Pin'ilʋg 28

Jakob n yii keŋ o ken la yɛla

1Ka Isaak buol Jakob ka kaanb, kaanb sʋŋʋ tis o ka sa'al o ye, “Da di pu'a yi Keenan buudi la nii. 2Mɛ Laban anɛ fʋ ansiba? Kem Padanaram fʋ ma saam Betuel san'an n di pu'a yi Laban biisin la. 3Wina'am Onɛ Galis la na niŋi fʋ zug bareka ka kɛ ka fʋ du'am nɔbig ka fʋ yaas na ti an buudi bɛdegʋ. 4O na niŋ fʋn nɛ fʋ yaas zug albareka wʋʋ on da niŋi fʋ yaab Abraham zug si'em la. Ala ka fʋ na sʋ'oe teŋ kanɛ ka fʋ an saanne li pʋʋgin la, teŋ kanɛ ka Wina'am zaŋi tis Abraham la.”

5Ka Isaak kɛ ka Jakob keŋ Padanaram paae Laban onɛ saamme an Betuel ka o an Aram teŋ nid, ka o taʋn an Rebɛka onɛ an Jakob nɛ Esau ma la san'an. 6Esau da wʋm ye Isaak niŋ Jakob zug albareka ka kɛ ka o keŋ Padanaram teŋin ye o di pu'a, ka mɛ wʋm ye o yɛl o ye, “Mit ka fʋ di pu'a Keenan dimin la,” 7ka Jakob sid siak o saam nɛ o ma nɔɔr ka keŋ Padanaram teŋin la, 8Esau yʋ'ʋn da baŋ ye o saam sʋnf pʋ malis nɛ on di Keenan dim pu'ab la. 9Alazug, o da duoe keŋ Isimael onɛ an Abraham biig la san'an dii o bipuŋ Mahalaf onɛ taʋn da an Nebaiof la paas pu'a banɛ ka o pʋn dɛŋi di sa la.

Jakob n zaansim Betel teŋin la yɛla

10Jakob n da yi Beerseba wa'ae Haran teŋin la, 11o da paae zin'isi'a ka winnig li, ka o zin'inɛ anina. O da nɔk kugir linɛ bɛɛ anina la yinne digil ka kʋk o zug. 12O da zaansim nyɛ dadʋg ka li ti' dunia ni keŋ ba'al arezana ni, ka Wina'am maliaknam dɔlisidi lii dʋt ka sigid. 13Anina ka Zugsɔb la zi'enɛ o baba ka yɛl ye, “Manɛ an Zugsɔb onɛ aan fʋ yaab Abraham Wina'am, nɛ Isaak Wina'am la. M na zaŋ teŋ kanɛ ka fʋ dig la tis fʋn nɛ fʋ yaas. 14Fʋ yaas na zu'oe nwɛnɛ titanbin'isʋg nɛ, ka fʋ sʋ'ʋlim na yaligi keŋ ya-tuona, nɛ ya-nya'aŋ, la'an nɛ datiuŋ nɛ dagɔbʋg wʋsa. Ka fʋn nɛ fʋ yaas la zug ka dunia nidib wʋsa na nyɛ bareka. 15M na bɛ nɛf ka gurif fʋn keŋ zin'isi'a wʋsa, ka na mɔri fʋ lɛb teŋ kaŋa ni na. M kʋ basi fɔɔ, asɛɛ m ti maal man pɔɔ zi'el si'em la wʋsa.” 16Jakob da nie gbɛɛmin ka ye, “Sida, Zugsɔb la sid bɛ kpɛla ka mam pʋ baŋɛ.” 17Dabiem da mɔr o nɛ, ka o yɛl ye, “Zin'ikaŋa anɛ dabiem zin'ig! Li anɛ Wina'am Yir, ka lɛn an arezana za'anɔɔr.” 18Bɛogʋ da bɔɔd nier la, ka Jakob nɔk kugkanɛ ka o sa kʋk la ba'a zi'el sappi nwɛnɛ zan'antɔlig nɛ, ka nɔk kpaam kpa'ae niŋi li zug. 19O da pʋd zin'ig la yʋ'ʋr Betel. #28:19 Betel gbin anɛ Wina'am Yir. Amaa teŋ la yʋ'ʋr da dɛŋi buon ye Luz. 20Ani ka Jakob zi'el nɔkaŋa ye, “Wina'am ya'a bɛ nɛ m ka gurimi m ken nwa' pʋʋgin, ka tisim diib nɛ fuud, 21ka lɛm mɔrim laafi lɛbi m saam yir, Zugsɔb la sid na aan m Wina'am. 22Kugkanɛ ka m ba' zi'el nwɛnɛ zan'antɔlig nwa' na lieb Wina'am pʋ'ʋsʋg zin'ig, ka on tisim si'el wʋsa, m na pʋdig piiga ka tis o yinne.”

Currently Selected:

Pin'ilʋg 28: kus_gh

Highlight

Copy