Pin'ilʋg 34

Daina nɛ Sekɛm dim yɛla

1Lea da du'a bipuŋ sɔ' tis Jakob ka o yʋ'ʋr buon Daina. Daar yinne ka Daina da yii keŋ ye o pʋ'ʋs teŋ la pu'a sieba. 2Hamor da anɛ Hivi buudi ka di teŋ la na'am, ka o biribiŋ Sekɛm nyɛ Daina ka o ya'am kpɛn' o ka o san'am o. 3Ka o ya'am wʋsa kpɛn' Daina, onɛ an Jakob bipuŋ la, ka o nɔŋ pu'asadir la hali ka pian' nɛ kʋkɔmalisiŋi tis o. 4Ka Sekɛm yɛl o saam Hamor ye, “Li'am pu'a kaŋa tisim ka m dii o.” 5Saŋkanɛ ka Jakob wʋm ye Sekɛm bibig o biig Daina la, o biis da nan bɛ nɛ mɔɔgin kem niigi. Ka o sin baanlimm gur biis la ka ba kul na. 6Ka Sekɛm saam Hamor keŋ Jakob san'an ye o nwɛ' nu'ug. 7Saŋkan la ka Jakob biis yi mɔɔgini paae na ka wʋm dinɛ maal la, ka li daami ba ka ba sʋʋnr pɛlig bɔzugɔ Sekɛm diis nɛ Israel nyan on san'am Jakob pu'ayua la, li pʋ sʋm ye nɛ' maali nɛ. 8Amaa ka Hamor yɛli ba ye, “M biig Sekɛm sʋʋnr kpɛn' fʋ bipuŋ la nɛ hali. M sɔsidif ye fʋ tis o ka o lieb o pu'a. 9Kɛl ka ti di taaba biis. Tisimi ti ya pu'asada la ka tinam mɛ tisi ya ti pu'asada. 10Ya na tun'e zin' teŋin la nɛ ti, ka nyaŋi tɔlim bɛɛ da' paalʋ ka li na aan ya din.” 11Ka Sekɛm mɛ da bɛɛ ani ka yɛl Daina saam nɛ o tanp ye, “Siakimi ka m na tisi ya linɛ wʋsa ka ya bɔɔd. 12Yɛlim pu'a la sʋl nɛ piini linɛ wʋsa ka ya bɔɔd; li ya'a zu'oe si'em wʋsa m na yɔɔ li. Kʋdim tisimi mam pu'asadir la ka o liebi m pu'a.” 13Amaa Sekɛm daa san'ami ba taʋn Daina la zug, Jakob biis la da ma' lɛbis on nɛ o saam Hamor 14ye, “Tinam kʋ nyaŋi tʋm tʋʋm kaŋa; ti kʋ nyaŋi nɔki ti taʋn tis dau kanɛ pʋ kpɛn' baŋʋ; lin aan ti kisʋg la zug. 15Yɛl yinne ma'aa na kɛ ka ti siak. Ka li anɛ ye asɛɛ ka ya siaki lieb wʋʋ tinam ka kpɛn'ɛsi ya dap la wʋsa baŋʋ. 16Ya ya'a niŋ ala ti na nɔki ti tanpi tisi ya, ka mɛ nɔki ya tanp la, ka ti na bɛ ya san'an ka tinam nɛ yanam na an buudi yinne. 17Amaa ya ya'a pʋ siak ye ya kpɛn' baŋʋ, tinam na nɔki ti taʋn keŋ.” 18Ka ban yɛl si'em la an sʋ'ʋŋa tis Hamor nɛ o biig Sekɛm. 19Dasaŋ la da pʋ gu'usɛ ka kpɛn' baŋʋ tɔ'ɔtɔ bɔzugɔ, o ya'am da kpɛn' Daina nɛ hali. O mɛ da anɛ onɛ ka o yidim wʋsa tisid o na'asi. 20Ka Hamor nɛ o biig Sekɛm keŋ tempʋʋg la za'anɔɔrin ka pian' tis o nidib la ye, 21“Dap la anɛ ti zuanam. Kɛl ka ba bɛɛ ti teŋin la ka tɔlim, bɔzugɔ teŋ la paalʋ zu'oya ka ba tun'e bɛ. Ti na tun'e dii ba bipumis la ka bam mɛ dii ti bipumis. 22Amaa linɛ na kɛ ka dap nwa' siaki bɛ nɛ ti anɛ ye asɛɛ ka ti dap la wʋsa kpɛn' baŋʋ wʋʋ ban nɛ. 23Yanamɛ nyɛ nwa', ba bʋnkɔnbid nɛ ba la'ad wʋsa kʋ lieb tinam bʋnnɛɛ? Kɛl ka ti siak ka ba bɛ kpɛla.” 24Ka dap banɛ wʋsa yi za'anɔɔrin la ka wʋm Hamor nɛ Sekɛm yɛl si'el la siak ka ba kpɛn'ɛs dap wʋsa baŋʋ. 25Ka daba atan' nya'aŋ ka ba wʋsa digi ka li zabidi ba, ka Jakob biribis ayi' Simeon nɛ Levi, banɛ an Daina mabiis la, nɔki ba sʋ'ʋsi keŋi niŋ dap la kʋʋb diin, kʋʋ ba wʋsa. 26Ba mɛ da kʋ Hamor nɛ Sekɛm wʋsa ka yisi ba taʋn Daina Sekɛm yin la mɔri kul. 27Ka Jakob biis la kena nyɛ ka ba wʋsa kpi la, ka ba vaae teŋ la la'ad la wʋsa, ban san'ami ba taʋn la zug. 28Ka biis la kadi ba bʋnkɔnbid banɛ an niigi, nɛ bʋmis nɛ pɛ'ɛs la ka faaɛn linɛ wʋsa bɛ tempʋʋgin nɛ pɔɔdin la. 29Ba da vaae ba areza'as nɛ pu'ab nɛ biis nɛ bʋn linɛ bɛɛ ba yaan wʋsa. 30Ka Jakob yɛl Simeon nɛ Levi ye, “Ya bɔnɛ yɛli tisim. Keenan dim nɛ Perizi dim banɛ bɛ kpɛla la kisig mam. Ti mɛ pʋ zu'oe, ba ya'a la'as taaba ye ba zab nɛ ti, ba na kʋ mam nɛ m yidim la wʋsa.” 31Ka ba lɛbis ye, “Fʋn nyɛ la li an sʋm ye o maali ti taʋn la wʋʋ pu'agɔɔndirɛɛ?”

Currently Selected:

Pin'ilʋg 34: kus_gh

Highlight

Copy