Matius 24

Allahri Mem Ae kwerekanepne sembe Yesusti ambatsiogha

(Markus 13:1-13; Lukas 21:5-6)

1Yesus Allahri Mem Ae aramag anekoa lamba palamogpa, eldi yubu ka'ero neleplamek nimi tanekori elag yubu lelamekti, “Allahri Mem Ae sopso waelbaeka tani tiwalengkae,” seek.

2Wene seekpa, Yesusti sinag yubu ambarelamsiogti, “Tane wamlange ni a'undi iplom te? Nari a'unag yubu sikne agha ambatnuahin. Amik sum ae soroba tani nimiri ni kwerekto yamolobikpa, kirik pairo poa waelbaek kirik tani agha nhon babe nen sorobag sekamlul kom,” seog.

3Aneko wene seogti, Yesus Zaitun yimag aneko pina pukamogpa, el yubu ka'ero neleplamek nimiri, “Elap nunap mo yubu lebukap,” aro yaek. Yaekti Yesusag hailamekti, “Andi leplamne neneko etsum agha uro yabilulne sembe leplam? Apna an nen samoro yalapmen sum kekneba huropne agha lag taleba, nu el talameberi, ‘Wene wamap ko'o komobanualba, wene samoro yanual,’ aro el taukap?” aro haibaek.

4Wene aro haibaekpa, Yesusti sinag samoro ambarelamsiogti, “A'un haing whi uro wapmundi, ‘Nimiri orolenange nunag ambatsiikag,’ aro yae up tangkamlulom. 5Allahri samenag na wepto pogneogpa, na Kristus yahi. Aghana amik sum nimi maiknori orolena yubu lero yalamikti, ‘Allahri nan agha wepto pogneoba, na Kristus yan,’ aro yalamukang. Sindi orolenange lelamikne sembe nimi maiknori sik sembaukang aghana, a'undi sik sembahiseng kom. 6A'undi ka'elapmunba, nimiri mog so'o aneag babe, weag urop mog so'oag babe mal talamikne sembe lelamukang. Sindi yubu lelamika ka'elapmun tanena, yae up tangkapmundi, wanaag samsamoro log sembaheng kom. Mal talamikne ane sik uro yabilul aghana, wene wamap ko'o komobanep sum olog anam uro yabinep kom. 7Yubu sia leropne as nhonap nhonap aisa nenep tangto mal talamikpa, nubu mog so'o nhonap mog so'o nhonap nimi teng-tengne mal talamukang. Mal talamikpa, kwaneng yo maikno walelamleba, mog so'o tala-tala sa'uma pot-porolamlul. 8Undo uro yabilul aghana, ‘Wene komobanual,’ sembaheng kom. Allahri tam kareptop sum lag tanepne sembe sunumnana undo. Me anam mangap tan komag ilin alniro maghan telamnari, maghan sapto nubu tang-tang seklelamna tanena, ‘Me mangkanuan,’ sembanep. Ane saog uro, nari ambatsin yubu eneko ni sunsunum uro uro yabalamlenge abeneko pere a'undi, ‘Wene komoptop sum uro yabinual,’ aro alniro seneragnep.

9A'undi nanag neleplapmunne sembe ora nimiri a'un salelamsiikti, ‘Seklebaukang,’ aro ora nimiri saeag nembahukang. Ora nimiri saeag nenelamsiikti, ‘Tebaukang,’ aro a'un opsukang. Nari siag kekhaekto wamlom nimi sembe mog so'oag tala-tala wamik nimiri a'un sembe hausag senelamsukang. 10Sum eneko nanag neleptop inaag yabirop nimi maikno phukul ingiro malingeag palamukang. Sin mamun ora nimiri saeag nenero pan khelamsiikti, hausag senel dalamukang. 11Nimi maiknori lero yalamikti, ‘Na Allah yubu silimu tipto lelamna,’ aro orolenange ambarelamsiikpa, ka'elamik nimi maiknori orolena yubu nene sik sembaukang. 12Apna nimi maiknori irikna phiro ulamikne nubu tangto yabalamlenge sembe, nimi mamun o'ona senep tangtopne nimi maiknori wanaag kom talul. 13Undo ulamukang aghana, nimi etneri wana khapto ulamleri, komobalul tanena, Imagneri nimi eneko taluro wali nembalul. 14Komobanep sum eneko anam uro yabin komag, yubu walinge Imagneri mog so'oag nimi saelbamsilulne sembe ambarelamsin yubu eneko mog so'o tala-tala urop nimi sisa niag sabo tangto yabilul andarina, sikne el taukang. Mog so'o tala-tala wamik nimi sisa niag wali yubu sikne eneko ambatsiik taneogna, wene wamap ko'o komobanep sum eneko uro yabilul,” seog.

