Matius 23

Yesusti Musa yubu amohirop nangap, Farisi nimiap sembe wenehirop yubu ambatsiogha

(Markus 12:38-40; Lukas 11:37-52; 20:45-47)

1Nimi maikno longolamek nimiap, eldi yubu ka'ero neleptop nimiap tanekoag Yesusti yubu lelamogti, 2“Musari yubu amohirop nimiap, Farisi nimiap tanekona, Musa eldamneri puka lelamloa saog uro Musa yubu nimi amolamsiang. 3Ane sembe sindi Musa yubu ambarelamsiangne wali uro ka'elapmundi ulamlulom. Aghana sindi ora nimiag, ‘Undo unulamlulom,’ aro ambarelamsiangne sunsunum uro sindam nimiri ulamang kom ane sembe, sindi ulamangneag nelebahiseng kom. 4Sindi ora nimiag, ‘Unualulom,’ alamangne toman agha, nimiri sa'obanep komne ikinne nimiag sa'oro pobililamsiloa saog uro ulamang. Ikinne nimiag pobililamsiang aghana, sindi sae nhon nginikto, ‘Keyagman uropne olog yepto pabinun,’ semban koma ologha babe sin yeplamsiang kom.

5Sindi nia mangkina ulamang nena, ‘Nimiri na kembaneikti, wali sembanukang,’ aro ulamang. Sindi usoghag noptangka ulamangdi, ‘Nimiri imnukang,’ aro Musari yubu mome toro pairopne nubu nenero usoghag noba ulamang. Sindi ag wangaro siliplengka urop ag ingkisag wenge kereklengka, ‘Nimiri ibikti, wali sembanukang,’ aro ulamang.#23:5 Musa yubu amohirop nangap, Farisi nimiapti ulamek nena, Musari samenag, “Allah yubu ekon tamunag aro ulamlulom,” seogpa (Ulangan - Sariktoba 11:18; Bilangan - A'iliroba 15:37-39), sindi usoghag sunsunum uro noba ulamekti, eneklamek aghag babe wenge kereklengka ulamek. Aghana ulamekne toman agha sindi Allah yubu sembe wanaag seneragna koma, “Nimiri imnukang,” aro ulamekne sembe Yesusti sin wembahiog.

6Sin nimi tanekona, nimi haiptangto kwaneng yoro nikag terobag babe, Allah yubu lero winirop aeag babe wa'ina, ‘Nimi nubunang purobag aghabog pukamsene,’ aro pulamang. 7Sin nimi taneko nimi maiknori kamna kapto toro longorobag wa'alamangdi, ‘Wali sembanehengdi, na sembe, “Yubu amohinne nubunge,” aro na kipneheng,’ senelamang. 8Aghana a'undina, undo unulamseng kom. A'un sembe ot nhonog nubunge wamlaba, a'un ni a'unipsabo a'undo yabo tangtop nimi wamlom. Ane sembe nimirina a'un nhon sembe, ‘Yubu amohinne nubunge,’ aro a'un kipsiseng kom. 9Apna a'un sembe A'uni ot nhonog wamlange poneko imag wamla ane sembe, a'undi mog so'oag nimi nhon babe, ‘Nai,’ aro engero kiplamsiseng kom. 10Apna a'un sembe ot nhon el nenero amohinne poneko Kristus wamla. Ane sembe yog nimiri a'un kipto, ‘“Nu el nenero amohinne,” aro engero kiplamsukang,’ sembaheng kom. 11A'un anabiag nimi nubunge nhon wamlom pagha tanena, nimi ologne nimi arukna nenep taleri, yogne yepsilul. 12Nimi etneri eldamne paliag nenep tale tanena, nimi eneko mombolag talul. Nimi etneri eldamne mombolag nenep tale tanena, nimi eneko paliag talul,” aro Yesusti ambatsiog.

13Nen tipto yubu lelamogti, “A'un Musari yubu amohirop nangap, Farisi nimiap, ‘Wali sembanukang,’ aro lero urop nimi seklelamlulom! Mog so'oag nimi Imagne ponekori saelba ulamsil nimi tanep ina wamla aghana, ina aneko nimi whingag serekatsiloa saog uro ulamlom. A'undi ulamlom nena, a'un wa'ilanep ina aneko wa'in koma ulamlomdi, yog nimi babe iriklamsilomdi, ‘Wa'aukang kom,’ aro wa'ilanep ina aneko serekatsiloa saog uro ulamlom. Ane sembe a'un seklelamlulom.

[14A'un Musari yubu amohirop nangap, Farisi nimiap, ‘Wali sembanukang,’ aro lero urop nimi seklelamlulom! A'un aboapti kaldam kelabori ae babe, saeagha uropne babe taluro telamlom. Taluro telamlom aghana, a'undi malia uropne sembe, ‘Niknip tanun,’ aro Allahag molona we uro kiliro lelamlom. Unulamlomne nene sembe ni tam kemero karebalulne ponekori kemelamsildi, tam ikin sirikne a'unag pipsilul].

