Ruum 7

Oturan nu puontunan soko poinongan

1Oo su kosulodan ku, tantu koorati kou yo nu oturan so wonuo tu, om subai waidon toko ono musingkopatoi. Nga bang matoi toko yo, dai toko yo kopongowaid nu oturan oono. 2Soko oturan suat so woinoi. Bang kisawo yo iyo, dai yo iyo kowasa mokiontun nu kusoi sondiang ong miau po sawo niyo no. Nga bang minatoi-o sawo niyo no, kowasa nai' iyo mokiontun koimbagu om dai yo iyo insola'on nu lobuw. 3Nga bang miau po sawo niyo no, om mondot-o iyo nu kusoi sondiang, dai iyo mongowaid nu oturan so wonuo tu om pokosundalon sono, so' nokolapa' iyo so sawo niyo no. Nga bang matoi-o sawo niyo no, kolabus-o iyo kiat so oturan nu puontunan, om okon-o sono ko kolapa' po koingoranan pudi oontun iyo nu kusoi sondiang.

4Oo su kosulodan ku, soko ono ya pudi toko. Soko minatoi toko yo suat so Ukum ni Musa. Pagka soko ono, dai toko yo kopongowaid nu Ukum oono, so' nokopuido toko yo so si Kristus. Om kosiono, si Kristus-o, iri noluli'an kiat so pinotoyan-i su mogkuasa so toko, om koompusan nu kinopotoyan Niyo ri, kopugogoma'on toko sono nu onu yo po koinginan nu Kinoringan. 5Gulu ri, laid nu nokuasa toko po nu koinginan toko, minomaal toko nu pomogosan nu Ukum oono, om norurudan sono nu Ukum oono koinginan toko momaal nu oraai, ono yo su mogkuasa so toko. Koompusan-o po nu gogoma'on toko oono nga sundur so kopotoyan orawu' so Kinoringan musingkolaid. 6Nga kosiono pagka nopoimaid toko yo so si Yisus Kristus, nilabus toko yo nu Kinoringan kiat so pogkuosaan nu Ukum oono. Gama' toko sono kopuwarong so Kinoringan okon-o ko mongowaid nu Ukum, so' pagka minatoi-o si Yisus, toko nga soko minatoi-a, om nilabus toko kiat so ponguriponan momaal nu koraayan. Kosiono gama' wagu toko mugogoma'on suat so Kinoringan, ono yo maid nu ponobangan nu Atod nu Kinoringan, om okon ko soko gama' gulu ri nu subai mongowaid nu Ukum nisurat-i.

Ukum ni Musa om koraayan

7Indadi kuwai sono gaam lobuw monokod nu Ukum oono yo su inimpuunon nu gogoma'on oraai. Dai obana ono, so' dai po nokotaak Ukum oono, kuwai yo gogoma'on oraai. Nga kiat so Ukum oono, oilaan toko ong onu kuanon nu koraayan oono. Bang d'ado pomogosan nu Ukum nu, “Adang moinsolon nu gonggamon nu lobuw wokon,” koo, dai ku ya oilaan nu moinsolon oono oraai.#Kin 20:17; Pom 5:21 8Kuwai koraayan tuui so aku, om pagka notudukan aku nu Ukum onu orati nu sumolon, rumuang-o sono koinginan ku sumolon om rumuang po koraayan ku. So' bang ado Ukum momogos so toko, dai toko ya oilaan ong onu orati nu koraayan-o. 9Togna ri dai ku oilaan ong onu orati nu Ukum ni Musa, om iya oono soko d'ado koraayan ku. Nga pagka notudukan aku nu Ukum, oorotian ku sono nu oraai kogoyaan ku, om oilaan ku nu matoi koompusan ku orawu' so Kinoringan musingkolaid. 10Tomod-o po nu Ukum nitaak nu Kinoringan oono nga monaak so lobuw nu kowiawan musingkolaid ong waidon toko Ukum oono. Nga pagka dai aku mongowaid nu ono, koompusan, ourug sono Ukum ono nu impuunon nu ponginsaadan so aku. 11Soko noburunsutan aku nu koinginan oraai, so' onu yo po nipogos nu Ukum-o, oilaan ku sono nu ukumon aku nu matoi orawu' so Kinoringan musingkolaid.#Pgn 3:13

12Ukum-o po oono nga kiat so Kinoringan, om kiawi' ponuu'an so Ukum oono nga kiat-a so Kinoringan. Indadi, Ukum oono musuat-a om owarong-a. 13Bang soko ono, okon-a ko iri Ukum ni Musa nu owarong su kopatoi so aku, nga ono yo koinginan ku momaal nu koraayan-o su kopatoi so aku. Nga pinakai nu koraayan Ukum ni Musa owarong oono poian so aku so kopotoyan, su' kointolang sobana kogoyaan nu koraayan oono. Om iri yo ponuu'an so Ukum oono su poilo so aku nu sobana ko oraai kogoyaan oono.

Duo kogoyaan mulawan

so inawo nu lobuw

14Oilaan toko yo nu owarong Ukum oono, so' nitaak nu Atod nu Kinoringan. Nga aku yo po lobuw-a, mongowaid nu koinginan nu koyuwan ku kondiri, om soko uripon aku sono nu koraayan. 15Aku kondiri dai koorati nu kogoyaan ku, so' moingin aku momaal nu owarong, ono yo su dai ku waalon. Nga ono koraayan sobana ko dai ku koinginan murogama' no, ono nai' su ogama' ku.#Gal 5:17 16Indadi, bang goma'on ku onu yo po oraai, ono dai ku koinginan-o, koorotian tumaayun aku nu Ukum ni Musa oono owarong. 17Bang obana ono, okon-o ko aku su momaal nu koraayan oono, nga koinginan oraai mogkuasa so kowiawan ku su popomaal so aku nu koraayan oono. 18Oilaan ku nu bang mongowaid nu kogoyaan nu lobuw-a, d'ado onu-onu owarong tuui so aku, so' pudi pona mokipopomaal aku nu owarong, dai aku ya kopomaal. 19Dai aku momaal nu owarong, ono koinginan ku no, nga oraai nai' su waalon ku, ono dai ku koinginan-o. 20Om bang waalon ku onu yo po dai ku koinginan momaal-o, okon-o ko aku su momaal nu ono, nga ono koraayan mogkuasa so aku no.

21Om koompusan-o po nu ono, soko kuwai ido ukum koopotan so pomikiran ku, ono yo bang moingin aku momaal nu owarong, ono nai' oraai-o su owaal ku. 22Bang so inawo ku po mokipopongowaid aku sobana nu koinginan nu Kinoringan, 23nga kinuasa aku nu ukum wokon om koinginan oraai so kowiawan ku lumawan nu ukum so inawo ku, iri owarong waidon kosoromaan ku ri. Ono yo ko' soko nokogosan aku nu ukum nu koraayan mogkuasa nu koyuwan ku tu. 24-25Indadi, soko itu yo kogoyaan ku, ono yo inawo ku no su mongowaid nu ukum nu Kinoringan, nga kogoyaan nu koyuwan ku no nokuasa nu koraayan. Atuuk! Sobana ko aagut aku! Isai yo ka su moingin monapul so aku kiat so koinginan oraai so koyuwan ku tu, ono mongowit so aku so ukuman nu matoi orawu' so Kinoringan musingkolaid?

Nga mongunsopot aku so Kinoringan so' sinopulan aku Niyo nu si Yisus Kristus su pinonapul!

Currently Selected:

Ruum 7: TomPWPgLgPn

Highlight

Copy