SAN JUAN 19

1Tejtzen cycyꞌi judío tuꞌn tetz ttzakpiꞌn Pilato ja Jesús, e xiꞌ tkbaꞌn Pilato cye soldado tuꞌn t-xiꞌ cykꞌoꞌnxin tzꞌuꞌn toc xcbil twiꞌ tiꞌ Jesús. 2Tej cybaj kꞌonxin tzꞌuꞌn tiꞌjxin, e baj cybinchaꞌnxin jun pasbil te chꞌiꞌx, bix e cub cycutzꞌenxin tuj twiꞌxin, bix oc cykꞌoꞌnxin jun t-xbalen cawel, 3bix e cub majekexin twitzxin te xmucchal texin, bix e xiꞌ cykbaꞌnxin: “¡Axsen cycawel xjal judío!” bix oc cylokaxin twitzxin. 4Tbajlenxetzen Jesús tuj tzꞌuꞌn, etz Pilato juntl maj, bix e xiꞌ tkbaꞌnxin cye judío:

—Qꞌueletz wiiꞌna ja xjal lu. Nim castiwa kꞌoꞌn texin, tisen cyaja. Pero waja tzꞌel cyniꞌya tiꞌj mintiiꞌ tilxin ma cnet wuꞌna―tz̈i Pilato.

5Bix etz Jesús cywitz xjal, tjax jpasbil te chꞌiꞌx tuj twiꞌxin, bix toc t-xbalenxin xbalen rey. Bix e xiꞌ tkbaꞌn Pilato cye judío:

—Jeyꞌ, cycyeꞌyenx ja xjal lu. ¿Japale jun cawel jlu?―tz̈i Pilato.

6Pero tej toc cycyeꞌyen kej nejenel cye pala bix kej cꞌojlal tja Dios ja Jesús, min e cub cyiꞌj tuꞌn Pilato, sino e jaw cys̈iꞌnxin:

—¡Kꞌonwexin twitz cruz! ¡Kꞌonwexin twitz cruz!―tz̈ikexin.

Bix e xiꞌ tkbaꞌn Pilato cyexin:

—Min. Ka cyaja jaw cykꞌoꞌna twitz cruz, cyiiꞌnxa ejeeꞌx cyey, cuma tuj nwitza mintiiꞌ tilxin―tz̈ixin.

7Aj cytzakꞌbeꞌn ke judío:

—Pero at tilxin. Tzin tkbaꞌn kleya il tiꞌj tuꞌn tcyimxin, cuma ma txiꞌ tkbaꞌnxin Tcwal Diosxin―tz̈i ke judío.

8Tejtzen tbinte Pilato yol lu tiꞌj Tcwal Diosxin, nim ttz̈i e tzaj tiꞌjxin. 9Bix ocxxin juntl maj tuj tjaxin, bix e xiꞌ tkanenxin te Jesús:

—¿Japa tey te twitz txꞌotxꞌ, bix ka ma tzaja te juntl lugar?―tz̈ixin.

Pero mintiiꞌ akꞌ Jesús.

10Juꞌ tzunj e xiꞌ tkbaꞌn Pilato te Jesús:

—¿Mimpa tzaj ttzakꞌbeꞌna inayena? ¿Mimpa tzꞌel tniꞌya tiꞌj at wipemala tuꞌn t-xiꞌ ntzakpiꞌna jay, bix at wipemala tuꞌn tcyima twitz cruz?―tz̈ixin.

11Aj ttzakꞌbeꞌn Jesús:

—Nuket min otk tzaj tkꞌoꞌn Dios toclena tuꞌn tcawena cyxol xjal, minttzeletiiꞌ tipemala wibaja. Jnxiꞌ tbinchaꞌna wiꞌja, nbinchana nuk oꞌcx cuma ma kꞌoj tey tuꞌn tcawena. Pero jxin tneel pala, oc tkꞌon tiibxin tuꞌn ttzaj tkꞌoꞌnxin inayena tuj tkꞌaba. Juꞌ tzunj, at mas tilxin twitzj jtey til―tz̈i Jesús te Pilato.

