Luk 4

Jesu na sangni

Mat 4.1; Mrk 1.12

1Ndɨla na Lal sir Jesu hul. Ər o̰ tɨ larɨm tɨ Jurdḛ mu la Ndɨla lal jul ər kwi si na ər tɨ taap hul. 2Tɨ un ne, Sidan sang ər na ɗa̰y dugso. Ər ten wa̰y ɓa̰ in ər wur tɨ ər mu lo na ɗa̰y ton hul. Tɨ ɗa̰y ton ɓəgri gɨna, ndula ka ər. 3Tɨ un ne Sidan ja gɨ ər ɓə: «Jo yim tɨ Ndɨla ɓa̰ gɨna, əm naa əm gṵ ka kura ne yɛr wa̰y tudi.» 4Lɛ Jesu duga gɨ ər: «A kya̰ tɨ Ndɨla maktub hul ɓə: “Tɨ tudi ngoy jo wo ɓə na tɨm jili lo.”»#4.4 Deu 8.3 5Sidan si na ər tɨ ɗingni sul tɨ ndal ɓag, ər ɓla gɨ ər waan gun tɨ dunya̰ tɨ daa mu, 6la ər ja gɨ ər: «Ən ɓə gɨ əm dwari la, taan tɨ waan ne la gun naa, kəysul a naa gɨ ən mum ne gun tɨ ən daa hul la ən ɓə gɨ wo ne ən hul taam naa la. 7Jo əm yabu ən gɨna, mum gun ne ɓə tɨm əm maan.» 8Jesu duga gɨ ər: «Ndɨla na Maktub ja: “Əm ɓə əm Baali tɨ Ndɨla yabu, la yḭr ngoy jo əm ɓə ər cida kar la#4.8 Deu 6.13-14.”»

9Gɨna Sidan duga si na ər tɨ Jerusalɛm. Ər kay ər tɨ Ndɨla li sul ne ura paa tɨ ndal la ər ja gɨ ər: «Jo əm tɨ Ndɨla ɓa̰ gɨna, əm kab, əm tɨba tɨ lɔr, 10kəysul a kya̰ tɨ maktub hul ɓə: “Ndɨla ɓə gɨ ər malayka-a gṵ naa tuna əm sul tɨ əm ɓaw.” 11La “a ɓə əm kula tɨ a daa tɨ ndal nɨ əm ɗa̰y ɓə kura ɗɨb lo.”» 12Jesu duga gɨ ər: «Ndɨla maktub jaa cam ɓə: “Əm ɓə əm Baali tɨ Ndɨla sangni lo.”» 13Gorne Sidan mugla Jesu sangni gɨna, ər si ɓag na ər marway ɗa̰y jak.

Jesu ɗo ər cida lɔ tɨ Galile

Mat 4.12; Mrk 1.14

14Ndɨla na Lal dwari sir Jesu hul la ər duga ər si tɨ nəgri sul tɨ Galile. Ər ndil cḛy tɨ lɔr nəgri sul ne gun. 15Ər ɓla gɨ bi mum dɨbla tɨ Juyb-a na li tɨ paa tina hul la bi gun teen ər la.

Bi tɨ Najarɛt kun Jesu

Mat 13.53; Mrk 6.1

16Jesu si tɨ Najarɛt, lɔr ne a o̰ ər tɨ nin. Ər wur tɨ Juyb-a na li tɨ paa tina hul na ɗa̰y tɨ saaw bɛ kuna ər cida mu tɨ kar. Ər o̰ tɨ ndal tɨ gɨ bi maktub edɨ. 17Gɨna a naa gɨ ər nebi Esay na maktub. Gorne ər ɓəgri gɨna, ər ten un tɨ ɓra ne a kya̰ tɨ nin ɓə:

18«Baali na Lal wo tɨ ən sul,

kəysul ər kay ən jak tɨ Jaa Ndinimani beel ɗula gɨ bi tɨ ndemni.

Ər toon ən ka ən ja jaa tuna bi tɨ dangay nɨm tɨ ndal sul la,

bi ji nina na duga un ləg la,

bi ton a kay mum luur tɨ a sul na wag tɨ pɛw hul la,

19tɨ gɨ bi gun ja jaa tuna an ne Baali ɓə gɨ a ɓari kar la.»

