SAN JUAN 7

Min e cyocsla ka titzꞌen Jesús ke jaxin Jscyꞌoꞌn tuꞌn Dios

1Tbajlenxitltzen jlu, e cyaj ten Jesús tuj Galilea, bix iyꞌxin te kbalte tcawbil Dios cyuj tnom. Min e tajbexin tuꞌn tiyꞌxin tuj Judea, cuma e cyajbe nejenel cye judío tuꞌn tcub cybyoꞌn jaxin. 2Pero chꞌitk tpon jun jawnex ninkꞌij cye xjal judío, jkꞌij tuꞌn cyten xjal jun smant cyuj niꞌ pach. 3Juꞌ tzunj, e xiꞌ cykbaꞌn titzꞌenxin texin:

—Ctex tzalu, juꞌ txiꞌy Judea, tuꞌntzen toc cycyeꞌyen kej xjal nchi oc lpe tiꞌja jatzewe ti nbint tuꞌna. 4Ka taja tzꞌoca te jun cawel, miꞌn txiꞌ tyeecꞌana tipemala nuk cyxol kej xjal tzalu yaaꞌn nintzaj. Oj tyeecꞌana tipemala, yeecꞌanx tiiba twitz cykil xjal, yaaꞌn nuk cywitz caꞌba oxe yalx xjal tzalu―tz̈i ke titzꞌenxin, tuꞌn toc cyxmucchaꞌnxin jaxin. 5Amale titzꞌet-xin ejeeꞌxin, pero min e cyocslaxin ka jaxin Jscyꞌoꞌn tuꞌn Dios.

6Juꞌ tzunj, e xiꞌ tkbaꞌn Jesús cyexin:

—Minaꞌx tpon jkꞌij tuꞌn woca te nintzaj cyibaj xjal. Pero cyey, cykil kꞌij baꞌn tuꞌn cyyeecꞌana jawnex key cywitz xjal. 7Mlay tzꞌel cyiiqꞌuen xjal ejeeꞌy. Pero weya, cycyꞌi xjal inayena, cuma wuꞌna nchicꞌajaxa jkaꞌ nbint cyuꞌn. 8Ejeeꞌxa ncheꞌxa tuj ninkꞌij. Weya, miꞌn chixa tuj ninkꞌij cyuyey, cuma minaꞌx tpon tumel tuꞌn njawa―tz̈i Jesús cye titzꞌen.

E ten Jesús tuj ninkꞌij jaaꞌ nchi chmete xjal

9Tej t-xiꞌ tkbaꞌn Jesús kej yol lu, bix e cyajxin tuj Galilea. 10Pero mas yaj, cyxiꞌlenxitltzen titzꞌenxin tuj ninkꞌij, yal texxin e xiꞌxin, pero yaaꞌn cywitz xjal, sino tjunalxin.

11Tejtzen cypon aj Galilea tuj Jerusalén pero min-al Jesús cyxolxin, e jyon ke judío tiꞌjxin, bix e xiꞌ cykanenxin:

—¿Jaaꞌ taꞌ jxjal Jesús?―tz̈ikexin.

12Cyxol kej xjal otk chi pon tuj ninkꞌij, at nim yol tiꞌ Jesús cyuꞌn, pero tuj ewjel. At juun e xiꞌ kbante: “Jun baꞌn xjalxin.” Pero at juuntl e xiꞌ kbante: “Jaxin jun tzpetsal xjal.” 13Pero nuk tuj ewjel e yolen ke xjal, cuma at cytz̈i nejenel cye judío cyiꞌj.

14Otk tzꞌex niyꞌjan ninkꞌij tej tocx Jesús tuj nin tja Dios. Bix akꞌxin xnakꞌtzal cye xjal. 15Tej cybinte nejenel cye judío t-xnakꞌtzbilxin, e jaw kleeꞌkexin, bix e xiꞌ cykbaꞌnxin:

—¿Ti tten nimxsen baꞌn tuꞌnj xjal lu? Bix min o xnakꞌtzet cyuꞌn maystro escuela―tz̈ikexin.