12Tej tbinte Pilato kej yol lu, nim e tajbexin tuꞌn tel ttzakpiꞌnxin Jesús. Pero tej t-xiꞌ tkbaꞌnxin cye judío at tel-lel ttzakpiꞌnxin, e jaw cys̈iꞌnxin:

—Ka ma txiꞌ ttzakpiꞌna ja xjal lu, cxeꞌl kkbaꞌna te rey tuj Roma ka yaaꞌn junx tey tuya gobierno te Roma, cuma taja tzꞌel ttzakpiꞌna jun xjal njaw tiiꞌn tiib tiꞌj rey tuꞌn toc te t-xel gobierno―tz̈i ke judío.

13Tej tbinte Pilato kej yol lu, e tzaj ttz̈i rey tiꞌjxin, bix e tcuyaxin jcyajbil judío. Etz tiiꞌnxin Jesús cywitzxin, bix e cub kexin tuj kꞌukbil te xkelte tuj jun lugar Xak Xiꞌnen Tuj tbi, bix ka Gabata tbi tuj cyyol judío.

14Jatzen kꞌij lu, jkꞌij oj nbaj cybinchaꞌn judío tikꞌch cye te tajbel te juntl kꞌij te ajlabl tuj ninkꞌij te Pascua. Bix otk tzꞌoc Jesús tuj xkelbil te kak tajlal hora.

Tej tcub ke Pilato, e xiꞌ tkbaꞌnxin cye judío:

—Jeyꞌ, lu jxjal lu tzin cykbaꞌna cycawela―tz̈ixin.

15Bix e jaw cys̈iꞌnxin:

—¡Byoꞌncꞌaxin! ¡Byoꞌncꞌaxin! ¡Kꞌonwexin twitz cruz!―tz̈ikexin.

Bix e xiꞌ tkbaꞌn Pilato cyexin:

—¿Jaxpa cyuꞌna? ¿Cyajpey tuꞌn tjaw nkꞌoꞌna cycawela twitz cruz?―tz̈ixin.

Bix aj cytzakꞌbeꞌn nejenel cye pala texin:

—Nuk rey te Roma ncawen kibaja. Min-al juntl―tz̈ikexin.

16Tej cyyolen judío juꞌwa, e xiꞌ tkꞌoꞌn Pilato ja Jesús tuj cykꞌabxin, tuꞌntzen tbyet.

Tej tjaw kꞌoꞌn Jesús twitz cruz bix e cyim

(Mt. 27:32-50; Mr. 15:21-37; Lc. 23:26-49)

17Bixsen ex cyiiꞌn soldado ja Jesús tiꞌjxe tnom. Jaxse Jesús e xiꞌ kitente tcruz. E xiꞌkexin tuj jlugar Tbakel Wiꞌybaj tbi, bix ka Gólgota tbi tuj cyyol judío. 18Tej cyponxin, e jaw cykꞌoꞌnxin jaxin twitz cruz, cyuyaj caꞌbatl xinak ttxlajxin. Jatzen Jesús tmij. 19Bix tibaj twiꞌxin e jaw cykꞌoꞌnxin cab letra otk cub ttzꞌiꞌben Pilato twitz jun tzlom, tuꞌn tchicꞌajax alcye tilxin. Tz̈i cyjulu: “Jesús, aj Nazaret, Cycawel Judío.” 20Nim judío e jaw cys̈iꞌn kej yol lu, cuma jlugar jaaꞌ otk jawa kꞌoꞌn Jesús twitz cruz, nka ttxaꞌn tnom, bix tzꞌiꞌben tuj yol hebreo bix tuj yol latín bix tuj yol griego. 21Pero min el baꞌn ja letra lu tuj cywitz nejenel cye pala cye xjal judío. Juꞌ tzunj, e cubsankexin cywitzxin te Pilato:

—Najsama, kaja tuꞌn tcub tchꞌixbeꞌna jletra. Yaaꞌn tumel ja yol “Cycawel Judío.” Mas tumel tuꞌn toc ja yol “Ja xjal lu oc tkꞌon tiib te Cycawel Judío”―tz̈ikexin.

