Ruum 8

Kowiawan wagu kinuasa nu Atod

nu Kinoringan

1Indadi kosiono, dai yo sono ukumon nu Kinoringan ongo lobuw iri nokopuido yo so si Yisus Kristus, 2so' pagka kinuasa toko yo nu Atod nu Kinoringan, kikowiawan wagu toko kopuido so Iyo. Iya nu kinuasa toko Niyo, dai yo sono kinuasa toko nu koraayan, iri kopongowit so toko so kopotoyan orawu' so Kinoringan musingkolaid. 3Iri yo po Ukum ni Musa dai ya kopongingkoyod so toko momaal nu koraayan so' dai toko kogoos mongowaid nu ono, nga Kinoringan-o su koponabang so toko. Sinuu' yo Niyo Anak Niyo, si Yisus, sumiliw nu lobuw bana. Suat so si Yisus, kikoyuwan Iyo soko toko lobuw kikoraayan tayon ong kolalag Iyo nu ponginsaadan nu Kinoringan suat so koraayan toko. 4Winaal nu Kinoringan soko ono, tayon ong otuman toko kiawi' pinonuu'an Niyo so Ukum oono maid nu ponobangan nu Atod nu Kinoringan, om okon ko maid nu koinginan nu lobuw. 5Isai kinuasa nu koinginan niyo oraai, dai kopomikir nu onu yo po sondiang ko koinginan niyo oraai oono. Nga isai yo po kuosaan nu Atod nu Kinoringan, pomikiran niyo no suat-a so koinginan nu Atod nu Kinoringan. 6Bang kuosaan nu koinginan oraai pomikiran nu lobuw, oinsaadan iyo nu matoi orawu' so Kinoringan musingkolaid. Nga bang Atod nu Kinoringan su mogkuasa so iyo, momikir iyo suat so koinginan nu Atod nu Kinoringan, om miau iyo musingkolaid maid so Kinoringan om osanang inawo niyo. 7Isai kipikiran kinuasa nu koinginan oraai, alod-alod nu Kinoringan, so' dai iyo mongowaid nu ponuu'an nu Kinoringan om dai nai' iyo kopongowaid nu ono. 8Isai kinuasa nu koinginan oraai, dai koponginsanang nu inawo nu Kinoringan.

9Nga toko yo po dai yo sono kinuasa nu koinginan oraai so' nokoido toko yo so Atod nu Kinoringan om kinuasa toko Niyo. Nga isai yo po dai kinuasa nu Atod nu Kinoringan, okon ko songapan ni Kristus. 10Nga bang mido-ido si Kristus so kou, pudi pona minatoi kou yo so koraayan muyu, kakal po kikowiawan wagu kou nitaak nu Atod nu Kinoringan#8:10: kikowiawan wagu kou nitaak nu Atod nu Kinoringan; intawa: miau-a atod muyu. so' nokopuwarong kou yo so Kinoringan. 11Bang mido-ido so kou Atod nu Kinoringan, iri minongoluli' so si Kristus kiat so pinotoyan, soko ono ya pudi koyuwan muyu nu matoi-o, wiawon-a Niyo.#1 Kur 3:16

12Oo su kosulodan ku, oogot sobana nu mongowaid toko yo sono nu koinginan nu Kinoringan om dai yo mokiuripon nu koinginan oraai so kowiawan toko. 13So' bang mongowaid toko nu koinginan oraai so kowiawan toko, oinsaadan toko nu matoi orawu' so Kinoringan musingkolaid. Nga, bang mulaiw toko kiat so gogoma'on toko oraai maid nu ponobangan nu Atod nu Kinoringan, taakan toko sono nu kowiawan musingkolaid maid so Iyo. 14Isai tundanon nu Atod nu Kinoringan om mongowaid nu kiawi' koinginan Niyo, inonakan sono nu Kinoringan. 15So' iri yo po Atod nu Kinoringan nitaak Niyo so toko, dai ya monguripon so toko nu lumaa' so Iyo. Ala' nai' inurug toko Niyo nu inonakan nu Kinoringan, om maid nu ponobangan nu Atod Niyo, koputangar toko sono so Iyo nu, “Oo su Amo ku,” koo.#Mrk 14:36; Gal 4:6 16Atod-o nu Kinoringan su poorati so inawo toko nu inonakan toko yo sono nu Kinoringan. 17Om pagka inonakan toko Niyo, kotorima' toko nu koworongan nijanji Niyo. Om okon ko ono ya, onu yo po nitaak Niyo so si Kristus, nga nitaak-a so toko, so' bang osonsara' toko nu kosiono tu soko koosonsara' ni Kristus nu laid po so wonuo tu, kowaid toko ya so Iyo orumaton ong wagu.#Gal 4:5-7