16Juꞌ tzunj, e xiꞌ tkbaꞌn Jesús cyexin:

—Jxnakꞌtzbil nxiꞌ nkꞌoꞌna cyey, yaaꞌn weya nyola, sino tyol Nmana e tzaj tsmaꞌn inayena. 17Kej xjal cyaj tzꞌoc cybiꞌn tajbil Dios, qꞌueleltzen cyniyꞌ tiꞌj nxnakꞌtzbila, ka te Dios, bix ka nuk wexwe nyol. 18Nuket nxiꞌ nkꞌoꞌna wexa nyola cyey, wajattzen loya tuꞌn tjaw nimset nbiꞌya cyuꞌn xjal. Pero yaaꞌn juꞌwa, cuma waja tuꞌn tjaw nimset Nmana e tzaj tsmaꞌn inayena. Juꞌ tzunj, jun jaxxix xnakꞌtzal kena, yaaꞌn jun xnakꞌtzal min tzꞌajben, tisenj cyey tzin cykbaꞌn. 19Ejeeꞌxa kej xjal tzpetsal xjal. E takꞌ te Moisés tley Dios cyey. Pero mi nuket jun cyey n-oc ebinte ley te Moisés. Ka ma cykbay n-oc cybiꞌna, ¿ti tten cyaja tuꞌn tcub cybyoꞌna inayena?―tz̈i Jesús.

20Bixsen e jaw cys̈iꞌn xjal texin:

—¡Njaw tuj twiꞌy! ¿Alcye xjal taj tuꞌn tcub byoꞌna tuꞌn?―tz̈i ke xjal.

21Bix aj ttzakꞌbeꞌn Jesús cyexin:

—Nuk jun maj e cub ncoꞌpana jun yaab tuj tyabel tuj kꞌij te ajlabl, bix kaꞌxsen o tzꞌeꞌla tuj cywitza. 22Pero cꞌoquel cycꞌuꞌja tiꞌj ti toc tuꞌn Moisés tuꞌn tonen cyiꞌ xjal. E takꞌ te Moisés jley cyey tuꞌn tcpet tchuꞌl ttzꞌalbil jaca juun ẍlak xinak. Bix yaaꞌn nuk Moisés e tzaj kꞌonte ja ley lu, sino akꞌ ke tneel cyxeꞌchela binchal jlu. Cꞌoquel cycꞌuꞌja tiꞌj, ka kꞌij te ajlabl oj npon twajxakan kꞌij titzꞌjlen jun ẍlak, cpeteltzen cyuꞌna tuꞌn cycuyana tuya ley, amale kꞌijet te ajlabl. 23Katzen juꞌ nbint cyuꞌna tuj kꞌij te ajlabl tuꞌntzen cynimana tley Moisés, ¿tikentzen njaw cykꞌoja wiꞌja tuꞌnj ul tnaabl cykilca t-xumlal jun yaab wuꞌna tuj kꞌij te ajlabl? 24Tuj cywitza in binchana jun il, pero miꞌn chi kbana ka kaꞌ j-e bint wuꞌna, sino cꞌoquel cycꞌuꞌja tiꞌj tuꞌn tel cyniꞌya tiꞌj ka jiquen waakꞌena twitz ley―tz̈i Jesús cye xjal.

¿Japale xjal jlu Scyꞌoꞌn tuꞌn Dios?

25Cuma otk yolen Jesús cyiw cye xjal, juꞌ tzunj at juun aj Jerusalén e xiꞌ cykbaꞌn:

—¿Yaaꞌmpa ja xinak lu nchi jyon xjal tiꞌj tuꞌn tcub cybyoꞌn? 26Pero lux nyolen cyuya xjal bix min-al jun nejenel cye xjal ma txiꞌ tkbante texin tuꞌn tweꞌxin tyolxin. ¿Japale xjal jlu Scyꞌoꞌn tuꞌn Dios te Cawel tuj cywitz nejenel? 27Pero n-el kniyꞌ tiꞌj yaaꞌn jaxin Jscyꞌoꞌn tuꞌn Dios, cuma ktzkiꞌn jaaꞌ itzꞌjaxin bix alcye ke tmanxin. Yal tej xjal Scyꞌoꞌn tuꞌn Dios, oj tulxin, min-al ttzkiꞌn jaaꞌ ctzaalaxin bix alcye tmanxin―tz̈i ke aj Jerusalén.

