Matyo 25

Jaa lar tuna ɓimi aa dɔkɔmɛ sul

1«Ndɨla na waan ɓə tɨm kuna ɓimi aa dɔkɔmɛ ne a so lampa, a si tɨ wo tɨ ii kula kwi tungni. 2Ton tɨ luni tɨ a daan tɨ ɓəji la, ya̰ ton tɨ luni tɨ bi jicina la. 3Ton tɨ ɓəji so a lampa bla nɨm tɨ hul. 4Lɛ ton tɨ luni ne a jicina a so ngobi na nɨm hari na lampa tɨ a daa. 5Wo tɨ ii kula ɗang hina saan lo, gɨna ɓimi aa ne gun nugun lom la a ley lom gun la. 6Na syɛl daan ɗəng, wo paa ɗo ngɔr ɓə: “I ləg, wo tɨ ii kula wo hina! I wag i si i tung ər kwi!” 7Gɨna ɓimi aa gun a jaar a kaaw a lampa. 8Ton tɨ ɓəji ja gɨ ton ne na jicina: “Naa gɨ i nɨm ɓa̰ ndḛni, kəysul i laa uy tɨ lampa hul.” 9La ton ne na jicina duga a: “yini nɨm lɛm gɨ i naa la ɓə gɨ i gə̰y lo. Yḭ si tɨ bi tɨ kingɨ kar ndɔ i huna i maan.” 10Gorne a si huna gɨna, a huna, lula sul ɗay wo tɨ ii kula hina. Ɓimi aa ne kaaw a ndɔ a wur na ər tɨ un tɨ ɓaar kar la a hul limu tɨ a sul. 11Dabra, ɓimi aa tɨ luni ne ɓəji hina a ja ɓə: “Baali, Baali, təng gɨ i limu!” 12Lɛ wo tɨ ii kula ja gɨ a: “Kuri, ən ja gɨ i tɨ bayri: Ən una i lo.” 13La Jesu ja gɨ a: I kay jicina tɨ i ndɔ sul, kəysul yḭ una lula sul ne Yin, Wo Ɓa̰ ən ɓə na hina lo.»

Jaa lar tuna bi tɨ cida tɨ tedi sul

Luk 19.11-27

14«Ndɨla na waan wag paa na wo tɨ saal tɨ ɓoy ne ər soon ər bi tɨ cida ər ɗol gɨ a ər mum tɨ tina ka a ka na cida. 15Ər naa gɨ ne toni mani gursu aru mi, tɨ ndidi mani aru sap, tɨ tedi mani gursu aru, lɛ ər ɗo ər sul ər si. 16Wo ne na gursu aru mu, ər si ər ka na kingɨ ər ten aru mi jak tɨ paa sul. 17Wo ne ten gursu aru sap, ər si ər ka na kingɨ la ər ten paa aru sap tɨ sul. 18Lɛ wo ne ten gursu aru, ər si ər yel tulɔ ər wal na Baali gursu tɨ nin.

19«Lɔ tɨ plaa ɓaam gorne Baali duga hina gɨna, ər ɓiri a wa̰y ne a ka na ər gursu. 20Wo ne ten gursu aru mi kori tɨ ər ndɔ ɓla gɨ ər gursu aru mi la ər ndu tɨ sul la. La ər ja gɨ ər: “Baali, əm naa gɨ ən gursu aru mi lɛ ən ten aru mi jak tɨ paa sul.” 21Ər Baali ja gɨ ər: “Tɨ ɓari. Əm tɨ wo tɨ cida ɓari ne əm ka cida na ɗa̰ygor. Əm ka wa̰y ɓa̰ na ɗa̰ygor. Ən ɓə gɨ əm mum dɨbla ɗoli. Əm hina əm ka ndula laar na əm Baali.” 22Wo ne na gursu aru sap kori tɨ ər ndɔ la ər ja gɨ ər: “Baali, əm naa gɨ ən gursu aru sap lɛ əm ləg, ən ten aru sap tɨ paa sul.” 23Ər Baali ja gɨ ər: “Tɨ ɓari. Əm tɨ wo tɨ cida ɓari ne əm ka cida na ɗa̰ygor. Əm ka wa̰y ɓa̰ na ɗa̰ygor. Ən ɓə gɨ əm mum dɨbla ɗoli. Əm hina əm ka ndula laar na əm Baali.” 24Mu tɨ tong gɨna, wo ne na gursu aru kori tɨ ər ndɔ la ər ja gɨ ər: “Baali, ən una ɓari ɓə, yim tɨ wo sɨgra. Wa̰y ne əm ndu lo, əm ɓya̰ la, wa̰y ne əm jaw lo, əm kura la. 25Nejo ayri ka ən nɨ ən bili əm gursu tɨ nəgri lɔ. Əm gursu jo le, əm ko.” 26Ər Baali duga gɨ ər: “Yim tɨ wo tɨ cida ɓijim la wo ndoor la! Jo əm una ɓari ɓə yin ɓya̰ ya tɨ un ne ən ndu tɨ nin lo la, ən ɓya̰ tɨ un ne ən ɗɨb nduri tɨ nin lo la gɨna, 27hiina əm ɓə saal ən gursu kay tɨ ba̰k nɨ gorne ən duga le, ən ɓə ndu tina tɨ sul! 28I ko gursu ne tɨ ər daa teni, i naa gɨ wo ne naa dubu. 29Kəysul wo ne na wa̰y tɨ ər daa, a ɓə gɨ ər paa naa tɨ sul, nɨ ər ɓə tɨm tɨ wani daan. Lɛ wo ne na wa̰y lo, a ɓə ne ɓa̰ ndḛ tɨ ər daa kula teni. 30Tuna wo tɨ cida ne ndoor sul gɨna, i ɗo ər tɨ bayri tɨ un ɗoyri ne bi ɓə cḛy tɨ nin la, a ɓə a ɗəngni lɔ tudi tɨ nin la.”»

