SAN JUAN 6

Tej cywaaꞌn jweꞌ mil xjal tuꞌn Jesús

1Yajxitltzen, bix iyꞌx Jesús tuj tnijabel aꞌ te Galilea, bix juntl tbi Tiberias. 2Cyuj tzunkej kꞌij, tbet-xin nimxsen cyajlal xjal oc lpe tiꞌjxin, tuꞌntzen toc cycyeꞌyen jjawnex tipemalxin tej tcoꞌpantexin kej yaab tuj cyyabel. 3Bix oc lpe ke xjal cnol texin tuꞌn cyken ttziyela aꞌ. Tejtzen tiyꞌpaxin jlajxe aꞌ, e tajbe tzunxin tuꞌn ttenxin tjunalxin. Juꞌ tzunj e jaxxin twiꞌ jun witz cyuya t-xnakꞌatzxin, bix e cub kexin cyuya. 4Chꞌitktzen tpon jjawnex cyninkꞌij judío te Pascua. 5Tejtzen tten Jesús tcꞌuꞌj witz, oc tcyeꞌyenxin, bix e tilxin nimxsen xjal otk kꞌon vwelt tiꞌ aꞌ tuꞌn tcnet-xin cyuꞌn. Juꞌ tzunj, e xiꞌ tkbaꞌnxin te Felipe:

—¿Ti tten tuꞌn tcnet waabj, tuꞌntzen cywaaꞌn kej xjal nchi ul wiꞌja?―tz̈ixin.

6E xiꞌ tkbaꞌnxin juꞌwa nuk tuꞌn tchicꞌajax ka at tocslabl Felipe tiꞌjxin, cuma ttzkiꞌntlxin alcye tuꞌn tbint tuꞌnxin. 7Aj ttzakꞌbeꞌn Felipe texin:

—Taat, mlay tuꞌn tlekꞌet waabj kuꞌn. Mitle tuꞌn xcnet caꞌba syent pwak te denario kuꞌn, mlayx canan tuꞌn t-xiꞌ klokꞌoꞌn waabj te cykilca xjal, tuꞌntzen t-xiꞌ twa jaca juun xjal bix nuk chꞌineeꞌ at―tz̈i Felipe.

8At juntlxin t-xnakꞌatz Jesús, Andrés tbi, titzꞌen Simón Pedro, bix e xiꞌ tkbaꞌnxin te Jesús:

9—Taat, lu jkꞌa ma tzul tiiꞌnkꞌa jweꞌ pan te cebada tuya caꞌba quis̈. Pero, ¿ti tten tuꞌn tcanan jlu cye nimcꞌa xjal?―tz̈i Andrés.

10Tejtzen cypon baj xjal tiꞌjxin, e xiꞌ tkbaꞌn Jesús cye t-xnakꞌatz:

—Cykbanx cye xjal tuꞌn cycub ke―tz̈ixin.

Tcꞌuꞌjtzen witz at jun chkꞌajlaj toc, bix e cub ke ke xjal tuj tz̈ꞌim. Atle jweꞌ mil xinak otk pon. 11Bix e tzaj ttzyuꞌn Jesús ke pan, bix e xiꞌ tkꞌoꞌnxin chjonte te Dios tiꞌj, bix e xiꞌ tkꞌoꞌnxin pan cye t-xnakꞌatzxin, tuꞌntzen t-xiꞌ cypaꞌnxin cyxol xjal otk chi cub ke. Bix juꞌx e xiꞌ tkꞌoꞌnxin ke quis̈. Jax nimcꞌa otk tzꞌeꞌla te cykilca xjal. 12Tejtzen cybaj noj ke xjal, e xiꞌ tkbaꞌnxin cye t-xnakꞌatzxin:

—Cychmonwe ttxꞌakan cywa xjal min xbaj cyuꞌn, tuꞌntzen mintiiꞌ qꞌuelex xeꞌt―tz̈ixin.

13Bix e jaw cychmoꞌnxin ttxꞌakan pan otk cyaj cyuꞌn xjal tiꞌj jweꞌ pan te cebada, bix e noj cablaaj chiꞌl. 14Yaltzen ke xjal, tej cylonte jjawnex tipemal Jesús, e cykbaxin:

—Tzinente ja xjal lu jtyolel Dios at tuꞌn tul twitz txꞌotxꞌ―tz̈ikexin.

15Tejtzen tel tniyꞌ Jesús tiꞌj e cyajbe xjal tuꞌn ttzyet-xin, tuꞌntzen t-xiꞌ cyiiꞌn jaxin tisen cycawelxin, mas e jax lkꞌexin twiꞌ witz, tuꞌn ttenxin tjunalxin.

