ກິດຈະການ 2
2
ພຣະວິນຍານບໍລິສຸດເຈົ້າມາໃນວັນເພັນເຕຄໍສະເຕ
1ເມື່ອເຖິງວັນເພັນເຕຄໍສະເຕ, ພວກເພິ່ນທັງໝົດໄດ້ມາເຕົ້າໂຮມກັນຢູ່ໃນບ່ອນດຽວ. 2ໃນທັນໃດນັ້ນ ກໍມີສຽງໜຶ່ງຈາກສະຫວັນເໝືອນສຽງພະຍຸແຮງດັງກ້ອງໄປທົ່ວເຮືອນທີ່ພວກເພິ່ນນັ່ງຢູ່ນັ້ນ. 3ພວກເພິ່ນເຫັນລີ້ນເປັນເໝືອນຮູບແປວໄຟແຕກກະຈາຍອອກໄປ ແລະ ມາຢູ່ເທິງພວກເພິ່ນແຕ່ລະຄົນ. 4ພວກເພິ່ນທຸກຄົນຈຶ່ງເຕັມໄປດ້ວຍພຣະວິນຍານບໍລິສຸດເຈົ້າ ແລະ ເລີ່ມເວົ້າພາສາແປກໆ#2:4 ຫລື ຫລາຍພາສາ ເຊັ່ນດຽວກັບຂໍ້ 11 ຕາມທີ່ພຣະວິນຍານບໍລິສຸດເຈົ້າໃຫ້ພວກເພິ່ນເວົ້າໄດ້.
5ໃນຂະນະນັ້ນ ມີຊາວຢິວຜູ້ຢຳເກງພຣະເຈົ້າຈາກທຸກຊາດທົ່ວໃຕ້ສະຫວັນມາພັກອາໄສຢູ່ເຢຣູຊາເລັມ. 6ເມື່ອພວກເພິ່ນໄດ້ຍິນສຽງນີ້ແລ້ວ ຄົນທັງຫລາຍກໍມາເຕົ້າໂຮມກັນດ້ວຍຄວາມສັບສົນ ເພາະແຕ່ລະຄົນຕ່າງກໍໄດ້ຍິນພວກເຂົາເວົ້າພາສາຂອງຕົນ. 7ພວກເຂົາຈຶ່ງຖາມດ້ວຍຄວາມປະຫລາດໃຈທີ່ສຸດວ່າ, “ຄົນເຫລົ່ານີ້ທີ່ກຳລັງເວົ້າຢູ່ແມ່ນຊາວຄາລີເລທັງໝົດບໍ່ແມ່ນບໍ? 8ແລ້ວດ້ວຍເຫດໃດ ພວກເຮົາແຕ່ລະຄົນຈຶ່ງໄດ້ຍິນພວກເຂົາເວົ້າພາສາທ້ອງຖິ່ນຂອງພວກເຮົາ? 9ຄືຊາວປາເທຍ, ຊາວເມເດຍ ແລະ ຊາວເອລາມ; ຄົນທີ່ຢູ່ໃນແຖບເມໂຊໂປຕາເມຍ, ຢູດາຍ ແລະ ກາປາໂດເກຍ, ປົນໂຕ ແລະ ເອເຊຍ, 10ຟີເຄຍ ແລະ ປຳຟີເລຍ, ເອຢິບ ແລະ ສ່ວນຕ່າງໆຂອງລີເບຍ ເຊິ່ງໃກ້ກັບກີເຣເນ, ຜູ້ມາຢ້ຽມຢາມຈາກນະຄອນໂຣມ 11(ທັງຄົນຢິວ ແລະ ຄົນຕ່າງຊາດທີ່ຖືສາສະໜາຢິວ), ຊາວກະເຣເຕ ແລະ ຊາວອາຣັບ ພວກເຮົາໄດ້ຍິນພວກເຂົາປະກາດເຖິງຄວາມອັດສະຈັນຂອງພຣະເຈົ້າດ້ວຍພາສາຂອງພວກເຮົາເອງ!” 12ພວກເຂົາຕ່າງກໍປະຫລາດໃຈ ແລະ ສັບສົນ, ພວກເຂົາຈຶ່ງຖາມກັນວ່າ, “ສິ່ງນີ້ໝາຍຄວາມວ່າແນວໃດ?”