Yahudi nimi amik seklebaukangne sembe Yesusti ambatsiogha

(Markus 13:14-23; Lukas 21:20-24)

15Wene seogti, Yesusti nen ambarelamsiogti, “Allah yubu silimu tiptopne Daniel ponekori samenag lebogne toman agha malia nhon Allahri, ‘Song mali,’ senenne Allahri Mem Ae lomag wa'ina sekamleri, Mem Ae aneko mali nembalulne sembe anamag yubu ambatsiog. Mem Ae aneko mali nembaleba, Allahri karong aro laplobi agha pileba, nimiri babe laplobi agha pukang,” aro Yesusti ambatsiog.

(A'undi mome nene kemelamlom nimiri wali uro seneraglapmun tanena Yesusti, “Malia,” seogne nene, “Tam huropne sembe lebog,” aro wana hekahilul).

16Yesusti eldi yubu ka'ero neleptop nangag tipto ambarelamsiogti, “Malia aneko Allahri Mem Aeag wa'ina sekamle sum eneko mog so'o Yudea wamik nimi merero tognop tangto yimag pukang. 17Sum eneko nimi nhon eldi ae imaghag waelbamle nimi elem uro kulukaleri, ae lomag wamlea tomna koma elem-elem merero yimag pilul. 18Nimi aweag wamle nimi eldi ag nongag enektoba kwiripto piplea samoro tol pin koma merero yimag pilul.

19Undo uro yabalamle sum eneko sin memon wamsile kelaboap, me maum tinil tolamik kelaboap sin merero panne ikin sirikti, seklenne seklebaukang. 20-21Ko'o neneag wamik nimi maiknoro seklebaukang. Undo uro yabalamleba, seklebaukang nena, samenag mog so'o sumbaog sumag agha nimi seklelameka kekman, wene babe seklelamang aghana, undo uro yabileba, ikin uro seklebaukangne sunsunum uro kom. Undo uro yabileba seklelamikpa, amik wamukang nimi babe seklebanep aghana, undo saog uro nen seklelamukang kom. Ot ko'o neneag wamik nimi agha undo seklebaukang. Ane sembe Allahag mololapmundi, ‘Nu elem uro panne eraruk wamleagti, mag telamle liag babe, Sabat sum babe uro yabilul kom,’ aro molona mololamlulom. 22Ikin seklebanep ko'o aneko tipto-tipto uro yaboho tanena, nimi ni tebanep. Aghana anam uro yabin komag sin Allahri wepsiog nimi sembe, ‘Seklebanep ko'o ane tipto-tipto uro yabileag,’ aro karebaog nena, amik seklebanep ko'o eneko peram talul. 23Sum eneko nimiri a'unag yubu ambarelamsindi, ‘Kembahut! Allahri wepto poghogne Kristus yaldi, ane wamla,’ senep. Nimi orangeri babe, ‘Ane wamla,’ senep. Undo yubu lelamseng tanena, a'undi sinag sik sembahiseng kom. 24Nimi maiknori lero yalamikti nenneri, ‘Na Allahri wepto pogneoba, na Kristus yan,’ aro orolena ambarelamsukang. Nenneri, ‘Na Allah yubu silimu tiptopneri lelamna,’ aro orolena ambarelamsukang. Orolena ambarelamsiikti, ‘Yaghe,’ senenne kekneba nubu sirik uro ulamukang. Undo unulamikne toman agha nimi maikno haing kunulamsukang. Haing kunuhiro orolena leropne nene nimi maiknori sik sembanep aghana, Allahri yog nimi, ‘Namabo taukang,’ aro wepsirop nimi babe wamikpa, kekneba ulamikne neneri Allahri wepsirop nimi taneko haing kumbahinep kom. 25Nari wene a'unag ambatsinne nene anam uro yabin komag ambatsin. Ane sembe kemero seneraglamlulom.