Jaa tungni ne tong mu

31«Gorne Yin, Wo Ɓa̰ ən ɓə hina tɨ ən taan hul na ən malayka-a gun gɨna, ər ɓə tɨm tɨ ər goblə tɨ taan sul. 32Bi kalɔ gun tɨ nəgri sul ɓə peer tay tɨ ər kwi. Ər ɓə a daan ɓaan kuna wo tɨ wa̰y ɓaw ɓaan həm a na bu a daan. 33Ər ɓə həm kay tɨ ər lɨma sul la, bu tɨ ər gɨlay sul la. 34Gɨna wa̰ay ɓə gɨ ton ti tɨ ər lɨma sul ja: “Yḭ hina, yḭ ne ən ba jul ər mu tɨ i sul. Ka jakaw ten waan ne Ndɨla kaaw gɨ i ɓagcagri gorne ər ɗo na dunya̰. 35Kəysul ndula ka ən gɨna, yḭ naa gɨ ən wa̰y tudi. Ndu yungni ka ən gɨna, yḭ naa gɨ ən ndu tɨ yḭḭ la. Yin tɨ wo ɓoy, yḭ par ən tɨ i ndɔ la. 36Ən wa̰y tɨ ɓəwlu teni, yḭ naa gɨ ən sər la, yin tɨ mo̰y, yḭ kay i ji tɨ ən lɔ la, yin wo tɨ dangay, yḭ si i ləg ən la.” 37Gɨna bi tugla ɓə gɨ ər ja: “Baali, na kəy ɗa̰y jo yini ləg əm na ndula la, yini naa gɨ əm tudi a? Ɓee na ndu yungni la yini naa gɨ əm ndu tɨ yḭḭ a? 38Na kəy ɗa̰y yini ləg əm kuna wo ɓoy la i par əm tɨ i ndɔ, ɓee əm ndula kura ta i naa gɨ əm sər a? 39Na kəy ɗa̰y yini ləg əm na mo̰y ɓee tɨ dangay ta yini si i ləg əm a?” 40Wa̰ay ɓə gɨ a duga “Kuri, ən ja gɨ i, gorne yḭ ka mum ton gɨ ən ɓungɨ ton ɓḭ gɨna, tɨ yin jo i ka gɨ ən wa̰y ne.”

41«La Wa̰ay ɓə gɨ bi ne ti tɨ ər gɨlay sul ja: “Yḭ si ɓag na ən, yḭ ne Ndɨla dobɨn i! Yḭ si tɨ laa ne ti na kwi ne Ndɨla kaaw gɨ Sidan a na ər malayka-a! 42Kəysul toni ndula ka ən lɛ yḭ naa gɨ ən tudi lo, ndu yungni ka ən lɛ yḭ naa gɨ ən ndu tɨ yḭḭ lo. 43Yin tɨ wo ɓoy lɛ yḭ par ən tɨ i ndɔ lo, yin na sər lo, lɛ yḭ naa gɨ ən sər lo, yin tɨ mo̰y la ən tɨ wo tɨ dangay la, lɛ yḭ si i ləg ən lo la.” 44A ɓə gɨ ər ja: “Baali, na kəy ɗa̰y yini ləg əm na ndula la, na ndu yungni la, kuna wo ɓoy la, na ndula kura la, na mo̰y la, tɨ dangay la, lɛ yini kay i ji tɨ əm lɔ lo a?” 45Baali ɓə gɨ a duga: “Kuri ən ja gɨ i tɨ bayri: Gorne yḭ ka mum ton gɨ ən wo paa ɓa̰ ndḛni tɨ ən bi daan lo gɨna, tɨ yin jo yi ɓini gɨ ən wa̰y kar.” 46Ya̰ bi ton, a ɓə wur tɨ pɛw ne mu tɨ tong teni hul. Lɛ bi tugla gɨna, a ɓə nina ne na kwi tina.»

Currently Selected:

Matyo 25: nie

Highlight

Copy