Pin'ilʋg 25

Abraham kum yɛla

(1Yɛ 1:32-33)

1Abraham da lɛn di pu'a ka o yʋ'ʋr buon Ketura. 2Ketura da du'a Zimran nɛ Joksan nɛ Medan nɛ Midian nɛ Isibak nɛ Sua. 3Joksan da du'a biis ayi' ka ba yʋda buon Seeba nɛ Dedan. Ka Dedan biis an Asiria dim nɛ Letusii dim nɛ Leum dim. 4Midian biis da anɛ Efa nɛ Efer nɛ Hanok nɛ Abida nɛ Eldaa. Bama wʋsa da anɛ Ketura yaas. 5Ka Abraham nɔk o mɔrim wʋsa digil ye li an Isaak faar, 6amaa on da nam vʋe la o da yis arezak la sieba tis o pu'abibis la biis ka kɛ ka ba yi Isaak san'anɛ lɛb tembanɛ bɛ ya-nya'aŋ la. 7Abraham da vʋe paae yʋma kɔbiga nɛ pisyɔpɔi nɛ anu (175). 8Abraham da kʋdignɛ hali paae o yʋma bɛn ka nyaan kpii paae o yaanam. 9Ka o biis, Isaak nɛ Isimael, mum o Makipiela tampinlɛuŋ linɛ bɛ Efiron pɔɔgin la. Efiron mɛ da anɛ Zohar biig ka an Hitti dim buudi. Pɔɔg la da kpi'enɛ Mamir teŋin. 10Pɔkan ka Abraham da da' yi Hitti dim ni la. Anina ka ba da mum Abraham nɛ o pu'a Sara. 11Abraham kum nya'aŋ la Wina'am da niŋ Isaak zug bareka, ka o zin'inɛ kpi'enɛ Berlahairoi buligin la.

Abraham yaas yɛla

(1Yɛ 1:28-31)

12Nwa' pa'an Abraham biig Isimael yaas yɛla: Sara yammʋg Haga onɛ da an Egipt nid la da du'a Isimael n tis Abraham. 13Isimael biis la yʋda nwana: Nebaiof ka Isimael du'a yiiga, ka onɛ tia'al la an Kedar nɛ Adibiel nɛ Mibsam 14nɛ Misima nɛ Duma nɛ Masa 15nɛ Hadar nɛ Tema nɛ Jetur nɛ Nafis nɛ Kedema. 16Bama da an Isimael biis pii nɛ ayi' la, banɛ da aan ba buudi la tuongatib ka ba da zaŋi ba yʋda pʋd tɛɛns pii nɛ ayi' banɛ ka ba da mɛ' la. 17Ka Isimael da bɛɛ paae yʋma kɔbiga nɛ pistan' nɛ ayɔpɔi (137) ka nyaan kʋdigi paae o bɛn ka maal ka'alim. 18O yaas mɛ da zin'inɛ Havila nɛ Seur tɛɛns banɛ kpi'e Egipt titɔndig lɛbisid Asuor baba. Ba da lal nɛ ba du'adib la wʋsa.

19Nwa' pa'an Abraham biig Isaak yaas yɛla: Abraham da anɛ Isaak saam. 20Isaak da mɔri yʋʋm pisnaasi ka nyaan di Rebɛka. Rebɛka saam da anɛ Betuel, onɛ an Aram nid ka yi Padanaram sʋ'ʋlimin na; ka o taʋn an Laban onɛ an Aram buudi la. 21Ka Isaak da sɔs Zugsɔb n tis o pu'a la bɔzugɔ o da anɛ kʋndu'ar. Ka Zugsɔb gandigi o sɔsʋg, ka o pu'a Rebɛka nɔk liiba pʋʋg. 22Ka biis la mɔɔd nɛ taaba o pʋʋgin la ka o bu'os ye, “Bɔɔ nwa' maan mam?” Ka ba keŋ Zugsɔb la san'an ye ba baŋ yɛl la gbin. 23Ka Zugsɔb yɛl o ye,

“Buudi ayi' bɛɛ fʋ pʋʋgin la,

Nidiba ayi' ka fʋ ye fʋ du'a.

Fʋ ya'a du'a ba,

ba na pʋdig kɔn'ɔb-kɔn'ɔb.

Ka yinne la na mɔr paŋi gat o tiraan,

ka kpɛɛm la na lieb o pitʋ la tʋmtʋm.”

24O du'am da paae la, o da du'a liiba, 25ka onɛ yi yiiga na la mu'oe ka o niŋgbina wʋsa mɔr kɔnbilʋg nwɛnɛ kɔnbʋg gbauŋ nɛ, ka ba pʋd o yʋ'ʋr ye Esau. 26Ka onɛ dɔl la gban'e Esau nɔbkpansinkpan'ar. Ka ba pʋd o yʋ'ʋr ye Jakob. Saŋkan ka Rebɛka du'a liiba la, Isaak yʋma da anɛ pisyuobʋ.

27Ka biis la nɔbig ka Esau lieb tɔn'ɔsi gɔɔnd mɔɔgin tɔn'ɔsid nɛ nimmua. Ka Jakob mɛ an ninkanɛ an baanlimm, ka bɛ yin saŋa wʋsa. 28Ka Isaak da bɔɔd mɔɔgin ni'im pamm, ka li kɛ ka o nɔŋ Esau on kʋʋd ni'im na tisid o la zug, amaa ka Rebɛka mɛ nɔŋ Jakob.

29Daar yinne ka Jakob dʋgid o zɛɛnd ka Esau yii keŋ mɔɔgin tɔn'ɔsi lɛb na, ka o kɔ'ɔm zabid hali. 30Ka o yɛl Jakob ye, “Tɔ'ɔtɔ! Tisimi fʋ dikanɛ mu'oe wii nwa' la, ka m vibidnɛ!” (Linzug ka ba da lɛm buon o ye Edom la.) 31Ka Jakob lɛbis ye, “Asɛɛ ka fʋ siak ye din yi nannanna ken, fʋ kuosi fʋ kpɛuŋ faar la tisim.” 32Ka Esau lɛbis ye, “Gɔsima, m kpiidnɛ, ka kpɛuŋ faar la sʋm an bɔɔ tisi ma?” 33Ka Jakob yɛl o ye, “Asɛɛ fʋ pɔɔ zi'el yiiga.” Ka o sid pɔɔ zi'el ka kuosi o kpi'euŋ faar la tis Jakob. 34Ka Jakob tis o bodobodo nɛ zɛɛnd la. Ka o di ka nu ka duoe keŋ o ken. Esau niŋnɛ ala ka o ba' kae o kpi'euŋ faar la yɛla.

Currently Selected:

Pin'ilʋg 25: kus_gh

Highlight

Copy