20Ər bini maktub la, ər naa gɨ wo tɨ cida kar, le ər duga ər ti tɨ lɔr. Bi gun ne wo tɨ Juyb-a na li tɨ paa tina hul ɗig ji tɨ ər sul. 21Gɨna ər ɗolɔ tɨ gɨ a ja: «Jaa ne yḭ laa tɨ maktub hul toni duga tɨ jaa kuri kakamle.» 22Bi gun jaa ja ndinimani tɨ ər sul. Jaa Ndinimani ne ər ja ɓɔr a ji nari la a ja ɓə: «Yir tɨ Josep na ɓa̰ lo a?» 23Jesu ja gɨ a: «Kuri, yḭ ɓə lɛm gɨ ən jaa lar ne ji ja: “Doktor, mam nen əm ndula.” La yḭ ɓə gɨ ən ja cam ɓə: “Yini laa mum gun ne ka paa tɨ Kapɛrnom, ndogle, əm ka nɨ ka ura ton pi tɨ əm lɔr hul le.”» 24La ər ja cam: «Kuri, ən ja gɨ i, ɗa̰y ɓudu wo ka nebi hormo̰ tɨ ər lɔr nəgri sul lo. 25La ən ja gɨ i tɨ bayri cam, na lula sul tɨ Eli maan, aa tɨ ndirimu dɨbla wo tɨ Israhel. Gorne ndɨla yo̰y lo na an tɨ tedi na pigɨ tɨ taar ndula ɗəng tɨba tɨ lorgɨ gun hul. 26Ne kaw, Ndɨla ton Eli tɨ wo ɓudu tɨ a daan ndɔ lo, lɛ tɨ ii tɨ ndirimu paa ne wo tɨ lɔr tɨ Sarepta, tɨ nəgri sul tɨ Sido̰ ndɔ. 27Na lula sul tɨ nebi Elise maan, bi tɨ yo dɨbla wo tɨ Israhel, ne kaw wo ɓudu tɨ a daan ne yo wag tɨ sul teni, lɛ Naama, wo tɨ Siri ngoy jo yo wag tɨ ər sul nɨ ər ndula ndeeri.» 28Gorne bi laa jaa ne gɨna, a ndɔ laar a lo gun tɨ Juyb-a na li tɨ paa tina hul. 29A o̰ ndal, a wag na Jesu na dwari tɨ lɔr bəgri marway a si na ər tɨ nan sul ne a kay lɔr lɔ tɨ nin, tɨ ər din loni. 30Lɛ ər wag tɨ a daan, ər si.

Wo ne jinsə yeri ər ji

Mrk 1.21

31Jesu si tɨ lɔr tɨ Kapɛrnom, tɨ nəgri sul tɨ Galile. Ər ɓla gɨ bi wa̰y na ɗa̰y tɨ saaw bɛ. 32Ər wa̰y tɨ ɓla ɓɔr bi ji nari, kəysul ər wa̰y ɓla na dwari ɗəng. 33Wo ne jinsə yeri ər sul paa ti wo tɨ Juyb-a na li tɨ paa tina hul ɗay. Ər ɗolɔ tɨ ngɔr kar na dwari ɓə: 34«Ay! Jesu tɨ Najarɛt, kəyjo əm taam tɨ i ndɔ a? Pay əm hina i yṵga a? Ən una əm ɓari: Yim tɨ wo ndeeri ne əm o̰ tɨ Ndɨla ndɔ!» 35Lɛ Jesu meer ər na gṵ sɨgra la ər ja gɨ ər: «Hoon əm mu la əm wag tɨ ɓər ne ndɔ!» Sidan loni ɓər tɨ bi daan la wag tɨ ər ndɔ bla gɨ ər ɓijim kar. 36Bi gun ɓɔr a ji la a ɓiri peer: «Kəy jaa jo ti kuna ne a? Ɓər ne ja jaa gɨ jinsə na gṵ sɨgra la dwari la, la a wag!» 37Jesu na ndil cḛy tɨ un gun tɨ lɔr nəgri sul ne.

Jesu nen bi tɨ mo̰y dɨbla

Mat 8.14; Mrk 1.29

38Jesu nɨm Juyb-a na li tɨ paa tina le ər si tɨ Simo̰ na gə̰y. Simo̰ na mo̰ tɨ ii tɨ mo̰y, ər ndula siila nari. Bi ɓiri Jesu ka ər ka gɨ ər wa̰y paa. 39Ər goni tɨ ər sul la ər meer ndula sila na gṵ sɨgra, ndula sila nɨm ər tɨ daamu. Ii o̰ ndal na lula sul ɗay ər ɗolɔ tɨ gɨ a cida kar. 40Na jeel mu, bi gun ne na mo̰y lɔ jak jak tɨ a maan, a hina na a tɨ Jesu ndɔ. Ər kay ər daa tɨ jakaw sul la, ər nen a la. 41Lal ɓijim wag tɨ bi dɨbla ndɔ na ngɔr tɨ a mu la a ja ɓə: «Yim tɨ Ndɨla ɓa̰!» Lɛ Jesu meer a na gṵ sɨgra la ər kway gɨ a un tɨ jaa ja, kəysul a una ɓə yḭr tɨ Krist, wo ne Ndɨla ɛr ər.

Jesu ja Ndɨla jaa tɨ Juyb-a na li tɨ paa tina hul.

Mrk 1.35

42Gorne un ndoy gɨna, Jesu wag tɨ gə̰y ər si tɨ tap hul. Bi jab ər la, gorne a ten ər gɨna, a taam ər par tɨ gor nɨ ər ka saal ɓag lo. 43Lɛ Jesu ja gɨ a: «Ən ɓə Jaa Ndinimani tuna Ndɨla waan sul ɗula gɨ lwərgɨ nii tapeer la, kəysul nejo tɨ wa̰y ne Ndɨla toon na ən.» 44La ər ja Ndɨla jaa tɨ Juyb-a na ləgɨ tɨ paa tina gun ne wo tɨ lɔr nəgri sul tɨ Jude.

Currently Selected:

Luk 4: nie

Highlight

Copy