Mark 16

Jesu na wag tɨ ngalɨm

Mat 28.1-8; Luk 24.1-12; Ja̰ 20.1-10

1Gorne ɗa̰y tɨ saaw bɛ ɗira gɨna, Mari tɨ Magdala la, Jak na na̰ tɨ Mari la, Salome la, a huna itɨr ne uun ndinimani tɨ saal ɗɨga tɨ Jesu ulu sul. 2Na aad na gaan cɔg, a si tɨ ngalɨm sul bari lula mu wag ɗang. 3Tɨ ul sul a ɓiri peer ja kuna ne: «Jaa jo ɓə gɨ ī kura ne wo ngalɨm mu ɓɨrgɨ a?» 4Gorne a uma a ji gɨna, a ləg kura ti tɨ ɓɨrgɨ teni. Lɛ kura ne tɨ kura tambra ɗəng. 5A wur tɨ ngalɨm hul la a ləg wo kɔr paa wur ngɔmi ɓɔr kar-kar ti tɨ lɨma sul la ayri ka a nari. 6Lɛ ər ja gɨ a: «I ka ayri kar lo, kəysul ən una ɓə yḭ taam Jesu, wo tɨ Najarɛt, yḭr ne a ɗɨb ər tɨ tɨla tərgɨ sul. Ər wag tɨ bi tɨ ulu daan. Ər wo le lo. Yḭ ləg un ne a ɗo na ər, 7lɛ i si, i ja gɨ ər bi tɨ wa̰y edɨ la Piyɛr la. Ər wo saal tɨ i kwi toni tɨ Galile. Tɨ un ne jo yḭ ɓə ər ləg tɨ nin kuna ər ja gɨ i toni.» 8Gorne a laa jaa ne gɨna, a wag a yey a si ɓag na ngalɨm sul, kəysul ayri ka a la, a ndula kɔbgɨ tɨ nga̰n-nga̰n. La a ja gɨ wo in ja ɓudu lo, kəysul ayri ka a nari.

Jesu ɓla ər ndula gɨ ər bi tɨ wa̰y edɨ

9Jesu wag tɨ bi tɨ ulu daan na aad na gaan cɔg, ər ɓla ər ndula gɨ Mari tɨ Magdala toni bari, tɨ yḭr jo ər kun jinsə kili tɨ ər sul. 10Gorne Mari ləg ər gɨna, ər si ər ja gɨ ər bi tɨ wa̰y edɨ ne a ti na jindemni la cḛy la. 11Lɛ gorne a laa ɓə Jesu ti jili la a ləg ər la gɨna, a ko hul lo. 12Lɔ tɨ pla, Jesu ɓla ər ndula gɨ a bi tɨ ndidi ne a wo saal tɨ lwərgɨ tɨ un ɓəgri. 13Gorne a hina a ja gɨ a peer kaw, a ko a hul lo la. 14Sul tɨ tong gɨna, Jesu ɓla ər ndula gɨ bi dɔkɔmɛ kar kede gorne a ti tɨ wa̰y tudi mu, ər par a tulɔ sul a hul sɨgra la jaa, kəysul a ko bi ne ləg ər na wag tɨ bi tɨ ulu daan hul lo. 15Ər ja gɨ a ɓə: «Yḭ si na un gun tɨ lɔr nəgri sul, i ɗo Jaa Ndinimani beel gɨ bi gun. 16Wo ne ko hul la ka batɛm gɨna, ər ɓə nina tina. Lɛ wo ne ɓini hul kula ɓə nina tina lo. 17I ləg mum ton ɓɔrji ne ɓə bi ton so hul naa gɨ ən lɔ an jo le: Na ən ndil, a ɓə jinsə kun la, a ɓə gṵ jak ja la. 18Jo a par kɔ na a daa ɓee a yḭḭ kuma ɓijim kaw, wa̰y ɓijim ɓa̰ in ɓə a kar lo. A ɓə a daa kay tɨ bi tɨ mo̰y sul tɨ a nina la.»

Jesu na ɗɔl tɨ Ndɨla sul

Luk 24.50-53

19Gorne Baali Jesu ja gɨ a jaa tong gɨna, Ndɨla jul ər si na ər tɨ ndal la ər ti tɨ ər daa tɨ lɨma sul. 20Lɛ ər bi tɨ wa̰y edɨ gɨna, a si a ɗo Jaa Ndinimani beel na un gun. Baali Jesu gə̰y na a tɨ jaa ne wag tɨ a mu la, ər an a lɔ na mum ne ɓɔrji la.

Currently Selected:

Mark 16: nie

Highlight

Copy