Kobontugan so toko ong wagu

18Mongowaid nu pomikiran ku, oworos sobana koogutan so wonuo tu ong popuinongon nu kobontugan itaak so toko ong wagu. 19Kiawi' winaal so wonuo tu mimat-imat nu iya pointolangan nu Kinoringan nu inonakan Niyo. 20So' kiawi' pinuwaal so wonuo tu rumobuk-a om ado kosudaan sono. Okon-a ko koinginan nu pinuwaal oono kondiri nu rumobuk, nga ono yo su notantu nu Kinoringan. Soko ono pona, kiorapan-a nosiro ong wagu.#Pgn 3:17-19 21Iya oono, pindaan sono nu Kinoringan nu dai rumaag onu-onu ya so wonuo. Soko ono ya pudi inonakan nu Kinoringan, pindaan su' dai matoi om taakan Niyo nosiro nu koworongan om koorumatan maid so Iyo. 22Oilaan toko nu kiawi' piningwaalan songodoi-odoi osokitan, soko woinoi ingoton nu mokipupuanak-o, so' kiat nu gulu ri sampai kosiono tu, osonsara' sobana ongo piningwaalan oono mongimat nu poidu'on nosiro nu Kinoringan kiat so pongoraagan. 23Nga okon ko nosiro ya su mimat-imat, toko nga mimat-imat-a, iri nokotorima' yo nu Atod nu Kinoringan, ono yo ponondu'an nu kuwai po itaak so toko nu Kinoringan ong wagu. Mimat-imat toko nu ono so' moingin toko ong orumaton toko nu Kinoringan ong wagu, om urugon toko nu inonakan Niyo,#8:23: om urugon toko nu inonakan Niyo; tinu-tinu solinan dai nokosurat itu. om taakan toko Niyo nu koyuwan dai matoi.#2 Kur 5:2-4 24Inumarap toko nu ono, kiat nu nosopulan toko yo Niyo om nokopuwarong toko yo so Iyo. Nga bang osiou toko onu yo po orapon toko, okon-o ko orapan ono, so' d'ado yo umarap nu onu yo po nosiou-o niyo no. 25Nga bang umarap toko nu onu yo po dai toko po osiou, ototog toko mongimat nu ono.

26Kuwai po wokon gogoma'on nu Atod nu Kinoringan, ono yo pagka dai oilaan toko onu otoop indomoon ong mogdu'a toko, monabang Iyo su' oilaan toko sono. Atod oono yo su mindamo so Kinoringan suat so toko nu dai koimbosang ong ontob-a nu totongaron. 27Om Kinoringan ono kosondot mongoorati nu inawo toko, oorotian-a Niyo pomikiran nu Atod Niyo om onu yo po indomoon nu Atod oono suat so toko. Om indomoon oono, musuat so koinginan nu Kinoringan nu nitaak Niyo so toko.

28Oilaan toko nu Kinoringan-o su popuatag-atag nu onu yo po owarong intawa oraai, su' ourug nu koworongan nu lobuw osamod so Iyo, ono yo ongo lobuw pinili' Niyo musuat nu tomod Niyo. 29Lobuw pinili' yo Niyo kiat nu gulu ri nga pinotondiang-o Niyo ourug nu soko Anak Niyo, si Yisus, om soko ono yo osiliw si Yisus soko ongko nu kiawi' lobuw poimaid. 30Indadi suat so toko, iri pinili' yo Niyo ourug nu inonakan Niyo, pinaau-o Niyo su' poimaid toko so Iyo. Om okon ko ontob-a nu ono, nga nokopuwarong-a Iyo so toko, om kowaid toko sono so Iyo orumaton ong wagu.

Samod nu Kinoringan niintolang ni Yisus

31Pagka oilaan toko nu tobangon toko nu Kinoringan so kiawi' nololagan toko, d'ado yo sono kopongodoog so toko. 32Pagka nikoyuu ya nu Kinoringan Anak Niyo kondiri, om nikomouli' yo so ongo wowaidon nu potoyon suat so koworongan toko, oilaan toko nu tobangon toko ya Niyo so onu yo po. 33D'ado ido koponginsala' nu kakal po kikoraayan toko, lobuw nopili' yo nu Kinoringan, so' Iyo yo kondiri su minokimuwarong so toko. 34Om d'ado ido koputangar nu otoop ong ukumon toko, so' tobangon toko ni Yisus Kristus. Minatoi-o Iyo suat so toko nga noluli'an-a Iyo. Om kosiono tu maayo sobana pangkat Niyo so obi' nu Kinoringan, om kiat nai tobangon toko Niyo. 35Indadi d'ado ido kopongingkoyod nu Kinoringan pointolang nu osamod Iyo so toko pudi pona osuang kosusaan, soko likop, d'ado pokakas, insaadan toko nu lobuw, om potoyon toko. 36Soko nokosurat-o so Buuk nu Kinoringan nu,

“Pagka poimaid kai so Ikau,

dadan pokipopotoyan kai

nu alod-alod mai,

om poinsuwon kai

nu dumba gogorason,”

koo ri.#Lgu 44:22

37Nga pudi pona osuang kosusaan soko ono, dai toko ya lumaa', ala' nai' osudu'an toko om maid nu kuasa ni Kristus, komanang toko ya. Sobana ko osamod Iyo so toko. 38Oilaan ku nu d'ado onu-onu kopongingkoyod nu Kinoringan pointolang nu osamod Iyo so toko pudi ong matoi intawa miau, ongo susuu'on nu Kinoringan intawa komoinatan, ololagan nu kosiono tu intawa so sunduron tu, 39ololagan dilanggau intawa so diipak tu. D'ado ido nu piningwaalan oono kopongingkoyod nu Kinoringan pointolang nu osamod Iyo so toko, maid so si Yisus Kristus, Tuhan toko.

Currently Selected:

Ruum 8: TomPWPgLgPn

Highlight

Copy