22Aj ttzakꞌbeꞌn Pilato:

—Mlay tuꞌn tchꞌixpet yol. Cyjel jma cub ntzꞌiꞌbena―tz̈ixin.

23Tej tjaw cypjoꞌn soldado Jesús twitz cruz, e xiꞌ cytzyuꞌnxin t-xbalenxin, bix e cub cypaꞌnxin tuꞌn tel te cyaja, jun te jaca juun soldado. Jax juꞌx e xiꞌ cytzyuꞌnxin jun t-xbalenxin te nim tweꞌ. Mintiiꞌ tzꞌisbilte, sino te junx plaj cujlec tiꞌjxin. 24Juꞌ tzunj, e xiꞌ cykbaꞌnxin cyxolxxin:

—Miꞌn cub krotan tzunj t-xbalenxin, sino nuk tuꞌn tcub kkꞌoꞌn suerte tiꞌj klaꞌ laꞌ alcye jun ke ccamal tiꞌj―tz̈ikexin. E baj jlu, tuꞌntzen tel jax jtyol Dios tzin tkbaꞌn cyjulu: “Cwel cypaꞌn xjal nxbalena cyxolx, bix cwel cykꞌoꞌn suerte tiꞌj tuꞌn al ccamal tiꞌ nxbalena,” tz̈i tyol Dios jatxe ootxa.

25Pero amale oquet ten ke soldado yajlal Jesús, pero eteꞌ nka tiꞌ cruz cyaja xuuj lepchec tiꞌjxin. Tocxse ttxuxin, bix titzꞌen ttxuxin, bix María, t-xuꞌl jxin Cleofas, bix xsunj xuj María Magdalena. 26Jax at nka jt-xnakꞌatzxin nim oc takꞌ texin. Tej tlontexin ttxuxin, bix tuyax t-xnakꞌatzxin, e xiꞌ tkbaꞌnxin te ttxuxin:

—Naa, ja xjal lu cꞌoquel tisen tala te nxela te cꞌojlaltey―tz̈ixin.

27Bix e xiꞌ tkbaꞌnxin tej t-xnakꞌatzxin nim oc takꞌ texin:

—Ja xuuj lu cꞌoquel tisen ttxuy―tz̈ixin. Bix tex hora e xiꞌ tiiꞌn tzunj t-xnakꞌatzxin ja María tuj tja te cꞌojlal texuj.

28Mas yaj, tej tel tniyꞌ Jesús tiꞌj otk bint cykilca tuꞌnxin tuꞌn tel jax tyol Dios, e xiꞌ tkbaꞌnxin:

—At takꞌ aꞌ wiꞌja―tz̈ixin.

29Attzen cyxol soldado jun vaso nojne tuya jun wik vino txꞌom chꞌin. Bix e cuꞌx cymuꞌnxin jun buꞌs̈ tuj vino, bix oc cykꞌoꞌnxin buꞌs̈ twiꞌ tkꞌab jun wik cꞌul hisopo tbi, bix e jax cykꞌoꞌnxin tuj ttzixin tuꞌn tetz ttzꞌuꞌbenxin vino tuj buꞌs̈. 30Tej t-xiꞌ tcꞌaꞌnxin vino, e xiꞌ tkbaꞌnxin:

—Ma bint cykilca waakꞌena―tz̈ixin, bix e cuꞌtz tunntzꞌaj twiꞌxin cubne, bix otk txiꞌ tokxenenxin tanemxin tuj tkꞌab Dios.