15A'un Musari yubu amohirop nangap, Farisi nimiap, ‘Wali sembanukang,’ aro lero urop nimi seklelamlulom! A'undi yubu ambatto tongolamsilomdi, ‘Nunag neleptop nimi nhon babe wana tobukap,’ aro mag nubu uro longorop mag kauro palamlomdi, mektop so'o toman we uro yabalamlomdi, yubu ambatto tongolamsilom. Ot a'undi wana malinge ambatto tongolamsilomne sembe Allahri a'un nimi teptoba urobag pelengero tobogahilul. Apna wana tolamsilom nimi a'unag neleptop nimi babe a'un wana malinge phelekto ulamangne sembe pelengero tobogahilul.

16A'un haing uamsil nimiri yog nimi poa yalamsilonga saog uro ulamlom nimi amik seklelamlulom! A'undi yubu ambarelamsilom nena, ‘Nimi nhondi salag palilamogne toman yubu mikip nenero, “Allahri Mem Ae enekoag yubu so'opto salag palilamna,” sele tanena, eldi salag paliro kauplenge neneko lopnep. Aghana nimi enekori, “Allahri Mem Ae lomag leng-leng aroba emas wamlange nenekoag yubu so'opto salag palilamna,” sele tanena, salag paliro kauplenge neneko lopnep kom,’ aro lelamlom. 17A'un haing urop nimi limituk nimi wamlom! Emas aneko mo wamla tanena, mem senep kom. Ot Allahri Mem Aeag pibekne toman agha emas aneko mem tanep. Undop pagha tanena, huropne agha nubu sirikne wamla aro seneraglamlulom. 18A'undi nen nhon yubu ambarelamsilom nena, ‘Nimi nhondi salag paliropne toman yubu mikip nenero, “Allah sembe pairop hao sin anekoag yubu so'opto salag palilamna,” sele tanena, eldi salag paliro kauplenge neneko lopnep. Aghana nimi enekori, “Allah sembe pairobag tatnepne nenekoag yubu so'opto salag palilamna,” sele tanena, salag paliro kauplenge neneko lopnep kom,’ aro lelamlom. 19A'un haing urop nimi saog wamlom! Huropne agha nubu sirikne wamla aro seneraglamlulom. Allah sembe tatnepne anam pimna komag, mem kom aghana, Allah sembe pairop hao sin mem wamla. Allah sembe pairop hao sin anekoag paliropne toman agha Allahag tatnepne neneko babe mem tanep. 20Ane sembe, nimi etneri Allah sembe pairop hao sin tanekoag yubu so'opto salag palilamla tanena, hao sin tanekoap nia mangkina hao sin paliag sip pimnepneap abenekoag yubu so'opto salag lelamla. 21Apna nimi etneri Allahri Mem Aeag yubu so'opto salag palilamla tanena, Mem Ae anekoap ae lomag ua ulamlange ponekoap abenekoag yubu so'opto salag lelamla. 22Apna nimi etneri im anikoag yubu so'opto salag palilamla tanena, imap so'oap saelba uhiropne Allah poneko puka uroba aneko babe, puka una alibag pukamlange poneko babe abenekoag yubu so'opto salag lelamla.

23A'un Musari yubu amohirop nangap, Farisi nimiap, ‘Wali sembanukang,’ aro lero urop nimi seklelamlulom! A'undi Allahag tarelamlom nena, ni kwaneng yona ologne babe a'undi saeag agha pogto palu sa'obare nenep tangka sa'onge Allah sembe wali palilamlom. Ot Allahri, ‘Ulamlulom,’ aro arukahiogne o'om yubu neneko, porog uro tam karebatsinepneap, yareag senehinneap, Allahag wana paliropneap uan koma lililamlom. Allah sembe saeri wali palilamlom aghana, ni o'om yubu lemnange neneko lia ulamlomne a'undi lia unuaheng kom, ane sembe seklebalulom. 24A'un haing urop nimiri yog nimi poa yalamsilonga saog nimi wamlom. A'undi, ‘Allah Yubu weplamap,’ aro ulamlom nena, nimiri tero, ‘Tenun,’ aro temna mag enekoag, ‘Ip nhon wamlange ma'aro teneag,’ aro mag weploa saog uro ulamlom. Aghana a'undi o'omne lia ulamlom nena, orangeag wepna koma pham unta ningki menaghaloa saog uro ulamlom.

25A'un Musari yubu amohirop nangap, Farisi nimiap, ‘Wali sembanukang,’ aro lero urop nimi seklelamlulom! Nimiri mag ma'i lomag sip kwaneng maghap inginag a'elban koma, ‘Nimiri ibukang,’ aro alibag sip a'elerop saog uro ulamlom. A'undi wanaag iriktan koma, ‘Topsene,’ senenneap aboabaap to'opto wamlaba ulamlom. 26An Farisinge haing uropne wamlam! Andi samenag mag ma'i lomag sip mag a'elbamen tanena, alibag sip babe sembenga orogha taleba, a'aleropne wamlul.

