Mark 15

Jesu wo guberno̰ Pilat kwi

Mat 27.1-2,11-14; Luk 23.1-5; Ja̰ 18.28-38

1Na gaan cɔg, bi tɨ hima ɓina nii ten peer na bi nii la, bi tɨ gṵ hul ɓla la, bi nii tɨ jaa tungni tɨ bi sul la. A ɓəw Jesu a hina na ər, a naa gɨ Pilat. 2Pilat ɓiri ər jaa: «Yim tɨ wa̰ay tɨ Juyb-a maan a?» Jesu duga gɨ ər: «Jo əm ja tɨ əm mu ɗay.» 3Bi tɨ hima ɓina na woom kay jaa dɨbla tɨ Jesu sul. 4Pilat ɓiri ər jaa cam: «Əm ja jaa ɓudu lo a? Əm laa jaa gun ne a kay tɨ əm sul lo a?» 5Ɓɔr Pilat ji kəysul Jesu ja jaa ɓudu lo. 6Na pya̰ tɨ Pak gun, Pilat nɨm wo tɨ dangay ɓudu ne bi taam ər tɨ ndal. 7Ɗa̰y ɗay ɓər paa ndil ɓə Barabas wo tɨ dangay ɓudu na bi ton hun wo na ɗa̰y tɨ hul laa kar. 8Bi gun si tɨ Pilat maan la a ɓiri ər ka ər nɨm gɨ a wo tɨ dangay ɓudu kuna ər ka gɨ a na an sul. 9Pilat ɓiri a: «Pay yḭ taam ɓə ən naa gɨ i Juyb-a na wa̰ay a?» 10Kəysul ər una ɓə bi tɨ hima ɓina na woom wur Jesu tɨ ər daa na wuri ji. 11Lɛ bi tɨ hima ɓina dog bi lɔ: «Yḭ ɓiri ka ər nɨm Barabas jo.» 12Pilat ɓiri a cam: «Kəyjo i taam ɓə ən ka na wo ne i soon ər Wa̰ay tɨ Juyb-a maan a?» 13La bi gun ka ngɔr cam: «Əm ɗɨb ər tɨ tɨla tɨ tərgɨ sul!» 14Pilat duga gɨ a: «Kəy ɓijim jo ər ka a?» Lɛ a ka ngɔr na dwari cam: «Əm ɗɨb ər tɨ tɨla tɨ tərgɨ sul.» 15Pilat jul Barabas tɨ dangay ka bi ndula laar a la, ər naa gṵ ka a ɗɨb Jesu na ngaar la a ɗɨb ər tɨ tɨla tɨ tərgɨ sul.

Əli ka Jesu siri

Mat 27.27-31; Ja̰ 19.2-3

16Əli si na Jesu tɨ Pilat bang hul la a soon əli kur gun tɨ ər sul. 17A wur gɨ ər wa̰ay na sər ɗəng hiina la a hin jugɔ na humi a wur tɨ ər sul. 18La a ɗolɔ tɨ ər siri kar kuna ne: «Lapya, Wa̰ay tɨ Juyb-a maan!» 19A ɗɨb ər sul na uun la a tib hirgɨ tɨ ər ji la. A ha̰w a ɗa̰y tɨ ər kwi a yabu ər la. 20Gorne a ka ər siri gun gɨna, a jul sər hiina tɨ ər ndɔ lɛ a yɛr na may na sər la a wag na ər tɨ bayri tɨ ər ɗɨb tɨ tɨla tɨ tərgɨ sul.

