Pin'ilʋg 39

Josef nyaŋi yi makir pʋʋgin

1Tɔ', ka ba da mɔr Josef n keŋ Egipt ka Potifa onɛ an Faaro na'ayikpɛɛm ka an banɛ gur Na'ab la tuongat la da' o Isimael dim banɛ mɔr o na la san'an. 2Zugsɔb la da bɛ nɛ Josef, ka si'el wʋsa ken sʋ'ʋŋa tisid o. On da bɛɛ o zugdaan Egipt kpɛɛm la yin la, 3o zugdaan la da nyɛ ka Zugsɔb bɛ nɛ o, ka linɛ ka o tʋm wʋsa da kennɛ tuon sʋ'ʋŋa. 4O sʋnf da ma'ae nɛ o hali ka o kɛ ka o gur o. Potifa da nɔk o yir wʋsa nɛ on mɔr si'el wʋsa yɛla niŋ o nu'usin ka o gɔti li. 5Lin yi saŋa kanɛ ka o nɔk o yir nɛ on mɔr si'el wʋsa niŋ Josef nu'usin la, Zugsɔb da tis Egipt kpɛɛm yir la wʋsa albareka Josef yɛla. Zugsɔb la albareka da bɛ nɛ Potifa mɔr si'el wʋsa, linɛ bɛ yin nɛ pɔɔdin wʋsa. 6O da zaŋ on mɔr si'el wʋsa gu'ul Josef. Josef n da gɔsid si'el wʋsa la zug, o ba'a da lɛn kae o yir la yɛla nii, ya'a ka' on na di disi'a ma'aanɛ.

Josef yʋ'ʋn da nɔb nɛ hali ka vɛnl. 7Li da pʋ yuugɛ ka o zugdaan la pu'a ya'am kpɛn' o ka o yɛl o ye, “Kem na digin nɛ m!” 8Amaa o da zan'as ka yɛl o ye, “Gɔsima li ka' manɛ gɔsid si'el wʋsa yiraa? M zugdaan pʋ lɛn gɔsid si'el-si'el yiraa. Bɔzugɔ, o nɔki li wʋsa niŋi m nu'usin. 9Sɔ' ka' yin kpɛla gat mam. M zugdaan la pʋ mɔŋim si'el si'ela, asɛɛ fʋn ma'aa, fʋn aan o pu'a la zug. M na niŋ wala maal bugisim kaŋa buudi, tʋm tʋʋmbɛ'ɛdi pɔ'ɔgi m Wina'am?” 10La'an nɛ on da zan'as la, pu'a la da sin'igid Josef nɛ daar wʋsa, ka o mɛ da zan'as ye o kʋ digin nɛ o bɛɛ li'el o san'anɛ.

11Daar yinne ka o kpɛn' yin la ye o tʋm o tʋʋma, ka yammis la sɔ'ɔsɔ ka' yin la. 12Ka pu'a la gban'e o fuug ka yɛl ye, “Kem na digin nɛ m!” Ka Josef yɛɛg fuug la bas o nu'usin ka zɔɔ yi.

13On nyɛ ka Josef bas fuug la o nu'usin ka zɔɔ yi yin la, 14pu'a la buol yin la yammis la wʋsa yɛli ba ye, “Gɔsimi ban mɔr Hibiru bikaŋa kena ye o ziemi ti si'em! O kpɛn' kpɛla na ye o digin nɛ mam; ka m kaas kuŋ, 15ka on wʋm ka m kaas ye ba faanmim la, ka o zɔ ka bas o fuugʋ m nu'usin.” 16O da nɔk fuug la digil ka o sid la ti kul na. 17Ka o yɛl o ye, “Hibiru yammʋg kanɛ ka fʋ mɔr na la kena ye o bibigim. 18Amaa on wʋm ka m kaas ye ba faanmim mɛ bas la, ka o zɔ ka bas o fuugʋ m nu'usin.” 19Josef zugdaan la da wʋm o pu'a yɛl ye, “Fʋ yammʋg la maal mam si'em nwa' la,” ka o sʋnf la'aŋ bugum 20ka o mɔr Josef n keŋ yɔ' zin'ikanɛ ka ba yɔɔd na'ab nimbanɛ da tʋm bɛ'ɛd la. Josef n da bɛ sanrega ni la, 21Zugsɔb la da bɛ nɛ o; ka onɛ gur sanrega la ya'am kpɛn' o. 22Onɛ gur sanrega la da kɛ ka Josef sʋ'oe banɛ bɛ sanrega ni la, ka gɔsid linɛ wʋsa tʋm anina. 23Onɛ gur sanrega la da pʋ lɛn gɔsid linɛ wʋsa ka o niŋ Josef nu'usin la, bɔzugɔ Zugsɔb la da bɛ nɛ o ka kɛ ka on maal si'el wʋsa ken tuon sʋ'ʋŋa.

Currently Selected:

Pin'ilʋg 39: kus_gh

Highlight

Copy