SAN JUAN 8

Jun xuuj aj paj

1Yaltzen te Jesús, e xiꞌ tcꞌuꞌj jwitz Olivos tbi. 2Te juntl kꞌij, tej kskix, ocx Jesús juntl maj tuj tja Dios tuj Jerusalén. Bix nim xjal e pon tuyaxin. E cubtzen kexin, bix akꞌxin xnakꞌtzal cye. 3Maatktzen nxnakꞌtzanxin, e pon ke txꞌolbal ley cyuya ke fariseo twitzxin. Matkx tjaw tzyet jun xuuj aj paj cyuꞌnxin tej nbinchan jyaaꞌn baꞌn, bix ul cyiiꞌnxin jaxuj, bix e cub cywaꞌbaxin cyxol xjal tuj tja Dios. 4Bix e xiꞌ cykbaꞌnxin te Jesús:

—Xnakꞌtzal, ja xuuj lu jun aj paj. Xtzyet kuꞌna tej toc kcyeꞌyena nwutanxuj tuya jun xinak yaaꞌn tchmilxuj. 5Taat, e cyaj tkbaꞌn Moisés tuj ley, ka at jun xuuj aj paj, iltzen tiꞌj tuꞌn tcub byet-xuj tuꞌn xak. Yaltzen tey, ¿ti toc tuꞌna tiꞌj lu?―tz̈ikexin texin. 6Pero e xiꞌ cykbaꞌnxin jlu nuk tuꞌn tcub cykꞌoꞌnxin jun cꞌoꞌbil tuj tbexin, tuꞌn tcub tzꞌakxin tuj tyolxin, tuꞌntzen tcnet tilxin cyuꞌnxin.

Mintiiꞌ aj ttzakꞌbeꞌnxin cyexin. Nuk e cub pchꞌexin, bix akꞌxin tzꞌiblcꞌate twitz txꞌotxꞌ tuꞌn twiꞌ tkꞌabxin. 7Pero tej t-xiꞌ cykanenxin texin juntl maj, e jaw tcyeꞌyenxin, bix e xiꞌ tkbaꞌnxin:

—Ka at jun cyxola mintiiꞌ til tuj twitz, baꞌntzen toc t-xooꞌn tneel xak tiꞌjxuj―tz̈i Jesús, 8bix e cub pchꞌexin te tzꞌiblcꞌate juntl maj twitz txꞌotxꞌ.

9Tejtzen cybintexin tyol Jesús, e tzaj cychꞌixewxin, bix akꞌ elex juun cyexin. Nejl, ex kej nejenel mas nintzaj, bix mancꞌbiltzen ex baj ke fariseo. Nuk ja Jesús e cyaj ten tuya xuuj cyxol xjal. 10Bix e jaw weꞌ Jesús, bix e xiꞌ tkanenxin te xuuj:

—Naa, ¿tiiꞌn ma cheꞌx ke kbal tila? ¿Mimpanal ma cyaj tuꞌn toc cyxooꞌn xak tiꞌja?―tz̈ixin.

11—Min-al, taat―tz̈ixuj.

Bix e xiꞌ tkbaꞌn Jesús texuj:

—Jax juꞌx weya, mlay cub nkꞌoꞌna tcastiwey. Cutxey, bix miꞌn binchantla il juntl maj―tz̈ixin.

Ja Jesús spiꞌyen cyxol xjal

12Juntl maj e yolen Jesús cyuya aj fariseo. E xiꞌ tkbaꞌnxin cyexin:

—Inayena tisen spiꞌyen cye xjal. Kej xjal ma chi oc lpe wiꞌja, mlay chi bet tuj klolj, sino chi temel tuj spiꞌyen. At cychunkꞌlal te junx maj―tz̈ixin.

13Juꞌ tzunj, e xiꞌ cykbaꞌn fariseo texin:

—Mintiiꞌ cꞌajbel tyola, cuma jax tey nyolena te tstiwa tiꞌjxa. Min-al juntl tuꞌn tcyiwsante tyola―tz̈ikexin.

