Matyo 17

Jesu na ndɔ yɛr

Mrk 9.2-13; Luk 9.28-35

1Ɗa̰y taar tɨ plaa Jesu jul Piyɛr la Jak la Ja̰, Jak na ɓun la, ər si na a tɨ nan baw sul. 2Ər ndula yɛr tɨ a kwi. Ər ji yibɨn kuna lula, la ər ngɔmi duga buy kar-kar kuna un ndeeri. 3Tɨ daamu Jesu na bi tɨ wa̰y edɨ ləg Moys la nebi Eli la a wag, a jaa ja na Jesu. 4Gɨna Piyɛr ja gɨ Jesu: «Baali, ndini ne yi ɓə tɨm le. Jo əm hul taam gɨna, ən ɓə li tanda tɨ tedi kaw, ɓudu gɨ yim la, ɓudu gɨ Moys la, ɓudu gɨ nebi Eli la.»

5Gorne ər wo ja jaa ɗang gɨna, goblɨ ndeeri o̰ tɨ ndal sul hina kubgɨ a sul la, a laa wo gṵ tɨ goblɨ hul ja ɓə: «Wo ne tɨ ən ɓa̰, ne ən kar kum nari. Ən ndula laar gun wo tɨ ər ndɔ. Yḭ laa ər jaa!» 6Gorne Jesu na bi tɨ wa̰y edɨ laa gṵ ne gɨna, ayri ɗəng ka a, a tɨba a ulgɨ tɨ lɔr. 7Jesu kori tɨ a ndɔ, ər do a la ər ja gɨ a ɓə: «I o̰ ndal, i ka ayri kar lo.» 8Gorne a uma a ji gɨna a ləg wo jak lo, lɛ a ləg Jesu ngoy. 9La gorne a wo jir tɨ nan sul, Jesu peer a kuna ne: «Yḭ ka gɨ wo wa̰y ne yḭ ləg le lɔ jul lo marway ɗa̰y ne yin, Wo Ɓa̰ ən ɓə wag tɨ bi tɨ ulu daan.»

10La Jesu na bi tɨ wa̰y edɨ ɓiri ər: «Kəyjaa bi tɨ gṵ hul ɓla ja ɓə Eli jo ɓə hina barita Wo Ɓa̰ ɓə hina a?» 11Ər duga gɨ a kuri: «Eli ɓə hina mum kay na ɗa̰ygor. 12Lɛ yin, ən ja gɨ i tɨ bayri: Eli hina teni lɛ bi ləg ər ka na wa̰y lo, la a ka ər kuna a hul taam. Yin wo ɓa̰ kaw a ɓə ən jindemni wur kuna ne la» 13Gɨna ər bi tɨ wa̰y edɨ una ɓə ər ja jaa tuna Ja̰ Batis sul.

Jesu nen ɓa̰ ne sakur ka ər

14Gorne a hina ndog na bi dɨbla, ɓər paa kori ndog tɨ Jesu ndɔ la ər ha̰w ər ɗa̰y tɨ ər kwi 15ər ja gɨ ər: «Baali, əm ləg ən ɓa̰ jindemni. Ər na sakur ne wur ər jindemni nari, ər tɨba tɨ laa la tɨ ndu la. 16Ən hina na ər tɨ əm bi tɨ wa̰y edɨ ndɔ, lɛ a lɛm ər nina lo.» 17Jesu so jaa ər ja gɨ a ɓə: «Yḭ bi hul sɨgra la bi tɨ ɓijim kar tɨ lula sul ne, ən ɓə na i tɨm marway an tɨ wa? Ən ɓə ən daa kay tɨ i lɔ marway an tɨ wa? I hina gɨ ən na ɓa̰ le!» 18Jesu meer lal ɓijim na gṵ sɨgra la ər wag tɨ ɓa̰ ndɔ tɨ daamu la ɓa̰ ten nina.

19Gɨna Jesu na bi tɨ wa̰y edɨ kori tɨ Jesu ndɔ na ər sul, a ɓiri ər: «Kəyjaa yini lɛm lal ɓijim ne kun lo a?» 20Jesu duga gɨ a: «Kəysul i hul kula gaw. Kuri, ən ja gɨ i tɨ bayri, jo yḭ hul kula tɨ ɓa̰ ndḛ kuna mutardə ji gɨna, yḭ ɓə lɛm gɨ nan ne ja ɓə: “Əm bo tɨ un ne əm si pi”, la ər ɓə bo. Wa̰y ɓudu in ɓə i bunga lo. 21Lɛ na Ndɨla soon la, tɨm na ndu yungni la jo wo ɓə na lal ɓijim ton in kun.»

Jesu duga ja jaa tuna ər ulu la ər wag tɨ ngalɨm la sul

Mrk 9.30-32; Luk 9.43-45

22Ɗa̰y paa, Jesu a na ər bi tɨ wa̰y edɨ a ten peer gun tɨ lɔr nəgri tɨ Galile. Jesu ja gɨ a: «A ɓə, Yin, Wo Ɓa̰ nɨm tɨ bi tɨ ɓijim kar daa 23la ɓə ən humna. Lɛ na ɗa̰y tɨ tedi mani hul tɨ plaa, ən ɓə wag tɨ bi tɨ ulu daan.» Gɨna ər bi tɨ wa̰y edɨ par ngɨnɨm dɨbla.

Lambo na jaa

24Jesu a na bi tɨ wa̰y edɨ a hina a an tɨ lɔr tɨ Kapɛrnom gɨna, bi tɨ lambo tay tɨ Ndɨla li hul kori tɨ Piyɛr ndɔ la a ɓiri ər: «Pay i Baali naa lambo tɨ Ndɨla li hul lo a?» 25Piyɛr duga gɨ a: «M, ər naa lambo tɨ Ndɨla li hul.» Gorne Piyɛr an tɨ gə̰y gɨna, Jesu so jaa toni ja gɨ Piyɛr: «Simo̰, əm ilgɨ tɨ kəy a? Woom tɨ nəgri sul tay lambo tɨ kəy bi daa a? Tɨ a peer nimni ɓee bi ɓoy jo daa a?» 26Piyɛr duga gɨ ər: «Tɨ bi ɓoy jo daa.» Jesu ja gɨ ər: «Ne gɨna bi tɨ lɔr hul na ul mu tɨ lambo tay lo. 27Lɛ yḭ ɓə bi ne hul yunga lo. Nejo, əm so əm ɓra əm si əm ɗo tɨ larɨm ɓɔ hul, gorne əm par kaa gɨna, əm təng kaa ne toni mani mu gɨna əm ɓə sele tɨ ndidi tina. Əm hina əm tung na ən sul la, yin sul la.»

Currently Selected:

Matyo 17: nie

Highlight

Copy