Tej tbet Jesús tibaj tnijabel aꞌ

16Tejtzen tex kꞌij, e cuꞌx ke t-xnakꞌatz Jesús ttziiꞌ tnijabel aꞌ te Galilea. 17Bix ocxkexin tuj cychocxin, bix akꞌ iꞌyexkexin tuj aꞌ tuꞌn cyponxin tuj tnom te Capernaum. Otk cub klolj tej cyocxxin tuj choc, pero mitknaꞌx tpon Jesús cyuyaxin. 18Bix nimxsen oc punntzꞌaj aꞌ, cuma nuk tisen tiiꞌ tej ttzaj jun nintzaj cykꞌiꞌk tibaj aꞌ. 19Nimxsen oc cyipenxin tiꞌj tuꞌn cyiyꞌxxin tuj tnijabel aꞌ. Otktzen chi iyꞌxxin caꞌba ajlabl tej toc cycyeꞌyenxin ja Jesús. Nbet-xin tibaj aꞌ, bix tzajne e tzaj lkꞌexin tiꞌ cychocxin. Tej cylontexin jaxin, e jawxsen seyꞌpajkexin. 20Pero e xiꞌ tkbaꞌnxin cyexin:

—Inayen weja. Miꞌn tzaj ntz̈iya cyiꞌja―tz̈ixin.

21Tej tel cyniyꞌxin tiꞌj ka ja Jesús, e jawxsen tzalajkexin, bix e tzaj cytxcoꞌnxin tuꞌn tocxxin tuj choc. Bix tujx naj e cub kꞌoꞌn cychocxin ttziiꞌ aꞌ jaaꞌ tuꞌn cyponaxin.

Tej cyjyoꞌn xjal tiꞌ Jesús

22Te juntl kꞌij, min e cnet Jesús cyuꞌn kej xjal otk chi cyaj ttziiꞌ tnijabel aꞌ jaaꞌ otk kꞌoja cywa tuꞌnxin. Ultzen tuj cycꞌuꞌjxin nuk junx choc otk ten ttziiꞌ aꞌ, bix e cyilxin min otk tzꞌocxin tuj ja choca tej cyiyꞌ t-xnakꞌatzxin. Min el cyniyꞌxin tiꞌj ti tten tej tiyꞌxxin.

23Maatkxsen eteꞌxin jaaꞌ otk chi waaꞌnaxin tej t-xiꞌ tkꞌoꞌn Cawel kxol chjonte te Dios, attzen juuntl choc e tzaj tuj tnom te Tiberio. 24Juꞌ tzunj, tej cylontexin min-alx Jesús cyuya t-xnakꞌatzxin, ocxkexin cyuj choc, tuꞌntzen cyponxin tuj Capernaum te jyolte Jesús.

Ja Jesús waabj te chunkꞌlal

25Tejtzen tcnet-xin cyuꞌnxin jlajxe aꞌ, e xiꞌ cykanenxin texin:

—Taat Xnakꞌtzal, ¿jtoo tzula tzalu?―tz̈ikexin.

26Aj ttzakꞌbeꞌnxin cyexin:

—Jaxxix cxeꞌl nkbaꞌna cyey, tej t-xiꞌ nyeecꞌana wipemala ewe, nuk tuꞌn tel cyniꞌya tiꞌj smaꞌn kena tuꞌn Dios, pero min ma tzꞌel cyniꞌya tiꞌj techel. Nchi jyona wiꞌja cuma cyaja nuk oꞌcx tuꞌn tnoj cycꞌuꞌja tisen ke alimaj. 27Miꞌn tzꞌoc cyipena nuk tiꞌj cyway nbaj tipen. Jax juꞌx cꞌoquel cyipena tiꞌj tuꞌn tcnet jwaabj tzin tkꞌoꞌn cychunkꞌlala mlay baj. Jatzen waabja cxeꞌl nkꞌoꞌna cyey, inayena, jxjal Smaꞌn tuꞌn Dios tuꞌn ntena cyuya xjal. Tuꞌn wipemala o cyila, ma tzaj tyeecꞌan Kman Dios scyꞌoꞌn kena tuꞌn t-xiꞌ nkꞌoꞌna jwaabj te cychunkꞌlala mlay baj―tz̈i Jesús.

28Bix e xiꞌ cykbaꞌnxin texin:

—¿Alcyej akꞌuntl taj Dios tuꞌn tbint kuꞌna, tuꞌn ttzalaj Dios kiꞌja?―tz̈ikexin.