14Pero aj ttzakꞌbeꞌn Jesús cyexin:

—Jax at tajbel nyola. Jaxxix nyola tiꞌj alcye kena, cuma nuk inayena baꞌn wuꞌna jaaꞌ tumel in tzaja bix jaaꞌ tumel chin xeꞌla. Pero cyey, min-al jun cyxola baꞌn tajben te tstiwa wiꞌja, cuma min cytzkiꞌna jaaꞌ tumel in tzaja bix jaaꞌ tumel chin xeꞌla. 15Tzin cykbaꞌna yaaꞌn inayena jxjal smaꞌn tuꞌn Dios tuꞌn tlaj ncheꞌx lpey nuk tiꞌj cynaabl xjal, bix tzin tkbaꞌn cynaabl xjal nuk jun aj Galilea kena. Weya, min nbint wuꞌna tuꞌn ntzpeta juꞌwa tuꞌn nxiꞌ lpeya tiꞌj cynaabl xjal. 16Oj nmlona tnaabl jun xjal, cxeꞌl nkbaꞌna ti tten tuya jun yol jaxxix, cuma min chin mlona njunala, sino junx tuyax Nmana e tzaj tsmaꞌn inayena. 17Tujtzen cywitza, mintiiꞌ tajbel nyola nbyan wuꞌna. Pero cꞌoquel cycꞌuꞌja tiꞌj cyleya. O tzꞌibj ka at caꞌba xjal junx taꞌ cyyol, jaxxixtzen cyyol. 18Juꞌ tzunj, jaxxix taꞌ nyola tiꞌj alcye kena, cuma yaaꞌn nuk inayena tstiwa wiꞌja, sino jax Nmana e tzaj tsmaꞌn inayena tstiwa wiꞌja―tz̈i Jesús cye fariseo.

19Juꞌ tzunj, e xiꞌ cykbaꞌnxin texin:

—¿Jaaꞌ taꞌ tmana, tuꞌntzen tajben te tstiwa tiꞌja?―tz̈ikexin.

Aj ttzakꞌbeꞌn Jesús:

—Min tzꞌel cyniꞌya tiꞌj alcye kena bix alcye Nmana. Nuket ma tzꞌel cyniꞌya tiꞌj alcye kena, jax cytzkiꞌntla Nmana―tz̈ixin.

20Kej yol lu e xiꞌ tkbaꞌnxin tuj tja Dios jaaꞌ e cykꞌa xjal cyoybil te tja Dios. Pero min-al e tzaj tzyunte texin, cuma mitknaꞌx tpon jkꞌij tuꞌn tcubxin.

Tej tkbante Jesús cyjulu: “Jaaꞌ tumel chin pomela, mlay chi pona”

21Bix juntl maj e xiꞌ tkbaꞌnxin cye fariseo:

—Chin aal tzuna. Bix oj waja, chi jyola wiꞌja, inayena, Colbil cyey, pero chi cymeela bix min najset cyila. Jaaꞌ tumel chin pomela, mlay chi pona―tz̈ixin.

22Juꞌ tzunj, e xiꞌ cykbaꞌn judío cyxolxxin:

—¿Tuꞌnxpaxin cwel tbyoꞌn tiibxin? Cuma ma txiꞌ tkbaꞌnxin: “Jaaꞌ tumel chin pomela, mlay chi pona”―tz̈ikexin.

23Bix e xiꞌ tkbaꞌnxin cyexin:

—Ejeeꞌy ncheꞌx lpey tiꞌj naabl te twitz txꞌotxꞌ. Inayena at nnaabla te tuj cyaꞌj, yaaꞌn te twitz txꞌotxꞌ. 24Cuma at cynaabla te twitz txꞌotxꞌ, juꞌ tzunj chi cymeela tjakꞌ cyila, cuma ka min ma cyocslay tiꞌj ma txiꞌ nkbaꞌna tiꞌj alcye kena, chi cymeela min najset cyila―tz̈ixin.

25—¿Alcye tzuna?―tz̈ikexin.

E xiꞌ tkbaꞌn Jesús cyexin:

—Ma txiꞌ nkbaꞌna alcye kena jatxe tuj tneel. ¿Tikentzen min cyocslay nyola? 26At nim cykaꞌyela baꞌn t-xiꞌ nkbaꞌna cyiꞌja, pero waja txiꞌ nkꞌumena nuk tyol j-e tzaj tsmaꞌn inayena. Jaxxix tyolxin, bix j-e nbiꞌya texin, ja tzunj yol nchin yolena cye xjal―tz̈ixin.

27Pero min el cyniyꞌxin tiꞌj e yolen Jesús tiꞌj Dios, Jtmanxin. 28Juꞌ tzunj e xiꞌ tkbaꞌnxin cyexin:

—Oj njaw cykꞌoꞌna twitz cruz, qꞌueleltzen cyniꞌya tiꞌj ka inayena jxjal Smaꞌn tuꞌn Dios tuꞌn ntena cyuya xjal. Bix qꞌuelel cyniꞌya tiꞌj ka jnxiꞌ nkbaꞌna cye xjal, yaaꞌn jweya wajbila, sino nxiꞌ nkbaꞌna nuk alcyej e tyeecꞌan Nmana weya. 29Bix Nmana e tzaj tsmaꞌn inayena at-xin wuyena. Min ma chin cyaj tcyeꞌyenxin, sino ntzalaj wiꞌja, cuma nuk nchin binchana tajbilxin―tz̈ixin.

