Luk 3

Ja̰ batis na beel ɗula

Mat 3.1

1Na an dɔkɔmɛ kar mi mani ne wa̰ay ɗəng Tibɛr twi na waan, Po̰s Pilat tɨ guberno̰ tɨ lɔr nəgri sul tɨ Jude, Erod twi waan tɨ lɔr nəgri sul tɨ Galile la ər ɓun Pilip wo tɨ lɔr nəgri sul tɨ Iture la Trakonit sul la, Lisyana wo tɨ Abilen sul la. 2Na ɗa̰y ne, Hana a na Kayip a tɨ woom nii tɨ bi tɨ hima ɓina. Ja̰, Jakariya na ɓa̰ Ndɨla jaa gɨ ər jaa tɨ tap hul. 3Ja̰ ɗolɔ tɨ saal tɨ lwərgɨ gun ne yeri larɨm tɨ Jurdḛ sul. Ər ja gɨ bi ɓə: «Yḭ nɨm i ɓijim, i ka batɛm, la Ndɨla hul ɓə ɗina tɨ i ɓijim sul.»

4Kuna a kya̰ toni tɨ nebi Esay maktub hul ɓə:

«Wo gṵ cḛy tɨ tap hul ɓə:

Yḭ kaaw Baali ul ɓḭ ka a lor tugla!

5Yḭ ɓə wol gun ɗɔri la,

Yḭ ɓə nan a na ɗingni sul jir ɓə lɛmgɨ,

Ul gong ɓə duga tɨm tugla la,

Yḭ ɓə ul ne ndini lo kaaw la,

6bi gun ɓə Ndɨla na nina ləg la.»#3.6 Esa 40.3-5

7Bi dɨbla hina tɨ Ja̰ ndɔ ka ər ka gɨ a batɛm. Ər ja gɨ a: «Yḭ ngɔl kaa kur! Ja jo ɓla gɨ i ul mu tɨ Ndɨla na hul laa ne wo hina yal a? 8Ndini ne i mum tɨ kar si ɓudu na i hul kula. Lɛ yḭ ka ilgɨ tɨ i hul tɨ ja ɓə: “Yini tɨ Abraham ɓimi lo”, kəysul ən ja gɨ i tɨ bayri, Ndɨla lɛm kura ne yɛr Abraham na ɓimi. 9Kɔl tɨ ndog tɨ teri ndeem tini. A ɓə tɨla tɨ lay ne toy ji ndinimani lo jani ɗoli tɨ laa.» 10La bi ɓiri ər: «kəyjo yini ɓə kar a?» 11Ər duga gɨ a: «Wo ne na ngɔmi tɨ ndidi ɓə ɓudu naa gɨ wo ne maan teni la wo ne na wa̰y tudi ɓə gɨ wo ne na lo naa la.» 12Bi tɨ lambo tay tapeer hina tɨ batɛm kar la a ɓiri Ja̰ ɓə: «Wo tɨ wa̰y ɓla, kəyjo yini ɓə kar a?» 13Ər duga gɨ a: «Ka wa̰y jak ɓiri gɨ wo tɨ paa sul lo.» 14Eli-a kaw a ɓiri ər: «Lɛ yini, kəyjo i ɓə kar a?» Ər ja gɨ a: «Ka pɛw kar gɨ wo tɨ ər gursu kula lo la, yḭ ka jaa ɓura kay tɨ wo sul lo la. Yḭ kay i ho̰ni tɨ i wa̰y tɨ tina sul ngoy.»

15Kuna tɨ lula sul ne bi wo tɨ mesi a̰y, a ɓiri a ndɔ tuna Ja̰ sul, pay yḭr tɨ Krist wo ne Ndɨla ɛr lo a? 16Ja̰ duga gɨ a gun: «Yin, ən ka gɨ i batɛm na ndu, lɛ wo tɨ dwari ɗəng ne ura ən ɓə hina. Ən dwari lɛm ər kungu#3.16 Tom 13.25 suwal cigri lo. Yḭr, ər ɓə i batɛm kar na Lal ɓari la na laa la. 17Ər naa guṵ tɨ ər daa tɨ ya yeem la ər ɓə ər ya ji bɛ tɨ dawlu hul la. Ər ɓə ya ji to bɛ tɨ dawlu hul la, ər ɓə ya yungni tuglu la.»

18Ja̰ peer bi na jaa lɔ jak jak dɨbla. Nejo ər ɗo gɨ bi Jaa Ndinimani beel la. 19Ja̰ meer Erod, waa̰y tɨ nəgri sul tɨ Galile, tuna Erodyad ər ɓun na ii ne ər jul la, ər mum ɓijim gun tɨ kar lɔ jak jak sul la. 20Erod ka ɓijim tɨ paa sul cam: Ər ɗo Ja̰ tɨ dangay.

