Ruum 6

Miau toko mido so si Kristus

1Bang soko ono, mutangar gaam lobuw nu, “Pagka moingin Kinoringan pointolang nu koworongan Niyo so lobuw kikoraayan, owarong ong sumundur toko ya momaal nu koraayan su' rumuang po koworongan Niyo so toko,” koo. 2Osala' sobana ong momikir kou soko ono, so' pagka nopoimaid toko yo om soko minatoi suat so koraayan, dai toko yo kosundur momaal nu koraayan. 3Tantu oilaan muyu nu iya nodiu' toko, pinopuido toko nu Kinoringan so si Yisus Kristus, om soko nokowaid toko so Iyo matoi. 4So' iya nodiu' toko, soko nokowaid toko so si Kristus matoi, om nokowaid toko so Iyo nokolobong. Om iya nu pinongoluli'an nu Kinoringan so si Kristus sampai kikowiawan wagu Iyo, toko nga kowaid-a so Iyo miau maid nu kogoyaan wagu.#Kul 2:12

5Pagka soko nokowaid toko so Iyo matoi, kowaid toko ya so Iyo miau. 6Om oorotian toko yo nu iri yo po kogoyaan toko laid-i, soko nokosalib-o maid so si Kristus su' oidu' kogoyaan toko oono. Om kogoyaan toko nu dadan momaal nu koraayan, noidu' yo sono om dai toko yo mokiuripon nu koraayan. 7So' ono yo po lobuw poimaid, minatoi-o maid so si Kristus, om dai yo sono okuasa nu koraayan. 8Indadi, pagka soko nokowaid toko so si Kristus matoi, oilaan toko nu kowaid toko ya so Iyo miau. 9So' oilaan toko nu noluli'an-o si Kristus nu Kinoringan, om dai yo sono Iyo matoi koimbagu. D'ado yo onu-onu kopomatoi so Iyo. 10Insan-a Iyo minatoi mongidu' nu koraayan, om d'ado yo sono kuasa nu koraayan so Iyo. Nga pagka noluli'an-o Iyo, miau sono Iyo poinsanang nu inawo nu Kinoringan. 11Indadi kou nga subai momikir nu soko minatoi kou yo suat so koraayan, nga miau kou maid so Kinoringan, so' nokopuido kou yo so si Yisus Kristus.

12Indadi, adang-o posimaidan koinginan oraai so koyuwan muyu no mogkuasa so kou. 13Adang toko yo nikomouli' kowiawan toko momaal nu koraayan, ala' nai' posimaidi toko ya Kinoringan mogkuasa nu koyuwan toko, so' ono yo su otoop so toko lobuw nokolabus-o kiat so kopotoyan om tinaakan-o nu kowiawan wagu. Om posimaidon-a Kinoringan momakai nu kowiawan toko su' owaal toko onu ya obana. 14Adang-o posimaidan koinginan nu oraai mogkuasa so kou, so' dai toko yo umarap nu Ukum ni Musa soko gulu ri, nga umarap-o sono nu koworongan om ponobangon nu Kinoringan.

Muripon mugogoma'on nu koinginan

nu Kinoringan

15Nga kuwai gaam monokod nu pagka dai toko yo oogot mongowaid nu Ukum, so' nopointolang-o Kinoringan nu koworongan Niyo so toko, kosundur toko momaal nu koraayan. Dai musuat ponokodan oono. 16Oilaan muyu nu, bang mokiuripon toko so isai yo po, nokuasa toko sono niyo. Soko ono ya pudi lobuw mokiuripon nu koinginan nu oraai. Ukumon iyo nu potoyon om orawu' so Kinoringan musingkolaid. Nga isai yo po mokiuripon so Kinoringan, kopuwarong Kinoringan so iyo. 17Gulu ri, minokiuripon kou nu koinginan muyu oraai, nga kosiono tu munsopot aku so Kinoringan so' mongowaid kou yo sono nu pontudukan obana, iri nituduk ku so kou ri. 18Nokolabus kou yo kiat so koraayan om uripon kou yo sono nu Kinoringan mugogoma'on nu obana. 19Mutangar aku momakai nu poinongan suat so ponguriponan, so' moingin aku ong oorotian muyu sobana pontudukan ku iitu. Gulu ri, sobana ko nikomouli' muyu kowiawan muyu soko uripon mugogoma'on nu osaim om oraai om osuang po kogoyaan oraai. Soko ono ya pudi kosiono tu, subai nikomouli' muyu kowiawan muyu soko uripon nu Kinoringan mugogoma'on nu obana.

20Laid nu uripon kou po nu koinginan oraai, sobana ko dai kou moingin momaal nu onu-onu ya obana. 21D'ado onu-onu owarong naalap muyu nu gogoma'on muyu oraai nu gulu ri, om koiyu'-iyu' so kou nu kosiono tu. Koompusan-o po nu gogoma'on muyu iiri nga kopotoyan korawu' so Kinoringan musingkolaid. 22Nga kosiono nilabus toko yo nu Kinoringan kiat so koinginan oraai om uripon toko yo sono Niyo. Om ono yo su kountungan maayo so toko, so' kopongowaid toko sono nu koinginan Niyo om koompusan nu ono, taakan toko nu kowiawan musingkolaid. 23Bang kuwai lobuw pokomouli' nu kowiawan niyo sampai kuosaan iyo nu oraai, koompusan kopotoyan orawu' so Kinoringan musingkolaid. Nga ong lobuw poimaid so si Yisus Kristus, Tuhan toko, taakan nu Kinoringan nu kowiawan musingkolaid maid so Iyo.

Currently Selected:

Ruum 6: TomPWPgLgPn

Highlight

Copy