Pin'ilʋg 35

Jakob n lɛb Betel teŋin la yɛla

1Wina'am da yɛl Jakob ye, “Lɛm Betel n zin'in anina ka mɛ' maan bimbimi tis Wina'am onɛ da nie o mɛŋi pa'alif, fʋn da zɔti yiti fʋ bier Esau san'an la.” 2Ka Jakob yɛl o yidim nɛ banɛ wʋsa dɔl o la ye, “Basimi ya bada la nɛ wina banɛ ka ya mɔr la wʋsa, ka maali ya mɛŋ sʋ'ʋŋa ka tiaki ya fuud. 3Kɛlli ka ti duoe lɛb Betel ka mɛ' maan bimbimi tis Wina'am onɛ ka m bɛ yɛla ni ka o sʋŋim hali ka bɛ nɛ m zin'ikanɛ wʋsa ka m keŋ la.” 4Ka ba vaae bada nɛ wina la nɛ tʋblɛma la wʋsa tis Jakob ka o nɔki pin' titita'ar gbinnin Sekɛm tempʋʋgin. 5Ka ba yii lɛbid ka Wina'am dabiem kpɛn' tempʋʋg la dim wʋsa, ka ba pʋ kadi baa.

6Ka Jakob nɛ o nidib la wʋsa paae Luz teŋin dinɛ an Betel ka bɛ Keenan sʋ'ʋlimin la. 7Anina ka o mɛ' maan bimbim ka buol zin'ig la ye El Betel,#35:7 Li gbin anɛ ‘Betel Wina'am’. bɔzugɔ anina ka Wina'am da nie o mɛŋi pa'al o, on da zɔti yiti o bier san'an la. 8Saŋkan la ka Debora onɛ an Rakɛl biyuol la da kpi, ka ba mum o titita'ar kanɛ bɛ Betel la gbinnin, ka ba pʋd zin'ig la ye Allon-Bakuf.#35:8 Li gbin anɛ, ‘Sʋnsa'aŋ Tiig’.

9Jakob n yi Padanaram la nya'aŋ ka Wina'am nie o mɛŋ ya'asi pa'al o ka niŋ o bareka 10ka yɛl o ye, “Fʋ yʋ'ʋr anɛ Jakob, amaa ba kʋ lɛm buonif ye Jakob ya'asɛ. Fʋ yʋ'ʋr na buon ye Israel.” Ala ka o pʋd o yʋ'ʋr ye Israel. 11Ka Wina'am lɛn yɛl o ye, “Manɛ an Wina'am Onɛ Galis la. Du'ami biis ka nɔbigi bɛdegʋ. Fʋ na wiak buudi bɛdegʋ hali ka ba lieb tembɛda. Na'anam na yii fʋ tuŋʋn na. 12Teŋ kan ka m da tis Abraham nɛ Isaak la, m mɛ na nɔki li tis fʋn nɛ fʋ yaas banɛ dɔlli fʋ nya'aŋ la.” 13Ka Wina'am da pian' naae ka bas o anina. 14Ka Jakob yʋ'ʋn nɔk kugiri ba'a zi'el sappi, zin'ikanɛ ka Wina'am pian' tis o la, ka bu'oe daam nɛ malʋŋ kpaam niŋi li zug, 15ka buol zin'ikanɛ ka Wina'am pian' tis o la ye Betel.#35:15 Betel gbin anɛ Wina'am yir.

Rakɛl kum yɛla

16Ka ba keŋ bi'ela yi Betel ka nam pʋ paae Efirata teŋin naa ka Rakɛl sa'ae ka li wʋm o hali. 17Ka saŋkanɛ ka li wʋm o hali la, ka pu'adu'as la yɛl o ye, “Da zɔt dabiem ka ɔŋa mɛ anɛ biribiŋ.” 18Ka on bɔɔd kum la ka pʋd o biribiŋ la yʋ'ʋr ye Ben-Oni.#35:18 Ben-Oni gbin anɛ sʋnsa'aŋ biig. Amaa ka o saam da pʋd o ye Benjamin.#35:18 Benjamin gbin anɛ “M datiuŋ biig.” 19Ka Rakɛl kpi ka ba mum o suor linɛ ken Efirata teŋin kpikpɛŋ, ani ka ba buon Betilehem nannanna la. 20Ka Jakob nɔk kugiri ba'a zi'el sappi o yaʋg zug, ka li nan kpɛm bɛ zina pa'an Rakɛl yaʋg la zin'ig. 21Ka Israel lɛn keŋ bi'ela paae Migdaleda teŋin zin'in.

Jakob biis yɛla

(1Yɛ 2:1-2)

22Israel n da bɛ teŋ kan la, ka Reuben digin nɛ o saam pu'abil Biliha ka Israel wʋmi li yɛla.

Jakob da mɔr biribis pii nɛ ayi': 23Lea biis da anɛ Reuben onɛ da an Jakob bikpɛɛm nɛ Simeon nɛ Levi nɛ Juda nɛ Isaka nɛ Zebulun.

24Rakɛl biis mɛ da anɛ Josef nɛ Benjamin.

25Rakɛl tʋmtʋm pu'ak Biliha biis da anɛ Dan nɛ Naftali.

26Lea tʋmtʋm pu'ak Zilipa biis da anɛ Gad nɛ Aser.

Bama da an Jakob bibanɛ ka o du'a Padanaram teŋin.

Isaak kum yɛla

27Ka Jakob kuli o saam Isaak san'an Mamir linɛ kpi'e nɛ Kiriaf Ariba teŋin linɛ an Hebron, zin'ikanɛ ka Abraham nɛ Isaak da zin' la. 28Isaak da mɔr yʋma kɔbiga nɛ pisnii (180). 29O da kʋdigi paae o bɛn ka kpi, ka o biis Esau nɛ Jakob da mum o.

Currently Selected:

Pin'ilʋg 35: kus_gh

Highlight

Copy