Pin'ilʋg 40

Ban tam Josef yɛla sanrega ni la yɛla

1Li da paae saŋa si'a ka onɛ kuobid daam tisid Egipt na'ab la nɛ onɛ maan bodobodo tisid o la tʋm bɛ'ɛdi pɔ'ɔgi ba zugdaan la. 2Ka Faaro sʋnf da pɛlig nɛ o tʋmtʋmniba ayi' nwa', banɛ kuobid daam kpɛɛm nɛ banɛ sʋ'oe bodobodo yɛla la kpɛɛm. 3O da nɔki ba yɔ' onɛ an banɛ gur na'ab la tuongat yin, dɔkanɛ ka ba da yɔ' Josef ani la mɛn. 4Banɛ gur na'ab la tuongat da nɔki ba niŋ Josef nu'usin ka o gɔsidi ba. Ba da bɛɛ anina ka li yuug bi'ela.

5Dapa ayi' nwa', onɛ kuobid na'ab daam nɛ onɛ sʋ'oe bodobodo yɛla la da zaansim yʋ'ʋŋ yinne, ka sɔ' wʋsa zaansʋŋ mɔri li gbine li kɔn'. 6Bɛogʋ da nie ka Josef kɛɛn ba san'an na la, o da nyɛ ka ba nindaas zuŋ ka ba sʋnya san'am. 7Ka o bu'os Faaro tʋmtʋm kpɛɛmnam banɛ ka on nɛ ban la'am bɛ sanrega ni o zugdaan yin la ye, “Bɔ ka ya sʋnya san'am zina?” 8Ka ba lɛbis ye, “Ti babayi' nwa' sa zaansimnɛ yʋ'ʋŋ, amaa sɔ' kae na pa'ali ti li gbinnɛ.” Ka Josef lɛbis ye, “Abaŋ zaansʋŋ gbin pʋ yit nɛ Wina'am ni naa? Yɛliminimɛ ya zaansʋŋ la!”

9Ani ka onɛ sʋ'oe na'ab daam kuobʋg la pin'ili tu'as Josef o zaansʋŋ la, ka yɛl o ye, “M zaansʋŋ la ni m nyɛ vain tiig ka li bɛɛ m tuon; 10ka li mɔr wila atan' ka vanpɔla yina ka puum mɛ pu, ka li pʋ yuugɛ ka li wali bi'ig. 11Ka nwam kanɛ ka m mɔri tisid Faaro daam la bɛɛ m nu'ugin ka m nɔk wala la nwiaki niŋ Faaro nwammin la, nɔki niŋ o nu'ugin.” 12Ka Josef yɛl o ye, “Li gbinni nwa'. Wila atan' la anɛ daba atan'. 13Daba atan' nwa' sʋʋgin, Faaro na yisif kpɛla ka kɛ ka fʋ lɛbi tʋmmi fʋ tʋʋma wʋʋ fʋn daa pʋn tʋm si'em la, ka fʋ na nɔk Faaro nwammi niŋ o nu'usin wʋʋ fʋn daa kuobid o daam si'em la. 14Amaa si'el wʋsa ya'a keŋ sʋ'ʋŋa tisif, fʋn tɛnri m yɛla ka pa'al pʋpielim nɛ m, pian'ami m yɛla tis Faaro ka kɛ ka m yi sanrega nwa' ni. 15Ba mukim nɛ ziimɛ yi Hibiru teŋin na, hali kpɛla nwa' m pʋ tʋm si'el dinɛ nar ye m bɛ bʋmbɔk kaŋa nii.”

16Onɛ an bodobodo maannib kpɛɛm la nyɛ ka Josef tu'as o tiraan la yɛla ka li malis la, o yɛl Josef ye, “Mam mɛ sa zaansimnɛ ka bodobodo pɛɛd atan' bɛɛ m zugin, 17ka pɛ'ɛkanɛ bɛ zugin la, ka bodobodo buudi wʋsa linɛ an Faaro din bɛɛ di ni, amaa ka niis ɔnbid bodobodo la.” 18Ka Josef yɛl ye, “Li gbinni nwa'. Pɛɛd atan' la anɛ daba atan'. 19Dabisa atan' nwa' sʋʋgin, Faaro na yisif kpɛla ka fi'igi fʋ zug, ka yuluf tiig zug, ka niis dii fʋ niŋgbina la.”

20Daba atan' daar la da anɛ Faaro du'am tiɛnr dabisir, ka o maal di'ema nɛ ba ka dʋg diibi tisid o na'ayikpɛm. Ka o yis onɛ gɔsid o daam yɛla nɛ onɛ maan o bodobodo la sanrega ni na zi'eli ba o na'ayikpɛm la tuon. 21O da lɛbis onɛ sʋ'oe o daam kuobʋg la o tʋʋma ni, ka o lɛn kuobid daam tis Faaro o nu'ugin, 22ka yul onɛ aan o bodobodo maannib kpɛɛm la nwɛnɛ Josef n da pa'ali ba zaansʋŋ la gbin si'em la. 23Amaa onɛ sʋ'oe daam yɛla la da tam Josef yɛla nɛ.

Currently Selected:

Pin'ilʋg 40: kus_gh

Highlight

Copy