Matyo 24

Jesu ja ɓə Ndɨla li ɓə yunga

Mrk 13.1-2; Luk 21.5-6

1Jesu wag tɨ Ndɨla li hul ər si ər wo saal gɨna, ər bi tɨ wa̰y edɨ hina ndogɨ tɨ ər ndɔ tɨ gɨ ər Ndɨla li ne a kaw ɓla. 2Jesu ja gɨ a: «I ləg li ɗəng ne ɓari, ər kura ɓudu in ɓə gə̰y tɨ paa sul lo, A ɓə tɨbɨn gun.»

Wa̰y ne ɓə an toni barita dunya̰ mu ɓə tong

Mrk 13.3-13; Luk 21.7-19

3Jesu ti tɨ nan tɨ olib ne lor tɨ Ndɨla li kwi gɨna, ər bi tɨ wa̰y edɨ kori tɨ ər ndɔ a ɓiri ər jaa ɓə: «Əm ja gɨ i na kəykwi mum ne əm ja kum ɓə an a, la kəy wa̰y jo ɓə əm ɗa̰y tɨ duga hina ɓla la, dunya̰ mu tong la a?» 4Jesu duga gɨ a: «Yḭ ka i jicina tɨ i ndɔ sul la, wo in ka i tan lo la! 5Kəysul bi dɨbla wo hina na ən ndil, jakaw ɓə ja ɓə: “Yin tɨ Krist ne Ndɨla ɛr!” La a ɓə bi dɨbla tan. 6Gorne yḭ ɓə sal jaa laa la, sal nig laa la gɨna, i ka i ndɔ cḛy lo kəysul mum ne ɓə an, lɛ ne tɨ dunya̰ na mu tɨ tong ɗang lo. 7Bi tɨ lɔr ɓudu ɓə ndɔ kay tɨ paa tɨ lɔr jak muna la, woom ɓə o̰ peer muna la, nəgri sul ɓə dig na un tɨ dunya̰ la, ndula ɗəng ɓə tɨba tɨ bi sul la. 8Gorne mum ne gun ɓə an gɨna, ɓə tɨm kuna pɛw tɨ twila lɔ ɗula. 9Bi ɓə i jindemni wur la a ɓə i humna la, bi ɓə i koor na un gun la. 10Na lula sul ɗay, bi dɨbla ɓə a hul kula nɨm. A ɓə peer sul sula la a ɓə peer koor la. 11Nebi ɓori ɓə hina bi dɨbla tan. 12Ɓijim tɨ kar dɨbla ɓə kar nɨ bi dɨbla na peer kumkar ɓə duga ɗina. 13Lɛ wo ne par ər hul kula sɨgra marway mu tɨ tong gɨna, ɓə nina. 14A ɓə beel tɨ Jaa Ndinimani tɨ Ndɨla na waan ɗula gɨ bi gun tɨ dunya̰. Gɨna lula sul tɨ mum na tɨ tong ɓə an.»

Pɛw ɗəng ne wo tɨba tɨ lɔr nəgri sul

Mrk 13.14-23; Luk 21.20-24

15«Gorne yḭ ləg wo tɨ mum yuga ɗəng ti tɨ un ndeeri kuna Danyɛl ja no̰ gɨna, ka wo tɨ wa̰y edɨ kay jicina ɓari tɨ ndɔ sul!

16«Ka wo ne wo tɨ Jude yey waal ndɔ tɨ nan gɔl. 17Wo ne wo tɨ durdur sul lɛm jir wa̰y sula tɨ li hul lo. #24.17 Jesu ja jaa tuna durdur sul keysul na lula sul ɗay bi kaw ləg durdur tɨ Israhel. 18Wo ne wo waal hul ɓə duga hina tɨ gə̰y ər sər sula cam lo la. 19Ndemni gɨ aa bi tɨ ɓimi yina la ton wo gɨ ɓimi huma naa la, na ɗa̰y ne! 20Yḭ soon Ndɨla ka i yaal ka tɨba na tyɛr mu kwi lo. 21Kəysul pɛw ɗəng ne ɗa̰y ɓudu in tɨba tɨ lɔr nəgri sul lo ɓagcagri tɨ mum lɔ ɗula marway kakamle. La batan pɛw kuna paa ne ɓə duga tɨba tɨ lɔr nəgri sul cam lo bad. 22Jo hiina Ndɨla ka na ɗa̰y ne mu duga tɨ bəgri lo gɨna, wo ɓudu ne ɓə nina in teni, lɛ ər duga na ɗa̰y ne mu tɨ bəgri ər bi ne ər ɛr a jaa. 23Jo wo ja gɨ i ɓə Krist, wo le ɓee wo ɗay gɨna, i ka ər hul kula lo. 24Kəysul Mesi ɓori la nebi ɓori la, a ɓə o̰ a ɓə mum ne ka ayri kar la, mum ne ɓɔrji dɨbla kar tɨ bi taan, jo a ten ul mu gɨna, a ɓə bi ne Ndɨla ɛr a kaw tan la. 25Kəysul ən ja gɨ i jaa ne toni teni.

26«Jo wo ja gɨ i: “I ləg ər wo tɨ tab hul”, i Ka saal lo. Ɓee jo wo ja gɨ i: “I ləg, ər waal ər ndula wo le!” Yḭ ka ər hul kula lo. 27Kuna un ndeeri o̰ tɨ ndɨla lɔ marway jir tɨ lula lɔ tɨ tɨba, Wo Ɓa̰ na duga hina kaw ɓə tɨm kuna paa ne la. 28Gor ne wa̰y ulu wo tɨ nin, cicini-a ɓə peer tay.»