28Maatktzen at Jesús tuj tja Dios, e tbixin tej t-xiꞌ cykbaꞌn aj Jerusalén ka yaaꞌn jaxin jCristo. Juꞌ tzunj, e jaw ts̈iꞌnxin:

—¿Tzimpa cykbaꞌna alcye kena bix jaaꞌ in itzꞌja bix alcye kej nmana? Pero mintiiꞌ tumel cyuyey. Yaaꞌn wuꞌnxa ma chin tzaja, tisenj tzin cykbaꞌna. At jun e tzaj tsmaꞌn inayena, pero cycyꞌiy jaxin. 29Weya, ntzkiꞌna twitzxin, cuma in tiina tuyaxin bix e tzaj tsmaꞌnxin inayena tzalu―tz̈i Jesús.

30Tejtzen cybinte nejenel cye judío kej yol lu, oc cyipen tiꞌj tuꞌn tcub cytzyuꞌn ja Jesús. Pero mixbe cyuꞌn, cuma mitknaꞌx tpon tumel e tkba Dios tuꞌn tcyimxin. 31Pero cyxol xjal otk chi pon tuj Jerusalén, at nim e xiꞌ tocslaꞌn ka jaxin Scyꞌoꞌnxin tuꞌn Dios, ja Cristo. Bix e xiꞌ cykbaꞌn cyej xjal min ocslante:

—Ka yaaꞌn Jscyꞌoꞌn tuꞌn Dios jxjal lu tuj cywitza, oj tul jxjal nchi ayona tiꞌj, ¿baꞌmpale cbinchal mas twitzj ya ma bint tuꞌn ja xjal lu?―tz̈i ke xjal ocslal.

Ex cysmaꞌn fariseo ke cꞌojlal tuꞌn ttzyet Jesús

32Tej cybinte kej fariseo nchi yolen xjal tiꞌj Jesús Jscyꞌoꞌn tuꞌn Dios, e xiꞌ cysmaꞌn aj fariseo bix ke nejenel cye pala cab tcꞌojlal tja Dios te tzyulte texin.

33Juꞌ tzunj, e xiꞌ tkbaꞌnxin cyexin:

—Nuk chꞌintl chin temela cyxola, cuma chin aal meltzꞌaja tuya Nmana j-e tzaj tsmaꞌn inayena. 34Chi jyola wiꞌja, pero mlay chin cneta cyuꞌna, cuma mlay chi pona jaaꞌ chin temela―tz̈ixin.

35Juꞌ tzunj, e xiꞌ cykbaꞌn nejenel cye judío cyxolx:

—¿Jaaꞌ tumel cxeꞌla jxjal lu, tuꞌntzen miꞌn cnet kuꞌn? ¿Cxeꞌlpaxin cyxol kej judío o chi el tz̈itj cyuj cytanem xjal yaaꞌn judío? ¿Jacꞌapa txiꞌ tkꞌoꞌnxin t-xnakꞌtzbil te cyej xjal yaaꞌn judío? 36¿Ti japenina ja yol: “Chi jyola wiꞌja, pero mlay chin cneta cyuꞌna, cuma mlay chi pona jaaꞌ chin temela”?―tz̈i ke judío.

Nimaꞌ iꞌtz te junx maj

37Tujtzen mancꞌbil kꞌij te ninkꞌij, jkꞌij mas xjan, e cub weꞌ Jesús, bix e jaw ts̈iꞌnxin:

—Alcyej xjal at takꞌ aꞌ te, tzajxit wuyena, bix cxeꞌl nkꞌoꞌna tcꞌa. 38Alcyej xjal cꞌocslal wiꞌja, j-aꞌ cxeꞌl nkꞌoꞌna, cꞌoqueltzen te jun nimaꞌ tuj tanem ctkꞌaꞌ tchunkꞌlal te junx maj, tisen tzin tkbaꞌn ootxa tyol Dios―tz̈i Jesús.