Tej tocx lansa ttxaꞌn t-xuucꞌ Jesús

31Te tzunj kꞌij tej tjaw Jesús twitz cruz, jatzen kꞌij te binchal tikꞌch cye judío tuꞌn miꞌn chi akꞌanan te juntl kꞌij te ajlabl. Bix ja tzunj kꞌij te ajlabl jun kꞌij te ajlabl mas jawnex, cuma tuj ninkꞌij te xjan smant. Bix tuj cyley nejenel cye judío, kaꞌxsen tuꞌn tjawe jun xjal twitz cruz tuj kꞌij te ajlabl. Juꞌ tzunj, e cubsankexin cywitzxin te Pilato tuꞌn tbaj cytoken soldado cyken kej oxe xjal tjaw twitz cruz, tuꞌntzen miꞌn jatztl cyxew, bix tuꞌn tcuꞌtz cyiiꞌn soldado cyxumlalxin cyimne twitz cruz. 32E tcuya Pilato, bix e pon cab soldado, bix e baj cytokenxin ke tken tneel aj il tjaw ttxlaj Jesús. Tbajlen cytokenxin tken tneel aj il, e baj cytokenxin ke tken juntl al il tjaw twitz cruz tuya Jesús. 33Pero tej cyponxin tiꞌj Jesús, e cyilxin ya otk cyimxin. Juꞌ tzunj, min e baj cytokenxin ke tkenxin. 34Pero at jun soldado ocx t-xyuꞌn tlans ttxaꞌn t-xuucꞌxin, bix etz tz̈iyꞌ tuya aꞌ tuj. 35Inayena, jtzꞌiꞌbel tej uꞌj lu, ncub ntzꞌiꞌbena jma chin cyeꞌyena tiꞌj. Inayena jun tstiwa jaxxix tiꞌj ti e baj, bix nxiꞌ nkbaꞌna cykilca tuya jaxxix yol, tuꞌntzen cyocslana tiꞌj ja Jesús Jscyꞌoꞌn tuꞌn Dios, 36cuma ma tzꞌel jax j-e tkba tyol Dios. Tz̈i tyol Dios cyjulu: “Mi nuket jun tbakel Jscyꞌoꞌn tuꞌn Dios cwel toket,” tz̈i tyol Dios. 37Bix at juntl tyol Dios tzin tkbaꞌn cyjulu: “Cꞌoquel cycyeꞌyen kej xjal judío jxjal e jaw cypjoꞌn,” tz̈i tyol Dios tiꞌj Scyꞌoꞌn tuꞌn Dios.

Tej tocx kꞌoꞌn Jesús tuj mukbil

38Attzen junxin xjal José tbi, jun aj tnom te Arimatea. Lepchecxin tiꞌj tyol Jesús, pero min otk tyeecꞌa tiibxin, cuma at cytz̈i nejenel cye judío tiꞌjxin. Tcyimlenxitzen Jesús, e pon José twitz Pilato te kanl te Pilato tuꞌn ttzaj tkꞌoꞌn t-xumlal Jesús te. E tcuya Pilato, bix e pon José jaaꞌ taꞌ t-xumlal Jesús tuꞌn t-xiꞌ tiiꞌnxin.

39Jaan Nicodemo e xiꞌ tuya José, jatzenj Nicodemo otk pon tuya Jesús jun koniyan. Ul tiiꞌnxin nim cꞌocꞌsbil cyiꞌ xjal te cꞌocꞌsbel te Jesús, mirra tbi jun wik cꞌocꞌsbil, bix áloes tbi juntl. Setenta libros talen cꞌocꞌsbil, bix smoꞌn cycaꞌbel wik. 40Bix oc cybalkꞌiꞌnxin xbalen tiꞌ t-xumlal Jesús tuya cꞌocꞌsbil tiꞌj, tisex tten cyxol judío oj nmaket jun cyimne.

41Nkatzen lugar jaaꞌ otk jawa Jesús twitz cruz, at jun awal te loꞌpj, bix cyxol cyken loꞌpj at jun acꞌaj tjayel anem twitz xak. Mitknaꞌx tocx cyimne tuj. 42Bix cyeca nka taꞌ ja mukbil lu, tuꞌntzen at-x tyem tuꞌn tmaket naj t-xumlal Jesús, cuma chꞌitk toc jkꞌij te ajlabl, bix xjantzen tuꞌn cymakunxin cyimne tuj kꞌij te ajlabl.

Currently Selected:

SAN JUAN 19: mamTS

Highlight

Copy