SAN JUAN 20

Tej tjatz itzꞌj Jesús

(Mt. 28:1-10; Mr. 16:1-8; Lc. 24:1-12)

1Texlen kꞌij te ajlabl, tej tpon tneel kꞌij te smant, te mitknaꞌx tul kꞌij, e tzaj jxuj María Magdalena tiꞌ tjayel Jesús twitz xak. Bix tej toc tcyeꞌyenxuj, otk tzꞌel kꞌiꞌn xak tlemel twitz tjayel anem. 2Tuj twitzxuj, otk tzꞌel cyiiꞌn nejenel cye judío t-xumlal Jesús. Juꞌ tzunj, ajtz kelenxuj cyuya Simón Pedro bix jjuntl t-xnakꞌatz Jesús, jatzenj t-xnakꞌatzxin nim oc takꞌ texin, bix e xiꞌ tkbaꞌnxuj cyexin:

—Ma tzꞌetz kꞌiꞌn t-xumlal Jesús tuj tjayel, bix mintiiꞌ tumel jaaꞌ ma pona cykꞌoꞌn―tz̈ixuj.

3Tej tbinte Pedro tpocbal min-al Jesús tuj tjayel, extzen tuyaj juntl t-xnakꞌatz Jesús, bix e xiꞌkexin ttziiꞌ tjayel. 4Junx ajkelenkexin cycaꞌbel tuj be, pero tuya mas ajkelbil ajkelen jjuntl t-xnakꞌatz Jesús, bix e pon ttziiꞌ tjayel Jesús nejl twitz Pedro. 5Bix e cub mutzexin tuꞌn tocx tcyeꞌyenxin tuj jul, bix e tilxin nuk ejeeꞌtl t-xbalen Jesús oc balkꞌet tiꞌj eteꞌcx, pero min ocxxin tuj jul. 6Bix lepchxe e pon Pedro tiꞌjxin, bix ocxxin tuj jul, bix oc tcyeꞌyenxin ke xbalen otk cyaj tuj jul. 7Bix jxbalen otk tzꞌoc balkꞌet tiꞌ twiꞌ Jesús, yaaꞌn junx tcub cyuya niyꞌtl xbalen, sino tcub tuj juntl lugar tuj jul, bix baltzꞌiꞌn.

8Yal te juntl t-xnakꞌatzxin, jaj otk pon nejl ttziiꞌ tjayel cyimne, jax ocxin tuj jul. Tej tlontexin tcub t-xbalen Jesús tuj tumel bix mintiiꞌtl xumlalbaj, eltzen tniyꞌxin tiꞌj otk jaw itzꞌj Jesús juntl maj tuj cyamecy. 9El cyniyꞌxin tiꞌj jlu tuꞌnj toc cycyeꞌyenxin t-xbalen Jesús. Yaaꞌn tyol Dios te ootxa e kbante cyexin, cuma mitknaꞌx tel cyniyꞌxin tiꞌj e tkba tyol Dios ka ilxix tiꞌj tuꞌn tjatz itzꞌjxin juntl maj tuj cyamecy. 10Tej tel cyniyꞌxin tiꞌj otk jatz itzꞌjxin tuj cyamecy, e pon meltzꞌajkexin tuj cyposadaxin.

Tej tjaw jlet Jesús twitz María Magdalena

(Mr. 16:9-11)

11Yaltzen te María Magdalena, e ponxuj ttziiꞌ tjayel Jesús juntl maj, bix nim ooꞌkxuj. Bix e cub mutzexuj, tuꞌn tocx tcyeꞌyenxuj tuj jul. 12Bix e tilxuj caꞌba tsanjel Dios tuj cyaꞌj toc cyxbalen sak cyiꞌj. Kꞌuklecxkexin jaaꞌ ocxe ten t-xumlal Jesús. Junxin tocx jaaꞌ a ten twiꞌ Jesús, bix juntlxin tocx jaaꞌ a ten ke tkenxin. 13Bix etz cykbaꞌnxin texuj:

—Naa, ¿tikentzen nooꞌka?―tz̈ikexin.