29Bix aj ttzakꞌbeꞌnxin cyexin:

—J-akꞌuntl taj Dios tuꞌn tbint cyuꞌna, jaj tuꞌn cyocslana tiꞌj ma tzaj tsmaꞌnxin inayen tzuna―tz̈i Jesús.

30E xiꞌ cykbaꞌnxin texin:

—Ka jay smaꞌn tuꞌn Dios, kꞌontz jun yecꞌbil jawnex, tuꞌntzen kocslana tiꞌ tyola. ¿Ti cbinel tuꞌna, tuꞌntzen tchicꞌajax ka jaxxix tyola? 31Jma bint tuꞌna, yaaꞌn jawnex tisenj e bint tuꞌn Moisés tej t-xiꞌ cywaaꞌn kxeꞌchel jwaabj e cuꞌtz twitz cyaꞌj jaca kꞌij tuj jlugar jaaꞌ mintiiꞌ cynajbil xjal tuj. “E tzaj tkꞌoꞌn Dios waabj te tuj cyaꞌj cye,” tz̈i tyol Dios―tz̈ikexin.

32Juꞌ tzunj e xiꞌ tkbaꞌn Jesús cyexin:

—Jaxxix cxeꞌl nkbaꞌna cyey, yaaꞌn ja Moisés e tzaj kꞌonte waabj te twitz cyaꞌj cyexin, sino ja te Nmana. Bix tzinx tkꞌoꞌnxin jaꞌlewe, pero jaj waabj ntkꞌoꞌn cychunkꞌlala mlay baj, 33cuma tej waabj tzin tkꞌoꞌn Dios ntzaj tuj cyaꞌj, bix cꞌajbel tuꞌn tkꞌonte chunkꞌlal te junx maj cye xjal―tz̈i Jesús.

34Tej cybinte ke xjal kej tyolxin lu, e xiꞌ cykbaꞌnxin texin:

—Taat, kꞌontzne ja jawnex waabj lu keya jaca kꞌij―tz̈ikexin.

35Bix e xiꞌ tkbaꞌn Jesús cyexin:

—Inayenja jwaabj tzin tkꞌoꞌn chunkꞌlal te junx maj. Alcye kej xjal chi tzaal wuyena, mintiiꞌtl takꞌ weyaj cye, bix jax alcye kej xjal chi ocslal wiꞌja, ya mintiiꞌtl ccyajbeꞌ. 36Jatzen cyey, nim maj ma txiꞌ nkꞌoꞌna nxnakꞌtzbila cyey, bix amale matet cyila wipemala, pero min chi ocslana wiꞌja. 37Tuj nkꞌaba ma takꞌa Nmana cykil kej xjal at tuꞌn cyclet. Bix mi nuket jun xjal, oj tul wuyena tuꞌn tclet, qꞌuelelet nxooꞌna. 38Mlay cheꞌx nxooꞌna, cuma ma chin cuꞌtza tuj cyaꞌj yaaꞌn tuꞌn nbinchana weya wajbil, sino tuꞌn nbinchana tajbil Nmana ma tzaj tsmaꞌn inayena. 39Jtajbil Nmana ma tzaj tsmaꞌn inayena, jaj tuꞌn miꞌn cyaj mi nuket jun xjal tuj cyamecy kej xjal ma tzaj tkꞌoꞌnxin tuj nkꞌaba tuꞌn cyclet. Taj Nmana tuꞌn cyjaw itzꞌj cykilca tuj cyamecy wuꞌna juntl maj tuj mancꞌbil kꞌij. 40Jtaj Nmana, jaj tuꞌn tten cychunkꞌlal te junx maj jaca juun xjal ma tzꞌel tniyꞌ tiꞌj alcye kena bix ma tzꞌocslan wiꞌja. Kej xjal nbint cyuꞌn juꞌwa, inayena cjawetz itzꞌjsaꞌncye tuj cyamecy tuj mancꞌbil kꞌij―tz̈i Jesús cye kej judío nchi kꞌojl tiꞌjxin.

41Tejtzen cybinte ke judío tyol Jesús, el kaꞌ tyolxin tuj cywitzxin, cuma otk txiꞌ tkbaꞌnxin: “Inayena jwaabj e cuꞌtz tuj cyaꞌj.” 42E xiꞌ cykbaꞌnxin cyxolxxin:

—¿Yaaꞌmpatzen jaj xjal lu nuk Jesús, tcwal jxin José? Ktzkiꞌn twitz tmanxin bix twitz ttxuxin María. ¿Titzen tten nxiꞌ tkbaꞌnxin ka e cuꞌtzxin tuj cyaꞌj?―tz̈ikexin.