13ແຕ່ບາງຄົນກໍໄດ້ເຢາະເຢີ້ຍພວກເຂົາ ແລະ ເວົ້າວ່າ, “ພວກເຂົາໄດ້ດື່ມເຫລົ້າອະງຸ່ນຫລາຍເກີນໄປ”.
ເປໂຕກ່າວຄຳປາໄສຕໍ່ປະຊາຊົນ
14ແລ້ວເປໂຕຈຶ່ງໄດ້ຢືນຂຶ້ນພ້ອມກັບອັກຄະສາວົກສິບເອັດຄົນ ແລະ ກ່າວຄຳປາໄສຕໍ່ປະຊາຊົນດ້ວຍສຽງດັງວ່າ, “ພີ່ນ້ອງຊາວຢິວ ແລະ ທ່ານທັງຫລາຍທີ່ອາໄສຢູ່ໃນເຢຣູຊາເລັມ, ຂໍໃຫ້ຂ້າພະເຈົ້າໄດ້ຊີ້ແຈງເລື່ອງນີ້ແກ່ພວກທ່ານທັງຫລາຍ ຈົ່ງຕັ້ງໃຈຟັງສິ່ງທີ່ຂ້າພະເຈົ້າຈະກ່າວໃຫ້ດີ. 15ຄົນເຫລົ່ານີ້ບໍ່ໄດ້ເມົາເຫລົ້າເໝືອນທີ່ພວກທ່ານຄິດ. ເຊິ່ງຫາກໍເກົ້າໂມງເຊົ້າ! 16ບໍ່ແມ່ນ, ເຫດການນີ້ແມ່ນໄດ້ເປັນໄປຕາມທີ່ຜູ້ທຳນວາຍໂຢເອນໄດ້ກ່າວໄວ້ວ່າ:
17“‘ພຣະເຈົ້າກ່າວວ່າ, ໃນວັນສຸດທ້າຍ
ເຮົາຈະເທພຣະວິນຍານບໍລິສຸດເຈົ້າຂອງເຮົາເທິງທຸກຄົນ.
ລູກຊາຍ ແລະ ລູກສາວຂອງພວກເຈົ້າຈະທຳນວາຍ,
ພວກຊາຍໜຸ່ມຂອງພວກເຈົ້າຈະເຫັນນິມິດ,
ພວກຊາຍເຖົ້າຂອງພວກເຈົ້າຈະຝັນເຫັນ.
18ເມື່ອເຖິງເວລານັ້ນ ເຮົາຈະເທພຣະວິນຍານບໍລິສຸດເຈົ້າຂອງເຮົາ
ລົງມາເທິງຜູ້ຮັບໃຊ້ຂອງເຮົາທັງຊາຍ ແລະ ຍິງ
ແລະ ພວກເຂົາຈະທຳນວາຍ.
19ເຮົາຈະສະແດງການອັດສະຈັນໃນຟ້າສະຫວັນເບື້ອງເທິງ
ແລະ ໝາຍສຳຄັນທີ່ແຜ່ນດິນໂລກເບື້ອງລຸ່ມ,
ຈະມີເລືອດກັບໄຟ ແລະ ມີອາຍຄວັນ.
20ດວງຕາເວັນຈະຖືກປ່ຽນເປັນຄວາມມືດ
ແລະ ດວງເດືອນຈະກາຍເປັນເລືອດ
ກ່ອນວັນອັນຍິ່ງໃຫຍ່ ແລະ ເຕັມດ້ວຍສະຫງ່າລາສີຂອງອົງພຣະຜູ້ເປັນເຈົ້າຈະມາເຖິງ.
