Mark 14

Jesu na ulu la ər wa tɨ ngalɨm la

Mat 26.1-5; Luk 22.1-2; Ja̰ 11.45-53

1Juyb-a na pya̰ tɨ wag la pya̰ tɨ mapa bla ham ho̰ni gə̰y ɗa̰y tɨ ndidi. Bi tɨ hima ɓina na woom la, bi tɨ gṵ hul ɓla, a taam ul mu tɨ Jesu par ilak tɨ ər humna, 2kəysul a ja gɨ peer ɓə: «Yi ɓə wa̰y ne kar na ɗa̰y tɨ pya̰ kar lo, kəysul bi ɓə sal kar.»

Ii bɛ itɨr tɨ Jesu sul

Mat 26.6-13; Ja̰ 12.1-8

3Jesu ti tɨ Betani tɨ Simo̰ wo tɨ yo li hul. Gorne a wo wa̰y tudi mu, ii paa kori tɨ Jesu ndɔ na itɨr ne towol dɨbla sir ngobi. Itɨr ne a ka na naar hur. Ər təng ngobi mu la ər bɛ itɨr tɨ Jesu sul. 4Bi tapeer ndula laar a lo tɨ ii ne sul. A ja gɨ peer «Ər yunga itɨr ne kəyja a? 5Ndini ne a ɓə itɨr ne cingɨ kar na aru meta tɨ gɨ bi tɨ ndemni naa!» A hul laar a tɨ ii ne sul lo. 6Lɛ Jesu ja gɨ a: «Yḭ nɨm ər kɛgɛgɛ! Kəyjaa i wur ii ne jindemni a? Tɨ cida ndinimani jo ər wo kar le. 7Kəysul yḭ ti na bi tɨ ndemni na i yɔd. Ɗa̰y ne i taam gɨna, i ɓə gɨ a ɓari kar, lɛ yin na i yɔd lo. 8Ii ne ka wa̰y ne ər dwari lɛm kar: Ər bɛ itɨr tɨ ən sul toni barita a ɓə ən bili. 9Ən ja gɨ i tɨ bayri, tɨ un gun tɨ dunya̰ hul, gorne ne a wo beel tɨ Jaa Ndinimani ɗula gɨna, a ɓə ii ne maani kar.»

Judas so Jesu sul

Mat 26.14-16; Luk 22.3-6

10Judas Iskariot, wo ɓudu tɨ Jesu bi tɨ wa̰y edɨ dɔkɔmɛ kar sap daan si ten bi tɨ hima ɓina na woom tɨ gɨ a Jesu wur tɨ a daa. 11Gorne a laa jaa ne gɨna, a ndula laar a la a so a gṵ tɨ gɨ ər gursu naa. Lɛ Judas taam lula sul ɓari tɨ Jesu wur tɨ a daa.

Jesu ka pya̰ tɨ Pak na ər bi

Mat 26.17-25; Luk 22.7-14,21-23; Ja̰ 13.21-30

12Ɗa̰y tɨ toni mani tɨ pya̰ tɨ mapa tudi bla ham ho̰ni, ne bi hun ham ɓa̰ tɨ pya̰ tɨ Pak kar, Jesu na bi tɨ wa̰y edɨ ɓiri ər: «Kəy un jo əm taam ɓə yini kaaw gɨ əm tɨ pya̰ tɨ Pak kar tɨ nin a?» 13Lɛ Jesu toon ər bi tɨ wa̰y edɨ tɨ ndidi la ər ja gɨ a ɓə: «Yḭ si tɨ lɔr ɗəng hul gɨna, i ɓə ɓər paa ne yəg dong na ndu tina, i si tɨ ər lɔ marway tɨ gḛy. 14Gorne ər ɓə wur tɨ li hul gɨna, i ja gɨ Baali tɨ li ɓə: “I wo tɨ gɨ i wa̰y ɓla ja ɓə, kəy un jo ər ɓə na wa̰y tɨ Pak tudi na ər bi tɨ wa̰y edɨ a? 15La ər ɓə gɨ i li hul ɗəng paa tɨ ndal ɓla. Mum tɨ paa tɨla gun wo tɨ hul. Yḭ ɓə wa̰y tudi tɨla tɨ nin.» 16Bi tɨ tomni si an tɨ lɔr ɗəng hul, a ten mum gun kuna Jesu ja gɨ a la, a par mum tɨ Pak kar sul tɨ un ne.