30Tej t-xiꞌ tkbaꞌn Jesús kej yol lu, nim xjal e cykba ka ocslalke tiꞌjxin.

Tuꞌn tzunj nxnakꞌtzbila, chi tzakpetela, tz̈i Jesús

31Juꞌ tzunj, e xiꞌ tkbaꞌnxin cyej judío otk chi ocslan tiꞌjxin:

—Ka cyaja tuꞌn cyxiꞌ lpey wiꞌja, cꞌoqueltzen cybiꞌna nyola. 32Bix qꞌuelel cyniꞌya tiꞌj ka jaxxix nxnakꞌtzbila, bix tuꞌn tzunj nxnakꞌtzbila, chi tzakpetela―tz̈ixin.

33Bix e xiꞌ cykbaꞌn kej judío te Jesús:

—Tchman kiyꞌjila Abraham koꞌya, bix bajx o ko tema tjakꞌ cycawbil juntl wik xjal. ¿Titzen tten nxiꞌ tkbaꞌna at jun il tiꞌj tuꞌn ktzakpeta?―tz̈i ke judío.

34Aj ttzakꞌbeꞌn Jesús cyexin:

—Jaxxix cxeꞌl nkbaꞌna cyey, alj nbinchan il, attzen tuj tkꞌab il. 35Cꞌoquel cycwenta tiꞌj jun techel. Tuj jun jaaꞌ, jun maan mlay cyjel te junx maj tuj jaaꞌ. Pero tcwal taaw jaaꞌ, at toclen tuꞌn tcyaj tuj jaaꞌ te junx maj. 36Jmaan mintiiꞌ toclen ntechlaꞌn ejeeꞌy xjal eteꞌy tuj tkꞌab il. Nuk inayena, Tcwal Dios, baꞌn tel ntzakpiꞌna ejeeꞌy tuj tkꞌab il. 37Jax cyuꞌna tiyꞌjil Abrahamkey. Pero yaaꞌn t-xjal Dioskey, cuma cycyꞌiy nyola bix juꞌ tzunj cyaja tuꞌn ncub cybyoꞌna. 38Pero jyol nxiꞌ nkbaꞌna cyey bix cycyꞌiy, jatzen yolj ma tzaj tkꞌoꞌn Nmana weya. Yaltzen cyey cyyol, nxiꞌ cykbaꞌna jaj ma cybiy te cyey cyman―tz̈i Jesús.

Kej t-akꞌanal taaw il

39E xiꞌ cykbaꞌnxin texin:

—Keya kman, ja kiyꞌjila Abraham―tz̈ikexin.

E xiꞌ tkbaꞌn Jesús cyexin:

—Ka tcwal Abrahamkey, cybinchamna j-e bint tuꞌn Abraham. 40Pero min ncheꞌx lpey tiꞌj tbinchben Abraham. Nuk oꞌcx n-oc cyipena tuꞌn ncub cybyoꞌna, inayena, jxjal ma txiꞌ nkbaꞌna jjaxxix yol cyey, jaj yol ma nbiꞌya te Dios. Min e bint tuꞌn Abraham juꞌwa. 41At juntl cymana, jatztzen ncheꞌx lpey tiꞌj tnaabl―tz̈ixin.

E xiꞌ cykbaꞌnxin texin:

—Jaxte t-xeꞌchel Abraham koꞌya. Yaaꞌn sicyꞌbel cwal koꞌya. Bix tcwal Dios koꞌya―tz̈ikexin.

42E xiꞌ tkbaꞌn Jesús cyexin:

—Nuket Dios cymana, n-octle wakꞌa cyey, cuma tiꞌ Dios ma chin tzaja. Yaaꞌn wuꞌnx wiiba ma chin tzaja, sino jaxin e tzaj tsmaꞌn inayena. 43¿Tikentzen min tzꞌel cyniꞌya tiꞌj nyola? Min tzꞌel cyniꞌya tiꞌj cuma cycyꞌiy tzꞌoc cybiꞌna nyola. 44Cyey cyman, ja taaw il. Cyaja tuꞌn cyxiꞌ lpey tiꞌj ti tajxin. Jaxin jun byol xjal jatxe tcublen itzꞌj twitz txꞌotxꞌ. O tzꞌel tpaꞌn tiibxin tiꞌj jaxxix yol, cuma tcyꞌixin jjaxxix. Oj nẍtakꞌenxin, nuk nxiꞌ lpexin tiꞌj texxin tnaablxin. Ẍtakꞌxin, bix jaxin cyman kej xjal ẍtakꞌ. 45Pero weya, jaxxix yol tzin nkbaꞌna, bix juꞌ tzunj cycyꞌiy nyola. 46¿Atpa jun cyey o tzꞌebinta mi nuket jun ẍtakꞌ nyola? Min-al. Juꞌ tzunj, ¿tikentzen cycyꞌiy tuꞌn cyocslana nyola oj nxiꞌ nkbaꞌna jaxxix yol cyey? 47Kej xjal te Dios, nxiꞌtzen cybiꞌn tyol Dios. Juꞌ tzunj, nchicꞌajax yaaꞌn t-xjal Dioskey, cuma min nxiꞌ cybiꞌna tyol Dios―tz̈i Jesús cye judío.

Tej mitknaꞌx tul itzꞌj Abraham ya atlte Cristo

48Bix e xiꞌ cykbaꞌnxin texin:

—Jax kuꞌna jay jun xjal nkꞌojla tiꞌ Dios tisen ke aj Samaria, bix njaw tuj twiꞌy―tz̈ikexin.

49Aj ttzakꞌbeꞌn Jesús:

—Min njawwe tuj nwiꞌ, sino nchin nimana Nmana. Pero cyey, nchi xmucchana wiꞌja nuk tuꞌnj nchin nimana Nmana. 50Pero min n-oc wipena tuꞌn woca te jawnex. At juntl xjal ctzaal tkꞌoꞌn weya tuꞌn woca te jawnex, bix ctkbaꞌ ka baꞌn nchin eꞌleya tuj twitzxin. 51Jaxxix cxeꞌl nkbaꞌna cyey, kej xjal cxeꞌl cyniman nyola, ckꞌojel cye jun cychunkꞌlal tuꞌn miꞌn chi cyim―tz̈ixin.

52E xiꞌ cykbaꞌn judío texin:

—Tzinenxsen njaw tuj twiꞌy. E cyim Abraham kaape ootxa, bix jax juꞌx ke tyolel Dios o chi cyim. Pero tey, tzin tkbaꞌna ka ma txiꞌ tniman jun xjal tyola, mlay cyim. 53¿Japa tey mas jawnex twitzj tneel kiyꞌjila Abraham e cyim? ¿Bix japa tey mas jawnex cywitzj tyolel Dios e cyim? ¿Titzen tten njaw tniman tiiba juꞌwa?―tz̈ikexin.

54Aj ttzakꞌbeꞌn Jesús:

—Ka ma jaw nnimana wiiba, nuk wajxe nchin yolena. Pero jax Nmana njaw nimsante weya, Cydiosa tuj cywitza. 55Min cytzkiꞌna Dios. Pero weya, ntzkiꞌna jaxin. Nuket t-xiꞌ nkbaꞌna min ntzkiꞌna jaxin, ẍtakꞌtzen kenle tisenj ejeeꞌy. Pero ntzkiꞌna jaxin, bix n-oc nbiꞌna tyolxin. 56Yaltzen te Abraham, tej tel tniyꞌxin tiꞌj at tuꞌn ntzaja, e tajbexin tuꞌn ntzaja, bix e tilxin tej ntzaja, bix e jaw tzalajxin wiꞌja―tz̈ixin.

57Juꞌ tzunj, e xiꞌ cykbaꞌn judío texin:

—¿Tzimpa tkbaꞌna e tena junx tuya Abraham twitz txꞌotxꞌ kaape ootxa? At-x nim jnabkꞌi tuꞌn tpona cyaꞌwnak tuya laaj jnabkꞌi. ¿Ti tten nxiꞌ tkbaꞌna o tila Abraham?―tz̈ikexin.

58E xiꞌ tkbaꞌn Jesús cyexin:

—Jaxxix cxeꞌl nkbaꞌna cyey, tej mitknaꞌx titzꞌj Abraham, inayena at―tz̈ixin.

59Tejtzen cyebinte judío ja yol lu, el cyniyꞌxin tiꞌj oc tkꞌon tiibxin te junx tuya Dios. Juꞌ tzunj, e jaw cytzyuꞌnxin xak tuꞌn toc cyxooꞌnxin tiꞌjxin. Pero e xiꞌ tewenx tiibxin cyxol xjal, bix etzxin tuj tja Dios.

Currently Selected:

SAN JUAN 8: mamTS

Highlight

Copy