21ແລະ ທຸກຄົນທີ່ຮ້ອງອອກນາມຂອງ
ອົງພຣະຜູ້ເປັນເຈົ້າກໍຈະໄດ້ຮັບ
ຄວາມພົ້ນ’.#2:21 ຢອ 2:28-32
22“ປະຊາຊົນອິດສະຣາເອນ, ຂໍຈົ່ງຟັງສິ່ງນີ້ ພຣະເຢຊູເຈົ້າຊາວນາຊາເຣັດເປັນຜູ້ທີ່ພຣະເຈົ້າໄດ້ສະແດງໃຫ້ພວກທ່ານຮູ້ເຫັນຢ່າງຈະແຈ້ງແລ້ວດ້ວຍການອັດສະຈັນ, ການອິດທິຣິດ ແລະ ດ້ວຍໝາຍສຳຄັນຕ່າງໆ, ເຊິ່ງພຣະເຈົ້າໄດ້ກະທຳໃນທ່າມກາງພວກເຈົ້າຜ່ານທາງພຣະອົງ, ຕາມທີ່ພວກທ່ານເອງກໍຮູ້ເລື່ອງນີ້ຢູ່ແລ້ວ. 23ພຣະເຢຊູເຈົ້າຜູ້ນີ້ໄດ້ຖືກມອບໃຫ້ພວກທ່ານຕາມທີ່ພຣະເຈົ້າໄດ້ກຳນົດແຜນການໄວ້ ແລະ ໄດ້ຮູ້ລ່ວງໜ້າກ່ອນແລ້ວ ແລະ ໂດຍການຊ່ວຍເຫລືອຂອງຄົນຊົ່ວຮ້າຍ#2:23 ຫລື ຂອງບັນດາຄົນທີ່ບໍ່ມີກົດບັນຍັດ (ຄື ຄົນຕ່າງຊາດ) ພວກທ່ານຈຶ່ງໄດ້ຈັບພຣະອົງໄປຂ້າດ້ວຍການຄຶງພຣະອົງໄວ້ທີ່ໄມ້ກາງແຂນ. 24ແຕ່ພຣະເຈົ້າໄດ້ເຮັດໃຫ້ພຣະອົງເປັນຄືນມາຈາກຕາຍ ໄດ້ປົດປ່ອຍພຣະອົງອອກຈາກຄວາມເຈັບປວດ, ອອກຈາກອຳນາດແຫ່ງຄວາມຕາຍ, ເພາະຄວາມຕາຍບໍ່ສາມາດຈະກັກຈ່ອງພຣະອົງໄວ້ໄດ້. 25ເພາະວ່າດາວິດໄດ້ກ່າວເຖິງພຣະອົງວ່າ:
“‘ຂ້ານ້ອຍໄດ້ເຫັນອົງພຣະຜູ້ເປັນເຈົ້າຢູ່ຕໍ່ໜ້າຂ້ານ້ອຍຕະຫລອດເວລາ
ເພາະວ່າພຣະອົງຢູ່ກໍ້າຂວາມືຂອງຂ້ານ້ອຍ
ຂ້ານ້ອຍຈະບໍ່ຫວັ່ນໄຫວ.
26ເຫດສະນັ້ນ ຈິດໃຈຂອງຂ້ານ້ອຍຈຶ່ງຍິນດີ ແລະ ລີ້ນຂອງຂ້ານ້ອຍກໍຊື່ນຊົມຍິນດີ;
ຮ່າງກາຍຂອງຂ້ານ້ອຍກໍຈະພັກຜ່ອນດ້ວຍຄວາມຫວັງ,
27ເພາະພຣະອົງຈະບໍ່ປະຖິ້ມຂ້ານ້ອຍໄວ້ໃນແດນຄົນຕາຍ
ພຣະອົງຈະບໍ່ປ່ອຍໃຫ້ຜູ້ບໍລິສຸດຂອງພຣະອົງສຳພັດກັບຄວາມເປື່ອຍເນົ່າ.
28ພຣະອົງໄດ້ເຮັດໃຫ້ຂ້ານ້ອຍໄດ້ຮູ້ຫົນທາງແຫ່ງຊີວິດ
ພຣະອົງຈະໃຫ້ຂ້ານ້ອຍເຕັມບໍລິບູນດ້ວຍຄວາມຊື່ນຊົມຍິນດີເມື່ອຢູ່ຕໍ່ໜ້າພຣະອົງ’.#2:28 ພສສ 16:8-11