26Anamag ambatsin ane sembe, nimiri a'unag ambarelamsiikti, ‘Pai aldesag wamlaba, kemel pukap!’ seik tanena, lamba kemel peheng kom. Yog nimiri a'unag, ‘Ae lom eneag wamlaba, kemel yahut!’ seik tanena, yubu nene sik sembaheng kom. 27Na mog so'oag nimi tahinge amik samoro yalamne sum eneko uro yabilul nena, lepna yale siba imag tingo-tingoa imag warero poa palogloa khemban nimiri tiboghanep saog uro na samoro yalamne sum eneko lag talul. 28Nimi teptoba wamleag aneko polon terop winangdi poloro yingkina terop saog uro keknep talul,” seog.

Yesus eldamne nen mog so'oag yalulne sembe ambatsiogha

(Markus 13:24-27; Lukas 21:25-28)

29Yesusti nen tipto ambarelamsiogti, “Ikin seklelamik ko'o eneko uro yabileba, peket uro yabilul nena, Allah yubu samenag mome toro pibogne sunsunum uro uro yabilul. Samenag Allah yubu silimu tiptopne nhondi amik uro yabilulne sembe mome toro palilamogti,

‘Heng babe tingkale komba, wal babe tingkalul kom.

Imberea babe lulupna agha imag agha tinilamikpa,

imagnang mikipne babe lologahilul,’

aro mome toro pibog.#Yesaya 13:10; 34:4 30Undo uro yabilul sum eneko kekneba imag lag talul nena, na mog so'oag nimi tahinge elem uro samoro yanepne sembe el nenerop kekneba lag talul. Ibikti nimi sisa tala-tala mog so'oag wamang nimi agha niri engelamukang. Na mog so'oag nimi tahinge toa imag wamlenge nusam toman nen samoro yalamne sum eneko, Imagne ponekori mikipne pere agha imang wareroba nubu sirikne nanag wamleba, mog so'oag wamik nimiri na tiboghanukang.#Markus 13:26; Lukas 21:27; Lag Taogha 1:7

31Yaneri wa'en yubu lilim nubu uro ma'i saog uropne trompet pho aropne toman Allah arukna imagnang malaikat pogsinun. Poglamsineri, ‘Nari wepsirop nimi tala-tala wamang nimi ni poloro wimbahilulom,’ aro pogsineba, im so'o tiptoba tara siba tara sibag poloro wimbahukang,” aro Yesusti ambatsiog.

Kal araag sunumna tol pina ambatsiogha

(Markus 13:28-31; Lukas 21:29-33)

32Yesusti nen tipto yubu ambarelamsiogti, “Nari a'unag ‘Undo-undo uro yabilul,’ aro ambatsinne sembe sunumna nhon ambatsinun. Nu nimi taneri kal ara kemelamapba, kon eren ua ulamlari, mog towalengelamla tanena, ‘Ebare li tanual,’ senelamap. 33Ane saog uro, nari a'unag, ‘Undo-undo uro yabilul,’ aro ambatsinne ni sunsunum uro uro yabalamleba kemelapmundi, ‘Nen amik uro yabinepne peram tanual,’ senelamlulom. 34Yubu sikne agha a'unag ambarelamsin nena, nimi wene wamang nimi#24:34 Yunani yubuag mome toro pibogne kembi agha, seneragna phende lag tanep. Nimi nhondi, “ ‘Nimi wene wamang nimi anam teban komag uro yabilul,’ aro lebog,” sembanep. Nhonna, “ ‘Yahudi nimi ni orog tan komag uro yabilul,’ aro lebog,” sembanep. anam teban komag ni ambatsinne nene uro yabilul. 35Imap so'oap orog talul aghana, nari yubu leropne orog talul kom. Ya'ag wamlul,” seog.