Jesu na sul sula

Mat 26.20-25; Luk 22.21-23; Ja̰ 13.21-26

17Na jeel gɨna, Jesu an tɨ un ne na ər bi tɨ wa̰y edɨ dɔkɔmɛ kar sap. 18Gorne a ti tɨ wa̰y tudi mu a wo wa̰y tudi gɨna, Jesu ja gɨ ər bi tɨ wa̰y edɨ ɓə: «Kuri, ən ja gɨ i tɨ bayri, wo ɓudu tɨ i daan ne wur daa na ən ɓudu tɨ lway hul ɓə ən sul sula nɨ a ɓə ən humna.» 19Gorne a laa jaa ne gɨna, a ndula laar a lo, la a ɓiri ər jaa ɓudu na ɓudu kuna ne: «Tɨ yin ɓee tɨ ja a?» 20La Jesu duga gɨ a: «Tɨ wo ɓudu tɨ i ji dɔkɔmɛ kar sap daan ne wur daa tɨ lway hul ɓudu na ən. 21Yin Wo Ɓa̰ ən ɓə ən sul ɗula ən ɓə saal kuna a kya̰ tɨ Ndɨla Maktub hul, lɛ jindemni gɨ wo tɨ ən sul sula. Wo ne hiina toni a toy ər lo kaw golgo!»

Baali na ər tudi tɨ mu tong na ər bi

Mat 26.26-30; Luk 22.15-20

22Gorne a ti tɨ lway mu gɨna, Jesu so mapa ər ka gɨ Ndɨla barka barita ər ha̰w ər ɓaan gɨ ər bi tɨ wa̰y edɨ. Ər ja gɨ a ɓə: «Yḭ ko wa̰y ne, i tuy ɓə tɨ ən ndula ya̰m!» 23La duga ər so kop na damnar ndu ər ka gɨ Ndɨla barka barita ər naa gɨ a ji gun a yḭḭ. 24Ər ja gɨ a: «Wa̰y ne tɨ ən hima, tɨ hima tɨ ergɨ ɓani ne a bɛ bi dɨbla jaa. 25Kuri, ən ja gɨ i tɨ bayri, ən ɓə duga damnar ndu ne yḭḭ na i tɨ nəgri sul le cam lo. Lɛ ən ɓə duga na i yḭḭ ɓani tɨ Ndɨla waan hul.» 26Lɔ tɨ plaa a so kwan la a wag a si tɨ nan tɨ olib sul.

Piyɛr sulɔ ɓə ər una Jesu lo

Mat 26.31-35; Luk 22.31-34; Ja̰ 13.36-38

27Jesu ja gɨ ər bi tɨ wa̰y edɨ ɓə: «Yḭ ji gun i ɓə ən ɓini kəysul a kya̰ tɨ Ndɨla maktub hul ɓə: “A ɓə wo tɨ ham ɓaw humna la həm ɓə peer ɓra tɨ un gun.” 28Lɛ gorne ən wag tɨ ngalɨm gɨna, ən ɓə saal i a̰y tɨ Galile.» 29Gorne Piyɛr laa jaa ne gɨna ər ja ɓə: «Bi gun jo ɓə əm ɓini lɛ yin lo bad-bad.» 30Jesu duga gɨ ər: «Kuri ən ja gɨ əm tɨ bayri, kakamle, na syɛl ne hul, toni barita twar ɓə togɨm ɗula, əm ɓə ən sul sulɔ lahul tɨ tedi.» 31Lɛ Piyɛr duga gɨ ər na dwari ɓə: «Jo ən ɓə ulu na əm kaw, ən ɓə əm sul sulɔ lo bad.» La a ji gun a ja jaa ɓudu ne.