43Bix e xiꞌ tkbaꞌn Jesús cyexin:

—¿Tikentzen nchi jaw yolena wiꞌja cyxolxa juꞌwa? 44Jaxte ma tzaj tsmaꞌn Nmana inayena. Yaaꞌn tuꞌnj nchi yolena juꞌwa chi ocslala wiꞌja, sino tuꞌnj oj ttzaj tkꞌoꞌn Nmana jun tajbil tuj cyanema tuꞌn cyocslana wiꞌja. Bix tuj mancꞌbil kꞌij cjawetz witzꞌjsaꞌna tuj cyamecy kej xjal ma chi ocslan wiꞌja. 45Jaxte at xjal chi ocslal wiꞌja, cuma tuj tyol Dios e cykba tyolel Dios cyjulu: “Cꞌoquel tkꞌoꞌn Dios cye xjal, tuꞌn tel cyniyꞌ tiꞌj,” tz̈i tyol Dios. Kej xjal cybiꞌ jtzin tkbaꞌn Nmana bix chi ocslal tiꞌj tyol, jax chi ocslal wiꞌja. 46Min tzin nkbaꞌna o til jun xjal twitz Nmana, cuma mi nuk jun xjal o til twitzxin. Nuk jaj xjal smaꞌn tuꞌn Dios o til twitzxin, inayen tzuna. 47Jaxxix cxeꞌl nkbaꞌna cyey, alcyej xjal ma tzꞌocslan wiꞌja, at tchunkꞌlal te junx maj. 48Inayenja jwaabj tzin tkꞌoꞌn chunkꞌlal te junx maj. 49Yal tej waabj e cuꞌtz twitz cyaꞌj, e xiꞌ cywaaꞌn ke cyxeꞌchela, pero e cyimke. 50Pero jwaabj nchin yolen weya tiꞌj, e cuꞌtz tuj cyaꞌj, bix oj twaaꞌn jun xjal tiꞌj, miꞌn cyim. 51Bix ja waabj iꞌtz lu e cuꞌtz tuj cyaꞌj bix ntkꞌoꞌn chunkꞌlal cye xjal, inayen tzuna. Alcyej xjal cwaaꞌl tiꞌj jwaabj lu, attzen tchunkꞌlal te junx maj. Bix jwaabj cxeꞌl nkꞌoꞌna tuꞌn tten cychunkꞌlal xjal, jatzen nxumlalja―tz̈i Jesús cye judío.

52Tejtzen cybinte judío tyol Jesús tiꞌj t-xumlal, akꞌkexin kꞌojlel cyxolxxin tiꞌj ti japenina ja yol lu. E baj cykanenxin:

—¿Ti tten tuꞌn ttzaj tkꞌoꞌn jxin lu t-xumlal ke, tuꞌn t-xiꞌ kchyoꞌn?―tz̈ikexin.

53Juꞌ tzunj, e xiꞌ tkbaꞌn Jesús cyexin:

—Jaxxix cxeꞌl nkbaꞌna cyey, ka min ma txiꞌ cywaaꞌna nchuꞌla, bix ka min ma txiꞌ cycꞌaꞌna ntz̈qꞌuela, mlay ten cychunkꞌlala, cuma inayena jxjal smaꞌn tuꞌn Dios tuꞌn nkꞌonteya cychunkꞌlal xjal. 54Alcyej xjal cxeꞌl twaaꞌn nchuꞌla bix cxeꞌl tcꞌaꞌn ntz̈qꞌuela, attzen tchunkꞌlal te junx maj, bix cjawel witzꞌjsaꞌna tuj cyamecy tuj mancꞌbil kꞌij. 55Ntkꞌoꞌn chunkꞌlal, cuma jwaabj jaxxix ja nchuꞌla bix ntz̈qꞌuela. 56Alcyej xjal cxeꞌl waaꞌnte nchuꞌla bix cxeꞌl cꞌante ntz̈qꞌuela, cꞌoqueltzen junx wuyena, bix jax chin oquela junx tuya. 57O tzaj itzꞌj cykil chunkꞌlal tiꞌj Nmana iꞌtz, bix cuma junx kena tuya Nmana e tzaj tsmaꞌn inayena, juꞌ tzunj at chunkꞌlal wuyena tuꞌn t-xiꞌ nkꞌoꞌna cye xjal. Bix tisenj at chunkꞌlal wuyena tuꞌnj tiꞌjxxin o chin tzaꞌya, jax ctemel tchunkꞌlal jxjal cwaaꞌl wiꞌja, cuma otktzen tzꞌoc wuyena. 58Key xjal, inayena ja waabj o cuꞌtz tuj cyaꞌj. Jwaabj e xiꞌ cywaaꞌn cyxeꞌchela yaaꞌn jwaabj jaxxix te tuj cyaꞌj, cuma e tiinkexin bix e cyimkexin. Pero ja waabj jaxxix lu, alcyej xjal cwaaꞌl tiꞌj, attzen tchunkꞌlal te junx maj―tz̈i Jesús 59tej t-xiꞌ t-xnakꞌtzaꞌnxin cye xjal tuj camon jaaꞌ te xnakꞌtzbil tiꞌ tyol Dios tuj tnom te Capernaum.