Bix aj ttzakꞌbeꞌnxuj:

—Nchin ooꞌka cuma ma tzꞌex cyiiꞌn xjal t-xumlal Jcawel weya, bix mintiiꞌ tumel wuyena jaaꞌ ma pona cykꞌoꞌn―tz̈ixuj.

14Tej t-xiꞌ tkbaꞌnxuj jlu, ajtz meltzꞌaj twitzxuj, bix e tilxuj waꞌlec jun xinak, pero min el tniyꞌxuj tiꞌj ka ja Jesús. 15Bix e tzaj yolen tuyaxuj:

—Naa, ¿tikentzen nooꞌka? ¿Altzen tzin tjyoꞌna?―tz̈ixin.

Tujtzen twitz María Magdalena, cꞌojlal cyken loꞌpj jaxin. Juꞌ tzunj, e xiꞌ tkbaꞌnxuj texin:

—Taat, ka jay jxjal ma tzꞌaj tiiꞌna t-xumlal Jesús, kbantz weya jaaꞌ ma pona tkꞌoꞌna, tuꞌntzen tcuꞌx nmakuꞌna―tz̈ixuj.

16Bix e xiꞌ yolen Jesús texuj:

—¡María!

Tej t-xiꞌ tkbaꞌnxin tbixuj, el tniyꞌxuj tiꞌj ka Jesúsxin, bix te junx maj oc tcyeꞌyenxuj tiꞌjxin, bix e xiꞌ tkbaꞌnxuj:

—¡Taat!―tz̈ixuj tuj yol hebreo.

17E xiꞌ tkbaꞌn Jesús texuj:

—Mlay chin cyaja tzalu. Minaꞌx njaxa tuya Nmana, pero il tiꞌj chin jawela. Juꞌ tzunj, miꞌn cub ttzyuꞌna inayena, sino cutxey cyuya ke hermano nxnakꞌatza, bix kbanx cyexin ka chin pomela tuya Nmana bix Cymanxin, tuya Ndiosa bix Cydiosxin―tz̈ixin te María.

18E tcuyaxuj, bix e xiꞌxuj kbalte cye t-xnakꞌatzxin:

—Ma wila Cawel kxol―tz̈ixuj, bix akꞌxuj kbalte cyexin ti otk tkba Jesús.

Tej tjaw jlet Jesús cywitz ke t-xnakꞌatzxin

(Mt. 28:16-20; Mr. 16:4-18; Lc. 24:36-49)

19Jax jtneel kꞌij te smant, tej tex kꞌij, oc cychmon cyiib t-xnakꞌatz Jesús. Etz cylomoꞌnxin jaaꞌ tuya tal, cuma at cytz̈i nejenel cye judío cyiꞌjxin. Chꞌinnchꞌe tul jlet Jesús cyxolxin, bix e xiꞌ tkbaꞌnxin cyexin:

—Chi tenxita tuj ttz̈yal―tz̈ixin.

20Tej t-xiꞌ tkbaꞌnxin jlu, e xiꞌ tyeecꞌanxin ke is̈jnin cyuj tkꞌabxin bix ttxlaj t-xuucꞌxin. Tej tel cyniyꞌxin tiꞌj ka ja Cawel cyxolxin, nim e jaw tzalajkexin. 21Bix juntl maj e xiꞌ tkbaꞌnxin cyexin:

—Chi tenxita tuj ttz̈yal. Tisenx ma tzaj tsmaꞌn Nmana inayena tuꞌn nkꞌumena tyol cye xjal, jax inayena cxeꞌl nsmaꞌna ejeeꞌy―tz̈ixin.