39Pero ja yol lu tiꞌj aꞌ e xiꞌ tkbaꞌnxin tiꞌj Espíritu Santo, cuma at tuꞌn tkꞌoj Espíritu Santo te cyej xjal ocslan tiꞌjxin, cuma mitknaꞌx tkꞌoj Espíritu Santo cye ocslal, cuma mitknaꞌx tjatz itzꞌj Jesús tuj cyamecy bix mitknaꞌx tjaxxin tuj cyaꞌj.

Tej tjaw jun kꞌoj cyxol xjal tuꞌn tlaj alcye Jesús

40Tej cybinte xjal ti otk tkba Jesús tuj ninkꞌij, at juun e xiꞌ cykbaꞌn:

—Jatzen xjal jlu jjawnex tyolel Dios e tkba Moisés at tuꞌn tul―tz̈ikexin.

41At juuntl e xiꞌ cykbaꞌn:

—Jatzen xjal jlu jmero Scyꞌoꞌn tuꞌn Dios―tz̈ikexin.

Pero at juuntl e xiꞌ cykbaꞌn:

—Min. Mlay tzꞌitzꞌj Jscyꞌoꞌn tuꞌn Dios maa tuj Galilea. 42¿Yaaꞌmpatzen tzin tkbaꞌn tyol Dios ka tiꞌj tiyꞌjil David tuj ttanem David, jtnom te Belén, qꞌuitzꞌjel Jscyꞌoꞌn tuꞌn Dios?―tz̈ikexin.

43Juꞌtzen tten e jaw jun kꞌoj cyxol xjal tuꞌn tlaj alcye Jesús. 44At juun e cyajbe tuꞌn ttzaj cytzyuꞌn jaxin, pero min-al jun cye e tzyunte, tuꞌn tocx cykꞌoꞌn jaxin tuj tzeeꞌ.

Min-al jun xjal o yolen tuya tipemal tisen te Jesús

45Yaltzen ke cꞌojlal tja Dios, e pon meltzꞌajke cyuya nejenel cye pala bix cyuya ke fariseo. Min-al Jesús kꞌiꞌn cyuꞌnxin. Juꞌ tzunj, e xiꞌ cykbaꞌnxin cye cꞌojlal tja Dios:

—¿Tikentzen min tzaj cyiiꞌna?―tz̈ikexin.

46Bix aj cytzakꞌbeꞌn cꞌojlal tja Dios:

—Min xknimsaya kcꞌuꞌja tuꞌn xtzyet kuꞌna, cuma min-al jun xjal o yolen tuya tipemal tisen ja xjal lu―tz̈ikexin.

47Juꞌ tzunj, e xiꞌ cykbaꞌn fariseo cye cꞌojlal tja Dios:

—¿Juꞌxpa cyey ma chi tzpeta tuꞌnxin? 48¿Atpa jun keya kxola, ejooꞌya nejenel cye xjal bix ejooꞌya aj fariseo, ma ko ocslana tiꞌjxin? Min. 49Kej tnimal xjal lu min cytzkiꞌn ley tisen ejooꞌya. Min chi ajben. ¡Cubxit tsbubl Dios cyibaj!―tz̈ikexin.

50Pero at jun aj fariseo cyxolxin yaaꞌn junx cyuya niyꞌtl fariseo. Nicodemo tbixin, jaj xin e pon tuya Jesús jun koniyan. E xiꞌ tkbaꞌn Nicodemo cye fariseo:

51—Tuj kley, yaaꞌn tumel tuꞌn tcub kkꞌoꞌn tcastiwa jun xjal ka mitknaꞌx kbinte tyol tuꞌn tcoꞌpan tiib, bix ka mitknaꞌx kcyeꞌyen tbinchben, tuꞌn tel kniyꞌ tiꞌj ka yaaꞌn baꞌn―tz̈i Nicodemo.

52Bix aj cytzakꞌbeꞌnxin te Nicodemo:

—Nyolena tisen junx taꞌ tnaabla cyuyaj yalx xjal te Galilea. Cꞌoquel tcꞌuꞌja tiꞌj tyol Dios, tuꞌn tel tniꞌya tiꞌj min-al jun tyolel Dios nitzꞌj tuj Galilea―tz̈ikexin.

53Tejtzen tbaj ninkꞌij, cykilca xjal ajke cyja.

Currently Selected:

SAN JUAN 7: mamTS

Highlight

Copy