29“ພີ່ນ້ອງທັງຫລາຍຊາວອິດສະຣາເອນ, ຂ້າພະເຈົ້າບອກພວກເຈົ້າໄດ້ຢ່າງໝັ້ນໃຈວ່າ, ດາວິດບັນພະບຸລຸດຂອງພວກເຮົາໄດ້ຕາຍ ແລະ ໄດ້ຖືກຝັງໄວ້ແລ້ວ ແລະ ອຸບມຸງຂອງເພິ່ນກໍຢູ່ບ່ອນນີ້ຈົນເຖິງທຸກວັນນີ້. 30ແຕ່ເພິ່ນເປັນຜູ້ທຳນວາຍ ແລະ ຮູ້ວ່າພຣະເຈົ້າໄດ້ໃຫ້ຄຳໝັ້ນສັນຍາກັບເພິ່ນວ່າພຣະອົງຈະຕັ້ງຜູ້ໜຶ່ງໃນເຊື້ອສາຍຂອງເພິ່ນໃຫ້ຄອງບັນລັງຂອງເພິ່ນ. 31ດາວິດຮູ້ລ່ວງໜ້າກ່ອນແລ້ວ, ເພິ່ນຈຶ່ງໄດ້ກ່າວເຖິງການເປັນຄືນມາຈາກຕາຍຂອງພຣະຄຣິດເຈົ້າ,#2:31 ຫລື ພຣະເມຊີອາ ທັງຄຳວ່າ “ພຣະຄຣິດເຈົ້າ” (ເປັນຄຳກຣີກ) ແລະ “ພຣະເມຊີອາ” (ເປັນຄຳເຮັບເຣີ) ແປວ່າ “ຜູ້ທີ່ເຈີມຕັ້ງໄວ້” ເຊັ່ນດຽວກັບຂໍ້ 36 ວ່າພຣະເຈົ້າຈະບໍ່ປະຖິ້ມພຣະອົງໄວ້ໃນແດນຄົນຕາຍ, ຫລື ເນື້ອກາຍຂອງພຣະອົງກໍບໍ່ເປື່ອຍເນົ່າ. 32ພຣະເຈົ້າໃຫ້ພຣະເຢຊູເຈົ້າຜູ້ນີ້ໃຫ້ເປັນຄືນມາຈາກຕາຍ ແລະ ພວກຂ້າພະເຈົ້າທຸກຄົນຕ່າງກໍເປັນພະຍານໃນເລື່ອງຄວາມຈິງນີ້. 33ເມື່ອພຣະອົງຖືກຍົກຂຶ້ນສູ່ເບື້ອງຂວາມືຂອງພຣະເຈົ້າແລ້ວ ພຣະອົງໄດ້ຮັບພຣະວິນຍານບໍລິສຸດເຈົ້າຈາກພຣະບິດາເຈົ້າຕາມສັນຍາ ແລະ ໄດ້ເທລົງມາ ເໝືອນດັ່ງທີ່ພວກເຈົ້າໄດ້ເຫັນ ແລະ ໄດ້ຍິນຢູ່ນີ້. 34ເພາະດາວິດບໍ່ໄດ້ຂຶ້ນໄປເທິງສະຫວັນ, ແຕ່ເພິ່ນໄດ້ກ່າວວ່າ,
“‘ອົງພຣະຜູ້ເປັນເຈົ້າໄດ້ກ່າວກັບອົງເຈົ້ານາຍຂອງຂ້ານ້ອຍວ່າ:
“ຈົ່ງນັ່ງທີ່ເບື້ອງຂວາມືຂອງເຮົາ
35ຈົນກວ່າເຮົາຈະເຮັດໃຫ້ສັດຕູທັງຫລາຍຂອງເຈົ້າ
ເປັນບ່ອນຮອງຕີນຂອງເຈົ້າ”’.#2:35 ພສສ 110:1
36“ເຫດສະນັ້ນ ໃຫ້ປະຊາຊົນອິດສະຣາເອນທັງຫລາຍໝັ້ນໃຈໃນສິ່ງນີ້ຄື ພຣະເຈົ້າໄດ້ຕັ້ງພຣະເຢຊູເຈົ້າຜູ້ນີ້ ທີ່ພວກທ່ານໄດ້ຄຶງໄວ້ທີ່ໄມ້ກາງແຂນ ໃຫ້ເປັນທັງອົງພຣະຜູ້ເປັນເຈົ້າ ແລະ ເປັນພຣະເມຊີອາ”.
37ເມື່ອຄົນທັງຫລາຍໄດ້ຍິນຢ່າງນີ້ແລ້ວ ພວກເຂົາຕ່າງກໍຮູ້ສຶກເຈັບຊ້ຳກິນແໜງໃຈຫລາຍ ຈຶ່ງເວົ້າກັບເປໂຕ ແລະ ອັກຄະສາວົກຄົນອື່ນໆວ່າ, “ພີ່ນ້ອງ ພວກເຮົາຄວນຈະເຮັດຢ່າງໃດ?”