Jesu na batɛm kar

Mat 3.13; Mrk 1.9

21Kuna bi gun hina tɨ Ja̰ ndɔ tɨ batɛm kar gɨna, Jesu kaw hina ka batɛm la. Gorne ər wo Ndɨla soon gɨna, ndɨla sul təng 22la Ndɨla na Lal jir tɨ ər sul na ndula ya̰m, kuna gugoli no̰. La wo na gṵ cḛy tɨ ndɨla sul pi ɓə: «Yim tɨ ən ɓa̰, ne ən ka əm kum nari, ən ndula laar ən nari tɨ əm sul.»

Jesu na kalɔ

Mat 1.1

23Jesu ɗolɔ tɨ Ndɨla cida kar gorne ər an lɛm dugmɨta. Bi ilgɨ ɓə yḭr tɨ Josep ne tɨ Eli na ɓa̰ jo toy ər. 24Eli ne tɨ Matat na ɓa̰, Matat tɨ Lebi na ɓa̰, Libi tɨ Melki na ɓa̰, Melki tɨ Janay na ɓa̰, Janay tɨ Josep na ɓa̰, 25Josep tɨ Matatiyas na ɓa̰, Matatiyas tɨ Amos na ɓa̰, Amos tɨ Nahum na ɓa̰, Nahum tɨ Esli na ɓa̰, Esli tɨ Nagay na ɓa̰, 26Nagay tɨ Maat na ɓa̰, Maat tɨ Matatiyas na ɓa̰, Matatiyas tɨ Semehin na ɓa̰, Semehin tɨ Josep na ɓa̰, Josep tɨ Yoda na ɓa̰, 27Yoda tɨ Yohana na ɓa̰, Yohana tɨ Resa na ɓa̰, Resa tɨ Jorobabɛl na ɓa̰, Jorobabɛl tɨ Salatyel na ɓa̰, Salatyel tɨ Neri na ɓa̰, 28Neri tɨ Melki na ɓa̰, Melki tɨ Adi na ɓa̰, Adi tɨ Kosam na ɓa̰, Kosam tɨ Elmadam na ɓa̰, Elmadam tɨ Er na ɓa̰, 29Er tɨ Jesu na ɓa̰, Jesu tɨ Eliyesɛr na ɓa̰, Eliyesɛr tɨ Yorim na ɓa̰, Jorim tɨ Matat na ɓa̰, Matat tɨ Lebi na ɓa̰, 30Lebi tɨ Simeho̰ na ɓa̰, Simeho̰ tɨ Juda na ɓa̰, Juda tɨ Josep na ɓa̰, Josep tɨ Jonam na ɓa̰, Jonam tɨ Eliyakim na ɓa̰, 31Elyakim tɨ Meleya na ɓa̰, Melya tɨ Mena na ɓa̰, Mena tɨ Matata na ɓa̰, Matata tɨ Nata̰ na ɓa̰, Nata̰ tɨ Dabid na ɓa̰, 32Dabid tɨ Jese na ɓa̰, Jese tɨ Obed na ɓa̰, Obed tɨ Boos na ɓa̰, Boos tɨ Sala na ɓa̰, Sala tɨ Naason na ɓa̰, 33Naason tɨ Aminadab na ɓa̰, Aminadab tɨ Admin na ɓa̰, Admin tɨ Arni na ɓa̰, Arni tɨ Esrom na ɓa̰, Esrom tɨ pares na ɓa̰, Peres tɨ Juda na ɓa̰, 34Juda tɨ Jakob na ɓa̰, Jacob tɨ Isak na ɓa̰, Isak tɨ Abraham na ɓa̰, Abraham tɨ Tera na ɓa̰, Tera tɨ Nakɔr na ɓa̰ 35Nakɔr tɨ Serug na ɓa̰, Serug tɨ Rehu na ɓa̰, Rehu tɨ Peleg na ɓa̰, Peleg tɨ Eber na ɓa̰, Eber tɨ Sala na ɓa̰, 36Sala tɨ Kayna na ɓa̰, Kayna tɨ Arpakad, Arpakad tɨ Sɛm na ɓa̰, Sɛm tɨ Nowe na ɓa̰, Nowe tɨ Lemek na ɓa̰, 37Lemek tɨ Metusala na ɓa̰, Metusala tɨ Enok na ɓa̰, Enok tɨ Jered na ɓa̰, Jered tɨ Malaleyel na ɓa̰, Malaleyel tɨ Kena na ɓa̰, 38Kene tɨ Enos na ɓa̰, Enos tɨ Set na ɓa̰, Set tɨ Adam na ɓa̰, tɨ Ndɨla na ɓa̰.

Currently Selected:

Luk 3: nie

Highlight

Copy