A ɗɨb Jesu tɨ tɨla tərgɨ sul

Mat 27.32-44; Luk 23.26-43; Ja̰ 19.17-27

21Ɓər paa ndil ɓə Simo̰, ər tɨ wo tɨ Siren, ər tɨ Aleksandre-a na Rupus-a ba. Ər o̰ tɨ waal, ər wo ɗira gɨna, əli par ər na dwari nɨ ər yəgɨ Jesu na tɨla tɨ tərgɨ. 22A si na Jesu tɨ un ne a soon ɓə Golgota, ne ji ɓə: «Un tɨ sul kuna.» 23A taam gɨ ər ham bḛ tangɨ na kuma ne ndil ɓə mir naa le Jesu ɓini yḭḭ. 24A ɗɨb ər tɨ tɨla tɨ tərgɨ sul gɨna, a ɓaan gɨ peer ər sərgɨ a toy na mbara tɨ ləg pay ja ɓə tudi a? 25A ɗɨb ər tɨ tɨla tɨ tərgɨ sul na lula doso tɨ gaan. 26A kya̰ jaa ji ne a hun na ər tɨ baar hul a ɗɨb tɨ ər sul tɨ ndal ɓə: Jesu Juyb-a na Wa̰ay. 27A ɗɨb bi tɨ ɓijim kar tɨ ndidi na ər tɨ tɨla tɨ tərgɨ sul. Ɓudu tɨ ər lɨma sul la, ɓudu tɨ ər gɨlay sul la. 28Wa̰y ne ka paa nɨ ka wa̰y ne a kya̰ tɨ maktub hul toni ɓə: «A ɓra ər na bi tɨ ɓijim kar ɓudu.» Tɨ kuri. 29Bi tɨ ɗira tɨ ul sul ɓurum ər la a ɗɨb a sul a ja ɓə: «ɓəw! Yim ne əm ja ɓə əm ɓə Ndɨla li yunga lɛ əm ɓə kaaw tɨ ɗa̰y tɨ tedi hul ma? 30Mam nen əm ndula əm jir tɨ tɨla tɨ tərgɨ sul» 31Bi tɨ hima ɓina na woom la bi tɨ gṵ hul ɓla kaw, a ka Jesu siri, a ja gɨ peer ɓə: «Ər nen bi lɛ ər lɛm ər ndɔ nina lo. 32Ka Mesi, wa̰ay tɨ Israhel jir tɨ tɨla tɨ tərgɨ sul ka yini ləg! Gɨna yini ɓə hul kula.» Bi ne a ɗɨb a tɨ tɨla tərgɨ sul tɨ Jesu taal kaw a ɓurum ər la.

Jesu na ulu

Mat 27.45-56; Luk 23.44-49; Ja̰ 19.28-30

33Na tili, un gun tɨ nəgri sul duga tɨ siyɛl marway lula tɨ tedi tɨ jeel. 34Na lula tɨ tedi, Jesu ka ngɔr tɨ ndal ər ja kuna ne: «Eli, eli lama sapaktani!» Ne ji ɓə: «Ən Ndɨla, ən Ndɨla kəyja jo əm ɓini ən a?» 35Bi tapeer ne lor tɨ un ɗay a ja ɓə: «Yḭ laa, ər soon Eli!» 36Wo paa yey si wur sipo̰ tɨ ndu man ji wur tɨ uun mu kay gɨ Jesu tɨ mu ka ər yḭḭ. La ər ja ɓə: «Ka i a̰y ɓam i ləg, pay Eli ɓə hina ər jir tɨ tɨla tɨ tərgɨ sul a!» 37Lɛ Jesu, ɗo ngɔr na dwari la ər uy la. 38Gorne ər uy gɨna, sər ɗəng ne a tung na Ndɨla li daan da̰r tɨ ndal marway jir tɨ lɔr. 39Əli aru wa̰ay ne lor tɨ un ɗay, ləg Jesu na ulu la ər ja ɓə: «Kuri, ɓər ne tɨ Ndɨla na ɓa̰!» 40Aa tapeer lor ɓag ləg ər la. Tɨ aa ton daan, Mari tɨ Magdala la, Mari ne tɨ Jak ne ɓa̰ la Jose la na̰, Salome la a wo tɨ nin. 41Toni gorne Jesu wo tɨ Galile, aa ne si tɨ ər lɔ la a ka gɨ ər cida la. Aa tapeer dɨbla ne si na ər toni tɨ Jerusalɛm kaw a wo nin la.

Jesu na bili

Mat 27.57-61; Luk 23.50-56; Ja̰ 19.38

42Na jeel la ta tɨ ɗa̰y ne bi gun wo ndula kaw tɨ wag saw bɛ na nja sibit. 43Ɓər paa ndil ɓə Josep wo tɨ Arimate, yḭr wo tɨ bi tɨ jaa tungni kur hul la. Yḭr kaw ər wo Ndɨla waan a̰y kuna bi la. Ər par ər hul sɨgra ər si tɨ Pilat maan tɨ Jesu ulu ɓiri. 44Gorne Pilat laa ɓə Jesu uy gɨna ɓɔr ər ji nari, gɨna ər ɓiri əli wa̰ay pay Jesu uy ɓagcagri kuri a? 45Gorne əli wa̰ay duga gɨ ər tɨ nin gɨna, ər naa ər gṵ gɨ Josep ka ər so Jesu ulu. 46Josep si huna sər tɨ ulu bili hina na la, ər jir Jesu ulu tɨ tɨla tɨ tərgɨ sul, ər si ər bini tɨ ngalɨm ne a yel toni tɨ nan gɔl. Ər ɓɨrgɨ kura ɗəng ər hul na ngalɨm mu. 47Mari tɨ Magdala la, Mari tɨ Jose na na̰ la a ləg un ne a bili Jesu tɨ nin.

Currently Selected:

Mark 15: nie

Highlight

Copy