Jesu wo tɨ Getsemani

Mat 26.36-46; Luk 22.39-46

32Gorne Jesu a na ər bi tɨ wa̰y edɨ a an tɨ un ne a soon ɓə Getsemane gɨna, ər ja gɨ ər bi tɨ wa̰y edɨ ɓə: «Yi ti tɨ un ne i a̰y ka ən soon Ndɨla bari.» 33Ər si na Piyɛr la, Jak la, Ja̰ la. Ər ɗolɔ tɨ ndɔ ndemni kar la ər par ngɨnɨm la. 34Ər ja gɨ a: «Ən ndula laar ən lo marway wur ən tɨ ilgɨ tɨ ulu hul. I ti tɨ le, i ka ley lom lo.» 35Jesu si ɓag ɓa̰ndḛ, ər hulgɨ tɨ lɔr, ər soon Ndɨla nɨ ka Ndɨla taam gɨna ər jul ər ɓag teni na lula sul tɨ pɛw ne. 36Ər ja ɓə: «Aba, ən ba! Əm lɛm mum gun kar. Jo əm taam a, əm jul kop tɨ pɛw ne tɨ ən mu. Jo tɨ kəy kaw, əm ka wa̰y ne əm hul taam lɛ, əm ka wa̰y ne ən hul taam kar lo.» 37Gorne ər duga tɨ ər bi tɨ wa̰y edɨ tɨ tedi ndɔ gɨna, ər ten a na ley lom la ər uya̰ Piyɛr ər ja gɨ ər: «Simo̰ pay əm ley lom a? Əm lɛm tɨm jili na lula ɓudu lo a? 38I kway i ji lom la yḭ soon Ndɨla, nejo yḭ ɓə tɨba tɨ mum tɨ sangni hul lo. Ən una ɓə i ilgɨ dwari lɛm lɛ, i ndula ya̰m dwari gaw.» 39Duga ər jul ər ndɔ teni ɓag ər soon Ndɨla na jaa ɓudu ne tɨ ər mu. 40La ər duga ər hina ər ten a na ley lom kəysul a ndula lur a. La a una jaa ne a ɓə gɨ ər ja lo. 41Lahul tɨ tedi mani ər duga ər hina ər ja gɨ a: «Yḭ ley lom la i bɛ saw ara! Jaa tong teni! I ləg lula sul lɛm ne a ɓə yin Wo Ɓa̰ wur tɨ bi tɨ ɓijim daa. 42I o̰ ndal, ka i si kəysul wo tɨ ən sul sula an ndog teni.»

A Par Jesu

Mat 26.47-56; Luk 22.47-53; Ja̰ 18.3-12

43Na lula sul ɗay gorne Jesu wo ja jaa ɗang, Judas, wo ɓudu tɨ ər bi tɨ wa̰y edɨ dɔkɔmɛ kar sap daan hina na bi dɨbla na kaskar la ngurum la. Tɨ bi tɨ hima ɓina na woom la, bi tɨ gṵ hul ɓla la, tɨ bi nii jo a toon a. 44Judas, wo tɨ Jesu sul sula ɓla gɨ a wa̰y ne ər ɓə kar ka a una na Jesu. Ər ja gɨ a: «Wo ne ən njum ər mu gɨna, tɨ yḭr. Yḭ par ər, i si na ər la i ɓaw ər ɓari.» 45Gorne Judas an, ər kori tɨ Jesu ndɔ la ər sor ər Rabbi la ta ər njum ər mu. 46Tɨ nejo bi ton kay daa tɨ Jesu sul a par ər. 47Wo paa tɨ a daan jul kaskar ər jani na wo tɨ hima ɓina ɗəng na ha̰r tulɔ tḭ ndat.

48Jesu ja gɨ a: «Yin tɨ suga ta i hina na kaskar la ngurum la tɨ ən par a? 49Ɗa̰y sul ən ti na i tɨ Ndɨla li hul la ən ɓla gɨ bi mum la, kəyja yḭ par ən lo a? Lɛ wa̰y ne ka paa in ka jaa ne a kya̰ tɨ Ndɨla na maktub hul ti kuri.» 50Tɨ nejo ər bi gun ɓini ər la a yerɨm gun. 51Wo kɔr paa si tɨ Jesu lɔ, ər hul sər tɨ ər ndɔ a par ər, 52lɛ ər nɨm sər la ər yey ər ndɔ kura.