27A'un Musari yubu amohirop nangap, Farisi nimiap, ‘Wali sembanukang,’ aro lero urop nimi seklelamlulom! A'un wamlom nena, nimi teptoba so'o lomag siktop ae solom ae saog wamlom. Nimiri paiag siba kembi agha solom ae walinge sembanep aghana, ae lomag sip teptop nimi yo'o to'op tangkamlaba, Allah whingag pabinep kom sembenga ni to'opto wamla. 28Ane saog uro a'un konag sip kemehiropne toman agha ora nimiri a'un sembe, ‘Wana porog nimi wamang,’ sembanep. Aghana a'undi wanaag agha seneraglamlom nena, ‘Wali sembanukang,’ aro lero ulamlomneap, ‘Allahri iriksirop yubu phibahane,’ senenneap to'opto seneraglamlomdi ulamlom.

29A'un Musari yubu amohirop nangap, Farisi nimiap, ‘Wali sembanukang,’ aro lero urop nimi seklelamlulom! A'undi Allah yubu silimu tiptop nimi tebaek nimi sembe, ‘Kipsukap,’ aro sin teptoba so'o siktoba alibag ae solamlom. Samenag wana porog nimi tebaek nimi teptoba so'o siktoba babe wali kemerop nenelamlom. 30A'undi yubu lelamlomdi, ‘Nunisag yabo samenag wamek nimiri Allah yubu silimu tiplamek nimi olamsiekpa, eneng lanaro tebaek. Sin olamsiek sum eneko nu babe wamsebe tanena, nuri sinag nelepto opsisebe kom,’ alamlom. 31Wene alamlomne toman agha a'undam nimi sembe, ‘Allah yubu silimu tiplamek nang ya'ag opsiek nimiri likto pirop mabo wamap,’ aro lag nenero lelamlom. 32Wene a'unna, a'unisag yabori malia uroba sunsunup talulne a'undi babe tipto komobililamlulom.

33A'un yo urop nimi wamlomne nimi ohirop paghae mangaroba saog paghae wamlom! Allahri tam kemero karebi agha, a'un nimi teptoba urobag tobogahilulne a'unna welaro lambanep? 34Ane sembe nari a'unag poghol alamsin nimina, Allah yubu silimu tipto lelamik nimiap, wana hekahinep nimiap, yubu amohirop nimiap a'unag poghol alamsin. Sin poghol alamsin nimi agha nenne a'undi kalag sipto ya'ag opsululom. Nenne a'un Yahudi nimiri Allah yubu lero winirop aeag agha taeplam-taeplam lolamsimundi, as nhonag agha nhonag pina, ‘Saelbamsukap,’ aro sarekereplamsululom. 35Ane sembe Allahri a'unag tam pipsilul. Allahri mog so'o sumbaog sumag agha wana porog nimi olamsiekpa, eneng lanaro tebaekne sembe a'unag tam pipsilul. Adam elme Habel yum-yum samenag ya'ag obogneag agha, amik sum Berekhya elme Zakharia poneko Allahri Mem Ae aramag obekne babe, a'un wene wamlom nimiag Allahri a'unag, ‘Lumbanun,’ aro a'unag tam pipsilul. Zakharia poneko Allahri Mem Ae aramag wamog nena, Allah sembe pail pirobag anabi, Allahri Mem Ae anabiag wamogpa, a'un nimi tanekori ya'ag oplum.#2 Tawarikh - Ukuma 24:20-22 36Nari a'un yubu sikne agha ambarelamsin nena, sin ni olamsiekne a'un wene wamlom nimiag Allahri lumbahilul,” seog.

Yesusti as Yerusalem nimi sembe wana ikin uro lelamogha

(Lukas 13:34-35)

37Wene seogti, Yesusti nen tipto yubu lelamogti, “Yerusalem, Yerusalem. A'un Yerusalem nimiri Allah yubu silimu tiplamek nimi olamsilumdi, Allahri wepto poglamsiog nimi babe kirikti olamsilum. Ik sulu nari, ‘A'un paiamsisene,’ senelamsiri winang ayamdi eldi mabo winiro ol niknia urop saog uro, ‘As ene nimiri mabo ni paiamsisene,’ aro yoplamsisi aghana, a'undi karong aro kom alamlum. 38Ane sembe kembahut! A'undi sobalum ae anekoag Allah a'unap nhon ua ulamlul kom. 39Wene aro yubu lemnangena, a'un Yerusalem nimiri na wene anea nen imnululom kom. Ot na nen amik yane sum agha a'undi lelapmundi, ‘Nu Saelba Uhiropneri poglaba, el siag kekhaekto yalamlange poneko paliag uropne omeklamsut!’ aro lelapmun sum eneko agha imnululom,” aro Yesusti yubu lebog.#Sepna 118:26

Currently Selected:

Matius 23: kklKOS

Highlight

Copy