“Nimi ekon wamikag lo'om aro yanun,” aro Yesusti ambatsiogha

(Markus 13:32-37; Lukas 17:26-30,34-36)

36Wene seogti, nen tipto ambarelamsiogti, “Nari a'unag, ‘Undo-undo uro yabilul,’ aro ambatsin yubu eneko, nimi nhondi babe hurop sumag, hurop ko'oag uro yabinepne sembe el uro wamla kom. Allah arukna imagnang malaikat babe, na Allah Elme babe ekon. Ot Nuni Allah eldamne el uro wamla. 37Na mog so'oag nimi tahinge nen samoro yane sum eneko, samenag Nuh poneko wamog ko'oag wamek nimiri ulamek saog uro sin amik wamukang nimiri babe ul palamukang. 38Nuh wamog ko'o eneko magti anam mog so'o nikniban koma wamogpa, nimiri Allah sembe semban koma kwaneng mag tenne aghabog seneraglamekti, kabuniri kelabo tol pang, kelabori kabuni tohin ulamek. Undo unulamek paghabog, Nuh poneko kabongag wa'iog. 39Sin unulamek nimi taneko magti nikniro opsinepne sembe ekon aghana, magti sin nhin opsiog. Ane saog uro sin amik nimiri Allah sembe semban koma ul palamikpa, na mog so'oag nimi tahinge nen samoro yanun. 40Yalamne sum eneko nengabo phende awe nhonag wamdik aghana, nimi nhon kom taleba, nimi nhon mo wamlul. 41Kelabo phende, ‘Kwaneng roti sumbaukap,’ aro gandum wana sikto kirikag agha urulamtik aghana, nhon kom taleba, nhon mo wamlul.

42A'un Saelba Uhiropne poneko yanep sum a'un ekon uro wapmunba yanun. Ane sembe haing whi uro tiboghamlulom. 43Lemnunne nene sembe a'un el uro wamlulom! Ae ngainge ponekori, ‘Haogha torop nimi ae aneag heng ko'o neneag wa'alaukang,’ sembahori yae wamnep tanena, haogha torop nimi nhon ae enekoag wa'alanep kom. 44Ane sembe a'un babe sop-sop yae wero wamlulom. Na mog so'oag nimi tahinge nen samoro yanunne nenekona, a'un ekon wapmunba, ‘Sum ela yalul,’ senen komag agha yanun,” seog.

Awe torop nimi sol malingeap sol walingeap sembe ambatsiogha

(Lukas 12:41-48)

45Yesusti nen yubu ambarelamsiogti, “Ae ngainge nhondi el arukna nhonag, ‘Nari aruksirop nimi nari ae lomag tolamang nimi ni taneko yae paiamsimendi, sop-sop kwaneng telamikne sunsunum uro tarelamsululam,’ aro arukna nhon saeag pimnep. Arukna aneko wana hektopne wamleri, ‘Sol wali uro awe tomnun,’ sembale tanena, eldi welaro uanep aro seneraglamsut. 46-47Ili poneko nen samoro yale sum eneko, el arukna anekori ili yubu sunsunum uro ul tongolamleba, yaleri iplul. Nari yubu sikne agha ambarelamsin nena, ipleri arukna anekoag, ‘Name walinge, nari saeag wamlange ni yae paia o'olamlulam,’ selul. El aruknari saeag pipleba, arukna aneko yeng uro wali wamlul. 48Aghana arukna aneko wana yonge wamnep tanena, eldi wanaag seneraglamnepti, ‘Nai elemag yalamla kom,’ sembanep. Ili yananne ko'o we talamnaba, 49eldi arukna, ‘Yae paiamsululam,’ aro sekiamog arukna anekori alniro elap nikag awe torop nimi taneko olamsinep. Olamsinepti awe tomna koma kwaneng aboap uro telamnepti, mag yonge maikno terop nimi yogneap ma'ap tangto mag telamnepba, mag yongeri nenek salerop nimi saog nenerop. 50Undo arukna anekori nimi oro mag yonge kwaneng tero ulamnepti, ‘Nai sumene heng ko'o neneag yalul kom,’ sembanep aghana, sum eneko ili poneko lo'om aro yalul. 51Undo wamleba, ili poneko yaleri, yo uro oloplul. Yo uro olopleri, ‘Nimi eneap sindam nimi, “Wali sembanukang,” aro lero urop nimiap nikag wamukang,’ aro yag lambaleba, nimi eneko si keleng tereba yo lelem engero wamlul,” aro Yesusti ambatsiog.

Currently Selected:

Matius 24: kklKOS

Highlight

Copy