Jesu lor tɨ bi tɨ jaa tuni kwi

Mat 26.57-68; Luk 22.54-55; Ja̰ 18.13-15

53A si na Jesu tɨ wo tɨ hima ɓina ɗəng kwi, tɨ gorne bi tɨ hima ɓina woom la, bi nii la, bi tɨ wa̰y ɓla gun la taygɨ tɨ nin. 54Piyɛr hun tɨ bi ɓəgri ɓag marway ər wur tɨ wo tɨ hima ɓina ɗəng na bang hul. Tɨ gorne, ər ti na bi tɨ jal ɓaw tɨ laa mu. 55Bi tɨ hima ɓina na woom la, bi nii tɨ jaa tungni tɨ bi sul gun a taam ul mu tɨ jaa kay tɨ Jesu sul tɨ ər humna lɛ a ten jaa ɓudu in lo. 56Kəysul bi dɨbla kay jaa ɓori tɨ ər sul lɛ a jaa tɨba tɨ paa lo. 57Bi tapeer o̰ kay jaa ɓori tɨ ər sul kuna ne: 58«Ər ja ɓə: “Ən ɓə Ndɨla li ne woɓari kaw na daa yunga, lɛ na ɗa̰y tɨ tedi hul, ən ɓə paa jak kaaw ne wo ɓari daa ɓə kaaw lo.”» 59Lɛ ne may kawna a jaa tɨba tɨ paa lo. 60Tɨ un ne, wo tɨ hima ɓina ɗəng o̰ tɨ bi daan ər ɓiri Jesu jaa ɓə: «Jaa gun ne a ɓra tɨ sul le, əm duga gɨ a na jaa ɓudu tɨ sul lo a?» 61Lɛ Jesu ti muguni. Wo tɨ hima ɓina ɗəng ɓiri ər jaa cam: «Yim tɨ Krist Ndɨla ɓaw ɗəng ɓa̰ a?» 62Jesu duga gɨ ər: «M, tɨ yin, la i ɓə Wo Ɓa̰ ləg, na tɨm tɨ Ndɨla wo tɨ dwari ɗəng lɨma sul la, i ɓə ər ləg na hina tɨ goblə daan tɨ ndal la.» 63Gɨna wo tɨ hima ɓina ɗəng dḛr ər ngɔmi la ər ja ɓə: «Yi taam timo̰ jak cam lo! 64Yḭ may laa ər ndoni na i tula, kəyjo i ilgɨ ara?» Bi gun kay jaa tɨ ulu tɨ ər sul la a ja ɓə ka a hun ər. 65Bi tapeer ɗolɔ tɨ hirgɨ tɨb tɨ ər sul, a ɓəw ər ji na sər la a ɗɨb ər. A ɓiri ər ka ər ja gɨ a: jaa jo ɗɨb əm. Əli ko Jesu tɨ a daa la a ɗɨb ər tɛmtaal.

Piyɛr sulɔ ɓə ər una Jesu lo

Mat 26.69-75; Luk 22.56-62; Ja̰ 18.15-18

66Gorne Piyɛr ti tɨ li lɔ tɨ lɔr tɨ jaal hul, wo tɨ hima ɓina ɗəng na ha̰r tɨ ii paa hina. 67Gorne ər ləg Piyɛr tɨ laa mu gɨna, ər ja gɨ ər ɓə: «Yim kaw əm tɨ Jesu tɨ Najarɛt na wo la.» 68Lɛ Piyɛr duga gɨ ər: «Ən una əm jaa ne ji lo la, kəy jaa jo əm taam ja kaw ən una lo.» Gɨna Piyɛr wag, ər si tɨ jal mu la twar ɗo togɨm. 69Ha̰r ii ləg ər la ɗolɔ tɨ gɨ bi ja cam: «Yḭr kaw ər na a la!» 70Piyɛr duga ja cam: «Ən una ər lo.» Lahul tɨ ndidi mani. Dabra bi ne ti tɨ ɗay ja gɨ Piyɛr: «Tɨ kuri yim na a kəysul yim tɨ wo tɨ Galile.» 71Gɨna Piyɛr maar mu kuna ne: «Ka Ndɨla wur ən jindemni! Jo ən ka ɓura! Ən una ɓər ne i wo ər ja jaa le lo bad-bad.» 72Tɨ daamu, twar ɗo togɨm lahul tɨ ndidi mani gɨna, Piyɛr ho̰ni jani tɨ jaa ne Jesu ja gɨ ər sul ɓə: «Toni bari twar ɓə tɔgɨm ɗula, əm ɓə ən sul sulɔ lahul tɨ tedi.» Piyɛr wag tɨ bayri la si cḛy dɨbla la.

Currently Selected:

Mark 14: nie

Highlight

Copy