22Tej t-xiꞌ tkbaꞌnxin at t-xiꞌlel tsmaꞌnxin ejeeꞌ te t-xelxin, e xiꞌ t-xupanxin t-xewxin cyiꞌjxin, te jun techel tuꞌn tcuꞌtz tkꞌoꞌnxin Espíritu Santo, bix e xiꞌ tkbaꞌnxin:

—Oj tul Espíritu Santo, ccyiikꞌela jaxin. 23Ejeeꞌy kbalte ti pjel cye ocslal wiꞌja. Jcykbaꞌy baꞌn tuꞌn tbint cyuꞌn ocslal, baꞌntzen. Bix jcykbaꞌy yaaꞌn baꞌn tuꞌn tbint cyuꞌn xjal, jax yaaꞌn baꞌn―tz̈i Jesús cye t-xnakꞌatzxin.

Min tocsla Tomás ka otk jatz itzꞌj Jesús

24Yal tej Tomás, bix ka Yoẍ tbi, min otk tenxin cyxol niyꞌtl t-xnakꞌatz Jesús tej tul jlet Jesús cyxolxin. 25Juꞌ tzunj, e xiꞌ cykbaꞌn niyꞌtl t-xnakꞌatzxin texin:

—Ma kila Cawel kxol―tz̈ikexin.

Pero aj ttzakꞌbeꞌn Tomás cyexin:

—Chin ocslala cyyola nuk oꞌcx ka ma wila jaaꞌ ocxa clavos cyuj tkꞌabxin, bix ka ma tzꞌocx nkꞌoꞌna twiꞌ nkꞌaba tuj tocxlen clavos, bix ka ma tzꞌocx nkꞌoꞌna nkꞌaba tuj t-xuucꞌxin―tz̈i Tomás.

26Tetzen juntl tneel kꞌij te smant, juntl maj oc cychmon cyiib ke t-xnakꞌatz Jesús, lmoꞌntl ke tlemel jaaꞌ tuya tal. Ja maj lu at Tomás cyxolxin. Bix juntl maj ul jlet Jesús cyxolxin, bix e xiꞌ tkbaꞌnxin:

—Chi tenxita tuj ttz̈yal―tz̈ixin.

27Bix e xiꞌ tkbaꞌnxin te Tomás:

—Cyeꞌyenc j-is̈jnin cyiꞌ nkꞌaba, bix kꞌoꞌnctz twiꞌ tkꞌaba tzalu cyuj nkꞌaba. Bix kꞌoꞌnctz tkꞌaba tuj nxuucꞌa, tuꞌntzen miꞌntl baj tcꞌuꞌja iꞌtz kena, tuꞌn tocslana tiꞌj ka inayena―tz̈ixin.

28Aj ttzakꞌbeꞌn Tomás:

—Taat, jay Cawel wibaja bix Ndiosa―tz̈ixin.

29E xiꞌ tkbaꞌn Jesús texin:

—Ma tzꞌocslana tiꞌj in jaw itzꞌja tuj cyamecy nuk cuma ma chin tila. Pero mas baꞌn ka ma tzꞌocslan jun xjal wiꞌja, amale mint ma chin cyil―tz̈ixin.

Alcye t-xiꞌlen uꞌj lu

30Key xjal, ma cub ntzꞌiꞌbena chꞌin tiꞌj ti e bint tuꞌn Jesús. At nimtl e bint tuꞌnxin cywitz t-xnakꞌatzxin tuꞌn t-xiꞌ tyeecꞌanxin tipemalxin, pero yaaꞌn tzꞌiꞌben tuj ja uꞌj lu. 31Pero ma cub ntzꞌiꞌbena kej tbinchbenxin lu, tuꞌntzen cyocslana ka jxjal Scyꞌoꞌn tuꞌn Dios ja Jesús, bix Tcwal Diosxin, bix tuꞌn toc ke cycꞌuꞌja tiꞌjxin, tuꞌntzen tten cychunkꞌlala te junx maj.

Currently Selected:

SAN JUAN 20: mamTS

Highlight

Copy