandɨka masáare ˆyarɨ foo ˆmeene yasiina kwa vaandiki vɨɨngɨ va Masáare Maaja, noo kʉsea, Matáayo, Maáriki na Yooháani. Masáare aya nɨ, mʉʉntʉ muki mʉhéngeeti ˆamʉhaka Yéesu makuta (7:36-50), lusímo lwa Mʉsamaría mʉʉja (10:30-37), lusímo lwa taáta ˆajáa na mbavariri kwa mwaana waachwe ˆarɨmɨra (15:11-32), lusímo lwa musúngaati na Lasáaro mʉkɨva (16:19-31) na masáare ya Sakáayo mʉsaankanʼyi kóodi (19:1-10).
ˆVyeene Kɨtáabu ɨkɨ Chagavwa
Mʉlongooryo, kʉvyaalwa kwa Yéesu na usinga waachwe 1:1–2:52
Mʉrɨmo wa Yooháani Mʉbatisáaji 3:1-20
Yéesu yoobatisiwa na yooyerwa 3:21–4:13
Mʉrɨmo wa Yéesu ɨsɨ ya Galiláaya 4:14–9:50
Mʉrɨmo wa Yéesu mpɨɨndɨ ˆatamanyáa na Yerusaléemu 9:51–19:27
Mʉrɨmo wa Yéesu múujii wa Yerusaléemu 19:28–21:38
Inkwya ya Yéesu 22:1–23:56
Kʉfʉfʉka kwa Yéesu 24:1-53
Currently Selected:
Lʉ́ka Mʉlongooryo: LAG
Highlight
Share
Copy
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.