Pin'ilʋg 38

Juda tʋm tʋʋmbɛ'ɛd dinɛ mɔr nyan la yɛla

1Saŋkan la Juda da bas o ba'abiis ka keŋi bɛ dau sɔ' san'an Adullam teŋin, ka o yʋ'ʋr buon Hira. 2Ani ka Juda nyɛ Keenan dau onɛ yʋ'ʋri buon Sua la pu'ayua. O da dii o ka digin nɛ o, 3ka o gban'e pʋʋgʋ du'a biribiŋ ka ba pʋd o, o yʋ'ʋr ye Er. 4O da lɛm gban'e pʋʋgʋ du'a biribiŋ ka pʋd o, o yʋ'ʋr ye Onan. 5Ka o lɛn du'a biribiŋi pʋd o, o yʋ'ʋr ye Sela. O da du'a o nɛ Kezib teŋin. 6Juda da bɔ pu'a tis Er onɛ aan o bikpɛɛm la. O yʋ'ʋri da buon Tamar. 7Amaa Er, onɛ an Juda bikpɛɛm la, da anɛ tʋʋmbɛ'ɛd sɔb Zugsɔb la tuon, alazug Zugsɔb la da kʋʋ o. 8Juda da yɛl Onan ye, “Dimi fʋ bier pu'a la, ka maal pʋkɔndiir malima nwɛnɛ lin nar si'em ka li kɛ ka fʋ du'a biisi tisi fʋ bier ka o gbin da li'.” 9Amaa Onan n da baŋ ye o kʋ sʋ'oe biis la, o ɛɛnti digin nɛ pu'a la ka kpa'ae o daulim bas teŋ, linɛ na kɛ ka o kʋ du'a biisi tis o bier la. 10On da tʋm si'el la da anɛ bugus tʋʋma Zugsɔb la tuon. Ka o mɛ kʋʋ o. 11Ka Juda da yɛl o bipu'a Tamar ye, “Lɛmmi fʋ saam yiri bɛ nɛ pʋkɔntim la ka m biig Sela ti nɔbig.” O da tɛn'ɛs ye, “Daasi'erɛ Sela na ti kpi wʋʋ o bieya la kpi si'em la.” Tamar da keŋ bɛɛ o saam yin.

12Li da yuug ya hali ka Juda pu'a onɛ an Sua pu'ayua la nyaan kpi. Juda sʋnsa'aŋi da gaad la, o da keŋ Timna teŋin, ka o nidib la kiesid o pɛ'ɛs kɔnbid anina. O zua Hira onɛ an Adullam nid la da dɔl o keŋ. 13Ba da yɛl Tamar ye, “Fʋ dayaam dau la bɛ suori wa'ae Timna ye o kies o pɛ'ɛs kɔnbid la.” 14Ka o da yɛɛs o pʋkɔnfuud ka tiak fuudi yɛ ka viligi o zug nɛ fubili tiak o mɛŋ ka keŋ zin' Enaim za'anɔɔrin dinɛ bɛ Timna suorin la. Bɔzugɔ, o da nyɛ ka Sela bi', ka ba pʋ kɛ ka o kul o. 15Juda nyɛɛ o la, ka tɛn'ɛs ye o anɛ pu'agɔɔndir, on lus o nindaa la zug, 16ka pʋ baŋ ye o anɛ o bipu'a, ka keŋ o san'an suor la baba yɛl o ye, “Kem na ka m digin nɛf.” Ka o lɛbis ye, “Fʋ na tisim bɔ ka man nɛ fʋn diginɛ?” 17Ka o yɛl ye, “M na tisif bʋpɔl m kɔnbid la pʋʋgin.” Ka o bu'os o ye, “Bɔ ka fʋ na tisim ka li an kasɛt hali nɛ fʋn na ti mɔr bʋʋg la na tisi ma?” 18Ka o bu'os o ye, “Ka bɔ ka fʋ bɔɔd ye m tisif ka li an kasɛta?” Ka o lɛbis ye, “Nɔkimi fʋ niŋgɔɔnr baŋ kanɛ ka fʋ yʋ'ʋr sɔbi niŋ anina la nɛ fʋ dansaar la tisim.” Ka o zaŋi tis o ka digin nɛ o. Ka o kpɛn gban'e pʋʋg. 19Tamar n gaad la, o yɛɛg fukanɛ lus o zug la ka lɛbis o pʋkɔnfuud la yɛ ya'as.

20Juda da tʋm o zua onɛ an Adullam nid la nɛ bʋpɔl ye o keŋ tis pu'a la ka di'e o la'abanɛ ka o yɛl nɔɔri zi'el la. Amaa ka o keŋ ka pʋ nyɛɛ o. 21Ka o bu'os dap banɛ bɛɛ anina la ye, “Teŋgban pu'agɔɔndir kanɛ zin' suor kpikpɛŋ Enaim teŋ za'anɔɔrin la bɛ ya?” Ka ba yɛl o ye, “Teŋgban pu'agɔɔndir ka' kpɛlaa.” 22Ka o lɛb Juda san'an yɛl o ye, “Mam pʋ nyɛɛ o, dinɛ lɛm paas la dap banɛ bɛɛ anina la ye, ‘Teŋgban pu'agɔɔndir ka' kpɛlaa.’” 23Juda da yɛl ye, “On mɔr si'el la kɛl ka o mɔri keŋ; ya'a ka' ala, ba na la'adi ti. Li ya'a an sida, m pʋ pan'as o, bɔzugɔ m tʋm ya ye ba mɔr bʋpɔl la keŋi tis o ka pʋ nyɛɛ o.”

24Nwadis atan' nya'aŋ ka ba yɛl Juda ye, “Fʋ bipu'a Tamar kpɛn' nɛ dap bɔɔb ka ba'asi nɔk pʋʋg.” Juda da yɛl ye, “Mɔri nɛ o yina ka nyu'oe o nɛ bugum ka o kpi.” 25Ban mɔr Tamar n yina la, o tʋm labaari yɛl o dayaam dau la ye, “M mɔr nɛ pʋʋg ka li anɛ dau kanɛ sʋ'oe la'abama nwa' tisim.” Ka yɛl ye, “Gɔsim ye fʋ na baŋ la'abama an sɔ' bʋnnɛɛ? Li anɛ baŋ nɛ li nwiig, nɛ dansaar.” 26Juda da baŋya ka ye, “O anɛ pʋpielim sɔbi gaad man. Mam pʋ zaŋ o tisim biig Sela ka o di la zugʋ kɛ ka pu'a la niŋim anwana la.” Juda da pʋ lɛn digin nɛ o ya'asɛ.

27O du'am saŋa n da paae la, o da mɔri liiba o pʋʋgin. 28On da du'ad la, ka yinne yis o nu'ug na, ka pu'adu'as la nɔk gum zɛn'ugʋ lɔɔ o nu'ug la ka ye, “Oŋa yi yiiga na.” 29Amaa, on lɛbis o nu'ug la, ka yinne la yina, ka o ye, “Fʋn kɔɔ yi si'em nwanaa?” Ka pʋd o, o yʋ'ʋr ye Perez.#38:29 Li gbin anɛ ‘Akɔɔyina’. 30Ka liibir onɛ mɔr gum zɛn'ug o nu'ugin la yʋ'ʋn yina ka ba tis o yʋ'ʋr ye Zera.

Currently Selected:

Pin'ilʋg 38: kus_gh

Highlight

Copy