Tyol Jesús tzin tkꞌoꞌn chunkꞌlal te junx maj

60Kej xjal e bet tuya Jesús, tej cybinte kej yol lu, at nim xjal cyxolxin e xiꞌ cykbaꞌn:

—Yaaꞌn tumel kej yol lu. Mlay tuꞌn kocslan cyiꞌj―tz̈ikexin.

61Pero el tniyꞌ Jesús tiꞌj e jaw yolen kej xjal e xiꞌ lpe tiꞌjxin tiꞌj tyolxin, bix e xiꞌ tkbaꞌnxin cyexin:

—¿N-elpa cyiiqꞌuena ja yol lu tuꞌn t-xiꞌ cywaaꞌna nxumlala cuma kaꞌ tuj cywitza? 62Katzen yaaꞌn telniyꞌ tuj cywitza jaꞌlewe, ¿ti toc cyuꞌna nuket cyila oj njaxa jaaꞌ in tiina nejl bix min-atl nxumlala? Tuj cywitza, jacꞌa nxumlala cxeꞌl cywaaꞌna, pero min ma tzꞌel cyniꞌya tiꞌj nyola. 63Tuꞌn tcnet cychunkꞌlala, ja nyola cꞌoquel te cyway. 64Pero at juun cyxola miꞌn cyiikꞌ cychunkꞌlal, cuma n-el cyxooꞌn nyola―tz̈i Jesús.

E xiꞌ tkbaꞌnxin juꞌwa cuma ttzkiꞌnxin jatxe tej cyakꞌ oquel lpe xjal tiꞌjxin alcyej min e cyocsla jaxin. Bix jax juꞌx ttzkiꞌnxin alcyej cyxol t-xnakꞌatzxin at tuꞌn t-xiꞌ tqꞌueyen jaxin tuj cykꞌab kej xjal at tuꞌn tcub cybyoꞌn jaxin.

65Tuꞌn tpon baj tyolxin, e xiꞌ tkbaꞌnxin cyjulu:

—Ma txiꞌ nkbaꞌna cyey, min-al jun xjal cꞌocslal wiꞌja ka min ma tzaj tkꞌoꞌn Nmana te xjal tuꞌn tocslan wiꞌja―tz̈i Jesús.

66Cuma otk txiꞌ tkꞌumen Jesús kej yol lu cye xjal, juꞌ tzunj nim xjal e cyaj cycyeꞌyen jaxin, bix mintl e betkexin tuyaxin. 67Juꞌ tzunj, e xiꞌ tkbaꞌnxin cyej cablaaj t-xnakꞌatzxin:

—Yaj cyey, ¿jax cyajpey cyaj cycyeꞌyena inayena?―tz̈i Jesús.

68Bix aj ttzakꞌbeꞌn Simón Pedro texin:

—Taat, miꞌn cyaj kcyeꞌyena. Min-al juntl tuꞌn kxiꞌya tuya. Nuk jay nxiꞌ tiiꞌna kej yol ntkꞌoꞌn kchunkꞌlala te junx maj. 69N-el kniꞌya tiꞌj ka jay jjawnex xjal scyꞌoꞌn tuꞌn Dios, bix ma ko ocslana tiꞌja―tz̈i Pedro.

70Bix aj ttzakꞌbeꞌn Jesús cye t-xnakꞌatzxin:

—Inayen weja ma scyꞌonte cyey cablaaj cybaja tuꞌn cyoca te nxnakꞌatza. Pero at jun cyey ma tzꞌoc tnaabl tisen jun biman―tz̈i Jesús. 71Jyol lu e xiꞌ tkbaꞌnxin tiꞌj Judas, tcwal Simón Iscariote, cuma ja Judas tuꞌn t-xiꞌ qꞌueyente texin. ¡Pero cyimel niyꞌ, jaanxin cyxol kej cablaaj t-xnakꞌatz Jesús!

Currently Selected:

SAN JUAN 6: mamTS

Highlight

Copy