Pin'ilʋg 26

Isaak nɛ Abimelek yɛla

1Kɔ'ɔm da lu teŋin la nwɛnɛ kɔ'ɔm kanɛ da lu Abraham saŋa la nɛ, ka Isaak keŋ Na'ab Abimelek onɛ an Filistia dim Na'ab ka bɛ Gera teŋin la san'an. 2Ka Zugsɔb yɛl o ye, “Da keŋ Egipt teŋinɛ, bɛ teŋ kan ka m yɛl ye fʋ bɛ la. 3Bɛ kpɛla bi'ela ka m na bɛ nɛf ka niŋif bareka. Fʋn nɛ fʋ yaas ka m na nɔk tɛɛns nwa' wʋsa tis, ka mam da kaanb si'em tis Abraham la na nan kpɛn zi'e ala. 4M na kɛ ka fʋ yaas zu'oe wʋʋ nwadbibisi an si'em bɛ saŋgbana ni la, ka m na tisi ba teŋ la wʋsa. Fʋ yaas ma'asim zug ka dunia nwa' tɛɛns wʋsa na nyɛ bareka. 5Dina wʋsa na niŋ ka di anɛ Abraham siak m nɔɔr ka dɔlli m zi'ela nɛ m nɔɔr yɛlʋg nɛ m pa'ala la.”

6Ka Isaak nan kpɛn zin' Gera teŋin. 7Ka teŋ la dap bu'os o pu'a la yɛla ka o ye, “O anɛ m taʋn,” bɔzugɔ o da zɔtnɛ dabiem nɛ on na yɛl ye, “O anɛ m pu'a.” O da tɛn'ɛs ye dap la na kʋʋ o Rebɛka zug, bɔzugɔ Rebɛka vɛnlnɛ hali. 8Isaak n da bɛ teŋ la nii yuug la, Na'ab Abimelek onɛ an Filistia dim na'ab la gɔs nɛ takoro ni ka nyɛ ka Isaak di'emid nɛ Rebɛka. 9Ka Na'ab la buol Isaak ka yɛl o ye, “O anɛ fʋ pu'a, ka bɔzug ka fʋ ye o anɛ fʋ taʋn?” Ka Isaak lɛbis ye, “M tɛn'ɛs ye m ya'a yɛl ye o anɛ m pu'a, ba na kʋʋmi o zug.” 10Ka Abimelek bu'os o ye, “Tʋʋm bɔɔ nwa' ka fʋ tʋm tisi ti nwa'? Dap la yinne tun'e digin nɛ fʋ pu'a la ka li pa'al ye fʋnɛ mɔr taal na tisi ti.” 11Ka o tis nidib la wʋsa nɔɔr ye, “On wʋsa namis dau kaŋa bɛɛ o pu'a la, m na kɛ ka ba kʋʋ o.”

12Ka Isaak kua teŋin la yʋʋm kan la m bun nɔɔr kɔbiga bɔzugɔ Zugsɔb da niŋ o bareka. 13Ka o paam arezak bɛdegʋ ka o arezak la nɔbig hali ka o ti lieb bʋndaan. 14O da mɔr kɔnbid nɛ niigi nɛ yammis hali bɛdegʋ, ka lizug ka Filistia dim la yʋ'ʋn mɔr fufum. 15Ka bulis ban wʋsa ka o saam Abraham yammis la da tu la, Filistia dim la pin' ba nɛ titan.

16Ka Na'ab Abimelek yɛl Isaak ye, “Duom tɔɔm ka basi ti, ka fʋ paŋ yʋ'ʋn gati ti nɛ.” 17Ka Isaak duoe laligi keŋ zin' Gera bɔn'ɔgin. 18Ka Isaak gaae bulbanɛ ka ba da tu o saam Abraham saŋa ka Filistia dim la pin' ba o kum nya'aŋ la. O da tis bulis la yʋ'ʋbanɛ ka o saam Abraham da pʋn buonnɛ ba la. 19Isaak yammis la da tu bulsi'a bɔn'ɔgin nyɛ ku'oma'asig. 20Ka Gera na'akemnib zab nɛ Isaak na'akemnib ka yɛl ye ku'om la anɛ bam bʋn, ka o pʋd bulig la ye Esek,#26:20 Ezek gbin anɛ zaba. ka li anɛ ban da zab nɛ o la zug. 21Ka ba tu bulig yinne ya'as ka ba zab nɛ ba ya'as, ka o pʋd o li ye Sitna.#26:21 Sitna gbin anɛ nɔŋgbannwa'ar. 22Ka o lɛn keŋ tuonnɛ tu bulig ka sɔ' pʋ lɛn zabi li zugɔ, ka o pʋd bulkan ye Rehobof;#26:22 Rehobof gbin anɛ yaligir. ka yɛl ye, “Nannanna Zugsɔb yalig paalʋ tisi ti, ka ti na an sʋm ka keŋ tuon teŋ kaŋa pʋʋgin.” 23Ka o yi anina keŋ Beerseba.

24Yʋ'ʋŋ kan ka Zugsɔb nie o mɛŋi tis o ka yɛl ye, “Manɛ aan fʋ saam Abraham Wina'am la. Da zɔt dabiem ka m bɛ nɛf. M na niŋi fʋ zug bareka ka fʋ yaas na nɔbig ka li anɛ m tʋmtʋm Abraham zug.” 25Ka Isaak mɛ' maan bimbim anina ka buol Zugsɔb la yʋ'ʋri pʋ'ʋsid o. Anina ka o kpa' o Fuug Sʋgʋr ka o yammis tu bulig. 26Ka Na'ab Abimelek yi Gera kɛɛn o san'an na, ka dɔl o na'ayikpɛɛm onɛ yʋ'ʋri buon Ahuzaf nɛ o soogia kpɛɛm Fikol. 27Ka Isaak bu'osi ba ye, “Bɔ ka ya kennɛ m san'an na? Ka' yanamɛ kisigim ka kadimi yisi ya teŋin la?” 28Ka ba lɛbis ye, “Asida ti baŋ ye Zugsɔb la bɛ nɛf. Alazug ka ti bɔɔd ye tinam nɛ fʋn maal nɔɔr yinne. Kɛl ka tinam nɛ fʋ naal nɔnaar 29ka lin anɛ ye fʋ kʋ maali ti bɛ'ɛdɛ nwɛnɛ tinamɛ daa pʋ maalif bɛ'ɛd si'em la asɛɛ sʋ'ʋm ma'aa, ka ye fʋ yim nɛ sumbʋgʋsʋm la. Ti mi' ye Zugsɔb la sid niŋif bareka nannanna.” 30Ka Isaak nyaan maal diib nɛ bʋnnuuda tisi ba ka ba di ka nu. 31Ka bɛog nie ka ba kaanbi zi'el taaba. Ka Isaak zi'eli ba suor ka ba kul ka o kpɛlim nɛ sumbʋgʋsʋm. 32Daakan la ka Isaak yammis kena yɛl o ye, “Bulig la ka ti tuud la, ti paae ku'om.” 33Ka o pʋd bulig la yʋ'ʋr ye Siiba.#26:33 Li gbin anɛ kaanbʋg. Lin yi saŋkan sa paae zina tempʋʋg la yʋ'ʋr anɛ Beerseba.

34Esau da paae yʋʋm pisnaasi la, o da di Judif onɛ an Beeri biig; ka lɛn di Basemaf onɛ an Elon biig, ka ba saamnam wʋsa an Hitti buudi. 35Pu'a bama da san'am Isaak nɛ Rebɛka sʋnf hali.

Currently Selected:

Pin'ilʋg 26: kus_gh

Highlight

Copy