38ເປໂຕຕອບວ່າ, “ພວກທ່ານທຸກຄົນຈົ່ງຖິ້ມໃຈເກົ່າເອົາໃຈໃໝ່ ແລະ ຮັບບັບຕິສະມາໃນນາມຂອງພຣະເຢຊູຄຣິດເຈົ້າ ເພື່ອບາບຂອງພວກທ່ານຈະໄດ້ຮັບການອະໄພ ແລະ ພວກທ່ານກໍຈະໄດ້ຮັບຂອງປະທານຄືພຣະວິນຍານບໍລິສຸດເຈົ້າ. 39ສັນຍານີ້ມີໄວ້ເພື່ອພວກທ່ານທັງຫລາຍ ແລະ ລູກຫລານຂອງພວກທ່ານ ຕະຫລອດຈົນຄົນທັງປວງທີ່ຢູ່ຫ່າງໄກ ຄືທຸກຄົນທີ່ອົງພຣະຜູ້ເປັນເຈົ້າພຣະເຈົ້າຂອງພວກເຮົາຈະເອີ້ນ”.
40ແລ້ວເປໂຕໄດ້ເຕືອນພວກເຂົາອີກຫລາຍຄຳ ແລະ ອ້ອນວອນວ່າ, “ຈົ່ງເອົາຕົວເອງໃຫ້ພົ້ນຈາກຄົນໃນຍຸກເສື່ອມຊາມນີ້”. 41ບັນດາຜູ້ທີ່ຍອມຮັບຖ້ອຍຄຳຂອງເປໂຕກໍໄດ້ຮັບບັບຕິສະມາ ແລະ ໃນວັນນັ້ນ ມີສາວົກເພີ່ມຂຶ້ນອີກປະມານສາມພັນຄົນ.
ການສາມັກຄີທຳຂອງຜູ້ທີ່ເຊື່ອ
42ພວກເຂົາທັງຫລາຍໄດ້ອຸທິດຕົວເອງໃນຄຳສອນຂອງພວກອັກຄະສາວົກ ແລະ ໃນການຮ່ວມສາມັກຄີທຳ, ໃນການຫັກເຂົ້າຈີ່ ແລະ ໃນອະທິຖານ. 43ທຸກຄົນຕ່າງກໍຢ້ານໝາຍສຳຄັນ ແລະ ການອັດສະຈັນຫລາຍຢ່າງທີ່ພວກອັກຄະສາວົກໄດ້ເຮັດ. 44ບັນດາຄົນທີ່ເຊື່ອນັ້ນກໍໄດ້ຢູ່ຮ່ວມກັນ ແລະ ໄດ້ນຳເອົາສິ່ງຂອງທີ່ຕົນມີຢູ່ນັ້ນມາເປັນຂອງສ່ວນລວມ. 45ພວກເຂົາໄດ້ຂາຍທີ່ດິນ ແລະ ຊັບສິ່ງຂອງເພື່ອແຈກຢາຍໃຫ້ແຕ່ລະຄົນ ຜູ້ທີ່ມີຄວາມຈຳເປັນ. 46ທຸກໆວັນ ພວກເຂົາໄດ້ສືບຕໍ່ມາເຕົ້າໂຮມກັນທີ່ເດີ່ນວິຫານ. ພວກເຂົາຫັກເຂົ້າຈີ່ຕາມບ້ານຂອງຕົນ ແລະ ກິນອາຫານຮ່ວມກັນດ້ວຍຄວາມຊື່ນຊົມຍິນດີ ແລະ ດ້ວຍຄວາມຈິງໃຈ, 47ພວກເຂົາພາກັນສັນລະເສີນພຣະເຈົ້າ ແລະ ເປັນທີ່ພໍໃຈຂອງຄົນທັງໝົດ. ແລ້ວອົງພຣະຜູ້ເປັນເຈົ້າກໍໄດ້ໃຫ້ມີຜູ້ທີ່ໄດ້ຮັບຄວາມພົ້ນເພີ່ມຈຳນວນຂຶ້ນທຸກໆວັນ.
Currently Selected:
ກິດຈະການ 2: LCV
Highlight
Share
Copy
Want to have your highlights saved across all your devices? Sign up or sign in
ພຣະຄຳພີລາວສະບັບສະໄໝໃໝ່™ ພັນທະສັນຍາໃໝ່
ສະຫງວນລິຂະສິດ © 2023 ໂດຍ Biblica, Inc.
ໃຊ້ໂດຍໄດ້ຮັບອະນຸຍາດ ສະຫງວນລິຂະສິດທັງໝົດ.
New Testament, Lao Contemporary Version™
Copyright © 2023 by Biblica, Inc.
Used with permission. All rights reserved worldwide.
