Pin'ilʋg 27

Isaak niŋ albareka niŋ Jakob

1Isaak da kʋdignɛ ka o nini pʋ lɛn nyɛt sʋ'ʋŋaa. O da buol o bikpɛɛm Esau ka yɛl o ye, “M biiga!” Ka o lɛbis ye, “Naa, manɛ nwa'!” 2Ka Isaak ye, “M kʋdigya ka mɛ zi' daakan ka m na kpii. 3Duom nɔki fʋ tɔn'ɔsʋg la'ad dinɛ an tiraug nɛ piema la, kpɛn' sian'arin kʋ bʋnkɔnbʋg na 4maal dikanɛ malis ka m nɔŋ la tisim ka m di, ka kaanb albareka tisif ka nyaan kpi.”

5Rebɛka da kɛlisidnɛ Isaak n pian'adi tisid o biig Esau la. Esau da yii kpɛn' sian'arin ye o kʋ bʋnkɔnbʋgʋ lɛb na la, 6ka Rebɛka yɛl o biig Jakob ye, “Gɔsima, m wʋm ka fʋ saam yɛli fʋ bier Esau 7ye o kem sian'arinɛ kʋ bʋnkɔnbʋg na maal dikanɛ malisi tis o, ka o di ka niŋ o zug albareka Zugsɔb la tuon ka nyaan kpi. 8Tɔ', m biiga, wʋm sʋ'ʋŋa ka maal mam ye m yɛlif si'el la. 9Yim keŋ kɔnbidin la gaŋ bʋpaalis ayi' mɔr na ka m maal dimalisiŋ nwɛnɛ on bɔɔd si'em la 10mɔri keŋi tis o, ka o di ka kaanb albareka la tisif ka nyaan kpi.” 11Ka Jakob yɛl o ma Rebɛka ye, “Amaa m bier Esau anɛ dau kanɛ mɔr kɔnbilʋg ka mam pʋ mɔra. 12Ka m saam ya'a si'isim ka baŋ ye li anɛ manɛ, li kʋ nwɛnɛ m bɔɔd ye m pan'as o nɛɛ? Ka li ya'a niŋ ala, o na pɔ nɔɔri niŋim ka ka' albareka.” 13Ka o ma la yɛl o ye, “M biiga kɛl ka kaanb bɛ'ɛd la dɔl mam. Tʋm mam yɛl si'em la; kem mɔri ba na tisim.” 14Ka o keŋ gban'e ba na tis o. Ka o maal dikanɛ malis wʋʋ o saam la bɔɔd si'em la. 15Ka Esau onɛ an bikpɛɛm la fusʋŋ da bɛɛ o ma la dɔɔgin, ka o nɔki li na yɛɛl Jakob onɛ an o bipit la, 16ka lɛn nɔk bʋʋs la gbana ligil o nu'us nɛ o niŋgɔɔnr zin'ikanɛ ka' kɔnbilʋg la. 17Ka yʋ'ʋn nɔk dimalisiŋ nɛ bodobodo la tis Jakob.

18Ka o mɔri kpɛn' o saam la san'an ka pʋ'ʋs o ye, “Sɔnsiga!” Ka o siak ye, “Nambaa, m biiga. Fʋ aan anɔ'ɔnɛ?” 19Ka Jakob lɛbis o saam ye, “Manɛ fʋ bikpɛɛm Esau. M maal fʋn yɛlim si'em la. Duom di, ka kaanb albareka niŋim zug.” 20Ka Isaak bu'os o biig la ye, “Fʋ niŋ wala paami li tɔ'ɔtɔ ala m biiga?” Ka o lɛbis ye, “Zugsɔb Wina'am la sʋŋim.” 21Ka Isaak yɛl Jakob ye, “M biiga, li'elim na ka m si'isi fʋ gɔs ka baŋ ye fʋ sid anɛ Esau bɛɛ ka' Esau.” 22Ka Jakob li'el na ka o saam si'is o ka yɛl ye, “Kʋkɔr la anɛ Jakob kʋkɔr, amaa nu'us la anɛ Esau nu'us.” 23Ka o nu'usi da mɔr kɔnbilʋg wʋʋ o bier Esau la zug ka o da pʋ baŋ o. Ka o kaanb yɛlsʋmmi tis o.

24Ka o bu'os ye, “Ka fʋ sid anɛ m biig Esau?” Ka o lɛbis ye, “Ɛɛn!” 25Ka o yɛl ye, “M biiga, mɔr diib la na ka m di ka niŋi fʋ zug albareka.” Ka Jakob mɔr diib la keŋ tis o ka o di, ka o tis o daam ka o nu. 26Ka o saam Isaak yɛl o ye, “M biiga kem na kuakim.” 27Ka o kena kuak o. Ka Isaak n wʋm o fuud la nyuug la, o da niŋ o zug albareka ka yɛl ye,

“M biig la nyuug nwɛnɛ pɔkanɛ

ka Zugsɔb niŋi li bareka nɛ.

