RUTHA 4
4
Boaz Rutha lyis Nyihwank
1Housoeh Boaz gas zop xamgoh joqyos wus khomh mas e tsung toh. Boaz gas nyang taiq dah boek sain los lyis, Boek phoq eh, heimha los tsung shih geh, ge. Hauh boek sain eq los tsung. 2Boaz wus nhaiqbos 10 yuk lyis eq khi tsung. Nyang nyamoq lyis heimha los bos tsung shih aq, ge lyis nyamoq los tsung. 3Hauh uhlyis Boaz boek sain lyis taiq, Moab mau masyah tauh los dah Naomi yah boek Elimelek dah maunyeis ungh, ge. 4Hai ngah nhaiqbos bang xikkhonh mas Elimelek dah danh wis aq oen joeui dyei mes. Ngos nvng lyis haih cho no phank chah oen yoh nghamh. Nvng ma wis das lyis eq ngos lyis gvshih jenh taiq aq. Nvng gas zes boek sain nghuot, ngos gas nah thang mas soeu nghuot.
Boek sain ka, Ngos khyuot das, ge.
5Boaz gas, Nvng Naomi loq mas maunyeis wis lyis Moab lonyi chauhmuh Rutha lyis eq shoeuh chah. Houka shei soeu dah maunyeis lyis zom das lo bos das xiklyis nghuot.
6Boek sain doms taiq zis gas, Ngos ma yoh khyuot das, ngah maunyeis dyuk loh das cho bos. Ngah lo sain gvshih ngos sain nyeis maunyeis ma yoh lo das. Nvng ngah gungsthaiq khyuot aq, ge.
7Hauh shishenh lyis Israel dius nyau jens gas dvyuk dah toeuh dvyuk lyis thuot dyei lyis thuot dyei soeu ka nyah thyvkoq dvsan lyis thuot dyei xauh soeu lyis khyuot dyei. Heisoeh delam kuot cho ka lyi bos cho nghuot.#Lyi 25.9
8Boek sain ka nyah thyvkoq dvsan khyuot las Boaz lyis dyei uhlyis, Nvng yah boek Elimelek dah maunyeis khyuot aq, ge. 9Hauh uhlyis Boaz gas nhaiqbos 10 yuk yahge wus khomh mas nyeis bang dvnganhmoq xikkhonh mas, Khvnyhik namoq xikkhonh mas Elimelek yahge nyah lotang Malon yahge Kilion dah maunyeis lyis Naomi dah loq masyah ngos khyuot goeus. 10Malon dah chauhmuh Moab lonyi Rutha lyis eq khvnyhik ngos shoeuh goeus. Houka shei soeu dah maunyeis zom das soeu bos das xiklyis yahge shei soeu dah nyings yah vnyau ma dyuk loh bas jungh. Namoq dvnganh gas khvnyhik kanghjyoeng nghuot goeus.#Lyi 25.5-6
11Houlhyi nhaiqbos 10 yuk yahge wus khomh mas nyeis bang dvnganh gas, Ngamoq kanghjyoeng nghuot. Mangso ka Rakhel yahge Lea Yakop lyis lo nyoshoq khoeu dyei dah shvmanh dyei yhangteh khvnyhik nah yhen mha wvng los dah vmesbih lyis eq shvmanh dyei bas jungh. Nvng gas Ephrat wus mas kuhxing teh Betlehem mas eq nyings hoeuh nyeis bas jungh.#Vpm 29.31 12Mangso ka haih vmesbih lyis Yuda yahge Tarmar dah loloeu, yah phauh thyeih Pere teh soeu khoeu los nhang bas jungh, ge.#Vpm 38.27-30
Boaz, Nyah Vnyau Vshih
13Housoeh Boaz gas Rutha lyis nyihwank yoeus las nyah yhen mha shwih nyeis. Ma nyangh lyis Mangso ka Rutha lyis Boaz xiklyis loloeu dvyuk khoeu los nhang. 14Wukhau mha vmesbih jens Naomi lyis, Mangso lhyi chungh aq. Khvnyhik Nyang nah xiklyis loloeu dyei goeus. Nyah nyings gas Israel dvmau gonh hoeuh nyeis das zis nghuot. 15Haih loshang ka nah lonyi yoq lyis doms tauh los nhang bas jungh. Nvng nyenhkyi bos los lyis haih loshang nvng lyis nyhoeu bas jungh. Khasoeh ge lyis haih loshang ka nvng lyis jyet las loloeu nyhet yuk thoq lyis zes dah nah doeusmuh khoeu kat, tsain ge. 16Naomi gas hauh loshang lyis nyang khoeu kat nyah sainhkhonh mas lo teh vlhomuh yoeuh dyangh kat.
17Yhenkyoh vmesbih jens, Naomi loloeu yoh goeus, ge hauh loshang lyis Obed ge nyhink.
Obed gas Yese dah uwus, Yese gas Dawi dah uwus nghuot.
18Haih zis gas Pere dah diuscaiq shap gyoh cho nghuot. Pere lo Hezron, 19Herzron lo Ram, Ram lo Aminadab, 20Aminadab lo Nashon, Nashon lo Salmon, 21Salmon lo Boaz, Boaz lo Obed, 22Obed lo Yese, Yese lo Dawi nghuot.
Currently Selected:
RUTHA 4: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.