Wo Ɓa̰ na ər duga

Mrk 13.24-27; Luk 21.25-28

29«Tɨ daamu, tɨ ɗa̰y ne hul tɨ pɛw bəgri, lula ɓə duga ɗoy matata la, pya̰ ɓə sadala par la, meri ɓə o̰ tɨ Ndɨla sul tɨbɨn tɨ nəgri la, mum tɨ dwari gun tɨ ndɨlasul ɓə tɨbɨn tɨ lɔr. 30Gɨna, wa̰y paa ɓə ndɔ ɓla tɨ ndɨlasul ɓə Wo Ɓa̰ na ɗa̰y tɨ hina tɨ ndog. Bi kalɔ gun tɨ nəgri sul ɓə ndɔ cḛy la ɓə, Wo Ɓa̰ ləg na hina tɨ goblə hul na dwari ɗəng tɨ taan hul la. 31Ər ɓə ən malayka-a tomni na hudong la saw tɨ nḛni tɨ lɔr mu tɨ tong la tɨ ndɨlasul mu tɨ tong nɨ a tay bi tɨ dunya̰ ne Ndɨla ɛr a.»

Wa̰y tɨ ɓla tuna Ndɔg sul

Mrk 13.28-31; Luk 21.29-33

32«Yḭ una wa̰y edɨ ne ndɔgɨ ɓla gɨ i: gorne ər gangɨ duga ti wori la ər ɔri do la gɨna, yḭ una ɓə saw sul tɨ ndog teni. 33Tɨ jaa ji ɓudu la, gorne yḭ ləg mum ne gun an gɨna, yḭ una ɓə Wo Ɓa̰ tɨ ndog tɨ ul mu. 34Kuri, ən ja gɨ i tɨ bayri, bi kalɔ ne le ɓə ulu gun lo jo mum ne ɓə an. 35Ndɨla sul la nəgri sul la ɓə ɗira lɛ ən jaa ɓə ɗira lo bad.»

Jaa ne tuna Baali na duga sul

Mrk 13.32-37; Luk 17.26-30,34-36

36«Lɛ jaa ne tuna ɗa̰y sul la lula sul gɨna, wo ne una in teni. Malayka tɨ ndɨlasul la yin Wo Ɓa̰ kaw i una lo lɛ, ən Ba ɓudu ngoy jo una. 37Wo Ɓa̰ na duga hina ɓə tɨm kuna lula sul tɨ nebi Nowe maan. 38Kəysul toni tɨ ndu lɨma ɗəng kwi, bi twi la bi yḭḭ la, a ko paa la, a naa ɓimi tɨ aa gɨ ɓərgɨ la, marway ɗa̰y ne Nowe wur na tɨ bato ɗəng hul, 39Wa̰y ɓudu ne us a in teni marway ndu lɨma ɗəng hina so na a gun. Ɗa̰y ne Wo Ɓa̰ ɓə duga hina kaw ɓə tɨm jaa ji ɓudu la. 40Gorne bi tɨ ndidi wo waal hul gɨna: Ndɨla ɓə wo ɓudu sula la ɓə wo paa nɨm la. 41Aa tɨ ndidi ne wo ya cir na kura, Ndɨla ɓə ɓudu sula la ɓə paa nɨm la. 42Yḭ kay jicina tɨ i ndɔ sul, kəysul yḭ una ɗa̰y ne i Baali ɓə duga na hina lo. 43Yḭ una ɓari ɓə, jo Baali tɨ gə̰y una lula sul tɨ syɛl ne suga ɓə hina ər sila gɨna, ər ɓə ley lom lo la, ər ɓə ər nɨm nɨ ər ɓə wur tɨ ər gə̰y lo la. 44Nejo, yḭ kaw i ti ndog, kəysul yḭ una lula sul ne Yin, Wo Ɓa̰ ən ɓə na hina lo.»

Wo tɨ cida ne jicina

Luk 12.41-48

45«Jajo tɨ wo ne kar ər cida na ɗa̰ygor la na jicina, ne ər Baali kay ər tɨ bi sul nɨ ər ɓaan gɨ a wa̰y tudi na lula sul a? 46Ndula laar gɨ wo tɨ cida ne ər Baali duga ten ər tɨ cida mu. 47Kuri, ən ja gɨ i tɨ bayri, Baali ɓə ər kay tɨ ər mum tɨ tina gun sul. 48Lɛ jo ər tɨ wo tɨ cida ne ər ka cida na ɗa̰ygor lo gɨna, ər ɓə ja tɨ ər hul ɓə: “Ən Baali ɓə hina saan lo,” 49lɛ ər ɗolɔ tɨ ər peer tɨ cida ɗɨb la, ər tuy la ər yḭḭ la, na bi tɨ sakara̰n. 50Wo tɨ cida ne na Baali ɓə hina na ɗay ne ər ɓə una lo la, na lula sul ne ər ɓə una lo la. 51Ər Baali ɓə ər kun la, ər ɓə ər dangay kar na bi gṵ tɨ ndidi. Tɨ un ne bi ɓə cḛy la a ɓə a ɗəng lɔ tudi tɨ nin la.»

Currently Selected:

Matyo 24: nie

Highlight

Copy