28Dinzugɔ Wina'am na kɛ ka mɛligim lii fʋ pɔɔdin,

ka kɛ ka fʋ pɔɔd mɔr kʋ'ʋlʋm pamm,

ka fʋ zʋʋd nɛ daam maal bɛdegʋ.

29Tɛɛns wʋsa nidib na tʋm tisif.

Ba na igini fʋ tuonnɛ na'asif.

Fʋ na an zugdaan fʋ ba'abiis wʋsa tuon

ka fʋ mabiis na igini fʋ tuon.

Onɛ pɔ bɛ'ɛd wʋsa tisif, bɛ'ɛd na dɔl o.

Ka onɛ niŋi fʋ zug bareka, albareka na dɔl o.”

30Isaak n da niŋ Jakob zug albareka naae ka o duoe yi la, li da pʋ yuugɛ ka o bier Esau mɛ yi tɔn'ɔsʋgʋ paae na. 31Ka mɛ maal dikanɛ malisi mɔri kena tis o saam la. Ka yɛl o ye, “M ba', duom di diib la, ka niŋim zug bareka!” 32Ka o saam Isaak bu'os o ye, “Fʋ aan anɔ'ɔnɛ?” Ka o lɛbis ye, “M anɛ Esau fʋ bikpɛɛm la.” 33Ka Isaak kirid gba-gba-gba ka yɛl ye, “Ka anɔ'ɔnɛ la tɔn'ɔsi kena maal diib na tisim la? M di'e di ka niŋ o zug bareka ka fʋ mɛ nan kpɛn kpɛn'ɛd na la. O mɛ sid na nyɛ albareka.” 34Esau da wʋm o saamme yɛl si'em la, o da tans nɛ agɔla nɛ sʋnpɛɛnni kaas ka yɛl o saam la ye, “M saama! Niŋim albareka niŋ mam mɛn!” 35Amaa o lɛbis ye, “Fʋ pitʋ la kennɛ na pan'asim ka di'e fʋ albareka la.” 36Ka Esau yɛl ye, “Ya'a an sida, bi'esʋg kae ka ba pʋd o yʋ'ʋr ye Jakob ka li gbin an ‘Zam sɔb la!’ Nɔɔra ayi' nwa' ka o zam mam. O da faanm kpɛuŋ faar ka nannanna ka o lɛn faaɛn m albareka!” Ka o bu'os o saam la ye, “Fʋ pʋ kɛ albareka baa bi'ela digil mam mɛnɛ?” 37Ka Isaak lɛbis o ye, “M kɛnɛ ka o aan fʋ zugdaan ka kɛ ka o ba'abiis wʋsa aan o yammis, ka o na mɔr zʋʋd nɛ daam wʋsa. M biiga, bɔ ka m ye m lɛm maali tisi fɔ?” 38Ka Esau lɛn yɛl o ye, “M ba', fʋn mɔri albareka yinne ma'aanɛ? Aba, kʋdim niŋim man zug bareka mɛn; m ba'!” Ka o kaas bɛdegʋ. 39Ka o saam Isaak yɛl o ye,

“Fʋ bɛllim zin'ig na lal nɛ pɔɔd banɛ mɔr kʋ'ʋlʋm,

ka mɛligim pʋn kʋ luu anina.

40Fʋ na mɔr sʋ'ʋgʋ zabid

ka na an onɛ tʋmmi tisid Jakob.

Amaa saŋa kenna ka fʋ kʋ lɛn siaki aan o yammʋgɔ

ka na sʋ'oe fʋ mɛŋ.”

41Ka Esau kisig Jakob, ka li anɛ o saamme daa niŋ albareka si'a niŋ o la zug. O da tɛn'ɛs o sʋʋnrin sa ye, “M saam ya'a kpi ka ti maal o kʋʋri naae m na kʋʋ m pitʋ Jakob!” 42Rebɛka da wʋm linɛ ka Esau yɛl la, ka o buol o bipit Jakob la na yɛl o ye, “Fʋ bier gban'anɛ ye o kʋʋf. 43Dinzugɔ m biiga, maalim man ye m yɛlif si'em nwa', duom zɔɔ keŋi m taʋn Laban san'an Haran teŋin. 44Bɛɛ anina ti paae saŋkanɛ ka fʋ bier la sʋnf na ma'ae. 45Fʋ bier ya'a ti tam fʋn tʋm si'em tis o la ka o sʋnf ma'ae, m na tʋm yɛlif ka fʋ kul na. Ya wʋsa ya'a kpi daar yinne, li nyɔɔd an bɔ?” 46Ka Rebɛka yɛl Isaak ye, “M ya'am yinɛ Hitti dim biis banɛ ka Esau di la. Jakob mɛ ya'a lɛn di pu'ab buud kaŋa ni, m ya'a kpi sɔn'oe!”

Currently Selected:

Pin'ilʋg 27: kus_gh

Highlight

Copy